WƖAA DƖ-SUOMUŊ 39
39
Pɔtɩfa haala nyɩɛ wɩaa pɩ Josɛf
1Ɩsɩmɛl doho nɩalɩŋ sɩ yɔɔ Josɛf ʋ naambiiriŋ teeŋ kɛnʋ mʋ Ijipiti tinteeŋ. Ŋɩɩ nɛ Pɔtɩfa sɩ ŋaa laalɩyuoro-la sɩɩ pɔ Ijipiti tinteeŋ kuoro nɩhɩaŋ laaʋ yɔɔ ba nɩsɩŋ lɛ.
2Ŋɩɩ nɛ Wɩa chɩŋ Josɛf harɩŋ, ʋ wɩɩkala wasɛ ʋ kʋhɩaŋ Ijipiti tɩɩna-la dɩa lɛ. 3Ʋ kʋhɩaŋ na arɩ Wɩa chɩŋ Josɛf harɩŋ nɛ a leŋ ʋ wɩɩkala wʋwasɛ woruŋ. 4Ŋɩɩ nɛ Pɔtɩfa cho Josɛf wɩaa a leŋ ʋ ŋaa ʋ tɩntɩnnʋ, ʋ joŋ ʋ dɩa arɩ kʋŋkala ʋ sɩ kɛnɛ hɛ ʋ nɩsɩŋ lɛ ʋ bibeŋ. 5Bʋa-la lɛ ʋ sɩ joŋu hɛ ʋ bibeŋ ʋ dɩa arɩ ʋ kʋŋkala ʋ sɩ kɛnɛ, La TƖƖNA pɛ Ijipiti tɩɩna-la dɩa nɩaa kala lɛ a tɩŋ Josɛf wɩaa. La TƖƖNA leŋe Pɔtɩfa kʋŋkala wasɛ nɛ, ʋ dɩa arɩ ʋ baga kɩaa kala. 6Ʋ joŋ ʋ kʋŋkala hɛ Josɛf nɩsɩŋ lɛ aŋ ta ʋ jɩa. Ʋ kʋdiilee dʋndʋŋa wɩaa nɛ chɩlʋ.
Josɛf fa waa nɛ woruŋ, a ŋaa bapʋɔsɛ-zɔŋ. 7Ʋ ŋɩɩ harɩŋ lɛ Pɔtɩfa haala suomo hɩhɩɛnɛ Josɛf a bʋla pʋ, “Kɛmmɛ pɩŋ.”
8Ama Josɛf vɩa aŋ bʋl, “Mɩ kʋhɩaŋ joŋ ʋ dɩa arɩ kʋŋkala a hɛ mɩ nɩsɩŋ lɛ nɛ mɩ bibeŋ. 9Nʋʋkala bɩ mɩ kɩɩ dɩa deeŋ lɛ. Ʋ bɩ kʋŋkala joŋo faamɛ, ŋ dʋndʋŋa nɛ ʋ bɩ joŋo hɛ mɩ nɩsɩŋ lɛ a tɩŋ ŋ sɩ ŋaa ʋ haala wɩaa. Ɛɛ nɛ saa mɩ jaŋ wuo ŋaa wʋbɔmʋŋ deeŋ a chei Wɩa tʋɔŋ?” 10Arɩ Josɛf sɩ vɩa dɩ ʋ nɩɩ haal-la sɩ bʋl ŋɩɩ, a vɩa dɩ ʋ kɛnʋ pɩŋ, a paala bɩ chɛ dɩ ʋ kpagʋ, haal-la ha pɛsɛ Josɛf lɛ tapʋlɩɩ kala.
11Tapʋlɩɩ kʋbala dɩa-la tɩntɩnnaa kʋŋkala tuo, ka Josɛf jʋʋ dɩa-la dɩ ʋ tɩŋ ʋ tɩntɩŋŋaa. 12Ŋɩɩ nɛ haal-la kɛŋ Josɛf gɛrɩŋ lɛ aŋ bʋl, “Kɛmmɛ pɩŋ.” Ŋɩɩ nɛ Josɛf leŋ ʋ gɛrɩŋ haal-la nɩsɩŋ lɛ aŋ fá lɩɩ.
13Ʋ sɩ na dɩ Josɛf leŋ ʋ gɛrɩŋ pʋ aŋ fá lɩɩ, 14ŋɩɩ nɛ ʋ yɩrɛ ʋ dɩa tɩntɩnna-la a bʋla pɩba, “Má na mɩ bala Pɔtɩfa kɛŋ Hiburu tɩɩna deeŋ kɔ dɩ ʋ hɩɩsɛla nɛ. Ʋ kʋ jʋʋ dɩ ʋ gurigimi nɛ mɩ bunsi. 15Ʋ sɩ nɩa mɩ bunso ŋɩɩ, ʋ fá kagɛ ʋ gɛrɩŋ lɛ.”
16Ŋɩɩ nɛ ʋ joŋ gɛrɩ-la bil ʋ teeŋ ʋ bala kɔ. 17Ŋɩɩ nɛ ʋ bʋla pɩ ʋ bala a bʋl, “La yomo-la sɩ ŋaa Hiburu tɩɩna ŋ kaa kʋ jʋʋ la dɩa kʋ jʋʋ dɩ ʋ gurigimi nɛ. 18Ama mɩ sɩ bunso, ʋ fá lɩɩ kagɛ ʋ gɛrɩŋ lɛ.”
19Josɛf kʋhɩaŋ sɩ nɩɩ wɩɩ-la ʋ haala sɩ bʋla pʋ a mʋ tɩgɛ wɩalɩŋ Josɛf sɩ joŋo ŋaa ʋ lɛ, ʋ baanɩŋ sii. 20Ŋɩɩ nɛ Josɛf kʋhɩaŋ kɛnʋ mʋ tɔ kuoroo nɩtɔɔrɩ dɩa lɛ ʋ hɛ nɩmɛ. 21Ama La TƖƖNA ha chɩŋ Josɛf harɩŋ nɛ a fá ʋ nisusuŋ a leŋ nɩtɔɔrɩ dɩa-la kʋhɩaŋ cho ʋ wɩaa. 22Ŋɩɩ nɛ nɩɩ-la sɩɩ beŋ nɩtɔɔrɩ dɩa la joŋ nɩalɩŋ kala ba sɩ kaa tɔ dɩa arɩ wɩɩ na-kala ba sɩɩ ŋaa lee-la a hɛ Josɛf nɩsɩŋ lɛ dɩ ʋ bibemba. 23Nɩtɔɔrɩ dɩa-la kʋhɩaŋ ma fa ta jɩa nɛ a mʋ tɩgɛ kʋŋ na-kala ʋ sɩ joŋo hɛ Josɛf nɩsɩŋ lɛ, bɛɛ wɩaa La TƖƖNA fa chɩŋ Josɛf harɩŋ nɛ a leŋ wɩɩ na-kala ʋ sɩɩ ŋaa vɩvɛŋ woruŋ.
Právě zvoleno:
WƖAA DƖ-SUOMUŊ 39: SIS
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
©Ghana Institute of Linguistics Literacy and Bible Translation 1984, 2014