LIPOH 20
20
Abraham ko Abimelek
1Abraham Mamre lanü Negev lang shehmüi wünü Kadesh e Shur nyüh kahla licho. Akhanglang abi Gerar la liyade, 2#Lip 12.13; 26.7abinü anitpü Sara tsü aniepü yocho. Hütsünü Gerar yangthsaba Abimelek-nü abi yanglang Sara norosohcho. 3Romang khüdu abi melang Tsingrangba-nü abi te yocho: “Nühnü hiba khingkurü khyücho nengdangnü nüh sünung, tunüo abükyü tsü bürü nitpürü lile.”
4Ta Abimelek-nü abükyü chah müthahpüecho ko abinü yocho, “Abüdongba, Ih achomükeh! Nühnü achomükeh changsohnung do? 5Abraham apunü abükyü tsü aniepü yocho, ko abükyü nüsü hütsüta yocho. Ihnü hi lümlong amüsanü nguchicho ko Ihnü tu müthsameh.”
6Melang tsü Tsingrangba-nü lalingcho, “Ho, nühnü hi lümlong amüsanü nguchicho Ihnü müdhele; hütsünü Ih nyüm amünyi müshitpanung abükyü chah müthapüsohcho. 7Ta ade, khingkutpü tsü thali anii khyang jüng. Abi azikehrüe, nüh müsünung abinü nü khyang dangkhidangnangjünung. Ta nühnü abükyü thali müjükhang, nüh ko nü müyurü apüm sünungepü Ihnü nüh müzahsohre.”
8Nyangnyü khüu mütoh Abimelek-nü abi pohki thsazirüti atümung dsi atikehcho tsü yode, arüh drümüyangcho. 9Hütsüpü Abimelek-nü Abraham dsi tsingdhingcho, “Nühnü ihrü te hi tu nguchicho? Hiba achangba dhsürü I chah ko I yanglih chah hironungthsa Ihnü nüte tu amüthsalang nguchicho? Nühnü nguchiba hiroh-ilü sünüsü Ite münguchi. 10Tuepü hita nguchicho?”
11Abraham-nü lalingcho, “Hila Tsingrangba drürü süsü mülinung ko I nitpü khyünung khyanglangnü Ih kyüsehkhang mütsa pü Ihnü lümcho. 12Khang abükyü tsüsü yuje I nie. Abükyü tsü uwa tsulatpü, ta Itpa tsulatpü mah, ko Ihnü abükyü khyücho. 13Hütsünü khode Tsingrangba-nü Iu kuh lanü Ih limih palang tsisohcho, Ihnü abükyü te yocho, Ihjü khüdederü wünang apüm la Ite nüh yochonyiba ngusohnung nengdang Ih tsü nü mungepü atümung te young.”
14Achotsü Abimelek-nü Abraham khyang Sara thali jücho ko hütsüte san, misü ko ayurü jücho. 15Abinü Abraham te yocho, “Dhing, hila alih hi apüm Iyo lile; nüh khüde linyürünang lieng.” 16Abinü Sara te yocho, “Hila nüte lirüti atümung bete nüh achomükeh pü yuzithsanung, nü mung khyang Ihnü taripi hajar khüdu jüre; hi khu atümungnü nühnü tu müthsameh pü müdhenung.”
17Abraham nitpü Sara chah hütsüta tikehcho khu, Abüdongba-nü Abimelek kuh la khingkurü sünüsü tsuzarü müthsanung yatipehjücho. 18Achotsü Abraham-nü Abimelek nengdang dangkhidangnangjücho ko Tsingrangba-nü abi kyangjücho. Abinü anitpü ko ayularütisü azarü linungthsa kyangjücho.
Právě zvoleno:
LIPOH 20: SANGBSI
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.