LUKA 22
22
Judase. Selalelo. Bogolo. Getsemane. Ba a mo swara ba mo sekiša. Petro
1Gwa tla monyanya wa dinkgwa tše di se nago komelo, wo ba rego ke wa Paseka. 2Baperisita ba bagolo le bamangwalo ba na ba nagana ka mo ba kago mmolaya ka gona; gobane ba be ba boifa setšhaba.
3Gomme Sathane a tsena Judase, e a reetšwego la Isikariothe, e bego e le wa palo ya ba lesome le metšo e mebedi. 4Yena yo a tloga a ya go baperisita ba bagolo le go ditona, a lakana nabo ka mo a tlogo mo gafela diatleng tša bona. 5Ba thaba, ba dumelelana ba re ba tlo mo nea tšhelete. 6Yena a itlema a re o tlo bona sebaka se botse sa go mo gafela diatleng tša bona go se na batho ba bantši.
7Gwa tla letšatši la dinkgwa di se nago komelo, la go hlaba kwana ya Paseka. 8Jesu a roma Petro le Johane, a re: Yang le re lokišetše Paseka, re tle re je.
9Ba re: O rata ge re ka e lokiša kae?
10Jesu a re: E tlo re ge le tsena motseng, le tlo gahlana le motho e a rwelego moeta wa meetse. Le mo latele, le ye ngwakong wo a tsenago go wona. 11Le bolele le mong wa ngwako woo le re: Moruti o re: Ngwako o kae wo nkago jela Paseka go wona le barutiwa ba ka? 12O tlo le laetša ngwako o mogolo wa godimo, wo o adilwego magogwa. Le lokiše gona fao.
13Barutiwa bao ba ya ba hwetša go le bjalo ka ge a ba boditše, mme ba lokiša Paseka.
14Ge lebaka le tlile a dula dijong le baapostola ba lesome le metšo e mebedi. 15A bolela le bona a re: Ke hlologetšwe gagologolo go ja Paseka ye le lena ke sešo ka hlokofatšwa. 16Gobane ke a le botša, nka se hlwe ke e ja, ge e se ge e phethegile mmušong wa Modimo.
17A tšea senwelo, a leboga, a re: Se tšeeng, le nwe, le šielane. 18Gobane ke a le botša, nka se hlwe ke enwa seenywa se sa morara, go be go fihle mmušo wa Modimo.
19A tšea senkgwa, a leboga, a ngwatha, a ba nea sona, a re: Ke mmele wa ka o newago ka baka la lena. Dirang bjalo gore e be go nkgopola. 20Ka mokgwa o bjalo a tšea le senwelo ka morago ga selalelo, a re: Senwelo se ke kgwerano e mpsha mading a ka a a tšhollwago ka baka la lena.
21Fela, tsebang, seatla sa e a nkekago se hleng ga ka fa majelong. 22Ge e le Morwamotho o ikela ka mo go laetšwego; fela, yo madimabe ke motho eo a tlogo mo eka.
23Ba thoma go botšišana seng, ba re e ka ba mang mo go bona, e a tlogo dira seo.
24Gwa tsoga kgang mo gare ga bona, ya go re e a swanetšwego ke go ba yo mogolo go bona ke mang. 25Jesu a bolela le bona a re: Dikgoši tša ditšhaba di a di buša; le ba ba di bušago ka tše thata, ba retwa ba thwe Sethakga. 26Go lena go se ke gwa ba bjalo. E mogolo mo go lena a a ke e monyenyane; e a bušago a a ke mohlankedi. 27Gobane e mogolo ke ofe? A ke eo a dutšego dijong? Goba ke eo a mo hlankelago? A ga se eo a dutšego dijong? Gomme nna gare ga lena nka ke mohlanka wa lena.
28Fela, ba ba kgotleletšego le nna melekong ya ka ke bolena. 29Gomme ke le bea mmušo, bjalo ka ge Tate a mpeile mmušo. 30Gore mmušong wa ka le je le nwe majelong a ka, le tle le dule ditulong tša bogoši, le ahlolele meloko e lesome le metšo e mebedi ya Isiraele.
31Gomme Morena a re: Simone! Simone! O tsebe gore Sathane o le kganyogile, gore a le fefere bjalo ka mabele. 32Fela, ke go rapeletše, gore tumelo ya gago e se ke ya fela; gomme wena, e tlo re ge o sokologile o tiiše bana beno.
33Simone a fetola a re: Morena, nna ke itokišitše, gore le ge e le kgolegong, le ge e le lehung, ke ye nago.
34Jesu a re: Ke a go botša, wena Petro, mogogonope lehono o tlo ba o sešo wa lla o šetse o latotše gararo wa re ga o ntsebe.
35A bolela le bona a re: Mohla wola ke le roma le se na sekhwama, le se na mokotla, le se na dieta, a le kile la hloka selo?
Bona ba re: Le gatee!
