San Lucas 12
12
Dichdeu nem jaaujemjo khaba jũrr ag chaaur nem wauju khaba nʉm
1Mag nʉm ee warag õor pooma phẽeudʉdʉkhamua jũrr chikhaman bʉpa khiuthʉgmaajeejim anʉm. Am mamagkham ee, Jesuu ich khapeen ich dʉicha ogdʉba wenʉrraajerr khʉʉnag magjim anʉm:
—Khĩir khaphʉ wenʉrrathʉ̃; oob fariseonaan ben levadurajo sim pãach gaai dʉrbapimiet. Mua mag chirʉm aiguin pãrag, “Oob amjo chikham khĩir aawaipaita chadam iekjo iekhanaa pãach ap aadeewai jũrr pãachdeu jaaujemjo khaba nem waumiet” a chirʉmʉugui ajim anʉm. Pãrau am igar phũrrbamʉn, pãach gaai dʉrbabaadeewai sĩi amjo nʉisijugui ajim anʉm amag. 2Mʉg jẽb gaai aawai meraa iekhatarr iek khãijã mʉg atag paawai sĩi ich mag sĩsiwia khĩir akhoog khabam. Maagwai nem meraa wautarr awia khãijã ich mag khaugba sĩsibajugui ajim anʉm. 3Magnaa ichdeupai, Mua pãrag mag chirʉmgui ajim anʉm: Ar pãrau pãach appai meraa iekhabarm iek mʉg atag paawai jũrr thumaam khʉʉnau khakhapdo ajugui ajim anʉm. Maimua agjo khaugbaju awia puertdi khãijã ajap phãarkhanaa o sausau iekhatarr iekjã thumaam khʉʉn jʉ̃g daar jũrr khapanag ee thet jaaujugui a jaaumajim aajem.
Khaita okho aju aai nʉ
(Mt. 10:26-31)
4Mag ich khapeenag jajawagmamua ĩchab ich Jesuupai, —Keena, ar sĩi mʉg amach wir aig chikham kheechjem khʉʉn oob ogkhamiet ajim anʉm. Amau pãar chi ʉ̃rʉmʉn chadcha khechpʉiwiajã pãar akhaar chan pod thõo aubamgui ajim anʉm. 5Mamʉ ĩchab mua pãrag jaaukhim, khaita pãrau okho aju aai nʉ: Ẽwandamta okho abat ajim anʉm. Jãan chad nem jua theeg sim, pãar thõowia pãar akhaarjã khĩmie durr barpʉyaag a jaaumajim aajem. 6¿Pãrau oowai phatkhondam pom khabamua nemchaaindam cinco per auba aajẽ? Erraam gaai mag am perpʉimaajeeb mamʉ, ich Ẽwandamau chan am chigjã aba, ajaphata oo phe wai sĩejem. 7Maagwai oob khĩirjumiet ajim anʉm. Pãar chará nemchaain khãyaujã ʉ̃rʉʉcha irua iigjem. Mag pãachta nemchaain khãyaujã ajapcha nʉm gaaimua, pãar porbʉ maadeu igbaju ayaa sim khapanagjã irua thum khaphʉ wai simgui a jaaumajim aajem.
Meerba Jesús den amʉn ichdeujã amjã i deneu aju
(Mt. 10:32-33; 12:32; 10:19-20)
8Mag jajawagmamua ich Jesuupai magjim anʉm: —Ar õrau ichig jeeuwai ich imeerba mʉ iek ʉkhaajem a jaau sim wounan, mʉg mʉch chi Emkhooi Iewaaujã ĩchab ʉ̃gthar Ẽwandam chognaan thʉnʉm dakhĩir, “Jãan chadcha mʉ garmʉu” ajugui ajim anʉm. 9Mamʉ ar õrau ichig jeeuwai khãijã, “Mʉ chan i igarm khabam” a sim wounan, muajã ĩchab ʉ̃gthar Ẽwandam chognaan thʉnʉm dakhĩir ich khĩircha, “Jã chan mʉ den khabam, mua i khaugba chitʉm” ajugui ajim anaabá.
