MAK 14

A Nda Ushaura maa a 'Imɛ Jisus

(Mat 26:1-5; Luk 22:1,2; Jon 11:45-53)

1Tɛ ɛ hiɛŋ Isene Tɛkashɛka keeni Isene iyimɛyɛ nɛ zasa Ifucingɛ vwɛ waŋnabeyiko. Ibɛ po ehiu onongbo ne Embisegeni Undwa, a jalakaka gana na maa a 'imɛ Jisus ni inswɛ maa a kwụnɛ bụ.#Ụban 12:1-27 2Ama ɛ hiɛŋ, Kede i shɛ na aka Isene ɛtɛ i Tɛkashɛka o, iwɛ aka na atwamwa zhɛ na nda rundu.

Biyikwo bu Ko Dudugeni Jisus Manɛbɛ ni Bɛtani

(Mat 26:6-13; Jon 12:1-8)

3Aka na ti ge Jisus namɛ ni Bɛtani nu umwono Saimon ata ba gwuma ụngwụ-uwaŋna. Ge Jisus jɛjɛ baa ya iyimɛyɛ. Biyikwo bu ko 'waŋnɛ manɛbɛ mụ ụhiụŋ mu na aa njɛ ni iyi nɛ ɛɛ hiɛŋ unadu tugom ni ikeke ike nɛ ɛɛ hiɛŋ alabasta, manɛbɛ ma ata kaa mi zhanjɛ tebiye. Biyikwo ata bweji iŋ bee dudugeni mu Jisus nu uhiuhiu.#Luk 7:37,38 4Ama atwa oko namba apata yaa gwumanɛ, ɛɛ hiɛŋ, Iwembe po aa njɛ manɛbɛ mu ga mụ ụhiụŋ ufwu gadagaa? 5E ge eri a sanga manɛbɛ mu ga uhwuri apamu umpwa, maa e peni okofwo. Ibɛ po shɛmɛ sha aba shɛ hashɛganụ ne biyikwo ata.

6Ama ge Jisus jishijɛ aŋ, bɛɛ hiɛŋ, Ganga bu ma. Iwembe po ahia dumangana bụ n-ndumwa mụ wɛɛ? Bu n ndwanua ugondu ubiye. 7Okofwo zhɛ a nama ne hiŋ aka elele, aka elele yaa hiɛ kwụlanɛ hi eri hia nda aŋ uwebiye, ama N zha shɛ ma nama ne hiŋ aka elele o.#Undwa 15:11 8Bu nduwa iyi nɛ bee eri tɛnda. Bu dudugeni tu'waba ti mi manɛbɛ mu ga mụ ụhiụŋ ubiye maa imanga tụ iwɛ ụjita tuno ti mi.#Jon 19:40 9Iwɛ-tɛkana Omo hi mbiso maa, ofwo elele na aa ananga hwuŋ Anabarɛ Ebiye nu unyizo kpaaŋ, ɛ zhɛ a dumanana iyi nɛ biyikwo ga njɛ iwɛ maa e ne teyinje bu.

Ga Judas Leni maa Sanga Jisus ne Tidere

(Mat 26:14-16; Luk 22:3-6)

10Nazhɛ go Judas Iskariot na shɛ bụtụ bu ko na ashashɛ eseshi-iyi umpwa-na-ba-eyebi zhe no ofwo ehiu onongbo iwɛ maa sangana aŋ Jisus ne tidere. 11Aka na te ehiu ata onongbo hwụjɛ iŋ, aa njɛ unyasa, ibɛ po ee shileni bu unu maa ɛ zhɛ a pana bụ ukwuribi. Nazhɛ baa jalakaka ya ohwolu maa sangana bu aŋ ne tidere.

Ge Jisus Yɛ Iyimɛyɛ Tɛkashɛka ne Eseshi-iyi Ubwa

(Mat 26:17-25; Luk 22:7-14,21-23; Jon 13:21-30)

12Aka na tụ ụjita na maa e kwuni Iyimɛyɛ uzawa Ifucingɛ tiya u ci, aka na ta a kwụnɛ iyi ụrụpɛ Isene Tɛkashɛka. Nazhɛ eseshi-iyi Jisus heŋteni bu, ɛɛ hiɛŋ, Cee ubu kwụlanɛ maa ta zha ta bu imangana iyimɛyɛ Tɛkashɛka nɛ ɛbi zhɛ ba yaa?

