JON 3

Ge Jisus ne Nikodimos

1Bụtụ bu ko namba na ashashɛ Afarisi, na shɛ uhiu we Eju, na ɛɛ hiɛŋ, izeci ibwɛ ge Nikodimos. 2Bụtụ ata zhegeni Jisus#3:2 zhegeni Jisus: Tɛjɛshɛrɛga tu ko ti hiɛŋ, zhegeni bu. nụ ụjita, bɛɛ hiɛŋ bụ, E-Bimbisegeni, ti mepi maa gabụ bɛ shɛ bimbisegeni na Agwatana tumwanɛ. I zasa bụtụ be elele na eri ba nda arụhwajɛ ga aba nda o, semi bụtụ na Agwatana namɛ nu bwa.

3Ge Jisus jishijɛ bụ, bɛɛ hiɛŋ, Iwɛ-tɛkana Omo bu mbiso maa, yaa shɛ ee meteneni shi bụtụ tumata tu na tu banɛ ya na azuba,#3:3 tumata tu na tu banɛ ya na azuba: Kwo kaa tumata tu ufwo, kwo kaa tumanana. bi eri shi ba kwụba Cɛnjɛ-ta-tugwama ta Agwatana o.

4Ge Nikodimos heŋteni Jisus, bɛɛ hiɛŋ, E eri a matanana suu bụtụ tu baa ingwa? Bi te eri suu bo tononono na amɛ bino bwa maa e meteneni bu?

5Ge Jisus jishijɛ bụ, bɛɛ hiɛŋ, Iwɛ-tɛkana Omo bu mbiso maa, yaa shɛ ee meteneni shi bụtụ ne meni keeni Mpiala, asha bi eri shi bo tono Cɛnjɛ-ta-tugwama ta Agwatana o. 6Iyi nɛ butugwumwa meci, butugwumwa du yɛɛ zhɛ ya sha, iyi nɛ kaa Mpiala meci, mpiala#3:6 mpiala: Ne ridenji ru ko, tu uvwugo tu mpiala, ike ike yaa shɛ. Gana Rubassa du. du yɛɛ zhɛ ya sha. 7Kede ibu dama ti Ngɛɛ bi hiɛŋ maa, i shɛ tilɛɛ maa e hi meteneni tumata ta azuba o. 8Uvwugo wa nda geri elele na kwụlanɛ uŋ, okwo abụ hwụjɛ rundu ru bwa, bi eri shi ba mapa olugwo na waa banɛ kwo kaa ofwo na wɛɛ zhɛ o. Gobwonu du bụtụ na ee meci tumata tu Mpiala shɛ. 9Ge Nikodimosi heŋteni bu, bɛɛ hiɛŋ, Gana na ijɛ eri yo tumoo?

10Ge Jisus jishijɛ bụ, bɛɛ hiɛŋ, Gabụ kaa bɛ shɛ bimbisegeni ba atwa Isrɛl, asha bi mepi shi ecilo iwɛ gɛ hŋ? 11Ge Jisus hiɛŋ bụ, Iwɛ-tɛkana Omo bu mbiso maa, iyi nɛ eti mepi, ibɛ kiri ata duma iwɛ ibɛ, iyi nɛ kaa atu kwụbwa, ibɛ du kiri ata la tiseyida ti ibɛ. Hi le shi kaa iwɛ tiseyida tu na oto hi mbiso. 12N hi mbishi iwɛ iyi unyizo ga, hiɛ tɛtanɛ shɛ iŋ rishe o, yaa shɛ Ngee hi mbishi iwɛ iyi ya azuba, gana na ɛhi zhɛ hia tɛtana iŋ rishee? 13I zasa kaa bụtụ zhogwo na azuba kwukwuŋ o, semi bụtụ ata banɛ na azuba, ubwa shɛ Yɛu Bụtụ nɛ namɛ na azuba.#3:13 Yɛu Bụtụ…na azuba: Tɛjɛshɛrɛga tu ko tu zasa na azuba o.

14Gana na go Moses shepi la uhwa ata aa njɛ na bundala na azuba ta a namɛ nụ ụshɛka, gabata du ɛɛ zhɛ a shapa Yɛu Bụtụ na azuba tilɛɛ, #Tɛrɛ 21:9 15maa bụtụ be elele na tɛtanɛ bụ rishe, asha bi 'yajɛ uraiŋ unyizo-nom.

16Agwatana lubi unyizo duwa, bee peni Yɛu ibwɛ mokondo nɛ bee meci, maa bụtụ be elele na tɛtanɛ bụ rishe, bi zha shɛ ba nda ufwu o, ama bi 'yajɛ uraiŋ unyizo-nom.

17Agwatana tumwanɛ shɛ yɛu ɛtɛ ibwɛ nu unyizo ga maa duma ụshɛrɛya unyizo ga o, ama iwɛ maa bicingo atwa unyizo tedure nu bwa.