10’Amach mʉg jẽb gaai nʉweran amau mʉch chi Emkhooi Iewaa igwia khaigba iekhawiajã amach khaibag Ẽwandamag chugpaapi jeeubaawai ʉu chugpaapʉiju. Mamʉ pekau ãb simgui ajim anʉm, maan mua Ẽwandam Akhaar jua theegau nem wau chitʉm oo nʉmta warag mepeer gaai thʉ nʉmʉu. Mag pekau chan Ẽwandamau bʉ̃ʉrjã khĩir okhoobamgui ajim anʉm, i Akhaar igwiata mag iekha naawai. 11Pãachdeu mʉ iek ʉkha nʉm gaaimua õrau pãach pʉr auwia, pãar khĩir seukha iekhaag judionaan Ẽwandam iek jaaujem deg arrwia, chi thethem khʉʉn aarjã arrwai, oob “¿Jãgata mua iekhaagau?” wa pʉchig iekhabaawai, “¿Khan ata mua amag iekhaju?” a khĩirjumiet. 12Ya pãar iekhaagpaawai ich Ẽwandam Akharauchata pãrag khĩirjug deejugui ajim anʉm, khĩirjug khaphʉ iekhamamkhĩir.
Phatkhon paraamta khĩirjug meraa chirarr
13Jesús mag ijẽjẽbkham ee, ãbmua khapanag eemua irig, —Maestro, mʉ naamʉg jigpi jaaubá ajim anʉm, mʉ aai juagam nem pʉatarr eem mʉrʉg agjo jãrrcha deemkhĩir.
14Magbaawai Jesuu irig, —¿Khaíu pʉrʉg jaauwai, muata magʉm nemjã chi thethem khʉʉn denjo jigpi jaauju aai chirʉm ajĩ? ajim anʉm.
15Maimua ĩchab thum aig narr khʉʉnagpa magjim anʉm:
—Khĩirjug paraa aajeet. Oob pãrau sĩi nem khĩir thum paarpaju appaita khĩirjumiet ajim anʉm. Pãrau nem thum wai naawia khãijã pãar eu meebamgui ajim anʉm.
16Mag jaaupʉpʉigmamua ĩchab amag mʉg nem ĩgkhaadam jaaujim aajem: —Woun ãb phatkhon paraam sĩerrau nem jĩirjim aajem. Mag ich nem jĩirtarr thum eeuwia deg paa auwia oowai chi ãkhaajem di dʉrr khaba thʉnaajim anaabá. 17Magbaawai khĩirju oo sĩi awia ich wir aigpai, “¿Mua jãgata abarkhiina?” ajim anʉm, “ya mʉg mʉ nem ãkhaajem dijã phẽu thʉnʉm.” 18Mag khĩirju oo sĩi awiata, “Ãa” ajim anʉm ich appai. “Jãgan mua mʉch khoju nem ãkhaajem di jãg thʉnʉm thu werppʉiwia deeumta jũrr nem dapag eukha aujugui” ajim anʉm, “khoojem nemjã thum dʉrr awia juagam nempa thum ãba dʉrr amkhĩir. 19Ya mag eu aaipagkhanaa ãba paa thʉnʉisiewain chadau sĩi año khapan phithurg chukhu ag eempai au kho chirsijugui” ajim anʉm. Maimua, “¡Joo! Magbaawain chad mʉg woun sĩi degpai jua ʉ̃inaa, mʉchdeu khom aig thachjã khonaa, dodojojã biwaa dobaadee sĩi onee ajugui” ajim anʉm, ichdeupai ichig.
20’Maimua chadcha mag ichdeu khĩirju sĩerrjo di dapag eukhanaa ag ee thum ãba paa sĩsiewai jũrr Ẽwandamau irig magjim anʉm: “Khĩirjug chukdam, nau ĩsim edaar pʉ meejugui” ajim anʉm. “Mag pʉ meebaadeewai, pʉ nem jãg thʉnʉm paarpaag pʉ phithurg wautarr ¿jãga aagauma?” ajim anʉm. “Par pʉ phithur awia pua tag oobamgui” ajim anʉm Ẽwandamau.
