San Lucas 13
13
Dich khaibag Ẽwandamag chugpaapi jeeubam chan peerdʉbam
1Ich mag ed gaai ĩchab ãaur khʉʉn ich Jesús sim aig beewi irig nem ĩgkha naaichejim aajem. Mag ĩgkhamamua irig, —Galileapien Aai i jeeujem deg nemchaain khechwia phaa nʉmua agua Ẽwandamag amach khaibag chugpaapi jeeu naajimgui ajim anʉm. Am mag Ẽwandamag jeeu durrumta, am aig Pilato soldaaun beewia sĩi am khechpʉichejim aajemgui a jaau naaichejim aajem.
2Mag ichig jaaubaicheewaita Jesuu amag, —¿Pãrau khĩirjuawai, mag Pilato soldaaunau dau augjã chukhu khechpʉitarr khʉʉn warm khʉʉn agjo Galileapienkha thʉnʉm khãyaujã atcha khaibag pom sĩsid aawaita mag am khechpʉijim khai? ajim anʉm jũrr amag. 3Mag gaaimua khabajim, mamʉ mua pãrag jaaukhimgui ajim anʉm: Pãrauta chadcha pãach khaibag thumaa ãsie ewag khĩirjuwia Ẽwandamag chugpaapi jeeubam chan pãachjã dʉi khechjurau ajim anaabá, amachigcha. 4¿Wa pãrau khĩirjuawai, ar thʉrrdo Siloé aajem igaau di pom sĩerr burrwai õor dieciocho khechtarr khʉʉnta tagam khʉʉn Jerusalén phobor ee naajem khʉʉn khãyaujã iekkhõr pomaacha naajĩwa ajim anʉm, Ẽwandam dau na? 5Mag amach appaita Ẽwandam dakhĩir iekkhõr pomaacha narr gaaimuajã khabajimgui ajim anʉm, deeu ichdeupai. Ẽwandam dakhĩran thum ich agjo thʉnʉm, nem khaibag. Pãraujã ĩchab pãach khaibag thumaa khĩirjuwia Ẽwandamag chugpaapi jeeubam chan pãach thum ni ãbjã peerdʉbamgui ajim anaabá.
Higo cheba sĩerrarr ag nem ĩgkhaa
6Mag jaau dichwia ichdeupai mʉg nem ĩgkhaa amag jaaujim aajem: —Woun ãbmua ich uvado ee nemjõ higo anʉm jĩir wai sĩejim aajem. Khãai ãb jõm khõchag aadeewai aar oon majim anʉm. Mamʉ mag oon maawai bʉ̃ʉrjã cheba sĩi e meuu dʉnaajim anaabá. 7Magbaawai di aig pachewia magjim anʉm, chi nemjĩir jaarjemʉg: “Higo jõm khõchgau año thãrjup pam sĩi aar oo khʉrrkha chirʉm; mamʉ cheba sĩerraawai gaai ooimaba aajem. Jãgan jãg sĩpí warag thubapʉi” ajim anʉm. “Magba par chebam jãg sĩejemgui” ajim anʉm. 8Magbaawai, “Patrón jooi, magan ideu año ãb oo athá” ajim anʉm, chi nemjĩir bʉ phʉajem wounau. “Jãg sim khai, mua warag ag bʉkhʉrr wa phʉʉrdʉpʉinaa phʉichichagau i bʉ khuajugui” ajim anʉm, “chemkhĩir. 9Mag bʉ khuabaawai chemʉn ʉuma” ajim anʉm. “Mamʉ mag bʉ khua nʉmjã ich magpai cheba abarmʉn magan chadau thupʉijugui” ajim anʉm, chi bʉ jaarjemua.
