LUKA 21
21
Mosadi wa mohlologadi; tšhwalalanyo ya Jerusalema le bofelo bja lefase
1Ya re ge a lebelela a bona bahumi ge ba tšhela dineo tša bona polokelong ya Ntlokgethwa. 2A bona mosadi wa mohlologadi e a humanegilego a tšhela ditšheletiana tše pedi. 3A bolela a re: Ruri, ke a le botša mohlologadi yo wa modiitšana o tšhetše se se fetišago sa ba bangwe ka moka. 4Gobane bao ka moka ba ba tšhetšego moo go yago dineo, ba di ntšhitše go tše di ba tlaletšego; mme yena o ntšhitše bohumaneging bja gagwe, a tšhela tšohle tše a bego a tlo phela ka tšona.
5Ba bangwe ge ba bolela Ntlokgethwa ba re e thakgilwe ka mabje le ka matsaka. 6Yena a re: Ge e le tšeo le di bogelago, go etla matšatši ao go ka se kego gwa šadišwa lebje le sa hlatlagane le le lengwe, le sa ka la šuthišwa.
7Ba mmotšiša ba re: Moruti, ke tša go tlo direga neng? Gomme re tlo bona kang ge di šetše di tlo tšwelela?
8A re: Le bone gore le se forwe; gobane ba bantši ba tlo tla ka leina la ka ba re: Ke nna! Ba re: Lebaka le batametše! Le se ke la tšeetšana le bona. 9Mohla le kwago dintwa le meferefere, le se ke la tšhoga; gobane tšeo di swanetše go ba gona pele; bofelo bo tlo ba bo se kgauswi le go tla.
10A ba botša a re: Setšhaba se tlo tsogela setšhaba; mmušo o tlo tsogela mmušo. 11Go tlo ba le ditšhišinyego tše kgolo kua le kua, le ditlala le dinkhu, le tše di tšhošago, le matete a magolo e legodimo. 12Fela, ba tlo ba ba thomile go le iša matsogo, ba le tlaiša; ba tlo le sekiša diphuthegong tša bona, ba le iša kgolegong, la gogelwa pele ga dikgoši le babuši, ka baka la leina la ka. 13Fela, tšeo di tlo le diregela gore le bee bohlatse. 14Ke gona, felang le tseba tšeo, gore le se ke la belaela la re re tlo iphetolela bjang. 15Gobane ke nna ke tlogo le nea molomo le bohlale, bjo bahloi ba lena ka moka ba tlogo šitwa go bo fenya le go bo phema. 16Le gona le tlo lahlwa ke batswadi le bana ba bolena, le metswalo le bagwera, mme ba tlo bolaya ba bangwe ba lena. 17Le tlo ba ba ba hloilwego ke bohle ka baka la leina la ka. 18Fela, le thabe e tee ya moriri wa hlogo tša lena e ka se ke ya timela. 19Mme bophelo bja lena le tlo bo rua ka kgotlelelo.
20E re ge le bona motse wa Jerusalema o dikilwe ke makoko a madira, gona le tsebe gore go batametše go phušolwa ga wona. 21Mehleng yeo ba ba lego nageng ya Juda ba tšhabele dithabeng; ba ba lego mo motseng ba ngwege; ba dinakaneng ba se ke ba ya motseng. 22Gobane matšatši ao e tlo ba a tefetšo, gore go tšwelele tšohle tše di ngwadilwego. 23Ba madimabe mehleng yeo e tlo ba baima le ba ba amušago; gobane tlalelo e tlo ba e kgolo lefaseng e tlo ba kotlo e bogale e welago setšhaba se. 24Ba tlo fela ka bogale bja marumo; ba išwa bothopša ditšhabeng ka moka; mme Jerusalema o tlo gatakelwa ke bantle, go be go phethege mabaka a bantle.
25Go tlo ba le matete letšatšing le kgweding le dinaleding; mme lefaseng go tlo ba le tlalelo ditšhabeng. Di tlo gakanega ge lewatle le duma, mafula a lona a tsogile. 26Batho ba tlo nolega moko ka poifo le ka go dula ba re lefase le sa tlo welwa ke eng? Gobane le maatla a legodimo a tlo šišinyega. 27Ke moo ba tlogo bona Morwamotho a etla ka leru le ka maatla le ka letago le legolo. 28E re ge tšeo di thoma go direga, le inamologe, le tsoše dihlogo tša lena, ka gobane go tlo ba go batamela topollo ya lena.
29A ba botša seswantšho a re: Bonang mogo le dihlare ka moka. 30Ge le bona di hlogile le ye le tsebe ka noši gore lehlabula le batametše. 31Dirang bjalo le tabeng ye; ge le bona dilo tšeo di direga, le tsebe gore mmušo wa Modimo o batametše.
32Ruri, ke a le botša, di tlo direga tšohle moloko wo o sešo wa fela. 33Legodimo le lefase di tlo feta; gomme dipolelo tša ka di ka se ke tša feta.
34Fela, le itote gore dipelo tša lena di se ke tša imelwa ke bohori le go boiwa, le dipelaelo tša bophelo bjono, mme letšatši leo la tlo le wela sehlogo. 35Gobane le tlo etša sefu ge le wela ba ba dutšego lefaseng mo go fela. 36Phakgamang gee le fele le rapela ka mabaka ohle, gore le hwetšwe le loketše go phonyokga tšeo ka moka di tlogo direga, le go tlo ema pele ga Morwamotho.
37Ge e le mosegare o be a fela a ruta Ntlongkgethwa; mme bošego a tloge a ye go dula thabeng ye ba rego ke ya Mehlware. 38Gomme batho ka moka ba be ba tsogela Ntlongkgethwa, ba tla go yena e sa le bosasa ba rata go mo kwa.
Právě zvoleno:
LUKA 21: NSO51
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© Bible Society of South Africa 1986. Used with permission. All rights reserved.