21Mag nem ĩgkhaa ĩgkha opʉiwia jũrr aig narr khʉʉnagta, —Ich jãgta aajemgui ajim anʉm ĩchab, ar sĩi mʉg jẽb gaaipai phatkhon pom paarpawia, nem khĩir thum paraanaa, sĩi Ẽwandamag oobamjoo aajem khʉʉn.
Khani khoju wa khani jũaju khĩirjupiba jaautarr
(Mt. 6:25-34)
22Maimua mag ich dʉicha ogdʉba wenʉrraajerr khʉʉnagta, —Mua pãrag jaaukhimgui ajim anʉm: Oob pãrau “¿khani khojuuta maach mʉg nʉma?” awia okhĩirjuu amiet. Wa magbam khai, ya khajũajã chukhu nʉm, “¿khani jũajuuta mʉg nʉma?” a khãijã khĩirjumiet ajim anʉm. 23Pãarta nem khoojem nem khãyaujã ajapchanaa khajũa khãyaujã ʉ̃rʉʉcha balee sĩsidʉmgui ajim anʉm, Ẽwandam dau na. Jãg ichdeu pãar ompaatarrjo, pãrau nem ig nʉmjã irua deebajup. 24Pãade khĩirjubat ajim anʉm, kuerrb jãga naajẽ. Am phidkhaba aajeewai amach thach khoju ãkhaagjã di chukhu naab mamʉ, am augcheba aajemgui ajim anʉm, ich Ẽwandamauta amag phathau deejeewai. Magʉm pãar chará nemchaain khãyaujã ajapcha naawai, ¿jãga irua pãrag ooba abarju? 25Oob atcha pãachdeu nem ig nʉmta khĩirju nʉʉ amiet ajim anaabá. Mag pãrau pãachdeu khõsimta ig nʉʉ akhiinjã, ¿khaíuta mʉg nʉm aig mag ichdeu khĩirju sim gaaimuapai ich meeju arr ʉ̃r oradam ãbpai khãijã ich iiupiju aai sĩ? ajim anʉm. 26Pãrau jãg phithur khabam nemdampaijã podba nʉm, ¿khanthee warag pãachdeu nem ig nʉmjã podba nʉmta warag ãba aata khĩirju nʉʉ aju aai nʉ? ajim anʉm. 27Pãade ar pamaardam ooihmʉ thʉnaajem khĩirjubat. Am ĩchab bʉ̃ʉrjã phidkhajã phidkhaba, ni amach khajũa jũaju khĩirjuwia kha ẽkha nʉʉjã aba aajem. Mag naab mamʉ iwiir ãbmuajã am dʉi barba aajemgui ajim anʉm, ooimʉg athee. Warrgar rey Salomón khararraujã phatkhon pom paraanaa nem ajaphampa paraa aajerraujã pamaardam ooimʉgjo chan pod khajũa jũaba aajeejimgui ajim anʉm. 28Pamaar jãg ooimʉ thʉnʉm edau wʉʉbaademuapai khiugphebaadeewai sĩi khʉʉijemjã Ẽwandamau jãg ooimʉ wai sĩejemta, ¿jãgwia pãar pamaar khãyaujã ʉ̃rʉʉcha balee nʉmua nem jeeu nʉmta irua deeba abarju? ¿Wa pãachdeu jeeu nʉmjã pod deebajupii aajẽwa? ajim anaabá. 29Pãach thach kho nʉm dʉi dodojo doju chan oob pãrau atcha khĩirjumiet ajim anʉm. Wa jãga pãachdeu nem ig nʉm paarpajujã oob khĩirjumiet. 30Pãrau khaphʉ nʉmgui ajim anʉm, õor thum Ẽwandam iek ʉkhabam khʉʉnta magʉm nem khĩirju phobaademjã pʉaba sĩerrjeem. Mamʉ pãar Aai Ẽwandamau pãrau nem ig nʉmjã thum khaphʉ sĩewai pãar chan warm khʉʉnjo magju khaba nʉmgui ajim anʉm. 31Mag khãyau warag Ẽwandam ipierraa ajuuta khĩirjubat. Pãrau chadcha magmʉn, tagam nem pãachdeu igbarmjã irua deeb khaba deejugui ajim anʉm.