Jua ʉ̃i nʉm edcha Jesuu ʉʉi ãb monaautarr
10Biek ãb jua ʉ̃i nʉm ed Jesuu Ẽwandam iek jaau sĩejim aajem, judionaan ãba biirdʉwia Ẽwandam iek jaaujem deg. 11Maig ʉʉi ãb sĩejim aajem. Mag ʉʉi mor machpawia dieciocho años sĩi jã bʉreu khitaajeejim anaabá, ben khaigbam i mor ee dubwia. Magtarr aigmua pod bʉ̃ʉrjã phõ khajapha thʉrrkhaba ich mag khitaajeejim anʉm. 12Jesuu mag oo athaawai dau ee aug khaugwia, i thʉ̃r aunaa irig, 13“Mua pʉ monaaukhim” anaa, i ʉ̃r jua ausĩubarm bʉrre phõ thʉrrkha khajappha oo dʉnʉisijim anaabá, monakkha. Mag ich monaaubapäaiwai onegau Ẽwandamag, “Ẽwandam, ĩsin chadau pua mʉ ʉuta abarm. Pʉjo jua theegkham chan mʉg jẽb gaai chukhum. Ʉu abarmgui” ajim anʉm.
14Mamʉ magbaawai mag amach ãba biirdʉ nʉm ag degam chi porkha sĩerr Jesús dʉi meeukhabaadewia jũrr khĩir mor chigpai õragta, —Seman gaai seis diaspai phidkhaju aai nʉmgui ajim anʉm. Mag seis diam een chadau pãadeu beewia pãach monaaupibat ajim anʉm. Mamʉ oob mʉg sĩi jua ʉ̃i kheeujem ed khabajupama ajim anʉm.
15Magbaawaita maach Por Jesuu irig magjim anaabá:
—Woun seunem, ¿khantheeta pʉ mag chitʉ́ma? ajim anʉm. Pãar mag jua ʉ̃ʉijem ed bʉ̃ʉrjã phidkhaba aajem anʉmta, ¿khan jãgwia pãrau pãach cabaai wa phak khãijã do dopien phe arrjẽma? ¿Jãg nʉm chan magan phidkha nʉm khabahab? ajim anʉm. 16Pãrau pãach nemchaainjã mag do dopi khʉrrkha nʉmta, ¿khan jãgwia mʉg ʉʉi ĩchab warrgar jooi Abrán khararrau ʉkhaajerr ag Ẽwandam gaai ʉkha simta pod i monaauju khaba sĩ, jua ʉ̃ʉijem ed awia? Jãg sim aig ijã ĩchab dieciocho años meperau i pʉrnaa o jʉ̃ wai simjo simta ẽerpʉi nʉm khabahab ajim anʉm, jãg beneu i ogdʉpʉimkhĩir.
17Jesuu mag amach obeerbapʉim ũrwia i oomapha aajem khʉʉn thum chigaa aphobaadejim anaabá, amachta. Mag am chigaa nʉm ee, tagam khʉʉn thum aig narr khʉʉnau amach daúa Jesuu mag nem wau sim oo nʉm gaaimua onee nʉm iekhau Ẽwandamag, “Ʉu chadcha pua marag pʉch jua theeg oopibarm Ẽwandam; ag na marau mʉgjo chan nem ooba aajemgui” a iekha naajim aajem.
Mostaza den nem ĩgkhaadam
(Mt. 13:31-32; Mr. 4:30-32)
18Mag iekhakhagmamua ĩchab magjim anʉm ich Jesuu: —¿Pãrau khaphʉ nʉ, jãga sim abarí Ẽwandam iek mua jaau chitʉm, maimua khanjota sim a mua pãrag jaaubarkhiin? ajim anʉm. 19Magnaa ichdeupai, Mʉg Ẽwandam iekhan mostaza daudam woun ãbmua ich nemjĩir ee jĩirjemjota sĩerrʉm. Ichta nemjĩir daudam thumaam khʉʉn khãyaujã bʉ̃rʉʉcha khitʉm. Mamʉ mag khitʉmʉn nem bãau khaphí bãauwia sĩi pabʉ pom ãdee dʉnʉisiejemgui ajim anʉm. Mag ãdee dʉnʉisiewai nemchaaindamau ag gaai amach didam euphobaadeejem. Ich agjota simgui ajim anʉm ĩchab mʉg Ẽwandam iek mua pãrag jaau chitʉmjã. Mʉʉgwaiwe chan khapan khábata ʉkha durrum; pari mag durrumuata warag nem pom aaidʉbapäaiwai, õor khapankham khʉʉnau ʉkhajugui ajim anʉm.
