San Lucas 15
15
Oveja okhootarr nem ĩgkhaa
(Mt. 18:10-14)
1Biek ãb Jesuu jãga Ẽwandamau õor peerdʉajẽ a jaau sim aig, gobiernoog debpaar paar nʉm jeeujem khʉʉn khapan bee thʉnaajim aajem, chi pekau dapnaanpa, i iek ũraan. 2Magbaawai chi ajapha Ẽwandamau Moiseeg iek phãpitarr ʉʉrkhaajem khʉʉn, maimua ag iek jawaag athee chi machnaan dʉimua Jesús igwia, —I den mʉg wounau chan pekau pom sĩsidʉm khʉʉn awiajã isegba ich jãg warag am dʉi thach kho nʉrraajem anaajim aajem.
3Magbaawai ichdeu am mag iekha nʉm ũrwia, mʉg nem ĩgkhaadam jaaumamua amag magjim aajem:
4—Khanim nemjo mʉg nʉm aig ãbmua cien ovejas wai sim, maimua ãb okhoobaadeewai, ¿khaíuta tagam khʉʉn do wajaug ee phepʉawia mag okhoo khitʉmdam jʉraan mabaju khai? ajim anʉm. Keen, par maadeu dich nemchaai aawai baaubam aigjã ookha khitʉʉ abarju. 5Maimua mag baau athaawai, ¿khaíuta sĩi onegau dich nemchaaidam ud aibeebaju khai? ajim anʉm. 6Maimua di aig pachewiajã, ¿khaíuta ich khapkhʉʉn dʉi ich di dakha naajem khʉʉnpa thʉ̃rkhanaa, “Keen, mʉ onee chirʉm, mʉch oveja okhootarrdam oo athaawai” abaju khai? 7Keena, ich jãgta aajemgui ajim anʉm ĩchab ʉ̃gtharjã: Ar õor khapan amach ajaug thowia Ẽwandam dʉicha wenʉrrʉm aajem khʉʉn gaaimua onee aju khãyau, pekau pomkham khʉʉn eem ãb khãijã ich khaibag isegwia Ẽwandam ich thãar ee atham ed ʉ̃gtharmpeenjã onee aphobaadeejemgui ajim anʉm ĩchab.
Phatkhon okhootarr nem ĩgkhaa
8Maimua ĩchab mʉg jaaujim aajem: —Khanim nemjo ʉʉi ãb simua phatkhon chi dau daí appai diez wai sim, maimua mag eem ãb khãijã okhoobaadeewai, ¿chijãg ʉʉirauta bʉ̃ʉrjã ich phatkhon jʉrba ich mag sĩuju khai? Par jãgan irua ag bʉrre lámpara paanaa, dijã thũapwia, nem pʉaba jʉr sĩi awia, baau athajugui ajim anʉm. 9Maimua mag baau athaawai, ¿chijãg ʉʉirauta ich khapeen ich di dakha naajem khʉʉn thʉ̃rkha auwia, “Keena, ĩsin mʉʉn onee ʉm, mʉch phatkhondam okhoo wai ʉarr baau athaawai” abaju khai? ajim anʉm. 10Magnaa ich Jesuupai, Ich jãgta ʉ̃gtharjã ĩchab Ẽwandam chognaan onee aphobaadeejemgui ajim anʉm, ar woun ãb khãijã ich khaibag isegwia khĩirjug ajapham jʉrwia Ẽwandam ich thãar ee atham ed.
Ẽwan phatkhon ãr gastaa nʉrrʉʉ athurtarr ag nem ĩgkhaa
11Maimua jãga Ẽwandamau õrau ich iigwai isegba aajem khap amkhĩir, Jesuu mag ich aig beetarr khʉʉnag mʉg nem ĩgkhaajã ĩgkhajim aajem ĩchab:
—Woun jooi ãb simua chaain numí wai sĩejim aajem, emkhooin apha. 12Khãai ãb chi iewaa chi ẽudeemua ich ayag, “Tata, pʉ meebaadeewai marau jʉ̃aju nem warre magan mʉrʉg mʉch jua ee dee chirbá” ajim anʉm. Magbaawai jooirau chadcha amag jigbaadejim aajem, amachpierr. 13Mag deetarr khur khãai khapancha khaba nʉm ee, ichig nem deetarr thum perkhʉʉipʉiwia ag phatkhon dʉi warre warp petajim aajem, deeum durr. Mamʉ mam pawia nem oobam gaai ichdeu gastaam aig phatkhon ãr gastaa sĩeimajim aajem. 14Maimua mag phatkhon nem parhoobam gaai werba sĩi awia thum obapʉim ee ĩchab jãdau theega burrjim aajem, i sim durr. Maimua magbaadem dʉi ya ĩchab jãsogau mas aadejim aajem. 15Jãsogau ich magbaadeewai woun ãb sĩerr aar mawia parhoobam phidagdam khãijã ichig deemkhĩir jeeuwimajim anʉm. Magbaa magua irig jaaupʉijim aajem, khũsnaan thʉamkhĩir. 16Mag chadcha mawia khũsnaan thʉa oo chirʉmua jãsooga aawai chi khũsnaanag phathau deeche nʉm eemta dʉi khom iigjeejim anʉm, chi khũsnaanau kho nʉm dʉi ãba, bʉ̃ʉr khãijã jãd thõo awaag. Mamʉ magʉmjã ãbmuajã irig “Ya magan khojuma” aba aajeejim anʉm. 17Khãai ãb mag oo chirʉʉ awia thumaa khĩirjumamua ich wir aigpai magjim anʉm: “¡Eh! Mʉ aai di aar i piyonnaan bʉ̃ʉrjã khoju athee augcheba biwaa thʉnʉm ee, mʉchta mʉch khĩir lokgau jãdaúa mʉig mʉ thõo warrumgui” ajim anʉm. 18“Mʉg chirabnaa mʉ majugui” ajim anʉm “mʉch aai aar. Maimua barimawia mua irig ‘Tata, chadcha mua Ẽwandam dakhĩir pekau wauwia pʉ dʉijã khaigba abarm’ aimaju. 19‘Mag gaaimua warramjo pua mʉrʉg pʉch chaai aju khaba sim. Mʉrʉg iewaa aju khãyau sĩi mʉrʉg pʉch piyón abá; mʉ pʉ athee ich mag phidkha chitaju’ a iekhaimaju” khĩirju athajim anʉm.
