LUK 5
5
Eseshi-iyi Ehiiŋ na ge Jisus Suyanɛ
(Mat 4:18-22; Mak 1:16-20)
1Jitoo ko ge Jisus shikeni nu ụpalanụ Itekwu Gɛnɛsarɛt,#5:1 Itekwu Gɛnɛsarɛt: Kwo kaa Itekwu Galili. 2Aka na ti ge Jisus kwụbɛ ihiɛŋtu iyebi ti yɛɛ zɛtɛ nu uhaŋsa itekwu ɛtɛ. Ama ekwuzhi tuba bwonuo na amɛ ibɛ, aa nyashanga ya n-ngwuno ma aba. 3Ge Jisus teni nụ ụhaŋtụ ata uko, ubwa shɛ una Saimon, baa lụpɛ Saimon maa go shishingono uŋ maa u teni ne meni. Nazhɛ ge Jisus jɛjɛ nu bwa, bee mbisegeni atwa ata ofwugwo iyi.#Mat 13:1,2; Mak 4:1
4Aka na ti ge Jisus hwuwi n-ndumwa mu bwa tụdụma, bɛɛ hiɛŋ Saimon, Kaana ụhaŋtụ ga tishishingono maa u teni no ofwo na iri, maa hi zucinji n-ngwuno mi hiŋ ne meni maa hiɛ 'imɛ ijɛnɛ.
5Ga Saimon jishijɛ bụ, bɛɛ hiɛŋ, Iwɛnɛ ti yaa shɛ gabụ bi hiɛŋ, ibɛ po Ngɛɛ zhɛ mo zucingo.#Jon 21:3
6Aka na te e zucinji mu, aa 'imɛ ijɛnɛ nɛ gembi ufwugwo duwa, harɛ n-ngwuno ma aba ma dwatwagwụ.#Jon 21:6 7Ibɛ po aa suyanɛ eyejilo aba a na namɛ nu ụhaŋtụ unya na azhɛkwa maa a zhajɛ e mbiyeni aŋ. Ijɛnɛ nɛ aa 'imɛ shini ihiɛŋtu iyebi, ibɛ po ihiɛŋtu ɛtɛ kwuni ti'ilo.
8Aka na tu ga Saimon Pita kwụbɛ ijɛ, bee leyi bee kwuzeni Jisus, bɛɛ hiɛŋ bụ, Iyɛri, ishɛga no olugwo mi, iwɛnɛ ti Ngaa shɛ bụtụ-bi-iwɛwɛ. 9Iwɛnɛ po igɛhi 'imɛ bu duwa, ta atwa vwɛ a na namɛ nu bwa hwɛɛ, iwɛ ijɛnɛ ɛtɛ ifwugwo aa 'imɛ. 10Gobwonu du yaa shanɛ Jemis na Jon miaụŋ mu Zɛbɛdi mu na ma twa ikpɛngwu na Saimon.
11Aka na tɛ ɛ zɛtɛ ihiɛŋtu ɛtɛ nu uhaŋsa, ee genji iyi elele kpaaŋ aa 'wa Jisus. Ge Jisus hiɛŋ Saimon, Ta nda inyɛsɛ o, ama te kwuni na aka ga, atwa ɛbi zhɛ bu na ima ya.
Ge Jisus Nɛnjɛ Bụtụ bu ụngwụ-uwaŋna
(Mat 8:1-4; Mak 1:40-45)
12Aka na ti ge Jisus namɛ nu ụshɛpwụ uko, ibɛ butubwenyi bu ko na tu'waba tu bwa tɛ shɛ ụngwụ-uwaŋna hwɛ hwɛɛ kwụbɛ bụ, bee leyi ni ivwunɛ ibwɛ, baa tabwa bụ, bɛɛ hiɛŋ, Iyɛri, yaa shɛ yaa bu kwụlanɛ, bi eri bu ma nɛnga maa ma nama shɛshɛshɛ.
13Ge Jisus nderishinji u'ala ubwa bee timengeni bu, bɛɛ hiɛŋ bụ, I n kwụlanɛ, nama ya shɛshɛshɛ! Gunu ata ụngwụ-uwaŋna ata genji bu.