Levadura den nem ĩgkhaadam
(Mt. 13:33)
20Maimua deeu ichdeupai amag, —Pãrau khĩirjuawai ¿jãga sim abarí Ẽwandamau ich iek aaidʉpi nʉm, maimua jũrr khan dʉita mua pãrag jaaubarkhiin? ajim anʉm. 21Ich iiu aawai ich iek aaidʉpi nʉmʉn, ʉʉi ãbmua arin dʉrrcha sim ee levadura pʉitarrjota sĩerrʉmgui ajim anʉm. Levadura bʉ̃rʉʉ pʉitarrjã maadeu aaidʉmam chan ooba aajem; mamʉ mag simuan arin thum ʉrpi aaujem. Ich agjota simgui ajim anʉm ĩchab Ẽwandam iek mʉg mua jaau chitʉmjã. Mʉʉgwaiwe chan õor pom mʉg wejom ee agtha pomcha aaidʉba sim. Mamʉ mʉg atagta durr warpham magwe aaidʉbaadee thumaam khʉʉnau ũrab khaba ũrjugui ajim anʉm, ich Jesuucha.
Ʉ̃gthar maajem khʉdan phĩrkhi khitʉm aajem
(Mt. 7:13-14,21-23)
22Jesuu ich mag Ẽwandam iek jaau nʉrraajeejim aajem phoborpierr, didam khapan khaba dʉnʉnʉidʉm eem magwe ich nʉrrʉmpierr. Mag mamua warag Jerusalenag maa ajim aajem. 23I mag nʉrrʉm ee ãbmua irig, —Señor, ¿ʉ̃gthar oberju khʉʉnta khapanaacha nʉ wa okhooju khʉʉnta khapanaacha nʉwa? ajim anʉm.
Magbaawai Jesuu irig, 24—Ʉ̃gthar oberaagan, puertdidam bʉ̃rʉʉ khitʉm ee dubaagpamjota aajemgui ajim anʉm. Muan pãragan, mag puertdidam phĩrkhi khitʉm eeta dubju ẽkhabat a chirʉm. Mʉg atag õor pom ag ee dubam khõsi ajup mamʉ, mag thʉnʉm khʉʉn eem ãbjã pod dubbajugui ajim anʉm. 25Pãrau dubaag ẽkhawiajã ya chi dikhʉ jooyau phãarbapʉim chan, par pãrau daaugajãrmua, “Señor, maar weeu athá” awiajã, jũrr ierrmua irua pãrag, “¿Pãar jamaam khʉʉnauma? Pãar chan mʉ aiguim khʉʉn khabamgui” aju, warag weeu aubaju aawai. 26Magbaawai pãach weeu aumkhĩir, pãrau irig magjurau: “¿Pua maar khaugbata chirʉ́? Maar pʉ dʉi ãba thach khoojerr khʉʉn khabahab. Pʉ khabajieb maar maestro. Pua ante maar phobor ee Ẽwandam i jaauba aajeejieb” aju irig. 27Mamʉ magbaawai irua ĩchab pãrag magju: “Ya mua pãrag jaaubarm. Mua chan tag pãar khaugbam. Pãach sĩi nem khaigbam appai wau wenʉrraajerr khap, pãadeu warag pãachta mʉ aigmua chawag ereubaadet” a iekhajugui ajim anʉm, Ẽwandamau pãrag. 