JON 4

Ge Jisus ne Biyikwo bu Samaria

1Aka na ti ge Jisus mepi maa Afarisi hwụjɛ maa bi 'yajɛ eseshi-iyi baa nda aŋ ubaptizim uhwuri a na Jon. 2Ama ge Jisus njɛ shɛ atwa ubaptizim ni ikɛnyi ibwɛ o, semi eseshi-iyi ubwa a nda. 3Ti ge Jisus genji Judia, bee jiye nu Galili. 4I shanɛ bụ kaa i tilɛɛ maa dulo Samaria.

5Bee ci ụshɛpwụ wa Asamaria uko na ɛɛ hiɛŋ izeci ubwa, Saika, na dongonu cɛnjɛ tu na ge Jekob peni la yɛu ibwɛ go Josɛf.#Umoz 33:19; Josh 24:32 6U'ibwa meni na ge Jekob hini la kaa namba apata. Ama gana na ti ge Jisus lukwumi na tahaŋnụ tu bwa, baa jɛjɛ ya to dongonu u'ibwa ata meni. Uwaŋna kaa shikeci aka ata.

7Na aka ata kaa biyikwo bu ko banɛ nu Samaria baa zhajɛ maa sala meni. Ge Jisus hiɛŋ bụ, M peni kaa meni ma swa. 8Eseshi-iyi ubwa hwulwo nụ ụshɛpwụ ata maa ɛ sɛ iyimɛyɛ na aka ata.

9Nazhɛ biyikwo ata hiɛŋ bụ, Iwembe po abu ma n lụpa meni, tu Ngaa shɛ Busamaria, ta abɛ shɛ kaa Bijuu? Eju kaa ga lacɛmɛ shɛ na Asamaria o.#4:9 Eju…lacɛmɛ shɛ na Asamaria o: Kwo kaa Eju swe shi meni ikele ike na Asamaria o. #Ezr 4:1-5; Nehi 4:1,2

10Ge Jisus jishijɛ bụ, bɛɛ hiɛŋ, Yaa shɛ ebi ge mepi upwaŋ wa Agwatana, keeni bụtụ ga ibi hiɛŋ, M peni meni ma swa, bi gɛ zhɛ ba lụpa bụ du, maa ma bụ pana meni mu na ma pana bụtụ uraiŋ.

11Nazhɛ biyikwo ata hiɛŋ Jisus, Iyɛri, bu zasa kaa iyi tusala, u'ibwa ga kaa iri, ce kwuŋ abu banɛ ne meni mu go ma pana bụtụ uraiiŋ? 12Gabụ suu bu hwuri ugwunukwoshi tu ge Jekob na ti peni u'ibwa ga, na du kaa swe mu ta miaụŋ mu bwa, ti iyimabiga ubwa?

13Ge Jisus jishijɛ bụ, bɛɛ hiɛŋ, Atwa elele na a swa meni mu ga, i'uyɛ zhɛ ya gwumanana aŋ, 14ama bụtụ be elele na zhɛ ba swa meni na Ngɛɛ zhɛ ma pana bụ, i'uyɛ zha shɛ ya gwuma bu yɛ kwukwuŋ. Ama meni ata Ngɛɛ zhɛ ma pana bụ, mi zhɛ ma sha gana umɛzhinjɛ na wa pana bụ uraiŋ unyizo-nom.

15Ibɛ po biyikwo ata hiɛŋ bụ, Iyɛri mi, Asha m peni meni mu go, iwɛ maa kede i'uyɛ n gwumɛ ya o, maa ma ganga ya tizhajɛ epe iwɛ meni tɛcɛga.

16Ge Jisus hiɛŋ bụ, Asha zhaga suyanɛ bwolo bu, maa gwure epe.

17Ama biyikwo ata jishijɛ bụ, bɛɛ hiɛŋ, N zasa bwolo.

Ge Jisus hiɛŋ bụ, Bi teni cɛŋ, tɛ bi hiɛŋ, N zasa bwolo. 18Iwɛnɛ ta abu 'yagawa olwo a ta, ama bụtụ na abu namɛ nu bwa hwuwayɛ go, shɛ shɛ bwolo bu o. Inɛ ɛtɛ shɛ iwɛ-tɛkana ta abɛ jɛmɛ.

19Ibɛ po biyikwo ata hiɛŋ bụ, Iyɛri mi, N kwụbɛ maa bɛ shɛ bigesere. 20Ogwunukwoshi tu zhɛbɛ la Agwatana ni ishɛmɛ gɛ,#4:20 ni ishɛmɛ gɛ: Ibɛ shɛ ishɛmɛ Gɛrizim, nɛ gwumwonu nụ ụshɛpwụ ata ɛɛ hiɛŋ Shɛkɛm. ama hi hiɛŋ tuba maa nu Jɛrusalɛm ibɛ shɛ ofwo na maa a na zhɛba Agwatana.

