WƖAA DƖ-SUOMUŊ 46
46
Jekɔb mʋ Ijipiti tinteeŋ
1Ŋɩɩ nɛ Iziral paa ʋ kɩaa kala a mʋmʋ Ijipiti tinteeŋ. Ʋ sɩ yi Bɛɛsɩba, ʋ kpʋ pʋsʋŋ a ŋaa Wɩɩsʋlʋŋ a siili ʋ nyɩmma Aɩzɩk Wɩa.
2Tɩtaŋ kʋbala Wɩa bʋl wɩaa pɩ Iziral arɩ duosoo tʋɔŋ a yɩrʋ, “Jekɔb, Jekɔb.”
Ŋɩɩ nɛ ʋ sɛɩ, “Na mɩ nɛ ŋ-la.”
3Ŋɩɩ nɛ Wɩa bʋla pʋ, “Mɩ nɛ Wɩa, Wɩa-la sɩ ŋaa ŋ nyɩmma Wɩa. Sɩ́ fawʋllʋŋ fá arɩ ŋ sɩɩ mʋ Ijipiti tinteeŋ, bɛɛ wɩaa mɩ jaŋ leŋ ŋ dɩ ŋ doho nɩaa pʋŋ a ŋaa tintee-bal lee-la. 4Mɩ jaŋ to ŋ harɩŋ a mʋ Ijipiti tinteeŋ aŋ bɩra kɛnɩŋ kɔ daha. Ŋ jaŋ sʋʋ Josɛf nɩsɩŋ lɛ.”
5Ŋɩɩ nɛ Jekɔb sii Bɛɛsɩba lɛ. Iziral hambolibiisiŋ joŋ ba nyɩmma Jekɔb arɩ ba biiriŋ arɩ ba haalaa a hɛ pʋsʋŋ toruko-la lɛ Ijipiti kuoro sɩ leŋe ba kaa kɔ dɩ ba paaba. 6Ba pɛ kɛsɛ ba pʋsʋŋ kala arɩ kɩalɩŋ ba sɩ dʋa Kɛnaŋ tinteeŋ lɛ. Jekɔb dɩ ʋ dɩa nɩaa kala sii mʋ Ijipiti tinteeŋ. 7Ʋ kɛŋ ʋ hambolibiisiŋ, ʋ hantolibiisiŋ, ʋ nihee arɩ ʋ dɩa nɩaa kala mʋ Ijipiti tinteeŋ.
8Iziral sɩ kɛŋ ʋ hambolibiisi-la a mʋ Ijipiti yɩraa nɛ ŋ-la:
Rubiŋ nɛ ŋaa Jekɔb bii-hɩaŋ.
9Rubiŋ hambolibiisiŋ nɛ ŋ-la:
Hanɔk, Pallu, Hɛzɩrɔŋ arɩ Kaamɩ.
10Simioŋ hambolibiisiŋ nɛ ŋ-la:
Jɛmʋɛl, Jamɩŋ, Ohad, Jakɩŋ, Zoha arɩ Sawʋl. Sawʋl fa ŋaa Kɛnaŋ tɩŋŋaa tolo bie nɛ.
11Levi hambolibiisiŋ nɛ ŋ-la:
Gɛsɔŋ, Kohaf arɩ Mɛrarɩ.
12Juda hambolibiisiŋ nɛ ŋ-la:
Ɛɛ, Onaŋ, Sɛla, Pɛrɛs arɩ Zɛra. Ama Ɛɛ arɩ Onaŋ sʋʋ Kɛnaŋ tinteeŋ lɛ nɛ, aŋ ka ba-na sii nɩmɛ.
Pɛrɛs biiriŋ nɛ Hɛzɩrɔŋ arɩ Hamul.
13Ɩsaka hambolibiisiŋ nɛ ŋ-la:
Tola, Pʋa, Jasub arɩ Sɩmɩrɔŋ.
14Zebuluŋ hambolibiisiŋ nɛ ŋ-la:
Sɛrɛd, Ɛlɔŋ arɩ Jaalɛl.
15Biiriŋ deemba nɛ Liya lʋla pɩ Jekɔb Mesopotemia lɛ, a pɛ ʋ tolo Daana lɛ. Ʋ hambolibiisiŋ arɩ ʋ hantolibiisiŋ kala ŋaa mara arɩ fii arɩ batori nɛ.
16Gad hambolibiisiŋ nɛ ŋ-la:
Zɛfɔŋ, Hagi, Suni, Ɛzɩbɔŋ, Ɛrɩ, Arodi arɩ Areli.
17Asa hambolibiisiŋ nɛ ŋ-la:
Imina, Isiva, Isivi arɩ Bɛrɩa.
Ba dɩhaala yɩrɩŋ nɛ Sɛra.
Bɛrɩa ma hambolibiisiŋ nɛ ŋ-la: Hɛba arɩ Malɩkɩɛl.