28Pãrau oowai chadcha pãach daaugajãrpai thʉbagkha nʉisim oobaawai, pãrau icharaucha sereeu oo thʉnʉmua, warag gaai machgaupa ihesse aadephʉmua, pãrau oojugui ajim anʉm: jooi Abrán, Isá, Jacob, maimua tag warrgarwe Ẽwandam i jaaujerr khʉʉn ich dʉi ãba i bigaau onee ohoodo nʉm. Maagwai pãachta khõinaa am mag onee nʉmjo i dʉi wenʉrraju aajerr khʉʉnta pãran ich mag iseg nʉisim iekhaugui ajim anʉm. 29Maigta pãar khĩir machag ajugui ajim anʉm, pãach pod dubba nʉm daar durrpierram khʉʉnpata dub thʉnʉm oowia. Maig thʉnaaju: edau obeerjem garm khʉʉn, edau duubjem garm khʉʉn maimua deeum durram khʉʉnpa beemawia Ẽwandam dʉi ãba onee thach khoog ohood aphobaadejugui ajim anʉm. 30Mag Ẽwandamau õor i agkhabaadem ed ar mʉg jẽb gaai aawai amachta warm khʉʉn khãaijã ajapcha nʉm aajem khʉʉnta khapan khabacha oberju. Mag khãyau ar chikhamnau serbiibag pheejem khʉʉnta khapanaacha Ẽwandam sim aar oberjugui ajim anʉm, ich Jesuu.
Jesuu Jerusalén phobor ʉapertarr
(Mt. 23:37-39)
31Ich mag edcha Ẽwandamau Moiseeg ich iek phãpitarr ajapcha ʉʉrkhaajem khʉʉn Jesús aig beewi irig, —Rey Erodeeu pʉ thõopäaig ẽkha sim. Pʉchta mʉigmua jopkhaa igbaad aichejierram anʉm.
32Magbaawai ichdeu amag magjim anʉm:
—Ereubaadewi irig, “Ich iphithur ideu mag sim; mʉg ed gayan mʉʉn ichiita ich mʉg õor mor ee ben khaigbampa jʉr werpnaa ich mʉg õor monaau chitaju” a jaaubaimat ajim anʉm, mʉ imeerba. Magnaa ĩchab, Ya mʉ phidag oimʉʉ pamam; 33mag agtha oba sĩewai ich mʉg mʉch phidag opʉibam aarjã ogdʉba jaau chitʉmua Ẽwandam i jaaujem khechmien phobor ee barjugui ajim anʉm, Jerusalén. ¡Jãga mag mʉjã ĩchab Ẽwandam i jaaumieta Jerusalén phobor chaaur amau mʉ thõobarjugui! ajim anaabá.
34Maimua Jerusalenpienta warag ʉaperwia magjim anʉm: —¡Eh! ¡Aay, Jerusalenpien! Pãraun chadcha warrgarweta Ẽwandamau ich i jaaumkhĩir chogpʉi nʉm khʉʉnjã kha khõchkhaba, pãrau warag mokoujã am bar wai nʉmua khechpʉimaajemgui ajim anʉm. Biek khapan mua pãrag jaaujeejim, ãthãrr ʉʉirau ich chaaindam thumaa ich ich eegar thʉa wai juupjemjo, pãar thʉa wai chitaag. Mamʉ magtarrjã pãachdeuta bʉ̃ʉrjã mag khõchkhabajierramgui ajim anʉm. 35Jãgtarrau nau pãrau oomaa abarjugui ajim anʉm. Nau mʉ mʉg chitʉʉ awia petaawai Ẽwandamau sĩi di pariim ee wouchnaan phepʉabaajemjota thʉbagkha nʉisijugui ajim anʉm, pãran. Magbarm aigmua chan tag pãrau mʉ oobamgui ajim anʉm. Pãrau mʉ oojuun, ãba ya pãachdeucha deeu mʉ urum oowia, “Ʉuchata Ẽwandam, pua pʉch jũrr pʉch Chaaita maar athee Reikha pʉibarm” anʉm aigta pãrau deeu mʉ oojugui ajim anʉm.
Právě zvoleno:
San Lucas 13: noaA
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2011, Wycliffe Bible Translators, Inc. All rights reserved.