Ʉ̃gthar augcheba naaimaag
(Mt. 6:19-21)
32’Pãar chi mʉ bʉ ogdʉba wenʉrrʉm khʉʉnan chadcha khapan khaba durrum. Mamʉ khapanag ee pãach appai khapan khaba nʉm awia oob nem okho wenʉrramiet ajim anʉm. Pãrau maach Aai ipierraa amʉn, irua ich durr pãar phe arr nʉm ora pãar dʉi nem ajapha aju. 33Pãach nem wai nʉm perkhʉʉimamua chi phatkhon aphʉʉm khʉʉn oomampierr jigpetat ajim anʉm. Magbaawai pãrau ʉ̃gtharm phatkhon jẽeuba aajemta paarpajugui ajim anʉm. Nem ajapham pãrau mag wai nʉisim chan bʉ̃ʉrjã obam. Ma mʉg jẽb gayam phatkhon khĩir khaba aawai nem jĩgkhaag chi ajaphamʉu awiajã pod aubam, ni comejenaujã ag ee dikhabamgui ajim anʉm. 34Mʉig jẽb gaai nʉweta nem thum paraa aju khĩirjuju khãyau, ʉ̃gthar paawaita nem thum paarpaju khĩirju wenʉrrʉmʉn magan chadcha pãar khĩirjug ãba Ẽwandam gaaita simgui ajim anʉm.
Jesuu ich beeju nʉpi jaautarr
35-36Mag jajawagmamua ich beeju igwia magjim aajem ĩchab: —Õrau amach patrón õor jua pʉr nʉm aar matarr deeu beeju nʉ nʉmua daukhana õtdau phuu nʉajemjo, pãarjã ĩchab ajapha khĩir khaug nʉisit ajim anʉm, mʉ beeju nʉawai. Mag õrau amach patrón barbaicheewai weeu awaag nʉajemjo, mʉ beejuuta nʉbat ajim anʉm. 37Pãrau khaphʉ nʉmgui ajim anʉm, ar chi chognaan mag daukhana amach patrón nʉ nʉm khʉʉnan onee aju, i barbaicheewai. Mag amau daukhana ich nʉ nʉm oobaicheewai, ichta jũrr chi chogkha simjo am sĩi nʉmich, mes gaai thach thoikhawia am jãhogjugui ajim anaabá, ich garmuata. 38Chi chognaan amach patrón edacha pamjã beeba ni ãspajuag pamjã beeba sim ee warag daphokagjã igba nʉ nʉm khʉʉnan onee ajugui ajim anʉm, i da beeba awiajã ich pierrwai amach dʉi ajapha aju khap. 39Pãrau khaphʉ nʉmgui ajim anʉm, ãbmua khãijã ich di aig nem jĩgkhaan beeju ora khaphʉ akhiin, bʉ̃ʉrjã khãiba warag sĩi thʉa eeju, ʉdʉʉr ich nem jĩgkhapiba. 40Magua muan pãragjã “Ich agjota ajapha khĩir khaug nʉisit” a chirʉmgui ajim anʉm. Pãrau mʉ beeju ora chan ãbmuajã khaugbam. Pãrau mʉ da beebajupii nʉm ee, mʉch chi Emkhooi Iewaan degolp barcheju a jaaumajim aajem.
Chi chogau ichig nem jaau pʉatarr thum wautarr
(Mt. 24:45-51)
41Magbaawai Pedroou Jesuug, —Señor, pua mag jaau sim, ¿maragpaita pua jaau chirʉ́, wa thumaam khʉʉnagwa? ajim anʉm.