18Hambolibiisiŋ deemba nɛ Zilipa lʋla pɩ Jekɔb, nɩɩ-la Labaŋ sɩ joŋo daŋ ʋ tolo Liya. Ba kala ŋaa fii arɩ balɩdʋ nɛ.
19Jekɔb haala Rakɛl hambolibiisiŋ nɛ ŋ-la:
Josɛf arɩ Bɛnjamɩŋ. 20Josɛf arɩ Asɛnaf lʋl Manasɛ arɩ Efirem Ijipiti tinteeŋ lɛ. Asɛnaf fa ŋaa Pɔtɩfɛra tolo nɛ, a ŋaa Wɩɩsʋllɩ sɩpaalaara Ɔŋ lɛ.
21Bɛnjamɩŋ hambolibiisiŋ nɛ ŋ-la:
Bɛla, Bɛka, Asɩbɛl, Gɛra, Naamaŋ, Ehi, Ros, Mupim, Hupim arɩ Aad.
22Hambolibiisiŋ deemba ŋaa Rakɛl arɩ Jekɔb doho nɩaa nɛ. Ba kala ŋaa fii arɩ banɛsɛ nɛ.
23Daŋ bie nɛ Husim.
24Nafɩtalɩ hambolibiisiŋ nɛ ŋ-la:
Jazɩɛl, Guni, Jeza, arɩ Sɩlɛm.
25Hambolibiisiŋ deemba nɛ Biliha lʋla pɩ Jekɔb, nɩɩ-la Labaŋ sɩ joŋo daŋ ʋ tolo Rakɛl. Ba kala ŋaa balɩpɛ nɛ.
26Jekɔb doho nɩaa kala fa sɩ to ʋ harɩŋ mʋ Ijipiti tinteeŋ ŋaa mahɩŋ batori arɩ balɩdʋ nɛ a lɩɩsɛ ʋ bii-haalaa ta. 27Josɛf fa lʋl biiriŋ balɩa nɛ Ijipiti tinteeŋ lɛ. Josɛf arɩ ʋ biiriŋ fa sɩ pɛ Jekɔb doho nɩaa lɛ, ba kala ŋaa mahɩŋ batori arɩ fii nɛ.
Jekɔb arɩ ʋ doho nɩaa Ijipiti tinteeŋ lɛ
28Jekɔb tɩŋ Juda dɩ ʋ laa sɩpaaŋ mʋ Josɛf teeŋ a bʋla pʋ dɩ ʋ kʋ chemba Goseŋ tinteeŋ lɛ dɩ ba nɛ kɔ. 29Ŋɩɩ nɛ Josɛf sii joŋ ʋ jaaba arɩ ʋ toruko a mʋ Goseŋ dɩ ʋ cheŋ ʋ nyɩmma. Ʋ sɩ mʋ chemu, ʋ guori ʋ nyɩmma Iziral aŋ yel a dieni.
30Ŋɩɩ nɛ Jekɔb bʋla pɩ Josɛf, “Lɛɛlɛ mɩ jaŋ wuo sʋʋ, mɩ folo naŋ nɛ a jɩŋ ŋ hɛ ŋ mɩɩsɩŋ lɛ.”
31Ŋɩɩ nɛ Josɛf bʋla pɩ ʋ naambiiriŋ arɩ ʋ nyɩmma dɩa nɩaa kala, “Mɩ jaŋ mʋ bʋla pɩ Ijipiti tinteeŋ kuoro arɩ mɩ naambiiriŋ arɩ mɩ nyɩmma doho nɩaa kala fa sɩ hɛ Kɛnaŋ tinteeŋ lɛ kɔ mɩ teeŋ nɛ. 32Mɩ jaŋ bʋla pʋ arɩ ma ŋaa kʋdaaraa nɛ, ma kɛŋ ma pʋsʋŋ arɩ ma kʋŋkala kaa kɔ nɛ. 33Dɩ Ijipiti tinteeŋ kuoro nɛ yɩrɛma a pɩɛsɛma arɩ tɩntɩŋ bɛɛ nɛ ma tɩtɩŋ, 34má chaasa bʋla pʋ arɩ ma sɩ sie kala, pʋsʋŋ nɛ ma dɩdaa arɩ ma nyɩmmaba fa sɩ sii a ŋɩŋaa ŋɩɩ ba mɩɩsɩŋ kala lɛ. Dɩ ma nɛ bʋl ŋ-la, ʋ jaŋ leŋ ma mʋ hɔŋ Goseŋ tinteeŋ lɛ.” Josɛf bʋl wɩɩŋ deeŋ, bɛɛ wɩaa Ijipiti tɩŋŋaa sɩɩŋ jʋʋ nɩalɩŋ sɩɩ daa pʋsʋŋ nɛ.
Právě zvoleno:
WƖAA DƖ-SUOMUŊ 46: SIS
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
©Ghana Institute of Linguistics Literacy and Bible Translation 1984, 2014