Luka 15
15
Ala Nya Bwi-Bwiyi Bwa
1A gadu gwo yi n ɓa to n gaici yai nyi m, ɓedo n alaifida hoi ɓei zhin ɓa ɓe ntuge ɓa wo ɓeda. 2Amma kwo to ɓei da a Farisiyi tukwoda m, ntuge Yesu ɓei zhin woi dami n laifi dai har ma woi gyi nyagyi n ɓai. 3-4 Ntucenu Yesu wa gaɓa misali ye, “Oza n wo n anai lo tagyi, amma gmanyi kwa bwi, wo ta fa adeyi zhi vinya wa lo wo dna deyi wye har wa gye kwo m? 5Nsayi wa ɓe nkoi na gmadai n api n kwoi tu nwo bwapa m. 6Sanu wa si api kwa wo ɓa yi owo anugundo n wo azaje yi ɓa dagma gama wola ena gmanyi gye n kwa bwi nyi.
7“To, konyi lonu n She, Gama agmada lo n mwa n she ntu zaknayi ɓo n wa ga gaiciya ndu aza n ɓa shin Yesu viyi zhin lo nyi.
8“Ko kwa misali nyikwoza ho n zinariyai fi ngun awo. Ngmanyi a bwi wo, sai wa dna fitila na wa fin abaya vinya, woi zankwo zanyi ntuge wa gye kwo. 9N a ko bwa wa yi owo anugundo n wo azaje yi ntuge ɓa dagma. 10To, kwo wu lo nu. Ammalaika n she zhin ɓa dagma ntu laifida ɓo gmanyi n wa ga gaiciya.”
11Wa je ba misli ho gna ge, “Oza ho ɓei na ɓi ngun aba. 12Oza nawyi da wa gna owo dada ge, ‘Mi yelo ha gna yi oho gado n naiye, kafin ho fi.’ Owo dada kwa wa ye. 13Nsayi oɓi yi wa ku owo akaya wa lo ezhi ho nkpayi. Wa gyi agyiwye yi vinya. Wo si nyagyi ga aza laɓa, woi ce wo gyi a karuwa. 14Sanu agyiwye ɓwi ku wo zo, mikun kwa gmi n ezhi yi har to azai bwa nygyi m. 15Wa nya zaho n nabai wa gawo aburutu wa kna ɓa. 16Mikun ɓei zhin ko gun wo ce sosai, har ma ai wo wo ngye wo gyi aburutu nya gyi, amma to ai ga wo m.
17“Sanu wo ɓei zhin anyi ɓo nubo, nsayi wa cige, Ai n yi puwa ko abara ma ɓa n nyagyi lo sosai. Amma mi gninyi ya mikun ɓamiya. 18Miɓa jeze lo omi dada ba mi ciwo ge, ‘Dada miku laifi zhin Shekwoyi ɓedo n hoi. 19Mito kunce lo ha yi mi ge eho ɓi n shansun. Mi cei pma ma ze ho fyenu.’
20“Nsayi wa laka wa lo api da owo dada. Sanu wo ɓei ye ɓe n kpai owo dada gye wo. Wa busi lo wa zhin wo amabe har wa Shekma wo.
21“Eɓi yi waciwo ge, Mi ku laifi zhin ho ɓedo n Shekwoyi. Mito kunce lo m, ayi mi ge oho ɓi m.
22“Amma owo dada ci abara ge, ‘Fye ɓe n eje manayi fya kpe wo. Fye ɓe n bwai-nyai fya dnawo, fya ɓe na buadayi njesun. 23Fya ɓe n nakwo yi yawu ko, Tile ya zhin agmada sosai nya. 24Gama emi ɓi ye ɓei la fi, amma wola jeze ɓe. Wo ɓei la bwi amma ala wo gye.’ Sai n agmada yi nu sayi.
25“To, owo dnagma ɓei bwi nfwa woi zhin tnu-tnu; shi wo ɓei zhi wa wo ai gyi agaga nɓa puwa. 26Wa nya bara ho nya kwo zhin. 27Bara ho wa gna woge, ai oho mado nu la zhi. Oho dada kwa, woi la nakwo manayi wu wo, woi zhin agmada dnagmai ntu nwo ɓeɓe ɓo.
28“Wa gyi minagyi nsayi, har wa ma, to wa lodna n mi m. Owo dada wa ɓe wa ɓawo. 29Amma wa ci wo dada ge, esala mwa mi zhin ho tnu-tnu, har mi vi ho ɓo vinya. Amma ho to shin ena wu ntu mi ɓo m, ntuge ha zhin agmada deye pya m. 30Amma sanu n oho ɓi deye wa zhi, woi ku oho agyiwye zo wu n akaruwa laɓa hoi la nakwo manayi wuwo.
31“Owo dada ciwo ge, Emi ɓi yeye yi, ai ho kun sun lo n mi n saho-sahoyi, nya mi cei vinya oho nya nu. 32Amma kwo bmiya lo ya dagma. Gama wo zhin oho mado nu wo ɓei la fi amma wo la jeze ɓe. Wo ɓei la bwi amma a lawo gye wye.”
Právě zvoleno:
Luka 15: GAW
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Alkawali Woiwoyi
(Gbagyi New Testament)
Copyright © 1997 by Biblica, Inc.®
All rights reserved worldwide.
