WƖAA DƖ-SUOMUŊ 47
47
1Ŋɩɩ nɛ Josɛf mʋ bʋla pɩ Ijipiti tinteeŋ kuoro, “Mɩ nyɩmma arɩ mɩ naambiiriŋ kɔ nɛ arɩ ba pʋsʋŋ kala arɩ ba kɩaa kala ba sɩ kɛnɛ a lɩɩ Kɛnaŋ tinteeŋ lɛ, ba lɛɛlɛ hɛ Goseŋ tinteeŋ lɛ nɛ.” 2Ʋ lɩɩsɛ ʋ naambiiriŋ tʋɔŋ nɩaa banɔŋ nɛ a kaa mʋ dagɛ Ijipiti tinteeŋ kuoro.
3Ŋɩɩ nɛ Ijipiti tinteeŋ kuoro pɩɛsɛ ʋ naambiiri-la, “Bɛɛ kʋŋ tɩntɩmɩɩ nɛ maa tɩŋ?”
Ŋɩɩ nɛ ba bʋla pɩ Ijipiti tinteeŋ kuoro, “Laa ŋaa kʋdaaraa nɛ arɩ la nyɩmmaba fa sɩɩ daa kɩaa ŋɩɩ.” 4Ŋɩɩ nɛ ba bɩra bʋl, “La kɔ dɩ la hɔŋ daha mʋa nɛ, bɛɛ wɩaa losu-la faasa hɛɩ nɛ Kɛnaŋ tinteeŋ lɛ, la pʋsʋŋ ma bɩ yaŋ ka na dɩ ba dii. La saa sʋlʋŋ dɩ ŋ leŋ dɩ la hɔŋ Goseŋ tinteeŋ lɛ.”
5Ŋɩɩ nɛ Ijipiti tinteeŋ kuoro bʋla pɩ Josɛf, “Ŋ nyɩmma arɩ ŋ naambiiriŋ kɔ ŋ teeŋ nɛ. 6Ka Ijipiti tinteeŋ hɛ ŋ nɩsɩŋ lɛ, leŋ dɩ ŋ nyɩmma arɩ ŋ naambiiriŋ hɔŋ lee-la sɩ zɔmɔ. Leŋ dɩ ba hɔŋ Goseŋ lɛ. Dɩ ŋ nɛ jɩŋ ba tʋɔŋ nɩalɩŋ sɩ jɩŋ pʋsʋŋ nyuŋ beniŋ woruŋ, leŋ dɩ ba bibeŋ mɩ pʋsʋŋ.”
7Ŋɩɩ nɛ Josɛf kɛŋ ʋ nyɩmma Jekɔb kaa kɔ Ijipiti tinteeŋ kuoro teeŋ. Jekɔb sʋl Wɩa pʋ. 8Ʋ sɩ sʋl Wɩa pʋ, ŋɩɩ harɩŋ Ijipiti tinteeŋ kuoro pɩɛsʋ, “Ŋ ŋaa jɩsɩŋ baŋmɛɛ nɛɛ?”
9Ŋɩɩ nɛ Jekɔb bʋla pʋ, “Mɩ sɩ gɔllɔ mɩ mɩɩsɩŋ kala lɛ ŋaa jɩsɩŋ zɔlɔ arɩ mara arɩ fii nɛ. Jɩsɩŋ deemba bɩ yʋgɛ aŋ dolie pɩmɛ, ama ba bɩ mɩ naabalɩmaba jɩsɩŋ yie.” 10Ŋɩɩ nɛ Jekɔb sʋl Wɩa pɩ Ijipiti tinteeŋ kuoro aŋ viiri.
