LUK 4
4
Tumanga tu na ge Setan Menji Jisus
(Mat 4:1-11; Mak 1:12,13)
1Tu Mpiala mi Tijilo mi shini amɛ Jisus, ibɛ po Mpiala ma ata mi zeriji bu bee beni nu Urefu Jodan bee zhe nụ ụshɛka. 2Bu namɛ apata ijitɛ buhanda, bɛ yɛ shɛ iyimɛyɛ ye elele. Aka na ti ijitɛ ɛtɛ buhanda ulwa ibɛ po imunɛ gwụmɛ bụ ya, nazhɛ Ibiri menji bu.#Undwa 9:9
3Ibiri hiɛŋ Jisus, Yaa shɛ abɛ shɛ Yɛu ya Agwatana gom, asha hiɛŋ utayɛ ga maa ụ jɛshɛrɛjɛ ibrɛd.
4Ge Jisus jishijɛ bụ, bɛɛ hiɛŋ, Shɛ ni ibrɛd kiri bụtụ ba ya uraiŋ o.#Undwa 8:3
5Ibiri ɛtɛ zeriji bu bee mbiseni bu ofwo elele na cɛnjɛ cɛnjɛ-ta-tugwama tu unyizo ti teje kpaaŋ hwuŋri. 6Ibiri hiɛŋ bụ, Gabụ Ngɛɛ zhɛ ma pana ụhwada tuba keeni ụjɛrụma tuba kpaaŋ, iwɛnɛ to o m pwonuo tu, bụtụ be elele na n kwụlanɛ ya ubwa Ngɛɛ zhɛ ma pana tụ. 7Yaa shɛ abu n zhɛbɛ, gabụ Ngɛɛ zhɛ ma pana tụ kpaaŋ.
8Ge Jisus jishijɛ bụ, bɛɛ hiɛŋ, O 'nywotwo, ɛɛ hiɛŋ, Gabụ bɛ shɛ ba zhɛba Agwangwama na shɛ Agwatana bụ, ubwa kiri abɛ shɛ ba ndana iyi.#Undwa 6:13; 10:20
9Ibiri ɛtɛ zeriji Jisus nu Jɛrusalɛm, bee peteni bu ni ikerikeje Umwono wa Agwatana, bɛɛ hiɛŋ bụ, Yaa shɛ gabụ bɛ shɛ Yɛu ya Agwatana gom, asha meme gengenji maa ngbi epe. 10O 'nywotwo, ɛɛ hiɛŋ, Agwatana zhɛ a pana atumwa ubwa azuba unu maa a na bu ngbaraka.#Shɛzu 91:11,12 11Yoo 'nywotwo sasana, yɛɛ hiɛŋ, Ɛ zhɛ ma bu sa ni i'ɛlɛ ya aba iwɛ maa kede po uvwuna bụ nu utayɛ o.
12Ge Jisus jishijɛ bụ, bɛɛ hiɛŋ, Ɛ hiɛŋ, Ta na manga Agwangwama na shɛ Agwatana bu o.#Undwa 6:16
13Aka na ti Ibiri hwuwi tumanga tu bwa kpaaŋ, nazhɛ bee genji Jisus uuwa i ci aka anya.
Ge Jisus Kwuni Ugondu Ubwa Tɛnda na Cɛnjɛ tu Galili
(Mat 4:12-17; Mak 1:14,15)
14Ge Jisus jiye nu Galili nu ukpahiŋ Mpiala mi Tijilo. Nazhɛ unabarɛ ubwa beni woo rungwutwonu cɛnjɛ ta ata kpaaŋ.#Mat 9:26; Luk 4:37 15Ge Jisus mbisegeni atwa iyi no shimwono shɛ Tụ'ụlwatagwụ sha aba, ibɛ po atwa kpaaŋ peni bu ụjɛrụma.#Mat 4:23; 9:35; 11:1
Atwa Nazarɛt Lacɛ Jisus
(Mat 13:53-58; Mak 6:1-6)
16Ge Jisus zhe Nazarɛt na shɛ ụshɛpwụ na ɛɛ wɛŋnicinjɛ bụ, bee teni nu umwono tuulwa nụ Ụjita-ụhinjanụ gana na tu baa shana ba nda, bɛɛ ishijɛ maa rɛta Iwɛ ya Agwatana.#Ugo 13:14-16 17Ee peni bu utakada bigesere ga Ayizaya, bee ushiji uŋ, baa kwụbɛ ofwo na oo 'nywotwo na amɛ ubwa, ɛɛ hiɛŋ.
