ໂຢຮັນ 10
10
ພຣະເຢຊູເຈົ້າຊົງເປັນຜູ້ລ້ຽງທີ່ດີ
1“ເຮົາບອກພວກເຈົ້າຕາມຄວາມຈິງວ່າ, ຄົນທີ່ບໍ່ເຂົ້າຄອກແກະທາງປະຕູ ແຕ່ປີນເຂົ້າທາງອື່ນກໍເປັນຂະໂມຍແລະໂຈນ. 2ແຕ່ຜູ້ທີ່ເຂົ້າທາງປະຕູກໍເປັນຄົນລ້ຽງແກະ. 3ຄົນເຝົ້າປະຕູ ກໍໄຂປະຕູໃຫ້ແກ່ຜູ້ນັ້ນ ແລະຝູງແກະກໍຟັງສຽງຂອງເພິ່ນ ເພິ່ນເອີ້ນແກະຂອງຕົນຕາມຊື່ ແລະພາອອກໄປ. 4ເມື່ອນຳຝູງແກະຂອງຕົນ ເພິ່ນກໍນຳໜ້າຝູງແກະໄປ ແລະຝູງແກະກໍຕາມເພິ່ນໄປ ເພາະຮູ້ຈັກສຽງຂອງເພິ່ນ. 5ຝູງແກະຈະບໍ່ຕາມຄົນແປກໜ້າ ແຕ່ຈະແລ່ນໜີໄປຈາກຄົນນັ້ນ ເພາະບໍ່ຮູ້ຈັກສຽງຂອງຄົນແປກໜ້ານັ້ນ.”
6ພຣະເຢຊູເຈົ້າໄດ້ກ່າວຄຳອຸປະມານີ້ແກ່ພວກເຂົາ ແຕ່ພວກເຂົາບໍ່ເຂົ້າໃຈວ່າ ພຣະອົງໝາຍເຖິງຫຍັງ. 7ດັ່ງນັ້ນ ພຣະເຢຊູເຈົ້າຈຶ່ງກ່າວອີກວ່າ, “ເຮົາບອກເຈົ້າທັງຫລາຍຕາມຄວາມຈິງວ່າ ເຮົານີ້ແຫຼະ ເປັນປະຕູຂອງແກະທັງຫລາຍ. 8ບັນດາຜູ້ທີ່ມາກ່ອນເຮົານັ້ນ ເປັນຂະໂມຍແລະໂຈນ ແຕ່ຝູງແກະບໍ່ໄດ້ຟັງພວກເຂົາ. 9ເຮົານີ້ແຫຼະ ເປັນປະຕູ ຜູ້ໃດກໍຕາມທີ່ເຂົ້າມາທາງເຮົາກໍຈະໄດ້ພົ້ນ ແລ້ວຈະເຂົ້າມາແລະອອກໄປ ທັງຈະພົບອາຫານດ້ວຍ. 10ຂະໂມຍມາ ກໍພຽງແຕ່ຈະລັກ ຈະຂ້າແລະທຳລາຍເທົ່ານັ້ນ ຝ່າຍເຮົາໄດ້ມາ ເພື່ອເຂົາຈະໄດ້ຊີວິດ ແລະຈະໄດ້ຊີວິດຢ່າງຄົບບໍລິບູນ.
11ເຮົານີ້ແຫຼະ ເປັນຜູ້ລ້ຽງແກະທີ່ດີ ຜູ້ລ້ຽງທີ່ດີຍ່ອມສະຫລະຊີວິດຂອງຕົນເພື່ອຝູງແກະ. 12ຜູ້ຮັບຈ້າງ ຄືຜູ້ທີ່ບໍ່ແມ່ນຄົນລ້ຽງແກະ ແລະທັງບໍ່ເປັນເຈົ້າຂອງແກະ ເມື່ອເຫັນໝາໄນມາ ລາວກໍປະຖິ້ມຝູງແກະ ແລະແລ່ນປົບໜີໄປ ໝາໄນຈຶ່ງກັດ ແລະຍາດເອົາຝູງແກະເຮັດໃຫ້ເຂົາແຕກຊະກັນໄປ. 13ຄົນຮັບຈ້າງແລ່ນປົບໜີ ເພາະວ່າລາວເປັນພຽງແຕ່ຄົນຮັບຈ້າງ ແລະລາວບໍ່ຫ່ວງໃຍນຳຝູງແກະ. 14ເຮົານີ້ແຫຼະ ເປັນຜູ້ລ້ຽງທີ່ດີ ເຮົາຮູ້ຈັກແກະຂອງເຮົາ ແລະແກະຂອງເຮົາກໍຮູ້ຈັກເຮົາ. 15ເໝືອນດັ່ງພຣະບິດາເຈົ້າຮູ້ຈັກເຮົາ ແລະເຮົາກໍຮູ້ຈັກພຣະບິດາເຈົ້າ ເຮົາເຕັມໃຈສະຫລະຊີວິດເພື່ອຝູງແກະຂອງເຮົາ. 16ມີຝູງແກະອື່ນທີ່ເປັນຝູງແກະຂອງເຮົາ ແຕ່ບໍ່ຢູ່ໃນຄອກນີ້ ເຮົາຈະຕ້ອງພາແກະເຫຼົ່ານັ້ນມາເໝືອນກັນ ພວກເຂົາຈະຟັງສຽງຂອງເຮົາ ເຮົາຈະເຕົ້າໂຮມພວກເຂົາເຂົ້າເປັນຝູງດຽວທີ່ມີຜູ້ລ້ຽງແຕ່ຜູ້ດຽວ.
