LUKA 13
13
Tshokologo. Sabatha, Dithuto
1Mehleng yeo gwa rotoga ba bangwe ba botša Jesu taba ya Bagalilea, bao Pilato a hlakantšego madi a bona le didimo tša bona. 2Jesu a fetola a re: A le re Bagalilea bao, ge ba wetšwe ke bohloko bjo bokaakaa, e be e le badiradibe ba ba fetišago Bagalilea bohle? 3Nna ke re ga go bjalo; gomme ge le sa sokologe, le tlo fedišwa ka moka ka mokgwa woo. 4Le bala ba lesome le metšo e seswai ba go welwa ke morako wa Siloa wa ba bolaya, a le re ba be ba na le molato o fetago wa bohle ba ba agilego Jerusalema? 5Nna ke re ga go bjalo; gomme ge le sa sokologe, le tlo fedišwa ka moka ka mokgwa woo.
6A ba botša seswantšho a re: Motho e mongwe o be a na le mohlare wa gagwe wa mogo wo o medilego tšhemong ya gagwe ya merara; a tla a nyaka dienywa go wona, a di hloka. 7A bolela le molemi wa tšhemo a re: Bona, bjale ke nywaga e meraro ge ke fela ke etla ke nyaka dienywa tša mogo wo; gomme ga ke di hwetše. O o reme, o sa reng o diba tšhemo? 8Molemi a fetola a re: Morena, o lese lenyaga, ke tle ke leme ke o dikologe, ke tšhele morole. 9Mohlomongwe o ka bea dienywa. Ge o ka pala, ke mo o tlo go kgona o o rema.
10Ka la Sabatha o kile a ruta phuthegong e nngwe. 11Gonamoo go be go na le mosadi e a feditšego nywaga e lesome le metšo e seswai a na le moya wa bolwetši. O be a hunagane, a šitwa go inamologa le ganyane. 12Jesu ge a mmona, a mmitša a tla; a bolela le yena a re: Mosadi, o hunolotšwe bolwetšing bjoo bja gago. 13A mmea diatla; mosadi a otlologa e sa le semetseng, a reta Modimo.
14Mogolo wa phuthego a mmefela ge Jesu a fodišitše motho ka la Sabatha, a bolela le lešaba a re: Matšatši a go dira mediro ke a selelago. Tlang ka onaao le fodišwe: Le lese go tla ka Sabatha.
15Gwa fetola Morena a re: O moikaketši. Ka moka ga lena a ga le tlemolle kgomo le pokolo mo magopong ka la Sabatha, la di iša mo di nwago? 16Bjale motho e e lego ngwana wa Aborahama, e a feditšego nywaga e lesome le metšo e seswai a tlemilwe ke Sathane, a ka leswa bjang go hunollwa ditlemo ka tšatši la Sabatha? 17Ge a realo a ba leša dihlong ka moka ba bego ba ganana nae: batho bona ba thabela mediro ye e bego e retwa e dirwa ke yena.
18Jesu a re: Mmušo wa Modimo o swana le eng? Ke tlo o swantšha le eng? 19O swana le thorwana ya lehloko, ye motho a e tšeago a e bjala serapeng sa gagwe, ya mela ya ba sehlare se segolo; mme dinonyana tša sebakeng tša tla, tša aga dihlaga makaleng a sona.
20A buša a re: Mmušo wa Modimo ke tlo o swantšha le eng? 21O swana le komelo ye mosadi a e tšerego, a e tswakanya le bupi bja diroto tše tharo, bja tla bja omelega ka moka.
22Gomme a thetha le metse le metsana a fela a ruta, mme a šikela Jerusalema. 23E mongwe a mmotšiša a re: Morena, a ke ba bakae fela ba ba tlo go phološwa?
Jesu a fetola a re: 24Katanang gore le tsene ka mojako o pitlaganego; gobane ke a le botša, ba bantši ba tlo leka go tsena ba šitwa. 25Mohla mong wa ngwako a šetše a tsogile a tswalela mojako, ke mo le tlo ema ntle, la re: Morena! Morena! Re bulele! A tlo fetola a re: Ga ke le tsebe mo le tšwago. 26Ke mo le tlo go thoma go re: Re kile ra ja ga gago! O rutile dikgorong tša rena! 27Mong wa ngwako o tlo re: Ke le boditše, ga ke le tsebe mo le tšwago. Ntlogeleng lena bohle badiri ba bokgopo. 28Ke mo go tlo go tsoga dillo le ditsikitlano tša meno, ge le tlo bona Aborahama le Isaka le Jakobo le baporofeta ka moka ba le mmušong wa Modimo, mme lena le kgoromeletšwa ntle. 29Ba Bohlabela le ba Bodikela, ba Leboa le ba Borwa, ba tlo tla ba dula dijong mmušong wa Modimo. 30Tsebang, go na le ba morago ba e tlo go ba ba pele; go na le ba pele ba e tlo go ba ba morago.
31Ka lona lebaka leo gwa tla ba bangwe ba bafarisei ba mo sebela ba re: Tloga mo, o ye mo gongwe; gobane Herode o nyaka go go bolaya. 32Jesu a re: Sepelang le yo botša phukubye yeo, le re: Tseba gore ke leleka meoya e mebe, ke fodiša batho lehono le bosasa; ka moso ke yo feleletša. 33Se Nna ke lebanego naso ke go sepela lehono le bosasa le ka moso; ka gobane sa moporofeta ke go bolaelwa motseng wa Jerusalema e sego mo gongwe.
34Hee Jerusalema! Hee Jerusalema, wena o bolayago baporofeta! O thumago ka mafsika ba ba romilwego go wene! Ke gantši ke ratile go phuthela bana bago bjalo ka nonyana ge e apeša bana ba yona ka diphego; mme la gana. 35Le tlo di bona; ngwako wa lena o tlo le tlogelelwa e le lešope. Ke a le botša, le ka se hlwe le mpona, gwa tlo ba gwa tla lebaka la ge le tlo re: A go šegofatšwe e a tlago ka Leina la Morena.
Právě zvoleno:
LUKA 13: NSO51
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© Bible Society of South Africa 1986. Used with permission. All rights reserved.
