LUKA 12
12
Komelo ya bafarisei. Lehumo. Go phakgama
1Mohla go kgobetše mašaba a ba diketekete, ba ba ba gatana ka maoto, a thoma go bolela le barutiwa ba gagwe a re: Sa pele, phafogelang komelo ya bafarisei, ke ra boikaketši. 2Gobane ga go se se utilwego se ka se kego sa utollwa; ga go thopa e ka se kego sa utollwa; ga go thopa e ka se kego ya tsebja. 3Ke gona tše le di bolelago lefsifsing, di tlo kwala seetšeng; tše le di sebelago tsebeng le le phapošing, di tlo goelelwa godimo ga nywako.
4Mme lena bagwera ba ka ke le botša ke re: Le se ke la boifa ba ba bolayago mmele, ba tloga ba se be le se ba se kgonago. 5Ke tlo le laetša yo le swanetšego go mmoifa. Le boife yo e rego ge a bolaile, a ba le matla a go lahlela motho moleteng. Ke yo ke rego le boife yena.
6A dithaga tše tlhano ga di rekwe ka peni tše pedi? Le ge go le bjalo ga go le e tee ya tšona e lebalwago ke Modimo. 7Hleng le meriri ya dihlogo tša lena e badilwe yohle! Ke gona se boifeng; le feta dithaga tše ntši.
8Ke a le botša, mang le mang e a ipolelago ka Nna pele ga batho, le Morwamotho o tlo mmolela pele ga Barongwa ba Modimo. 9Gomme e a latolago pele ga batho a era nna, le yena a ka se tsebja pele ga Barongwa ba Modimo.
10Mang le mang e a kago bolela Morwamotho ka lentšu le lebe, o tlo lebalelwa; fela, e a kago roga Moyamokgethwa a ka se ke a lebalelwa.
11Mohla ba le išago diphuthegong tša bona, le go ba bagolo, le go babuši, le se ke la belaele la re re yo iphetolela bjang, re yo reng? 12Gobane Moyamokgethwa o tlo le ruta ka lona lebaka leo se le swanetšego go se bolela.
13E mongwe wa lešaba leo a mo kgopela a re: Moruti, botša ngwanešo gore a arolelane bohwa le nna.
14Jesu a re: Monna! Ke mang e a mpeilego moahlodi le maoroledi wa lena? 15A tsebo bolela le bona a re: Phafogang, le ile megabaru; gobane bophelo bja motho ga bo tšwe lehumong le go tše a di ruilego.
16A ba ruta ka seswantšho a re: Mašemo a monna e mongwe wa mohumi a be a budule ka gogolo. 17A eleletša a re: Ke tlo dirang? Gobane ga ke na mo nkago kgobelela mabele a ka. 18A re: Se ke tlo go se dira sese: Ke tlo katološa matlolo a ka, ka aga a magolo, ka kgobela dijo tša ka ka moka go ona, le thoto ya ka ka moka. 19Ya ba gona ke tlogo bolela le moya wa ka ka re: Moya wa ka, o na le dilo tše ntši tše di lekanetšego nywaga e mentši. Khutša gee, o je, o nwe, o ipshine. 20Modimo a tla a re: O setlaela! Ka bjona bošego bja moya wa gago o tlo tlošwa go wena; mme tšeo o di bolokilego e tlo ba tša mang?
21Ke tšona tša e a ikgobelago mahumo a sa ruele Modimong.
22A bolela a na le barutiwa ba gagwe a re: Ke ka baka leo ke le botšago ke re: Le se ke la belaela tša bophelo, la re: Re tlo jang? Le ge e le tša mmele la re: Re tlo aparang? 23Gobane se segolo ke bophelo, ga se dijo; se segolo ke mmele, ga se diaparo. 24Bonang magukubu; ga a leme, ga a bune, ga a ne matlolo le dišego; mme Modimo o a a fepa. Gomme dinonyana tšeo a di ka ba tša bapetšwa le lena? 25E ka ba mang mo go lena e a kago kgona go eketša leemo la gagwe ka go le belaela, a kgona le moelonyana o tee? 26Bjale ge ešita le tše nyenyane di le palela, tše dingwe le sa di belaelelang? 27Setšang matšobana a naga ka mo a melago a sa dire a sa ohle; mme ke a le botša, le Salomo letagong la gagwe ka moka ga a ka a apara bjalo ka le lengwe la ona? 28Bjalo, bjona bjang bja naga bjo, bja go ba gona lehono, mme bosasa bja tlo lahlelwa sebešong, ge Modimo a bo apeša ka mokgwa wo, a ka lesa bjang go direla lena tše di fetišago, lena bahlayatumelo? 29Le lena lesang gee go phoraphora la re: Re tlo jang? Re tlo nwang? Lesang go hlohlwa ke tšona. 30Gobane tšeo ka moka di tsongwa kudu ke ditšhaba tša lefase. Ge e le Tataweno wa magodimong o tseba gobane le lena Le phela ka tšona. 