San Lucas 14
14
Jesuu woun ãb kha ohoodo khitʉm monaautarr
1Khãai ãb fariseonaan eem ãb ĩchab chi porkha simua Jesús eeurrjim aajem, ich di aar i dʉi ãba thach khoog. Mag ed sĩi jua ʉ̃ʉijem ed arr aawai amachdeun ãba irigta eerpapa aajeejim anaabá, eeu degolp mag pod bʉ̃ʉrjã nem wauju khabam edta bʉ̃ʉr khãijã jua peerthʉ nem waubaawai magʉm gaaimua i imeraa pʉr awaag. 2Mag am thach kho nʉm aig beewi sĩejim aajem ĩchab, woun ãb kha ohoodo khitʉm. 3Mag oobaawai warag iyʉʉ nʉmua Jesuu chi machnaanag jeeunaa ĩchab chi fariseonaanagjã jeeumamua, —¿Pãrau oowai mʉg jua ʉ̃i nʉm ed õor mor masim khʉʉn monaauju aai sĩ, wa monaauju aai khaba sĩwi? ajim anʉm.
4Mamʉ mag amachig Jesuu jeeubarm ũr nʉmjã ni ãbmuajã jʉ̃ʉ abajierram anaabá. Mag amachig khabamjo warag khĩuu abaawai mag chi kha ohoodo khitʉm ich aig thʉ̃rnaa, i gaai pʉrbaawai monaaupʉiwia, irig, —Pʉ maju aai chirʉmgui ajim anʉm. 5Maimua jũrr ich dʉi ãba thach khoog aig narr khʉʉnag magjim anʉm:
—Pãar cabaai khãijã wa pãar phak khãijã jẽbdeg burrwia pod ich ap oberba sĩsim oobaawai, ¿khaíuta ag bʉrre mawia ich nemchaai jẽu aubaju khai ajim anʉm, sĩi jua ʉ̃ʉijem ed awia?
6Mamʉ ich iek ʉkhamkhĩir par irua mag jeeu ohookhamjã ni ãbmuajã i iek ʉkhabajim anaabá.
Jua pʉrtarr phiesta ee thʉ̃rkhʉʉitarr khʉʉn
7Maimua Jesuu oowai, jũrram khʉʉnau amachig jaauba nʉm ee amachdeuta sie ajapcharam jʉr aunaa nacha ohood aadeewai, chi thʉ̃rkhʉʉipʉiwia beetarr khʉʉnag magjim anʉm, am wawimamua:
8—Degolp ãbmua khãijã ich jua pʉr nʉm phiesta ee pãach thʉ̃r aauwai, oob pãach khĩrau chan sie ajapcharamta ookhanaa pãachta por garcha jupmiet ajim anʉm. Magbam eeu mag sie pãach khãyau chi thethem khʉʉn athee wai nʉm gaai khãijã pãach jupdukham. 9Mag pãachta sie ajapcharam gaai ohoodo nʉm aig, chi jua pʉr chirʉm wounau beewi pãrag “Phiidʉtkhabat, mʉg sie deeum khʉʉn atheemʉu” aicheewai, eeu degolp pãar khĩir naauwia jũrr õor eugarcha khĩir naa ohoodo aimadukham ajim anʉm, tagam khʉʉn dakhĩir. 10Magju khãai ãbmua khãijã ich jua pʉr nʉm phiesta ee pãach thʉ̃r aauwai pãachta warm khʉʉn eugarcharam sie gaai jupbat ajim anaabá. Pãar mam ohoodo nʉm oobaawai, chi jua pʉr chirʉm wounau pãrag, “Keena, jũrr mau na jupbahut” abaawai, chigag chukhu pãachta warm khʉʉn na ohoodo aimaju. 11Mag, pãrag mag chirʉmʉn, ar amach thowia chikham dʉi athuucha aajem khʉʉnta jũrr mʉg atag paawai am Ẽwandamag chaigpa oo sĩsidʉ aju. Maimua ar mag amach dʉi athuu nʉm khʉʉn ichaaurjã magʉm aba sĩi warag serbiibamjo aajerr khʉʉnta jũrr mʉg atag paawai Ẽwandamau warm khʉʉn khãyaujã ʉ̃rpai apiju ajim aajem.