18A zha shɛ a duma ụshɛrɛya bụtụ na tɛtanɛ bụ rishe o, ama bụtụ na tɛtanɛ shɛ bụ rishe, a dumwa ụshɛrɛya ubwa cebe, iwɛnɛ tu baa tɛtanɛ shɛ Yɛu mokondo ya Agwatana#3:18 Yɛu mokondo ya Agwatana: Kwo kaa Yɛu mokondo ya Agwatana nɛ bee meci. rishe. 19Ụshɛrɛya ganana: Uhioko-uhwaŋna zhajɛ nu unyizo, ama atwa lubi tishi uhwuri uhioko-uhwaŋna, iwɛnɛ tu ugondu wa aba ụ shɛ ugondu ụwɛ. 20Bụtụ be elele na ba nda iyi iwɛ, ubwa bo imo uhioko-uhwaŋna, bi zha shɛ ba zha no ofwo uhioko-uhwaŋna o, iwɛ maa kede ugondu ata baa nda banɛ uvwi o. 21Ama bụtụ be elele na ba nda iwɛ-tɛkana, ubwa ba zha no ofwo uhioko-uhwaŋna, iwɛ maa ugondu ata baa nda banɛ caakwụ maa Agwatana ubwa bo mbiyono bu, nazhɛ baa nda uŋ.

Ge Jisus na Jon

22Na aba inɛ gɛ, ge Jisus ne eseshi-iyi ubwa zhe na cɛnjɛ tu Judia; baa namɛ apata baa nda atwa ubaptizim. 23Ga Jon namɛ du na Anon, na dongonu Salɛm, atwa a zhajɛ pu bwa, baa nda aŋ ubaptizim, iwɛnɛ te meni mi gembi apata. 24E te shiyeni shi la Jon nu umwono-tishi na aka ata o.#Mat 14:3; Mak 6:17; Luk 3:19,20

25Nazhɛ ashamanjɛ layanɛ eseshi-iyi Jon ne Biju bu ko,#3:25 ne Biju bu ko: Tɛjɛshɛrɛga tu ko ti hiɛŋ, ne Eju oko. iwɛ iyi tishɛshɛshɛ nɛ Eju a nda. 26Aa zhajɛ pu Jon, ɛɛ hiɛŋ bụ, E-Bimbisegeni, bụtụ ata ga namɛ la na bụ hileniye Urefu Jodan, bu gata ebi le tiseyida tu bwa, hioko ba nda ba atwa ubaptizim, atwa kpaaŋ a zha pu bwa.

27Ga Jon jishijɛ aŋ, bɛɛ hiɛŋ, Bụtụ eri shi ba lashɛga iyi elele o, semi ta a panɛ bu taa na azuba. 28Ahiɛba du hiɛ shɛ eseyida mi, ti Ngɛɛ hiɛŋ, Shɛ Gamba n shɛ ga Krast#3:28 Krast: Kwo kaa Mɛsaya. ata o, ama utumwa aa n tumwanɛ nu umbe ubwa.#Jon 1:20 29Bụtụ na 'yajɛ biyikwo, ubwa shɛ bwolo-be-eyikwo. Ama biyejilo bwolo-be-eyikwo ata na shikeni ba hwuga iwɛ ubwa, unyasa kiri bɛɛ zhɛ na nda, iwɛ rụhwụ ro bwolo-be-eyikwo ata baa hwuga. Iwɛ ecilo ga unyasa mu ulwa ya hwuwayɛ go. 30I shɛ tilɛɛ maa ga bu na kaana bụtụ bu tandụ tisha, maa tuba mu no gwulo ekwunyi.

Bụtụ na Banɛ na Azuba

31Bụtụ na banɛ na azuba, bu hwuri atwa kpaaŋ. Bụtụ na banɛ nu unyizo, bụtụ bu unyizo du baa shɛ, ba duma iwɛ unyizo. Bụtụ na banɛ na azuba bu hwuri atwa kpaaŋ. 32Iyi nɛ baa kwụbɛ, keeni iyi nɛ baa hwụjɛ ibɛ kiri baa la tiseyida ti ibɛ, i zasa kaa bụtụ na ba la tiseyida tu na baa la o. 33Bụtụ na le tiseyida tu na baa la, asha bụtụ ata le tiseyida maa Agwatana ulwa na tɛkana tisha. 34Bụtụ na Agwatana tumwanɛ utumwa, utumwa wa Agwatana baa duma. Agwatana kaa a pana#3:34 Agwatana a pana: Kwo kaa, ba pana. Mpiala mu bwa ta hialụ. 35Bishi bo lubo Yɛu ibwɛ, bee utegeni bu ụhwada iyi elele kpaaŋ.#Mat 11:27; Luk 10:22 36Bụtụ na ba tɛtana yɛu ɛtɛ rishe, bi 'yajɛ uraiŋ unyizo-nom, ama bụtụ na ba laka unu yɛu ɛtɛ tuhwuga, bi zha shɛ ba 'yaga uraiŋ o, ama isɛbwɛ ya Agwatana jɛjɛtanɛ bụ.

Právě zvoleno:

JON 3: RBT

Zvýraznění

Sdílet

Kopírovat