14Ge Jisus tɛtaganɛ bụtụ ata unu, bɛɛ hiɛŋ bụ, To mbiso bụtụ be elele o, ama zhaga meme mbiseni onongbo, iwɛ tɛnɛnga tu na aa bu nɛnjɛ. Shɛkana aŋ iyi nɛ go Moses ihi peni-unu ibɛ maa i shanɛ aŋ tiseyida.#Liv 13:49; 14:2-32
15Ama unabarɛ Jisus mburusonu no ofwo elele, ibɛ po atwa ofwugwo ụ'wụtụ a zhaganɛ bụ maa a hwụjɛ iwɛ ubwa, maa kaa du nɛnga igwumɛgwumɛ ya aba.#Mat 9:26; Luk 4:14 16Ama ge Jisus ba shana baa mama dashɛgana baa nama nu ụshɛka ɛgbɛ ɛgbɛ maa nda adua.#Luk 3:21; 6:12; 9:18,28; 11:1
Ge Jisus Nɛnjɛ Bụtụ na Tu'waba tu Bwa tu 'Wegeni
(Mat 9:1-8; Mak 2:1-12)
17Jitoo ko ti ge Jisus bo mbisogono atwa iyi, Afarisi, ne embesegeni Undwa a na bananjɛ na ashɛpwụ Galili, keeni ashɛpwụ Judia keeni Jɛrusalɛm gɛgajɛ. Ukpahiŋ wa Agwatana kaa namɛ ne Jisus maa nɛnga atwa ata.#5:17 maa nɛnga atwa ata: Kwo kaa maa nɛnga aŋ. #Mat 15:1; Mak 5:30; Luk 6:19 18Aa kwụbɛ ta atwa oko 'waŋnɛ bụtụ bu ko na tu'waba tu bwa tu 'wegeni no ogodo, aa jalakaka maa e tecinji bu na amɛ umwono maa e wecinji bu nu ukaka Jisus. 19Ama gana na te e gwushiji shi ohwolu maa e tecinji bu iwɛ ufwugwo ụ'wụtụ wa atwa na namɛ apata, ee munji ukogo, ee duricinji ogodo ata bee weci nu ukogo ata, ee zucinji bu nu ukaka Jisus.
20Aka na ti ge Jisus kwụbɛ rishe ra aba tɛtɛtana, bɛɛ hiɛŋ bụtụ ata, E-biyejilo mi, e bi gengeni iwɛwɛ bu.#Luk 7:48
21Ibɛ po embisegeni Undwa keeni Afarisi kwuni tuhaŋsa abaaba, ɛɛ hiɛŋ, Bụtụ bi ce naa ba dumangana Agwatanaa n-ndumwa mụ wɛɛ? Gaaba eri ba gangana bụtụ iwɛwɛ ibwɛɛ, ti yaa shɛ shɛ Agwatana kirii?
22Ama ge Jisus mepi shihaŋsa sha aba, bee heŋteni aŋ, bɛɛ hiɛŋ, Imbe po ahia haŋsa iyi gɛnɛ gɛ na shɛmɛ shi hiiŋ? 23Inɛ nɛ i shɛ kakayɛ maa mɛ hiɛŋ bụụ? Maa mɛ hiɛŋ bụ suu E bi gengeni iwɛwɛ bu, okwo maa mɛ hiɛŋ bụ, Ishijɛ zhe tahaŋnụ? 24Ama maa hi mepi maa Yɛu Bụtụ 'yajɛ ụhwada maa gangana bụtụ iwɛwɛ ibwɛ nu unyizo, bɛɛ hiɛŋ ugwumashɛ ata tu'waba tu bwa tu 'wegeni, Gamba m bi hiɛŋ, ishijɛ shepi ogodo bu maa hwuri ujiyo ni ihwɛ bu.
25Gunu ata bụtụ ata ishijɛ ne eshe aba kpaaŋ, bee shepi ogodo ata bee ge weci, bee beni apata bee hwuri ujiyo ni ihwɛ ibwɛ, bee peni Agwatana ụjɛrụma. 26Yaa dama aŋ ya kpaaŋ aba, ee peni Agwatana ụjɛrụma, inyɛsɛ shɛ aŋ duwa, ɛɛ hiɛŋ, Tu kwụbɛ iyi ifwo hwayɛ ga.
