Luka 16
16
Anabari Ntu Bemanayi Zhin Bo
1Nsayi Yesu w gna owa bara Nabari ye, “Gyiwyeda ho ɓei la zaho n nabai wa zhin wo manaja, esa fyewyi waya nabari nukwoyi wo tu nu tukwo.
2“Wa yi wo manaja waciwo ge, ‘Kni nu zhin hoi wyi mi agyiwyeʼa? To lo ho zhin shiri anyai vinya, gama miɓa gmi ho ya.’
3“Nsayi manaja yi wa zhin nubo wa cige, ‘Miɓa zhin wuna?’ Emi tnu-tnu ku zo ya mi-i ta mi ma nu ofwa m, mi ta ye-ge ma ze nyaɓayi m. 4To mi kpe ɓoye lo n mi ɓa zhin n nabai mi bwa anugundo n mwa ntu ge ɓei bma mi zhin.”
5-6 “Nsayi wa yi aza ɓe n cei n ɓa ɓei na ta shi owo maigida nyi, wa ci zaknayi ge, ‘Ho cei shi akniya?’ Zayi wa ciwo ge a galon 850 zaitun mi nya Manaja yi wa ciwo ge mila ce ho zunya. Ho ɓa gba tokunyi nu kawai.”
7“Wa je zado nya ge, ‘ho cei shi akniya?’ Zayi wa ciwo ge, ‘Mudu 1,000 alkama nya. Manaja ciwo ge to ho ɓa gba 800 nu kawai.’
8“Owo maigida cige, ‘Lalle mana ja ye cecei lo sosai.’ To, kwo bwawu lo nu a shetan da gna cecei n laifi zhin afa aza ɓa fi n buzangna nyi. 9Amma mi ɓa cifye ge fye zhin ngye wo n nabai fya bwa anugundo n gyifi dna? Deye ɓa lo n fyei n api nyalo-nyalo nya n she? 10Awo! Gama oza wo to n ɓefyecei lo n anya ɓi-ɓiyi m, wo tami wa zhin ɓefyece n anya dnagmayi m. 11Njesun n fye to zhin ɓefyece n aɓo anyi ya m, nyikado ɓei ga fye gaiciya ntu arziki eshe nya ɓoʼa?
12“Nfye to zhin ɓefyece n aza agyiwyei fye ɓa zhin ɓefyece n wuna n fya gyiwyeʼa?
13“Gama zaho-zahoi to lo n wo ɓa mi wa bwa a maigida ngun aba m. Ko ha ye zaknayi to ha ye zadeyi m, ko kwa ha ye zadeye to ha ye zadeyi m. Ho ta mi ha vi Shekwoyi ɓedo n agyiwyei n esa gmanyi m.”
14A Farisiyi ɓei zhin agyewye yei nu sosai. Ntuce nu ɓa gyi minagyi n woi.
15Nsayi Yesu wa ciɓa ge, Fye zhin aɓo ngye aza manayi, har ai ga fye mwa-mwa, amma Shekwoyi kpe fya bugba nukwoyiye lo. Ntu ge oɓo nkwo zhin ngye ɓemanayi nna zaba kwo zhin laifi nu n Shekwoyi aba. 16Kafin Yohanna wo ya waʼazi zhin n batisma yi, Musa owa, nu ɓei zhin fye zokwo ɓedo n waʼazi n anabi gbo-gbo ɓei zhin anyi. Amma Yohanna wa ɓe fye n nabari maayi nge Shekwoyi bemi la ga ɓe. To aza zhi nyi n mwa ɓai ye. 17Amma deye ta wu ge Musa owa to n ampanyi lo m. Ata mi a shan kwo do ngye ʼShe nkniyi.
18Ntuce oza n wa gmi owo nyikwo ya, wa la nyikwo do, wo ku anagbai zhin. Njesun oza wa la nyikwo n na la kwo gmiya to, wo ku anagbai zhin ce.
19Yesu wa cige, ozaho ɓei nyi n agyiwye yi sosai. Wo ɓei na je yi n mwa har woi dagma n saho-sahoi. 20Nwyihoi zaho ai yi wo ge Liazuru n wo ɓei zhin nyaɓai nu, n na ci kpe laɓa, a wo shi n Nyabwayi yi puwa. 21Sanu wo ɓei shi woi pmi nyagyi kwa kaya, n agyiwyeda yi ɓei zhin woi gyi nyi, a mwi ɓei zhin ɓai nyi wo aci. 22Nwyihoi Liazuru wa fi, amalaika lawo ɓa lo woi n Ibrahim aba. Nwyihoi gyiwyeda yi wa fi ce, Har a wo bi. 23Amma owo wyewyeyi kwa lo anapi, n ɓo wa gye Liazuru ngnisun n Ibrahim yi.
24“Wa cige, ‘Dada Ibrahim gye mi sun-sun, ha tnu n Liazuru yi n nabai wa dna owo bwai n nuwan, wa lice mi. Gama mi sin wahala lo n mwa.’
25“Amma Ibrahim wa ciwo ge ‘Eɓi pa sanu n ho ɓei dna n anyi ho ɓei nyaho-nyahoi n ho ɓei cei pma. Amma Liazuru to ɓei nya hoi m. Amma n saiye a zhin wo atna lo amma ho dna lo n wahala. 26Amma bokun dnalo n mwa, n ya tan-tasin n hoi ntuge oza wo cei pma wa piya lo fya ba, wo ta mi m. Zahonyin ta mi wa piya ɓe eya ba m.’
27“Nsayi nyabwayi wa ciwo ge ‘O dada Ibrahim suku-suku ha tnu n woi n mi dada puwa, 28Gama emi azaje lo ngun atnu, n nabai wo gnaɓa wahala ye ɓo, kada ɓaye ɓe ya ce ɓai ku fi.’
29“Amma Ibrahim wa ciwo ge, ‘Ai litafi ku gna ɓa. Oha maje ɓami ɓa ba litafi ndai gye ɓa ce pma lo.’
30“Arziki dayi wa ciwo ge, ‘Aʼa Dada Ibrahim ɓa ta gye ɓa nuwan ɓa ba m. Amma ndai zaho wa lo woi gmi n naku, ɓa ɓa fa oɓa laifi.’
31“Amma Ibrahim wa ciwo ge, ‘Ngye ɓa ta wo Musa ɓeda ɓedo n anabi yi m, To ɓa ta wo m, ko ozai laka n vingwo m.’ ”
Právě zvoleno:
Luka 16: GAW
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Alkawali Woiwoyi
(Gbagyi New Testament)
Copyright © 1997 by Biblica, Inc.®
All rights reserved worldwide.