21Ge Jisus hiɛŋ bụ, E-biyikwo ga, tɛtana n-ndumwa mi mi rishe aka zhɛ oto ta a hiɛ zha shɛ hia zhɛba Bishi ni ishɛmɛ gɛ, Okwo nu Jɛrusalɛm#4:21 tɛtana n-ndumwa mi mi rishe: Kwo kaa n tɛtana-rishe. maa, aka zhɛ o to ta ahi zha shɛ hi na zhɛba ya Bishi ni ishɛmɛ gɛ, kwo kaa nu Jɛrusalɛm. 22Hi eshiciji shi bụtụ na ahia zhɛba o, ama ta zhɛba bụtụ na eti mepi, iwɛnɛ tu ubino banɛ tedure ne Eju. 23Ama aka zhɛ o to, aka ata du kaa tuwo cebe, ta atwa na a zhɛba Agwatana tɛzhɛba tu tugom, zhɛ a zhɛba Bishi na ti'yagaga tu Mpiala keeni iwɛ-tɛkana. Atwa gana ata aba Bishi ba jalakaka maa a na zhɛba bụ. 24Agwatana shɛ Mpiala, i shɛ tilɛɛ maa atwa na a zhɛba bụ, ga a na zhɛba bụ tedure nu ukpahiŋ Mpiala, gana na tu baa shɛ Agwatana tɛkana.

25Biyikwo ata hiɛŋ bụ, M mepi maa gɛ Mɛsaya be ci ba, na ɛɛ hiɛŋ, ga Krast. Aka na baa zhajɛ hwuŋ bi zhɛ mo tu mbiso iyi elele kpaaŋ.

26Ge Jisus jishijɛ bụ, bɛɛ hiɛŋ, Gamba ga ma njɛ n-ndumwa na bụ, Gamba ganana.

27Gunu ata eseshi-iyi Jisus gwure, yaa dama aŋ ti ge Jisus ba dumanga n-ndumwa ne biyikwo ata. Ama i zasa kaa bụtụ heŋteni bu maa, Imbe aba jalakakaa? Kwo kaa iwembe po aba dumanga n-ndumwa ne biyikwo gaa?

28Nazhɛ biyikwo ata genji ihiulwe ibwɛ, bee zhe na amɛ ụshɛpwụ ata, bee mbishe atwamwa, bɛɛ hiɛŋ, 29Zhajɛ ma hiɛ kwụbɛ bụtụ na m mbishi iwɛ nɛ Ngaa nduwa la hwɛɛ. Bụtụ ga eri ba sha ga Krast ata hŋ? 30Ibɛ po atwamwa bananjɛ nụ ụshɛpwụ ata, aa zhajɛ pi Jisus.

31Na ashashɛ ata ibɛ eseshi-iyi Jisus tabwa bụ, ɛɛ hiɛŋ bụ, E-Bimbisegeni, ya iyimɛyɛ tugwo.

32Ama ge Jisus jishijɛ aŋ, bɛɛ hiɛŋ, N 'yajɛ iyimɛyɛ nɛ Ama ya inɛɛ nɛ ehi mepi shi.

33Ibɛ po eseshi-iyi momo hoŋtongonu, ɛɛ hiɛŋ, Bụtụ bu ko suu u panɛ bụ iyimɛyɛ?

34Ge Jisus jishijɛ aŋ, bɛɛ hiɛŋ, Iyimɛyɛ mi i shɛ maa Ma nda ukwulana bụtụ na n tumwanɛ, maa Mo hwuwo kaa ugondu ubwa hwɛɛ. 35Shɛ ahiɛba suu hi hiɛŋ, Iyimɛyɛ tugwubo ta vwɛ ipiɛnɛ ineshi? Ama Mo hi mbiso maa, Shapa ma eshe na azuba hi yeleji itimɛ, maa hiɛ kwụbɛ ti iyimɛyɛ nuwaŋ, yaa 'yacɛ tugwubo. 36Bugwubi ba la ule ubwa, bɛɛ zhɛ bo sotulonu tụ'walụ iwɛ uraiŋ unyizo-nom, iwɛ maa ta bɛbɛrɛ, te bugwubi, e eri a nda unyasa aka oko zhiaaŋ. 37Ni iwɛ gɛ ibɛ iwɛ ɛtɛ i shɛ iwɛ-tɛkana maa, Bụtụ bu ko ba bila, binya bụtụ tuba bo gwubo. 38N hi tumwanɛ maa hi gwubi iyi nɛ ahiɛ njɛ shɛ la tire ti ibɛ, anya atwa aba nduwa tire, ehi teni tuba nu unyasa tire ta aba.