20’Mag ich appai iyʉʉ oo sĩewia baubaadeeu chadcha ich aai aar petajim aajem. Mag mamua agtha di warphaa sĩwe chi ayau oo athajim anʉm, i chaaita dau aphʉʉ ur khitʉm. Magbaawai jooi thãrau ãwatbajim aajem. Mag warag khaphig mawia ich chaai o phʉʉr jõinaa khĩir ʉ̃ʉ aujim aajem. 21Magbaawai chi chaairau ich ayag, “Tata, chadcha mua Ẽwandam dakhĩir pekau wauwia pʉ dʉijã khaigba abarmgui ajim anʉm. Mag gaaimua warramjo pua mʉrʉg pʉch chaai aju khaba chirʉm” ajim aajem ich ayag. 22Mamʉ chi ayau dau aug khaugwia, magʉmjã igba, warag degag arrwia ich chognaanag, “Mʉ chaai athee khajũa chi ajapcharam jʉrwia jũapi sĩubat” ajim anʉm. “Maimua ĩchab sorrtikjã jũapinaa zapatjã chi ajapham jũapibapʉit. 23Magwia phakdam chi õtpaam authurwia thõobapʉit” ajim anʉm, “maach thum ãba onee kho nʉmua phiesta wawaag. 24Pãrau oo nʉmgui ajim anʉm, mʉ chaai chi meem arrta deeu iiubarmjo abarm; beebajupii narrta deeu barbaichem” ajim anʉm. Mag, chadcha phiesta waujim aajem.
25’Mamʉ maagwai ich jooi iewaa chi naam, phidag ee sĩejim aajem. Maimua beewia di dakha panaa ũr uraa aawai sĩi karris phophookham dʉi tamburrpa bubujukham gaai jemkha khodthʉnʉm khaug athajim anʉm. 26Mag ũrbaawai ich aai chog ãb thʉ̃rnaa, “¿Khan gaaimua agá eeupemjo mag thʉnarram?” a jeeujim aajem. 27Magbaa chi chogau “Pʉ eeumta beejimgui” ajim anʉm. “Mag ʉu barbaicheewaita pʉ ayau phakdam chi sebaam wai narr thõopibajieb” ajim anʉm “phiesta wawaag.” 28Mamʉ ichig mag jaaubaawai warag meeukhawia dubmapha daaugajãrpai sĩsijim aajem. Magbaawai oberchewia chi ayau ithũu ich iewaag, “Dubtarrau iewaa” ajim anʉm. 29Mamʉ ichig magbaawai warag ich ayag, “Pʉde ũrbá tata” ajim anʉm. “Mʉch erraawe bʉ̃ʉrjã pʉ aigmua ogdʉba, pʉ phidag ee mʉ phidkha chitaajem; pua nem jajaaukham ichaauraapaijã iekhaba chitʉmgui” ajim anʉm. “Mamʉ magʉmjã bʉ̃ʉrjã pua mʉrʉg chĩb chaaidam khãijã deeba aajem, mʉch khapeen dʉi onee khomkhĩirjã. 30Mag khãyau sĩi jãg pʉch phatkhon arrwia parhoob kachaloonaa ʉʉin dʉipa ãr gastaapʉithurtarr barbaicheewain chadau, pua phak chi sebaampa thõo chirabma” ajim anʉm, “i khomkhĩir.” 31Magbaa jooirau jũrr ich iewaag magjim aajem: “Mamʉ pua khaphʉ chirabá” ajim anʉm, “chadcha pʉchta mʉ aigmua ogdʉba khitaajeewai mʉ nem mʉg thʉnʉm thum pʉch den appai thʉnʉm. 32Mamʉ pua oo chirʉmgui” ajim anʉm, “pʉ eeum chi meem arrta phiidʉwi pierrumjo abarm; maach aigmua mawia tag beebajupii narrta, ĩsta deeu pierrumgui” ajim anʉm. “Magua ĩs chadcha maadeu mʉgju aai naabahab ajim anʉm, i beetarr gaaimua onee aag.”
Právě zvoleno:
San Lucas 15: noaA
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2011, Wycliffe Bible Translators, Inc. All rights reserved.