11Josɛf leŋ ʋ nyɩmma arɩ ʋ naambiiriŋ hɔŋ Ijipiti tinteeŋ dɩ-zɔmʋŋ, lee-la ba sɩɩ yɩrɛ Ramesis lɛ, arɩ Ijipiti tinteeŋ kuoro sɩ dagɛ ŋɩɩ. 12Ŋɩɩ nɛ Josɛf magɩsɛ kʋdiilee pɩ ʋ nyɩmma arɩ ʋ naambiiriŋ arɩ ʋ nyɩmma dɩa nɩaa kala. Ʋ magɩsa pɩba magɛ ŋɩɩ nʋʋkala hambiisiŋ sɩ maga nɛ.
Ŋɩɩ Josɛf sɩ ŋaa, losuŋ sɩ jʋʋ Ijipiti tinteeŋ
13Kʋdiilii kala fa tuo Ijipiti arɩ Kɛnaŋ tinteeŋ lɛ. Ŋɩɩ nɛ losu-la wasa nyɛsɛ woruŋ nʋʋkala sʋsʋʋ losuŋ. 14Ŋɩɩ nɛ Josɛf laa moribie-la kala Ijipiti tɩŋŋaa arɩ Kɛnaŋ tɩŋŋaa sɩ kaa kʋ yɔɔ kʋdiilee pɩ Ijipiti tinteeŋ kuoro. 15Moribie-la fa sɩ hɛ Ijipiti arɩ Kɛnaŋ tinteeŋ kala lɛ fa sɩ dɛrɛ, ŋɩɩ nɛ Ijipiti tɩŋŋaa kala sii mʋ Josɛf teeŋ a bʋl, “Pɩla kʋdiilee, bɛɛ nɛ tɩɩ ŋ jaŋ bibenla ka la sʋsʋʋ losuŋ? La moribiee kala nɛ dɛrɛ.”
16Ŋɩɩ nɛ Josɛf bʋl, “Dɩ ma moribiee nɛ dɛrɛ, má kɛŋ ma pʋsʋŋ kʋ lenni kʋdiilee.” 17Ŋɩɩ nɛ ba kɛŋ ba pʋsʋŋ kaa kʋ lenni kʋdiilee. Ba janɩŋ, piesee, bʋʋnaa, nɛsɩŋ, arɩ kakusuŋ kala. Jɩna-la lɛ ba pʋsʋŋ nɛ ba kaa lenni kʋdiilee. 18Jɩna bɩra sɩ yie, ba bɩra kɔ Josɛf teeŋ a bʋl, “La kʋhɩaŋ, la bɩ jaŋ kaa faaŋ, la bɩra bɩ moribii kala kɛnɛ, la pʋsʋŋ ma kala nɛ dɛrɛ. La bɩra bɩ kʋŋkala kɛnɛ dɩ la pɩŋ, see la tɩtɩa arɩ la tinteeŋ nɛ ka. 19Bɛɛ nɛ tɩɩ ŋ jaŋ bibenla, ka laa sʋʋ losuŋ ka dɩ la tinteeŋ pɩna ta? Joŋ kʋdiilee yɔɔla arɩ la tinteeŋ kala dɩ la ŋaa Ijipiti tinteeŋ kuoro yosi, ka la tinteeŋ ma ŋaa ʋ kʋŋ. Pɩla kʋdoho dɩ la duu a na kʋdiilee a sɩ́ sʋʋ, ka dɩ la tinteeŋ pɩŋ pɛɩ.”
20Ŋɩɩ nɛ Josɛf yɔɔ Ijipiti tinteeŋ kala a pɩ ba kuoro. Ijipiti tɩŋŋaa kala joŋ ba tinteeŋ yallɛ, a tɩŋ losuŋ sɩ faasa jʋʋba wɩaa, tintee-la kʋ ŋaa Ijipiti tinteeŋ kuoro kʋŋ. 21Ŋ-la nɛ Josɛf to a kɛŋ Ijipiti tɩŋŋaa kala ba ŋaa yosi. 22Tintee-la dʋndʋŋa ʋ sɩ bɩ yɔbɔ nɛ ŋaa Wɩɩsʋllɩ sɩpaalaaraa tinteeŋ. Ijipiti tinteeŋ kuoro yie pɩpɩba kʋdiilee nɛ, ŋɩɩ nɛ tɩɩ ba-na bɩ ba tinteeŋ yalla.