13Na aka ata ge Jisus tumwanɛ eseshi-iyi ubwa eyebi utumwa, bɛɛ hiɛŋ aŋ, Zhaga ma nụ ụshɛpwụ ga, hi zhɛ hia twa ne butubwenyi bu ko na 'waŋnɛ ihiulwe meni. 14'Wa bu ma no ofwo elele na bee teni, maa hi heŋteni agwuma-ihwɛ ɛtɛ maa, Bimbisegeni hiɛŋ, Cee umwono wa agaiŋ namɛ maa ma ya iyimɛyɛ Tɛkashɛka ne eseshi-iyi mii? 15Nazhɛ bụtụ ata zhɛ mo hi mbisono umwono wa azuba na gembi, na iyi ya ajɛjɛ tulonowoŋ, unaa na kaa du aa imwangwa i'wɛŋnɛ. Apata ɛhi zhɛ hi ma ti imangana iyimɛyɛ ɛtɛ Tɛkashɛka.

16Ibɛ po eseshi-iyi ubwa beni ga ee zhe nụ ụshɛpwụ, ee jiteni ga iyi gana na ti ge Jisus ge mbishi aŋ. Apata aa imanganɛ aŋ iyimɛyɛ Tɛkashɛka.

17Aka na tụ ụrụmɛ shɛ, ge Jisus zhe apata ne eseshi-iyi ubwa umpwa-na-ba-eyebi. 18Aka na ta a jɛjɛ aa ya iyimɛyɛ, ge Jisus hiɛŋ aŋ, Iwɛ-tɛkana Omo hi mbiso maa, bụtụ bu ko namba na ashashɛ hiŋ na zhɛ ma n sangana atwa ne tidere, ubwa shɛ bụtụ na ba ya iyimɛyɛ ne mi.#Shɛzu 41:9

19Ibɛ po shɛmɛ sha aba shi kwuni tuhashɛganụ, ee heŋteni bu atwa oko oko, ɛɛ hiɛŋ, Gamba suu? Bụtụ ye bɛ hiɛŋ, Gamba suu?

20Nazhɛ ge Jisus jishijɛ aŋ, bɛɛ hiɛŋ, Bụtụ bu ko na ashashɛ eseshi-iyi umpwa-na-ba-eyebi na ba kalanga u'ala ne mi ni ikwede. 21Yɛu Bụtụ zhɛ ya zhaga tilɛɛ gana na to o 'nyotwo iwɛ ubwa. Ama bụtụ ata na zhɛ ba sangana atwa Yɛu Bụtụ ne tidere, bi zhɛ ba nda hwuŋ adangboo! I gɛ zhɛ ya zhɛmana bụtụ ata ta atwa ubwa ge meci shi bu.

Iyimɛyɛ Ụrụmɛ nɛ ge Jisus Peni Eseshi-iyi Ubwa

(Mat 26:26-30; Luk 22:15-20; 1 Kor 11:23-25)

22Aka na ta a jɛjɛ aa ya iyimɛyɛ, ge Jisus shepi ibrɛd, baa tabwa Agwatana maa pana iŋ uwebiye, boo dwonu iŋ, bee peni eseshi-iyi ubwa, bɛɛ hiɛŋ aŋ, M ma ma, inɛ gɛ shɛ tu'waba ti mi.#Luk 24:30

23Nazhɛ bee shepi ukwopi baa njɛ ugwoje na Agwatana, bee peni aŋ; ee swe kpaaŋ aba.#1 Kor 10:16 24Ge Jisus hiɛŋ aŋ, Inɛ gɛ shɛ mehieŋ mi mi mu Unu-tutwa,#14:24 mehieŋ mi mi mu Unu-tutwa: Tɛjɛshɛrɛga tu ko ti hiɛŋ, mehieŋ mi mi mu Unu Ufwo Tutwa. mu na mụ fwụnjɛ iwɛ ya atwa ofwugwo. #Ụban 24:8; Jɛrɛ 31:31-34; Ehib 9:20 25Iwɛ-tɛkana Omo hi mbiso maa, N zha shɛ ma swa ya meni mu ga mụ tụ'walụ ta afwafwa uuwa i ci ụjita na Ngɛɛ zhɛ ma swa mu na mu ufwo na Cɛnjɛ-ta-tugwama ta Agwatana o. 26Aka na ta a zụnjɛ azunga, ee beni ee zhe ni Ishɛmɛ Buta.