36Yena a re: Gomme lehono, e a nago le sekhwama, a se sware, le e a nago le mokotla; e a se nago lerumo, a a bapatše kobo a reke lona. 37Gobane ke a le botša, go nna go swanetše go phethega le taba yela e ngwadilwego ya re: O badilwe le badiradibe; gobane tše di ngwadilwego di era nna, di na le phethego ya tšona.
38Bona ba re: Morena, šedi ditšhoša tše pedi.
Yena a re: Go hwetše.
39A tšwa a ya thabeng ya mehlware, mo a bego a lemetše go ya gona; barutiwa ba gagwe ba mo latela. 40Ge a fihla felo fao, a bolela a re: Rapelang gore le se tsene melekong.
41A ubuga go bona, a ya go kago fihla leswika ge le betšwa, a khunama ka matolo a rapela. 42A re: Tata! Ge o ka rata, šuthiša senwelo se se mphete. Fela, go se dirwe thato ya ka, go dirwe ya gago. 43Gwa bonala morongwa wa legodimong a tlile go yena a mo nea maatla. 44A rapela a tlaletšwe wa motho e a hwago; dikudumela tša gagwe tša ba bjalo ka marotholodi a madi a rothelago fase.
45A tsoga moo thapelong, a tla go barutiwa ba gagwe, a ba hwetša ba robetše ka go nyama. 46A bolela le bona a re: Le robaletšeng? Tsogang le rapele, gore le se tsene melekong.
47A sa bolela, ba bona go fihlile lešaba la batho; yola a bitšwago Judase, e mongwe wa ba lesome la metšo e mebedi, a ba etile pele, a batamela Jesu, a mo atla. 48Jesu a mmotšiša a re: Judase, a o eka Morwamotho ka go mo atla?
49Barutiwa ge ba bona ba mo dikanetša, ba lemoga se se dirwago, ba re: Morena, a re ka rema ka ditšhoša? 50Ke ge e mongwe wa bona a rema mohlanka wa moperisita e mogolo, a mo ripa tsebe ya le letona.
51Jesu a re: Lesang: Le se ke la boeletša. A swara tsebe ya mohlanka eo, a mo fodiša.
52Gomme Jesu a bolela le baperisita ba bagolo le ditona tša Ntlokgethwa le ba bagolo, ba ba tlilego go mo swara, a re: Le tšwile ka marumo le ka melamo, eke le tlile go swara mohlakodi. 53Mola ke na le lena Ntlongkgethwa ka mehla, ga la ka la nkiša matsogo. Fela, le ke lona lebaka la lena le maatla a leswiswi.
54Ge ba mo swere, ba tloga nae ba mo iša ngwakong wa moperisita e mogolo. Petro a latela a le kgole. 55Ya re ge ba goditše mollo gare ga lapa, ba dutše sehlopha, Petro a tla a dula le bona. 56Mosetsana e mongwe a mmona a dutše mollong, a mo lebeleša a re: Le yo o be a na le yena.
57Petro a latola a re: Mosadi, nna ga ke mo tsebe.
58Ka moragwanyana e mongwe a mmona a re: Le wena o wa bona.
Petro a re: Monna, ga go bjalo.
59Gwa feta lebaka le e ka bago la nako e tee; ke ge e mongwe a tiišetša a re: Ruri, le yena yo o be a na nae; le gona ke wa Galilea.
60Petro a re: Monna! Nna ga ke tsebe se o se bolelago.
-- Ge a realo mogogonope wa lla. 61Morena a retologa, a lebelela Petro. Ke mo Petro a elelwago tše Morena a mmoditšego tšona, ge a re: Mogogonope ge o sešo wa lla, o tlo ba o latotše gararo wa re ga o ntsebe. 62A tšwela ntle a lla gabohloko.
63Banna bao ba go swara Jesu, ba mo kwera, ba mo itia; 64Ba mo khupetša mahlo, ba mo setla sefahlogo, ba mmotšiša ba re: Porofeta, ke mang a go setlilego? 65Ba mo goboša ka tše dingwe tše ntši tše ba di boletšego.
66Ge go esa, ba bagolo ba setšhaba le baperisita ba bagolo le bamangwalo, ba bokana ba mo iša lekgotleng la bona. 67Ba re: Re botše ge o le Kriste.
A fetola a re: Ge nka le botša, le ka se ke la dumela. 68Ge ke le botšiša, ga le fetole. 69Go tloga bjale Morwamotho o tlo dula ka letsogong le letona la maatla a Modimo.
70Bohle ba re: A o re o Morwa wa Modimo?
Jesu a fetola a re: Le boletše, gobane ke nna.
71Bona ba re: Re sa nyaka bohlatse bjang? Re di kwile ka nnoši di etšwa molomong wa gagwe.
Právě zvoleno:
LUKA 22: NSO51
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© Bible Society of South Africa 1986. Used with permission. All rights reserved.