12Maimua ich thach khomkhĩir thʉ̃rtarrag magjim anʉm ich Jesuu: —Deeu pʉch phiejãb dʉrrcha wauwia thach khomkhĩir õor thʉ̃ʉrwai oob sĩi pʉch khapkhʉʉn appai thʉ̃rkhʉyam ajim anʉm, ni pʉch khodnaan, ni sĩi thʉ̃r khodpaim khʉʉn appaijã thʉ̃rba, ni sĩi phatkhon paraam khʉʉn pʉch dʉi ãba di dakha naajem khʉʉn appaijã oob thʉ̃rkhʉyam. Pua magʉm khʉʉnta khĩirjuwia thʉ̃rkhʉʉimʉn, magan amaujã agjo wauwia pʉ thʉ̃r athaawai deeu pʉrʉg phagbarmjota aju. 13Magju khãai pʉch phiejãb pom waupʉiwia thach khoog õor thʉ̃ʉrwai dau aphʉʉm khʉʉndamta thʉ̃rbá ajim anʉm: ar bʉ bisi wa juadam khãijã bisi khitheem khʉʉn, ar khu thũuiba thũuiba khitheem khʉʉn, wa ar dau khĩsu khitheem khʉʉn khãijã. 14Pua mag khitheem khʉʉn dʉita magmʉn, amau chadcha pʉ dʉi pod agjo abaju, mamʉ magtarr paar Ẽwandamauta jũrr pʉ onee apiju. Ar i iek ʉkha durrumua khechtarr khʉʉn deeu iiu phiidʉ nʉm jaar, magtarr jũrran ichdeuta pʉrʉg phagjugui a jaaumajim aajem.
Ẽwandam dʉicha thach kho sim wounan chadcha onee aju
(Mt. 22:1-10)
15Mag Jesús iyʉʉ sim ũrwia, ãb i dʉi ãba thach kho sĩerrau irig, —Ʉ̃gthar pawiajã ich mʉg cha maach nʉmjo Ẽwandam dʉicha thach kho sim wounan chadcha i onee ajugui ajim anʉm.
16Ichig magbaawai jũrr Jesuu irig, —Mua pʉrʉg nem ĩgkhakhimgui ajim anʉm. Magnaa, Jooi ãb sĩejim aajemgui ajim anʉm. Mag jooirau õor khapankham khʉʉnag jaau wai sĩejim aajem, ichdeu phiejãb pom waubapäaiwai makhʉʉn thum ich aig thach khoon beemkhĩir. 17Maimua chadcha phiejãb wauwia, ya thach khoju ed aadeewai, chi patrón jooirau ich chog pʉijim aajem, ich dʉi iekhatarr khʉʉn aar jaaubaimaawai thach khoon beemamkhĩir. 18Maimua mawia, chi chogau jajawagmampierr beemaaugau, jũrr pogkha jaaumaajeejim aajem, chi beeju arr khʉʉnau. Nacha jaauwimatarr aiguimua magjim anʉm: “Chaig ewaa jẽb per autarr oon maju chiraawai mʉ pod mabam; ideu ẽudeem athee khertarrau” ajim anʉm. 19Maimua ãbakhai aar jaaubaimaawai maguajã agjo, “Mʉ pod mabam, phak emkhooin diez eeu perkha autarr phidag ee wai jẽraan phe arrju aawai. Jãgba akhiin chadau mʉ makhamgui” ajim anʉm. 20Ich mag jajawagmamua ẽudeecharam aar jaaubaimaawai magua paawai magjim anʉm: “Mʉ maju ajieb mamʉ, mʉch ʉʉi dʉi ewaa pa chiraawai pod mabajugui” ajim anʉm. 21Magbaawai mag chi iek jaau chitarr woun deeu ich appai beewi ichig warm khʉʉnau jaaumarrjoo jũrr ich patronag jaauchejim aajem. Mag ũrbaawai jooi khĩir machag thʉnʉmua magjim aajem, ich chogag: “Petá” ajim anʉm, “deeu. Maimua jopkhar jũrr kaaijã ee ar dau aphʉʉ khitheem khʉʉn phe aipidú ajim anʉm: ar bʉ bisi wa juadam khãijã bisi khitheem khʉʉn, khu thũuiba thũuiba khitheem khʉʉn, maimua ar dau khĩsu khitheem khʉʉnpa.” 22Mag jaaubaawai chi chogau mawia, ichdeu jaaupʉitarrjo awia, deeu barchewia magjim aajem, ich patronag: “Mua thum pʉchdeu jaautarrjo abarm. Mamʉ magʉmjã agtha õor khapaana dʉrr aju simgui” ajim anʉm. 23Magbaawai ich jooirau deeu magjim anʉm, ich chogag: “Jũrr phobor igaau mawia parhooba ar ich jãg dau aphʉʉ khitheem khʉʉn thum pʉchdeu oomam phe aipidú” ajim anʉm, “warre õrau di dʉrrkhaba sĩwaag. Pʉch iek ʉkhaba abaawai amag thum ajapha jaaumamua ichiita mua am mʉch dʉi thach khomkhĩirta thʉ̃rkhʉʉi chirʉm abá” ajim anʉm. 24Ya maadeu khaphʉ nʉm, ar nacha thʉ̃rwia beeba arr khʉʉnau chan amau bʉ̃ʉrjã mʉ thach isĩebajugui ajim anʉm, chi nacha thʉ̃rtarr khʉʉn igwia.