Ge Jisus Hiɛŋ ga Pita Zhɛ ba Tala Ashamanjɛ maa bu Mepi Shi bu o

(Mat 26:31-35; Luk 22:31-34; Jon 13:36-38)

27Ge Jisus hiɛŋ aŋ, ɛ zhɛ ma hi nda ukwurishi kpaaŋ hiŋ iwe mi. Iwɛnɛ to o 'nywotwo, ɛɛ hiɛŋ, N zhɛ mo dubo bi'iywa-ba-agwụdụ, nazhɛ agwụdụ zhɛ a garatgwụ.#Izik 13:7; Jon 16:32 28Ama na aba na tɛ ɛ n hicinjɛ, N zhɛ mo hi hwulono maa ma zha na cɛnjɛ tu Galili.#Mat 28:16; Mak 16:7

29Ama ga Pita hiɛŋ Jisus, Okwo ɛɛ zhɛ a nda atwa vwɛ ukwurishi iwɛ bụ, a zha shɛ ma n nda ukwurishi iwɛ bụ kwukwuŋ.

30Ge Jisus hiɛŋ Pita, Iwɛ-tɛkana Ngɛɛ zhɛ mo bu mbiso maa, Alụma zha shɛ a ugana hwayɛ kpalụ yebi, tɛ ɛbi zhɛ ba tala ashamanjɛ mi kpalụ tatụ maa bu m mepi shi o.#Mak 14:66-72; Jon 13:36-38; 18:17,18,25-27

31Ama ga Pita jɛmɛ n-ndumwa ni ikɛnyi, bɛɛ hiɛŋ, Okwo yaa shɛ tilɛɛ maa Mo 'wo na bụ, N zha shɛ ma tala ashamanjɛ maa M bu mepi shi o. Gobwonu du atwa vwɛ dumanjɛ ya kpaaŋ aba.

Ge Jisus Njɛ Adua ni Itimɛ Gɛsɛmani

(Mat 26:36-46; Luk 22:39-46)

32Ee zhe no ofwo oko na ɛɛ hiɛŋ izeci ya aba, Gɛsɛmani, apata ge Jisus hiɛŋ eseshi-iyi ubwa, Gɛga ma epe tugwo, maa Ma zha ma nda adua. 33Bee shepi Pita, ne Jemis keeni Jon, aa sanɛ nu bwa. Igɛhi kwuni bu ti'ima, ụbaụta sepi bu duwa. 34Bɛɛ hiɛŋ aŋ, Amɛ mi hashɛganụ duwa, okwo tutu i ci tu'wo. Nama ma epe maa hi n 'yaka.#14:34 hi n 'yaka: Kwo kaa to woto ma malabụ o. #Jon 12:27

35Bee keeni izhɛ fwalaa, bee leyi na cɛnjɛ, baa njɛ adua, maa yaa shɛ yee ge deuri maa ga aka ata keshici bu. 36Baa njɛ adua, bɛɛ hiɛŋ, Ada#14:36 Ada: Tɛjɛshɛrɛga tu ko ti hiɛŋ, Aba, nɛ i shɛ nu unu Ru'aramaik. Egini ibɛ i shɛ Ada, kwo kaa Bishi mi. (Kwụba Rom 8:15). iyi elele ibu deuleni tɛnda. Shapa ukwopi ga ụbaụta no olugwo mi, ama shɛ ukwulana mu Ama jala o, semi ukwulana bụ.#Mak 10:38; Jon 18:11

37Bee gwure bee jiteni eseshi-iyi ubwa to o woto malabụ, bɛɛ hiɛŋ Pita, A-Saimon, bo woto suu malabụ? Bi eri shi suu ba nda ashɛlatụ okwo na aka ticwɛŋ? 38Bɛɛ hiɛŋ aŋ, Na nda ma ashɛlatụ, maa hi na nda adua, iwɛ maa kede tumanga ti hi lasụ o. Mpiala mi leni gom, ama tu'waba tu lweji.#Mat 6:13; Luk 11:4

39Bee gwuri baa njɛ adua, baa dumananɛ iwebe ike ike. 40Bee gwuleneni no ofwo eseshi-iyi ubwa, bee jiteneni aŋ to o woto malabụ, iwɛnɛ te shishe sha aba shi zhinengeni na malabụ, e mepi shi iyi nɛ maa ɛ jishijɛ bụ o.