18Mpiala ma Agwangwama mu namɛ ne mi,
iwɛnɛ bee n dudugeni mu maa ma anangana okofwo Anabarɛ
Ebiye.
Bu n tumwanɛ maa ma anangana atwa na aa 'imɛ tubanangana
ta aba,
iwɛ maa ma anangana du sholubo tɛzhɛmanana
tu ulubwo wa aba,
maa ma nda maa ɛ gɛnjɛ atwa na aa nda umungwuta, #Ayiz 61:1,2
19iwɛ maa ma ananga iwɛ uywa na teneni Agwangwama cɛŋ.
20Bee kwungwuri utakada ata, bee gwuricingeni uŋ yɛu-ugondu, baa jɛjɛ sasana. Nazhɛ atwa elele na zweni nu umwono ata zweni bu igbɛtɛtɛ. 21Bɛɛ hiɛŋ aŋ, Hwayɛ ga nazhɛ ti'nyeci ti Iwɛ ya Agwatana ga ti sɛ na shɛcɛbɛ shi hiŋ.
22Nazhɛ n-ndumwa mu tulubo-ti-biye mu na mu banɛ nu unu Jisus mu dama aŋ kpaaŋ aba, ɛɛ hiɛŋ, Shɛ ubwa maa shɛ yɛu Josɛf? #Jon 6:42
23Ge Jisus hiɛŋ aŋ, M mepi gom maa hi zhɛ hi mo n shono ushi ga, hiɛ hiɛŋ, A-buwa-bi-inibi, mama nɛnjɛ, maa njɛ du iyi nɛ atu hwụjɛ maa bɛ njɛ nu Kapanaum nụ ụshɛpwụ ata ee bi meci.
24Ge Jisus keeni tụdụma, bɛɛ hiɛŋ, Iwɛ-tɛkana Omo hi mbiso maa, I zasa bigesere be elele na oo tumwo iwɛ ubwa no ofwo na ee meci bu kwukwuŋ.#Jon 4:44
25Ama N zhɛ mo hi mbiso iwɛ-tɛkana maa, olulo ofugwo namba la na cɛnjɛ ti Isrɛl na aka Elaija, te eshilo ngbi shi shiywa shɛ tatụ ni ipiɛnɛ icihiŋ, imunɛ i'wɛtwɛ layɛ na cɛnjɛ ta ata kpaaŋ.#1 Shɛgwu 17:1,8-16; 18:1; Jem 5:17,18 26Ama a tumwanɛ shɛ kaa Elaija no ofwo bụtụ be elele na ashashɛ aba o, semi no ofwo biyikwo ata shɛ bululo nu Zarefat na namɛ na cɛnjɛ tu Saidụn kiri. 27Atwa ụngwụ-uwaŋna#4:27 ụngwụ-uwaŋna: Kwụba ti'eshicigono tu Mat 8:2 ofwugwo namba la na cɛnjɛ ti Isrɛl na aka bigesere ge Elaisha, ama i zasa bụtụ be elele na aa nɛnjɛ na ashashɛ aba o, semi ge Neman bụtụ ata bi Siria kiri.#2 Shɛgwu 5:1-14
28Aka na ta atwa elele na namɛ nu umwono ata Tụ'ụlwatagwụ hwụjɛ iwɛ ɛtɛ, ibɛ po isɛbwɛ shini na shɛmɛ sha aba hwɛɛ aba. 29Ibɛ po ɛɛ ishijɛ ee becinji Jisus nụ ụshɛpwụ ata, ee zeriji bu ne embi ishɛmɛ ike nɛ ee peteni ụshɛpwụ ata, iwɛ maa e shiyeni bu na tụbagwụ tu utayɛ uko, 30ama bi keshici na ashashɛ aba bee hwuri.#Jon 8:59; 10:39
Bụtụ na Mpiala mụ Wɛ mu Namɛ na Amɛ Ubwa
(Mak 1:21-28)
31Nazhɛ ge Jisus zhe Kapanaum na namɛ nu Galili, bee mbisegeni aŋ iyi nụ Ụjita-ụhinjanụ. 32Ibɛ po iyi nɛ bee mbisegeni aŋ dama aŋ, iwɛnɛ tu baa duma iwɛ nu ụhwada.#Mat 7:28,29; 13:54; 22:33; Mak 11:18; Jon 7:46
33Bụtụ bu ko namba nu umwono ata tu'ulwa na mpiala mụ wɛ ma butumwa-bi-Ibiri mu namɛ na amɛ ubwa. Maa uganɛ duwa, mɛɛ hiɛŋ, 34Ee! Imbe bwa i shɛ inee tu na bu gabụ ge Jisus bụtụ bu Nazarɛtii? Bi zhajɛ suu maa iti iricinji? M mepi bụtụ na abɛ shɛ, bụtụ bi tijilo ba Agwatana abɛ shɛ.