Dich nem thum isegba nʉm chan pod Jesús khapeen aju khaba nʉm
(Mt. 10:37-38)
25Mag Jesús mam dʉi i ẽudee õor pooma wetmajim aajem. Mag ich ẽudee wetum khʉʉnag magjim anʉm:
26—Ãbmua khãijã mʉ dʉi ogdʉba nʉrraju khĩirju simta khũchpaijã ich dennaan kha ogdʉmapha wa ich ʉʉi, ich chaain, ich khodnaan khãijã ogdʉmaphanaa ich dau aphʉʉ aju khãijã khĩirju sim chan, pod mʉ dʉi khapeer khaju khaba simgui ajim anʉm. 27Ar chi mʉ dʉi nʉrram khõsi simuan warre ich phithurg au nʉrrajujã khaphʉ aju aai simgui ajim anʉm, mʉ gaaimua chikhamnau ich thõoju khaphʉ awiajã ich mag mʉ bʉ ogdʉba nʉrraju aawai. Mag ãwatbaju chan, parta ideu khõs mʉ dʉi nʉrrʉm ajugui ajim anʉm.
28Magnaa amag, —¿Chijãg wounauta ich di ewaagpaawai nacha khĩirju sĩi abaju khai ajim anʉm, khan nemta phe auju, khachpai igju, wa phatkhon khãijã dʉrr khaba abaawai pod nem igju thum phe aubaju khãijã khap aag? 29Magjã khĩirjubanaa, eeu degolp di euju aadewia, dibʉ appai khãijã jukha sĩuwia, pod eu auba ich mag werba sĩukhiin, bigaaum khʉʉnau ich khĩircha khãijã i wauwia irig, 30“Mʉg wounaun par di eu aubajuuta sĩi dibʉ appai jãg ideu khõs jukhabaadejim” ajugui ajim anʉm. Ich jãg di ewaagpaawai khĩirjuajemjota khĩirjuju aai simgui ajim anʉm mʉ dʉi nʉrraagjã, dich dau aphʉʉ aju khaphʉ simjã magʉm igba warag magʉm ãwat nʉrraag.
31Magnaa deeum ejemplo igwia, —Wa magbam khai, ¿khanim reita deeum agjo ichjo reikha sim dʉi juurhi ee ich werbʉan maju nawe khĩirju sĩi abaju khai ajim anʉm, ajap khap aag? Irua khaphʉ simgui ajim anʉm, warmua soldaaun khapanag veinte mil wai sĩewai ichdeu diez milpai wai sim. Mag juurhi ee maju nawe, ¿irua khĩirju aubaju khai, mag ich soldaaun magcha khapan khaba durrum dʉi warm khʉʉn khapan thʉnʉm aar werbʉan petaawai ichdeu podbaju? 32Irua mag khĩirjumʉn, agtha warm dʉi thẽuju nawe, warp nʉwe khaug aujugui ajim anʉm, ichdeu podbaju. Magbaawai irua ich soldaaun warm khʉʉn aar chogpʉiju, makhʉʉnau chaigpabaimaawai werbʉju arrjã werbʉba warag khõinaa nʉisieg. 33Ich agjota aajemgui ajim anʉm ĩchab mʉ dʉi khapeerkhaagjã. Mʉʉta nacha pãrau ʉ̃rcha khõsinaa mʉg jẽb gaaim nem pãachdeu khõsim thum isegbam chan, pod mʉ khapeen aju khaba nʉmgui ajim anaabá.
Thakhaar nakha aadekhiin ¿khanthee serbiiju?
(Mt. 5:13; Mr. 9:50)
34Mag amach nem isegmapham khʉʉn igwi iekhakhagmamua ĩchab, —Thakharan chadcha nem ajaphamʉugui ajim anʉm; mamʉ mag sim nakha aadekhiin, ¿khanthee serbiiju? Pod bʉ̃ʉrjã agua nem phoju khaba, 35ni jẽb phʉichichag dʉi waaureunaa nemjĩir bʉ khuagjã serbiiba sĩsiju. Mag serbiiba sĩsiewai sĩi barpʉijugui ajim anaabá. Ich jãgaugui ajim anʉm ĩchab ar mʉ iek ʉkhamaaugau amach nem khõchag thum isegba nʉm khʉʉnjã. Keena, jʉ̃g ʉ̃rʉʉnaa cha mua jaau chirʉm ajapha ũrbat a jaaumajim aajem, ich Jesuu.
Právě zvoleno:
San Lucas 14: noaA
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2011, Wycliffe Bible Translators, Inc. All rights reserved.