41Nazhɛ bee gwuleneni na aka ụtatụ, bɛɛ hiɛŋ aŋ, Hi to woto suu malabụ keeni ụhinjanụ tuta? Inɛ ɛtɛ gwumwa ya, aka ci ya! Hioko ma, o shopwo Yɛu Bụtụ oo pwonuo atwa-iwɛwɛ. 42Ishijɛ ma tu hwuri ma. Bụtụ na ma n sangana atwa ne tidere, bu gwumwonu ya.

A 'Imɛ Jisus

(Mat 26:47-56; Luk 22:47-53; Jon 18:3-12)

43Gunu ata ti ge Jisus ta duma iwɛ ɛtɛ, go Judas na shɛ bụtụ bu ko na ashashɛ eseshi-iyi umpwa-na-ba-eyebi pushe, baa zhagajɛ na atwa ofwugwo a na 'wananjɛ otokwobi ne shekwute, ta a banɛ no olugwo ehiu onongbo, ne embesegeni Undwa keeni n-nyarɛ. 44Bụtụ na sengeni bu atwa ne tidere pwonuo atwa ata tusakana, bɛɛ hiɛŋ aŋ, Bụtụ be elele na Ngaa ruwanɛ hwayɛ, asha ubwa atata, ima bu ma hi hwuri.

45Aka na tu go Judas ci apata, bee hwuri pi Jisus mbwụụ, bɛɛ hiɛŋ bụ, E-Bimbisegeni! Baa ruwanɛ bụ. 46Nazhɛ atwa ata gbodongonu Jisus, aa 'imɛ bụ.

47Ama bụtụ bu ko na ashashɛ atwa Jisus na shikekeni apata, hwucice utokwobi ubwa, boo po bujama bo Bunongbo bụ 'wụtụ, bee vweri bu ụcɛbɛ. 48Nazhɛ ge Jisus hiɛŋ aŋ, Hi bananjɛ suu ahi 'wananjɛ otokwobi, ne shekwute maa hi n 'imɛ gana bɛshɛrɛ? 49N namɛ ne hiŋ nu Umwono wa Agwatana iyi-heri iyi-heri Omo mbisogono atwamwa iyi, hi n 'imɛ shɛ kaa o. Ama inɛ gɛ shɛ iwɛ maa iyi nɛ 'nywotwo nu utakada Iwɛ ya Agwatana sɛ.#Luk 19:47; 21:37; Jon 18:19-21

50Nazhɛ eseshi-iyi ubwa genji bu kpaaŋ aba ee gezhiji.

51Ama usemberi uko namba ga 'wa Jisus, na ge urigeni tugwuno ti ilinɛn kiri, ibɛ atwa ata 'imɛ bụ. 52Bee gengeni aŋ tugwuno ta ata ti ilinɛn, bee gezhiji mohondo bee hwuri.

Ge Jisus na Atwa Ụshɛrɛya

(Mat 26:57-68; Luk 22:54,55,63-71; Jon 18:13,14,19-24)

53Nazhɛ ee zeriji Jisus po Bunongbo bụ 'wụtụ. Ehiu onongbo, tu n-nyarɛ, keeni embisegeni Undwa ụlwatagawa apata kpaaŋ aba. 54Ga Pita 'wa Jisus ne ekwunyi, na ahanga na dụlụmɛ, bee teni nu ukpogwu Bunongbo ata bụ 'wụtụ, baa jɛjɛ ne edegeri baa hwatụ ulwa.

55Ehiu onongbo, ta ajɛmɛ-ụshɛrɛya kpaaŋ aba, a jalakaka eseyida iwɛ Jisus iwɛ maa a kwụnɛ bụ, ama e gwushiji shi kaa. 56Okwo ta atwa ofwugwo dumanganɛ Jisus tiseyida tu tukata, tiseyida ta aba kaa tu za unu uko.

57Atwa oko ishijɛ ee shikeni aa dumanganɛ bu tiseyida tu tukata ɛɛ hiɛŋ, 58Tụ hwụjɛ ti bɛɛ hiɛŋ, N zhɛ mo hwuŋzo Umwono ga wa Agwatana oo mo ni i'ɛlɛ, maa Ma ma unaa na ee me shi ni i'ɛlɛ ijitɛ itɛtu.#Mak 15:29; Jon 2:19; Ugo 6:14 59Ama okwo ti yaa shɛ gana ata tiseyida ta aba kaa tu za unu uko waa.