42—Pãragpai khabamgui ajim anʉm; mua mag chirʉmʉn pãach thum chi mʉ iek ʉkha nʉm khʉʉnagau. Magnaa, Pãade ũrbat ajim anʉm: khanim nemjo patrón ãb simua ich chaaug maagpaawai ich chog ãbamʉg warm khʉʉn porkhapinaa ich magʉgpai ich nem thum jaau pʉabajem. 43Maimua mawi, mam sĩi awi deeu beewi ichdeu jaau pʉarrjo phidkha sim oobaicheewai, ¿mag jooi ich chog dʉi onee sim dʉi chi chogjã onee abaju khai? 44Mag ajapha phidkha sim oobaicheewai jooirau warag ich nem thum magʉgta thʉsĩepʉijugui ajim anʉm, ich denjo khap amkhĩir. 45Mamʉ magba mag ichig nem jaautarrjã ich odegpai, “Mʉ patrón chan da beebam” awi nem khaibag ich khapeen jũrr ich jua eegpaim khʉʉn dʉi ichdeu ampierr anaa, nagjã ichdeu dom aig donaa, thachjã ichdeu khom aig khomʉn, 46chi dikhʉ bʉ̃ʉrjã irua nʉba sim ee beewi mamagkham oobaichee, jũrr ichdeu warm khʉʉn dʉi aajerr khãaijã i gaai athuucha wʉnaa, phidag eemuajã barpʉinaa, chi khaigbacharam khʉʉn dʉi ãba sĩujugui ajim anʉm. 47Magua pãade mʉ iek ũrbat ajim anʉm: ãbmua khãijã ich patronau ichig nem jaau pʉatarr khaphʉ simta, degolp ich oochejujã khĩirjuba, ni bʉ̃ʉrjã irua nem khõsim nemjã waubamʉn, mag patronau ich beem ed i gaai mas deejugui ajim anʉm, bʉ̃ʉrjã dau aug khaugba. Ich agjota ajugui ajim anʉm ĩchab Ẽwandamau, ar ajapha wenʉrraju khaphʉ nʉmta nem khaigba waaujem khʉʉn gaai. 48Mamʉ ãbmuata khaugba aawai nem khaigba waumʉn, Ẽwandamau i gaai mas ab khaba mas ajup mamʉ, agpierrpai deejugui ajim anaabá. ¿Pãrau oowai ar nem dʉrrcha deetarrag agjo ich deetarrpierr dʉrrcha jeeuba aajẽ? ajim anʉm. Mua pãrag magkhimgui ajim anʉm: Thumaam khʉʉnau Ẽwandam athee nemdam bʉ̃rʉʉm awiajã wauju aai nʉm. Ar chi ʉ̃rʉʉcha wauju khaphʉ nʉm khʉʉnag irua ich agpierr dʉrrcha jeeujem. Maimua ar ich athee nem dʉrrcha wauju podba nʉm khʉʉnag irua agjo ich agpierr bʉchkhunpai jeeujemgui a jaaumajim aajem.