17ດ້ວຍເຫດນີ້ ພຣະບິດາເຈົ້າຈຶ່ງຮັກເຮົາ ເພາະເຮົາສະຫລະຊີວິດຂອງເຮົາ ເພື່ອຈະຮັບຊີວິດນັ້ນຄືນມາ. 18ບໍ່ມີຜູ້ໃດຍາດເອົາຊີວິດໄປຈາກເຮົາ, ແຕ່ເຮົາສະຫລະຊີວິດດ້ວຍໃຈສະໝັກຂອງເຮົາເອງ, ເຮົາມີສິດທີ່ຈະສະຫລະຊີວິດນັ້ນ ແລະມີສິດທີ່ຈະຮັບເອົາຄືນ ຄຳສັ່ງນີ້ເຮົາໄດ້ຮັບຈາກພຣະບິດາເຈົ້າຂອງເຮົາ.”
19ຍ້ອນຂໍ້ຄວາມເຫຼົ່ານີ້ ຊາວຢິວຈຶ່ງເກີດມີການແຕກແຍກກັນອີກ. 20ມີຫລາຍຄົນໃນພວກເຂົາເວົ້າວ່າ, “ຜີມານຮ້າຍສິງລາວຢູ່ ແລະລາວກຳລັງເປັນບ້າ ຟັງລາວເຮັດຫຍັງ?” 21ແຕ່ພວກອື່ນເວົ້າວ່າ, “ຄົນມີຜີມານຮ້າຍສິງບໍ່ເວົ້າຢ່າງນີ້ດອກ ຜີມານຮ້າຍຈະເຮັດໃຫ້ຄົນຕາບອດເຫັນຮຸ່ງໄດ້ຊັ້ນບໍ?”
ພຣະເຢຊູເຈົ້າຖືກພວກຢິວປະຕິເສດ
22ເວລານັ້ນເປັນລະດູໜາວ ພໍດີເປັນເທດສະການສະຫລອງຖວາຍພຣະວິຫານໃນນະຄອນເຢຣູຊາເລັມ. 23ສ່ວນພຣະເຢຊູເຈົ້າກໍຍ່າງໄປມາໃນພຣະວິຫານ ທີ່ລະບຽງໂຊໂລໂມນ. 24ປະຊາຊົນໄດ້ມາອ້ອມພຣະອົງແລ້ວຖາມວ່າ, “ຈະໃຫ້ພວກເຮົາສົງໄສໄປດົນປານໃດ? ຈົ່ງບອກພວກເຮົາໃຫ້ຮູ້ຄັກສາວ່າ ທ່ານເປັນພຣະຄຣິດບໍ?”
25ພຣະເຢຊູເຈົ້າຕອບວ່າ, “ເຮົາໄດ້ບອກພວກເຈົ້າແລ້ວ ແຕ່ພວກເຈົ້າບໍ່ເຊື່ອ ພາລະກິດທີ່ເຮົາເຮັດໃນພຣະນາມພຣະບິດາເຈົ້າຂອງເຮົານັ້ນ ກໍເປັນພະຍານຢືນຢັນໃຫ້ເຮົາ, 26ແຕ່ພວກເຈົ້າບໍ່ໄດ້ເຊື່ອ ເພາະພວກເຈົ້າບໍ່ແມ່ນຝູງແກະຂອງເຮົາ. 27ແກະຂອງເຮົາກໍຟັງສຽງຂອງເຮົາ, ເຮົາຮູ້ຈັກພວກເຂົາ ແລະພວກເຂົາກໍຕາມເຮົາໄປ. 28ເຮົາໃຫ້ຊີວິດນິຣັນດອນແກ່ພວກເຂົາ ແລະພວກເຂົາກໍຈະບໍ່ຈິບຫາຍຈັກເທື່ອ ບໍ່ມີຜູ້ໃດຍາດເອົາພວກເຂົາອອກຈາກມືຂອງເຮົາໄດ້. 29ສິ່ງທີ່ພຣະບິດາເຈົ້າຂອງເຮົາໄດ້ໃຫ້ແກ່ເຮົານັ້ນ ກໍໃຫຍ່ກວ່າທຸກສິ່ງ. ແລະບໍ່ມີຜູ້ໃດຍາດເອົາພວກເຂົາຈາກກຳມືພຣະບິດາເຈົ້າຂອງເຮົາໄດ້. 30ເຮົາກັບພຣະບິດາເຈົ້າກໍເປັນອັນໜຶ່ງອັນດຽວກັນ.”