Ge Jisus Suyanɛ Livai
(Mat 9:9-13; Mak 2:13-17)
27Na aba inɛ gɛ, ge Jisus beni apata, baa kwụbɛ bile-bu-ụdalụ bu ko na ɛɛ hiɛŋ izeci ibwɛ ga Livai, tu baa jɛjɛ nu umwono na aa la ụdalụ, bɛɛ hiɛŋ bụ, N 'wa. 28Ga Livai genji ga iyi elele, bɛɛ ishijɛ baa 'wa bụ.
29Ga Livai 'imɛ Jisus ugaiŋ ụ'wụtụ ni ihwɛ ibwɛ, ele-ụdalụ ofwugwo ụ'wụtụ na anya atwa jɛjɛ na aba aa ya iyimɛyɛ.
30Nazhɛ Afarisi keeni embisegeni Undwa, o ngulongongono eseshi-iyi Jisus, ee heŋteni aŋ ɛɛ hiɛŋ, Iwembe po ahia ya iyi, ahia swa ne ele-ụdalụ keeni atwa-iwɛwɛɛ? #Luk 15:1,2
31Ge Jisus jishijɛ aŋ, bɛɛ hiɛŋ, Ukekeshi buwa-bi-inibi njɛ shɛ atwa na 'yajɛ ulapiya o, semi atwa na a gwumanga. 32N zhe shi maa ma suyana atwa tiririri o, ama semi atwa-iwɛwɛ maa a jɛshɛrɛjɛ-shihaŋsa.
E Heŋteni Jisus iwɛ Ezumi Tɛnda
(Mat 9:14-17; Mak 2:18-22)
33Nazhɛ atwa oko hiɛŋ Jisus, Eseshi-iyi Jon a nda ezumi#5:33 ezumi: kwụba ti'eshicigono tu Mat 8:2 Ɛgbɛ ɛgbɛ, aa nda du adua, gobwonu du eseshi-iyi Afarisi a nda, ama eseshi-iyi bu a ya aa swa.#Luk 11:1; Jon 3:25,26
34Ge Jisus heŋteni aŋ, bɛɛ hiɛŋ, Hi eri suu hia nda ma eyejilo bwolo-be-eyikwo njɛ ezumi na aka na to bwolo-be-eyikwo ta namɛ na aba? 35Ama ụjita zhɛ wo to na aka na tɛ ɛ zhɛ a shapa bwolo-be-eyikwo no olugwo aba, jita ata nazhɛ ɛɛ zhɛ a nda ezumi.
36Ge Jisus manganganɛ aŋ du n-ndumwa, bɛɛ hiɛŋ, I zasa bụtụ na zhɛ ba muna tugwuno tu ufwo maa swana utogwo ụngwụshɛ o, yaa shɛ baa njɛ gana ata, asha tugwuno ta ata tu ufwo ti zhɛ ta ingɛcɛnga utogwo ata ụngwụshɛ, iwɛnɛ ta ma tuta tu ufwo ti zha shɛ ta sha iyi ike na ma tu tu ngwụshɛ. 37I zasa bụtụ be elele na zhɛ bo zwono meni mụ tụ'walụ ta afwafwa mu ufwo nu ututu#5:37 ututu: Nu u'waba la atwa angwụshɛ a nda ututu. A sụkwụta uŋ tebiye, nazhɛ o togono uŋ tebiye ta waŋnɛ maa kede meni mi beni te e zweni mu nu ututu ata o. ụngwụshɛ o, yaa shɛ abɛ njɛ gana ata, asha meni ma ata mụ tụ'walụ ta afwafwa mu ufwo mi zhɛ mo puso ututu ata, nazhɛ meni ma ata mi zhɛ mo dudugwo, ututu ata kaa du zhɛ wa nda ufwu. 38Ama i shɛ tilɛɛ maa e zweni meni mụ tụ'walụ ta afwafwa mu ufwo nu ututu ufwo. 39Aka na bụtụ swe meni mụ tụ'walụ ta afwafwa mụ ngwụshɛ, bi zha shɛ ba jala maa swa ya mu na mu ufwo gunu ata o, iwɛnɛ ti bɛɛ zhɛ bɛ hiɛŋ, Meni ma ata mụ tụ'walụ ta afwafwa mụ ngwụshɛ muba mɛ zhɛmɛ.
Právě zvoleno:
LUK 5: RBT
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Rubassa Bible © Bible Society of Nigeria, 2008