Chi chaairaujã ich dennaan igar khaba aju jaautarr
(Mt. 10:34-36)
49’Mʉʉn mʉg jẽb gaai õor durrum khʉʉn ee mʉch iekta phũak phuu wejom ee õtdau dʉrbapʉimjo apienta beejimgui ajim anʉm, ich Jesuu. Ya mag õtdau pa sim, mamʉ mʉchdeu khõsi chirʉmjo warag uu pa jẽerdʉmaa akhiin ajapcha akhamgui ajim anʉm. 50Mamʉ magaagan õor jua machgau agtha ajappha dau aug wauju waaur chirʉmgui ajim anʉm. Mʉch dʉi õrau magju thumaa khĩirjubaadeewaita okhĩirjug pooma chiraajem; mamʉ ichiita ich mag ajugui ajim anʉm. 51¿Pãrau khĩirjuawai mʉ sĩi pãar khõinaa bibigag chukkhu naamkhĩirta beejĩ? Pãar magamkhĩir khabajim. Mʉg mʉ beetarran mʉg mʉchdeu Ẽwandam iek õrag jaau chitʉm gaaimua õor khĩirjug aaiphur warag chaaur khĩirju nʉrrjee amkhĩirjota beejimgui ajim anʉm. 52Mua mag chirʉmʉn, mʉg mua jaau chitʉm gaaimua ãbam deg khãijã cinco naajem khai, õor thãrjupam khʉʉnau jũrr numiim khʉʉnau mʉ iek ʉkha durrum khʉʉn ichaaur iekhaju aawaita mag chirʉmgui ajim anʉm. Wa magbam khai, jũrr numpaim khʉʉnau khãijã thãrjupam khʉʉnau khĩirjug ajapham wai durrum khʉʉn igar khaba wenʉrrajugui a jaaumajim anaabá. 53Magphobaadeewai chi ayau mʉ iek ʉkham khõsi ʉkha sim ee, jũrr chi chaairau mʉ iek ʉkhamapha ajugui ajim anʉm. Ʉʉinjã agjo, chi ãdau mʉ iek ʉkham khõsi ʉkha sim ee, jũrr chi khaau bʉ̃ʉrjã mʉ iek ʉkhamapha ajugui ajim anʉm. Wa magbam khai, chi phaauhũanau mʉ iekdam ich ãigog jaau khitaawai, jũrr chi ãigou ich phaauhũan ichaaur ajugui ajim anʉm, mʉ iek ʉkhamaaugau.
¿Khani khaphʉ aju aai naajĩ Jesuu nem wau nʉrrʉm oowi?
(Mt. 16:1-4; Mr. 8:11-13)
54Maimua õor khapan ĩchab aig narr aawai amagjã magjim anʉm: —Edau duubjem garta edjã khĩbaadeewai, “Nosegan urum” aajem pãrau; chadcha ich maagjemgui ajim anʉm. 55Maimua ar phũ khãijã dokhẽu garmua phua thʉnʉisiewai, “Edau pechag wʉʉju aawai” aajem pãar iek; magʉm ed chadcha ich mag pechag kheeujemgui ajim anʉm. 56Pãrau magʉmjã khaug ahau aajemta, ¿jãgwia ĩs pãrau pãach daúa mua nem wau chitʉm oo nʉmjã pod khaug auba nʉ ajim anʉm, mʉ chadcha ich Ẽwandamau pʉiju jaaujerr chaarkha chirʉm?
Jãga aju aai nʉ dich khapeen dʉi iekkhõr aawai
(Mt. 5:25-26)
57Mag jajawagmamua ich Jesuupai amag, —¿Jãgwia pãrau pãach wir aigpai pãach Ẽwandam na khaigba nʉm khaug auwia pod “Maran chadcha khaigba nʉm” aba nʉ? ajim anʉm. 58Mua pãrag jaaukhimgui ajim anʉm: Ãbmua khãijã leinaanag pʉ khaibag waumkhĩir pʉch jawaan arrwai chi thethemnaan aar barwi jaauju nawe i dʉi ajapha iyʉʉ awi khõinaa nʉisit a chirʉmgui ajim anʉm. Magbamʉn chi thethemnaanau guardianaanag pʉ pʉr deebaawai jũrr makhʉʉnau pʉ cárcel deg pʉibajup ajim anʉm. 59Cha mʉ iekha chirʉm iekhau ya pʉʉta amau mag phãar athamʉn, phatkhon gaaimua arr khai, ãbmiecharam centaaudam phagpʉibam aigjã amau pʉ obeerpʉibajugui ajim anʉm. Mua mag chirʉmʉn, pãach khaibag Ẽwandamag chugpaapiju aai nʉwe chugpaapiwi i dʉi khõinaa ajuuta ẽkhabat a chirʉmʉugui ajim anʉm.
Právě zvoleno:
San Lucas 12: noaA
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2011, Wycliffe Bible Translators, Inc. All rights reserved.