31Sa lena e be go tsoma mmušo wa Modimo; ke mo le tlo go ekeletšwa ka tšeo ka moka. 32Se boife, wene mohlatswana o monyenyane, gobane Tataweno o ikgahletšwe ke go le fa mmušo. 33Bapatšang ka tše le nago natšo! Le hlallele badiidi. Itireleng mekotla e sa onalego, le lehumo le le sa felego la kwa magodimong, mo lehodu le sa fihlego, mo tshwele e sa senyego. 34Gobane mo go lego lehumo la lena, ke mo go tlo go ba le dipelo tša lena. 35Dulang le itlemile matheka, le mabone a lena a tuka. 36Le etše batho ba ba letetšego mong wa bona, gore ge a boa monyanyeng a tla a opaopa, ba akgofe ba mmulele. 37Ba lehlogonolo ke bahlanka bao, mong wa bona ge a etla, a ba hwetša ba phakgame. Ruri, ke a le botša, o tlo gara diaparo, a ba dudiša dijong, a tla a ba direla. 38Ba lehlogonolo ke bonabao, ba mong wa bona ge a etla, e ka ba ka nako ya bobedi le ge e le ka ya boraro, a ba hwetša ba phakgame. 39Le gona le tsebe, ge mong wa ngwako a ka tseba lebaka le lehodu le tlo go tla ka lona, a ka phakgama, a se dumele ge ngwako wa gagwe o phulwa. 40Le lena dulang le itokišitše, gobane Morwamotho o tlo tla ka lebaka le le sa le gopolego. 41Petro a botšiša a re: Morena, seswantšho se a o botša rena fela, goba o botsa bohle? 42Morena a re: Bjale molaki e a botegago yo bohlale ke mang? Ke eo Morena a mmeilego a laka bahlanka ba gagwe, a ba fa dijo ka lebaka la gona. 43Ke yena a tlo go ba wa lehlogonolo, ge Morena wa gagwe a etla, a mo hwetša a dira ka mokgwa woo. 44Ruri, ke a le botša, o tlo mmea a ba molaki wa dilo tša gagwe ka moka. 45Fela, ge molaki mo pelong ya gagwe a ka re: Mong waka o diega go boa, a thoma go itia bašemane le basetsana, le go ja le go nwa le go tagwa, 46Mong wa gagwe o tlo tla ka letšatši le a tlo go tšhoga a fihlile, ka lebaka le a bego a sa le tsebe, a mo kgabutla, a mo dira se se dirwago ba ba sa botegego.
47Mohlanka e a tsebilego thato ya Mong wa gagwe, mme a lesa go itokiša le go dira thato ya Mong wa gagwe, o tlo otlwa ka kotlo tše ntši. 48Gomme e a sa kago a tseba, mme a dira tše di swanelago dikotlo, o tlo otlwa ka dikotlo tše e sego dikae. E a filwego tše ntši, o tlo belwa tše ntši: go e a laetšwego tše ntši go tlo latwa tše di fetišago.
49Ke tlile go gotša mollo lefaseng; mme se ke se ratago, a ga se ge o ka be o šetše o tuka? 50Fela, ke sa tlo kolobetšwa ka kolobetšo; gomme ke se tlaletšwe gakaa kang, go be go tle e phethege. 51A le re ke tlile go fa batho khutšo lefaseng? Nna ke re: Ga go bjalo; ke tlišitše kgaogano. 52Gobane bjale ba bahlano ba ngwakong o tee ba tlo kgaogana; ba bararo ba tlo tsogela ba babedi, ba babedi ba tlo tlogela ba bararo. 53Tatagomotho o tlo šitana le morwa wa gagwe; morwa o tlo šitana le tatagwe; mmagomotho o tlo šitana le morwedi wa gagwe, morwedi a tlo šitana le mmagwe, mmatswalagomotho o tlo šitana le ngwetši; ngwetši a tlo šitana le mmatswalagwe.
54A bolela le mašaba a batho a re: Ge le bona leru le rotoga Bodikela, le akgofa le re: Pula e tlo na! Mme gwa ba bjalo. 55Ge le ekwa go foka phefo ya Borwa, le re: Go tlo huthumela! Mme gwa ba bjalo. 56Lena baikaketši, ponalo ya lefase le ya legodimo le tseba go di hlatha; mme lebaka leno le reng le sa le hlathe?
57Le reng le sa hlaologanye ka nnoši se e lego go loka? 58Ge o ya mošate le e a sekišanago le wene, phegelela go kgaola taba nae le sa le tseleng; gore a se go iše go moahlodi; moahlodi a go gafela mohlanka; mohlanka a go kgoromeletša kgolegong. 59Ke a go botša, moo o ka se ke wa tšwa o sešo wa lefa le tšheletana ya kgoreletšo.
Právě zvoleno:
LUKA 12: NSO51
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© Bible Society of South Africa 1986. Used with permission. All rights reserved.