60Nazhɛ Bunongbo bụ 'wụtụ ishijɛ bee shikeni na ashashɛ, bee heŋteni Jisus, bɛɛ hiɛŋ, Bɛ jishɛjɛ shɛ ree iwɛ ye elele, asha bụ hwụjɛ shɛ ree tiseyida tu ga atwa ga ma bu dumangana?

61Ama ge Jisus sumenji bu, bɛ jɛshɛjɛ shɛ bụ iwɛ ye elele o. Ibɛ po Bunongbo ata bụ 'wụtụ unseni sasana Jisus, bɛɛ hiɛŋ bụ, Gabụ suu bɛ shɛ ga Krast, yɛu ɛtɛ ya Agwatana nɛ oo zhemonjino?

62Ge Jisus jishijɛ bụ, bɛɛ hiɛŋ, Gamba ganana. Hi zhɛ hia kwụba ti Yɛu Bụtụ jɛjɛ nu u'ala ubiye ukpahiŋ ụ'wụtụ, ti bee ci no odomu azuba.#Dan 7:13

63Ibɛ po Bunongbo ata bụ 'wụtụ dwetweji tugwuno tu bwa, bɛɛ hiɛŋ, Ukekeshi tiseyida ti imbe to tu too? #Tɛrɛ 14:6; Ugo 14:14 64Hi hwugwa tu baa dumanganɛ Agwatana n-ndumwa mụ wɛ nu unu ubwa. Inɛ nɛ ahiɛ kwụbɛɛ?

Nazhɛ kpaaŋ aba peni Jisus n-ndumwa-tụwụma maa bu lanɛ no tu'wo.#Liv 24:16

65Nazhɛ atwa oko kwuni Jisus mecemi tuzwogono, ee urigeni bu iyi ne eshe, aa tagana bu okwu, ɛɛ hiɛŋ bụ, Duma tigesere! Edegeri shepi bu aa pagana bụ awaŋpɛ.

Ga Pita Teri Ashamanjɛ maa bu Mepi Shi Jisus o

(Mat 26:69-75; Luk 22:56-62; Jon 18:15-18,25-27)

66Ti ga Pita namɛ nu ukpogwu, yɛu ike nɛ namɛ na ashashɛ miaụŋ-mu-ugondu showo sho Bunongbo bụ 'wụtụ zhajɛ. 67Aka na tu baa kwụbɛ Pita tu baa hwatụ ulwa, baa ngbaracɛ Pita, bɛɛ hiɛŋ bụ, Bu namɛ du ne Jisus, bụtụ ga bu Nazarɛt.

68Ama ga Pita teri ashamanjɛ, bɛɛ hiɛŋ bụ, M mepi shi o, N eshiciji shi du kaa iwɛ nɛ aba njɛ o. Nazhɛ baa ishɛjɛ apata bee teni ni igɛsɛji, gunu ata alụma uganɛ.#14:68 gunu ata alụma uganɛ: Tɛjɛshɛrɛga tu ko tu zasa n-ndumwa ma ata o.

69Nazhɛ Yɛu ɛtɛ towo kwụbananɛ bụ, bee kwuni atwa na shikekeni apata timbiso, bɛɛ hiɛŋ aŋ, Bụtụ ga shɛ bụtụ bu ko na ashashɛ aba.

70Ama ga Pita teleneni ashamanjɛ.

Ti yaa namɛ fwalaa, atwa na shikekeni apata hiɛŋ Pita, Iwɛ-tɛkana, bu namɛ ga na ashashɛ aba, bụtụ bu Galili gom abɛ shɛ.

71Ama ga Pita kwuni tutwa, na tuwa-tuta, bɛɛ hiɛŋ aŋ, Iwɛ-tɛkana Omo hi mbiso! Maa, M mepi shi bụtụ go ahia njɛ iwɛ ubwa o!

72Gunu ata alụma yebi uganɛ sasana. Nazhɛ ga Pita teyinje n-ndumwa ma ata ge Jisus mbishi bu la, bɛɛ hiɛŋ, Alụma zha shɛ a ugana hwayɛ kpalụ yebi, tɛ ɛbi zhɛ ba tala ashamanjɛ mi kpalụ tatụ maa bu m mepi shi o. Aka na ti bee heŋshi iwɛ ɛtɛ, bee tileni nu u'wo gboo.

Právě zvoleno:

MAK 14: RBT

Zvýraznění

Sdílet

Kopírovat