23Ŋɩɩ nɛ Josɛf bʋla pɩ nɩalɩŋ, “Lɛɛlɛ mɩ sɩ yɔɔma arɩ ma tinteeŋ kala a pɩ ma kuoro, má laa kʋdoho mʋ duu tintee-la lɛ. 24Ama dɩ ma nɛ kʋ ŋaa ma baga kɩaa, ma kaa kpaa leree banɔŋ a joŋ dɔŋɔ a pɩ ma tinteeŋ kuoro. Ka dɩ kʋkaanaa ŋaa ma kʋdoho arɩ ma biiriŋ arɩ ma dɩa nɩaa kala kʋdiilee.”
25Ŋɩɩ nɛ ba bʋl, “Ŋ laa la mɩɩsɩŋ pɩla nɛ, la jaŋ jʋʋ ŋ lahɔrɩmɔ lɛ a ŋaa Ijipiti tinteeŋ kuoro yosi.”
26Ŋɩɩ nɛ Josɛf bil niiŋ deeŋ Ijipiti tinteeŋ kala lɛ dɩ ba tuto. Dɩ nʋʋkala nɛ ŋaa ʋ baga kɩaa, ʋ jaŋ kaa kpaa leree banɔŋ, dɩ kʋbala ŋaa Ijipiti tinteeŋ kuoro kʋa, ka kʋkaanaa ŋaa tɩɩna kɩaa. Arɩ jɩnɩŋ kala niiŋ deeŋ ha hɛ Ijipiti tinteeŋ lɛ ba tuto. Wɩɩsʋllɩ sɩpaalaaraa tinteeŋ dʋndʋŋ nɛ bɩ Ijipiti tinteeŋ kuoro kʋŋ ŋaa.
27Iziral tɩŋŋaa hɔŋ Goseŋ lɛ Ijipiti tinteeŋ a dʋa kɩaa kɩŋkɛŋ, ba nɩaa ma pʋŋ woruŋ a pɛ.
28Jekɔb hɔŋ Ijipiti tinteeŋ lɛ jɩsɩŋ fii arɩ balɩpɛ nɛ. Jekɔb mɩɩsɩŋ kala lɛ ʋ fa ŋaa jɩsɩŋ zɔlɔ arɩ mahɩŋ balɩa arɩ balɩpɛ nɛ. 29Ʋ mɩɩsɩŋ sɩ kpagɛ dɛrɩŋ, ʋ yɩrɛ ʋ nanʋala Josɛf a bʋla pʋ, “Dɩ ŋ nɛ chomi, joŋ ŋ nɩsɩŋ hɛ mɩ naapuiŋ bʋbʋɔŋ a hɛ niiŋ pɩmɛ arɩ wʋtɩtɩɩ, dɩ mɩ nɛ sʋba ŋ bɩ jaŋ jommi hugi Ijipiti tinteeŋ lɛ, 30ama dɩ mɩ nɛ kʋ sʋʋ, ŋ jaŋ jommi kaa mʋ hugi lee-la ba sɩ hugi mɩ nyɩmmaba.”
Ŋɩɩ nɛ Josɛf bʋl, “Mɩ jaŋ ŋaa wɩɩ-la kala ŋ sɩ bʋla.” 31Ŋɩɩ nɛ Jekɔb bʋl, “Ŋmɩɛsa pɩmɛ.” Josɛf ŋmɩɛsa pʋ. Ŋɩɩ nɛ Iziral tɩɛbɛ ʋ dantɩga aŋ dɛnnɛ Wɩa.
Právě zvoleno:
WƖAA DƖ-SUOMUŊ 47: SIS
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
©Ghana Institute of Linguistics Literacy and Bible Translation 1984, 2014