31ປະຊາຊົນຈຶ່ງຈັບກ້ອນຫີນຈະແກວ່ງໃສ່ພຣະອົງ. 32ພຣະເຢຊູເຈົ້າກ່າວແກ່ພວກເຂົາວ່າ, “ເຮົາໄດ້ເຮັດໃຫ້ພວກເຈົ້າເຫັນການດີຫລາຍຢ່າງທີ່ມາຈາກພຣະບິດາເຈົ້າຂອງເຮົາ ພວກເຈົ້າຈະແກວ່ງກ້ອນຫີນໃສ່ເຮົາຍ້ອນເລື່ອງຫຍັງ?”
33ພວກຢິວຕອບຄືນວ່າ, “ພວກເຮົາຈະແກວ່ງກ້ອນຫີນໃສ່ເຈົ້າ ບໍ່ແມ່ນຍ້ອນການດີຢ່າງໃດຢ່າງໜຶ່ງ ແຕ່ຍ້ອນເຈົ້າເວົ້າໝິ່ນປະໝາດພຣະເຈົ້າ ເຈົ້າເປັນພຽງມະນຸດເທົ່ານັ້ນ, ແຕ່ເຈົ້າຕັ້ງເຈົ້າເອງເປັນພຣະເຈົ້າ.”
34ພຣະເຢຊູເຈົ້າຕອບພວກເຂົາວ່າ, “ມີຄຳຂຽນໄວ້ໃນກົດບັນຍັດຂອງພວກເຈົ້າບໍ່ແມ່ນບໍວ່າ, ‘ເຈົ້າທັງຫລາຍເປັນພຣະ.’ 35ຖ້າພຣະອົງຊົງເອີ້ນຜູ້ຮັບພຣະທຳຂອງພຣະເຈົ້າວ່າເປັນພຣະ ພຣະຄຳພີນັ້ນຈະຖືກລຶບລ້າງເສຍບໍ່ໄດ້. 36ພວກເຈົ້າເວົ້າໃຫ້ເຮົາວ່າ, ເຮົາເວົ້າໝິ່ນປະໝາດພຣະເຈົ້າ ຍ້ອນເຮົາໄດ້ເວົ້າວ່າ, ເຮົາເປັນພຣະບຸດຂອງພຣະເຈົ້າຊັ້ນບໍ? 37ຖ້າເຮົາບໍ່ໄດ້ເຮັດພາລະກິດຂອງພຣະບິດາເຈົ້າຂອງເຮົາ ພວກເຈົ້າກໍຢ່າເຊື່ອໃນເຮົາ. 38ແຕ່ຖ້າເຮົາເຮັດພາລະກິດນັ້ນ ເຖິງພວກເຈົ້າບໍ່ເຊື່ອເຮົາກໍຕາມ ກໍຈົ່ງເຊື່ອໃນພາລະກິດນັ້ນ ເພື່ອພວກເຈົ້າຈະໄດ້ຮູ້ຈັກ ແລະເຊື່ອໝັ້ນວ່າ, ພຣະບິດາເຈົ້າຢູ່ໃນເຮົາ ແລະເຮົາຢູ່ໃນພຣະບິດາເຈົ້າ.”
39ເຫດສະນັ້ນ ພວກເຂົາໝາຍທີ່ຈະຈັບພຣະອົງອີກ ແຕ່ພຣະອົງໜີພົ້ນຈາກມືຂອງພວກເຂົາໄປໄດ້.
40ແລ້ວພຣະອົງກໍຂ້າມແມ່ນໍ້າຈໍແດນ ໄປບ່ອນທີ່ໂຢຮັນໃຫ້ຮັບບັບຕິສະມາແຕ່ກ່ອນນັ້ນ ແລະພຣະອົງກໍພັກຢູ່ທີ່ນັ້ນ. 41ມີຫລາຍຄົນໄດ້ມາຫາພຣະອົງ ແລະເວົ້າວ່າ, “ໂຢຮັນບໍ່ໄດ້ເຮັດໝາຍສຳຄັນການອັດສະຈັນຈັກຢ່າງ, ແຕ່ທຸກສິ່ງທີ່ໂຢຮັນເວົ້າເຖິງທ່ານຄົນນີ້ ກໍເປັນຄວາມຈິງທັງໝົດ.” 42ໃນທີ່ນັ້ນ ໄດ້ມີຫລາຍຄົນເຊື່ອໃນພຣະອົງ.
Právě zvoleno:
ໂຢຮັນ 10: ພຄພ
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
@ 2012 United Bible Societies. All Rights Reserved.