35Ge Jisus tezhigeni mu, bɛɛ hiɛŋ, Ima ilɛmɛ! Banɛ na amɛ ubwa! Aka na ta butumwa ata bi Ibiri keri bụtụ ata na cɛnjɛ na ashashɛ aba, baa banɛ na amɛ ubwa, bɛ njɛ shɛ bụ ya iyi iwɛ ye elele o.
36Igɛhi iwɛ ɛtɛ 'imɛ aŋ kpaaŋ aba, ibɛ po oo momo hoŋtongonu, ɛɛ hiɛŋ, Imbe shɛ gana gaa? Iwɛnɛ po nu ụhwada na 'yajɛ ukpahiŋ bee mbishi mpiala mụ wɛ iwɛ, maa banɛ. 37Ibɛ po unabarɛ ubwa beni woo rungwutwonu cɛnjɛ ta ata kpaaŋ.#Mat 9:26; Luk 4:14; 5:15
Ge Jisus Nɛnjɛ Atwa ofwugwo
(Mat 8:14-17; Mak 1:29-34)
38Ti ge Jisus ishijɛ bee beni nu umwono ata tụ'ụlwatagwụ, bee teni nu umwono Saimon, te uji Saimon weci mpiala mụ 'wụtụ mɛ shɛ bụ. Aa tabwa Jisus iwɛ ubwa.
39Ge Jisus zhe bee shikeni to dongonu biyikwo ata, bee tezhigeni mpiala ma ata mu ga shɛ bụ, nazhɛ mee genji bu. Nazhɛ biyikwo ata ishijɛ gunu ata baa ndanɛ aŋ iyi.
40Aka na tu uwaŋna zhɛ utwonuo, ee sugeni Jisus atwa elele na a gwumanga ụngwụ gɛnɛgɛnɛ, bee petengeni aŋ i'ɛlɛ ibwɛ hwɛɛ, baa nɛnjɛ aŋ. 41Atumwa-ibiri du bananjɛ na shɛmɛ sha atwa ofwugwo, aa uganɛ ɛɛ hiɛŋ, Gabụ bɛ shɛ Yɛu ya Agwatana.
Ge Jisus tezhigeni mu, bi leni shi maa mu dumanɛ iwɛ o, iwɛnɛ ti mee mepi maa ubwa shɛ ga Krast.
Ge Jisus Njɛ I'enenji na Cɛnjɛ tu Judia
(Mak 1:35-39)
42Aka na ti iyi heri nu uvwungwa, ge Jisus beni bee zhe no ofwo na bụtụ zasaba. Atwa ofwugwo zhajɛ pu bwa aa jalakaka bu maa a njɛ bu ukwurishi maa kede ganga aŋ o. 43Ama bi hiɛŋ aŋ, I shɛ tilɛɛ maa ma ananga Anabarɛ Ebiye Cɛnjɛ-ta-tugwama ta Agwatana na ashɛpwụ anya du, iwɛnɛ po utumwa na aa n tumwanɛ ta.
44Gabata baa njɛ i'inenji no shimwono shɛ Tụ'ụlwatagwụ shi Judia.#4:44 Judia: Tɛjɛshɛrɛga tu ko ti hiɛŋ, Galili, mo tu ko kaa ti hiɛŋ, tutu rungwutwonu cɛnjɛ te Eju kpaaŋ. #Mat 4:23; 9:35
Právě zvoleno:
LUK 4: RBT
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Rubassa Bible © Bible Society of Nigeria, 2008