39Asamaria ofwugwo a na namɛ nụ ụshɛpwụ ata ụ'wụtụ tɛtanɛ Jisus rishe iwɛnɛ te biyikwo ata le tiseida, bɛɛ hiɛŋ, Bu m mbishi iwɛ nɛ Ngaa nduwa la hwɛɛ. 40Aka na ta Asamaria ata ci pi Jisus, aa tabwa bụ maa nama na aba, ibɛ po baa jɛjɛ na aba ijitɛ iyebi.

41Aka na ta anya atwa ofwugwo hwụjɛ iwɛ Jisus, aa tɛtanɛ bụ rishe.

42Nazhɛ atwa ata hiɛŋ biyikwo ata, Shɛ iwɛ n-ndumwa mụ bụ kiri upo atɛ tɛtanɛ rishe o, atuba du tu hwugwa ni ikɛnyi tu, eti mepi kaa du tebiye maa bụtụ ga ubwa shɛ Bibicinji ba atwa unyizo gom.

Ge Jisus Nɛnjɛ Yɛu-ye-eyi Uzhɛgba wa Agwuma

43Ama ti ijitɛ ɛtɛ iyebi ulwa, ge Jisus beni apata bee zhe Galili. 44Okwo ge Jisus ni ikɛnyi ibwɛ le du tiseyida, bɛɛ hiɛŋ, Bigesere zasa ụjɛrụma na cɛnjɛ tu bwa o.#Mat 13:57; Mak 6:4; Luk 4:24 45Aka na ti bee teni Galili, atwa Galili leni bu, iwɛnɛ ta a kwụbwa iyi elele nɛ baa njɛ nu Jɛrusalɛm na aka Isene Tɛkashɛka, e zhe la apata na aka Isene ɛtɛ.#Jon 2:23

46Ge Jisus gwuleneni ni Kena na namɛ na cɛnjɛ tu Galili, no ofwo ata baa jɛshɛrɛjɛ la meni mo ohondo maa shɛ meni mụ tụ'walụ ta afwafwa. Uzhɛgba wa agwuma uko namba nu Kapanaum na yɛu ibwɛ ye eyi ya gwuma.#Jon 2:1-11 47Aka na ta bụtụ ata hwụjɛ maa ge Jisus banɛ nu Judia bɛɛ zhɛ Galili, bee zhe pu bwa, baa tabwa bu maa ge zwe iwɛ maa nɛnga yɛu ibwɛ, iwɛnɛ ti yɛu ɛtɛ gwumwonu tu'wo.

48Ge Jisus hiɛŋ bụ, Yaa shɛ ahiɛ ta kwụbɛ shɛ iyi tụdama keeni iyi ya arụhwajɛ, hi zha shɛ hia tɛtana-rishe o.

49Nazhɛ uzhɛgba ata wa agwuma hiɛŋ Jisus, Iyɛri mi, Zwe tugwo tobwolo yɛu mi ticwɛŋ te 'wi shi o.

50Ge Jisus hiɛŋ bụ, Zhaga hwulo yɛ, yɛu bu zhɛmwanuanua.

Ibɛ po bụtụ ata tɛtanɛ ga iwɛ nɛ ge Jisus mbishi bu rishe, bee hwuri ga ujiyo. 51Aka na ti bɛɛ zhɛ ujiyo ata, baa twa na miaụŋ-mu-ugondu ubwa, ee mbishi bu, ɛɛ hiɛŋ, Yɛu bu zhɛmwanuanua.

52Bee unseni aŋ aka na ti bee debeji. Ɛɛ jishijɛ bụ, ɛɛ hiɛŋ, Wenebe tu uwaŋna yinganɛ cwɛŋ#4:52 tu uwaŋna yinganɛ cwɛŋ: Kwo kaa na aka ogogo oko, kwo kaa na auwa ecenje. ibɛ mpiala ma ata mi genji bu.

53Ibɛ po bishi bi yɛu ɛtɛ mepi maa aka ebe ge Jisus gɛ hiɛŋ bụ, Yɛu bu zhɛmananɛ, aka ata ta gom yɛu ibwɛ zhɛmananɛ ga. Ibɛ po baa tɛtanɛ-rishe#4:53 tɛtanɛ-rishe: Kwo kaa tɛtanɛ Jisus rishe. ta atwa umwamwa ubwa hwɛɛ.

54Ụrụhwajɛ uyebi na ge Jisus ndaananɛ aka na tu baa banɛ nu Judia bee zhe Galili ta.

Právě zvoleno:

JON 4: RBT

Zvýraznění

Sdílet

Kopírovat