LIPOH 19
19
Sodom Münyiti
1Khode riwürü anyüh tsü hütsü anyüzehlang ro Sodom chihcho, Lot tsü yangdi tbükhüm la pümcho. Abinü arüh ngudu shemüsu wü arüh mütohcho. 2Abinü arüh jingte mükhukeh yocho, “Adirüti, Ih hila nührü dikehnung lile. Yanglilüm I kulang rung. Nührü jing thsütohng ko shomülang hila kyahshang. Atunyang du mütoh suropü tsieng.”
Ta arühnü yocho, “Doh, Ihrü ama ayung yanglongla linung.”
3Abinü mütozah kihchichonü akhanglang arühnü abi kulang wücho. Lot-nü akulirü te hümdhse külüp shirü khyang tsuyongnung atsa rungnümnung yocho. Ko khode hütsü rungnümcho arühnü tsuyongcho.
4Ta arüh müyüp-ede, Sodom-rünü kuh tsü mükangticho. Hütsüla yangdi nyitsarü aza-azi apüm zehcho. 5#Yuk 19.22-24Arühnü Lot dsicheh tsingdhingcho, “Nü kuh la müdongnung roba shirü tsü khülo? Ihrü yang arüh ade norung!” Sodom-rünü arüh te mükhongnyücho.
6Lot-nü akhanglang kukhang khangti dongkhu chüducho. 7Abinü arüh te yocho, “Jünirüti, Ihnü nührü te kihchire, amütsa nguchi hitari tünguchi. 8Dhing, I tsularü amüxengcho amüdhsengcheh anyüh lile. Ihnü nührü khyang anyüh norojünung, ko nührünü tu nguchinyüro arüh chah nguching. Ta hiri chah tu tünguchi; arüh I shirü lile, ko Ihnü arüh tsungtinung athsalang.”
9Ta arühnü yocho, “Lang khuchüng, nüh atsichirü! Ihrü te thülanung nüh süo? Langla tüya mahkhang arüh tenü nü chah amütsau bichinung.” Arühnü Lot nyümpehpü kukhang nyümphohnung wücho. 10Ta nyüh anyüh tsünü kheh tohchehchü Lot tphahyohcho, ko kukhang tsü khangtipehcho. 11#2 Yang 6.18 Hütsüpü arüh khyang trahtri müngusohnung shulüm dongkhu yarü apüm nahtohsohcho.
Lot-nü Sodom Pehjücho
12Nyitsarü anyüh tsünü Lot-te yocho, “Nüte khürü likhang, atsurü, atsularü, tsunyahrüti mahkhang yangdila tsutpurü khürü likhang, hilanü nüpü tsieng, 13tunüo ihrünü hiba yangdi hi changjünung. Hiri nyitsarü nyüm adrünungkeh mülangjücho Abüdongba-nü yuchiko ko hiba Sodom changjünung abinü ihrü müthehcho.”
14Achotsü Lot-nü atsulatpürü müxing liba adhrebarü yanglang tsü wünü yocho, “Hilanü zahta tsieng; Abüdongba-nü hiba yangdi hi changjünung.” Ta abi tsü tülarepü arühnü lümcho.
15Nyajang riwürü tsünü Lot zohchi yocho, “Zahding, yangdi changbala tsü nührü müzehnungthsa, nü nitpü ko nü tsularü anyüh tsü nüpü tsieng.” 16#2 Pet 2.7Lot-nü tütohnyünyehcho. Ta Abüdongba-nü abi müichonü, nyitsarüti tsünü abi, anitpü, atsulatpü nyüh tsü arüh khehnü tphah nowü yangdi tsü khu nüchehchüpehcho. 17Hütsüpü riwü nyüh yola khüdunü yocho, “Nührü akang nengdang shang! Khanglang tüximüla ko angah la tsü tünyehli. Nührü müsünung nengdang azonglang tsü tsieng.”
18Ta Lot-nü lalingcho, “Doh, adirü, yanglilüm ihrü hütsüta tüthsasoh. 19Nühnü Ih khütang müi I kang khümchoko. Ta azong tsü shurale; achangnung dhsürünü Ih bhünüpnung ko hütsü müchie Ih sünung. 20Nühnü yangdiza tsü münguo? Hütsü amünyeh due. Ih hütsüla wüsohng. Hütsü yang adükeh due, hütsüla Ih khümcho linung.”
21Abinü lalingcho, “Hütsüta thsaang. Ihnü yang hütsü müchangjünung. 22Dhsüdhsang! Shang! Nührü hütsü müchih-ede Ihnü tu nguchinung mükoh.” Hütsünü hütsüba yangdi neng tsü Zoar pü dsicho.
Sodom Ko Gomora Changcho
23Lot wü Zoar chihde nyü chürocho. 24#Mat 10.15; 11.23-24; Luk 10.12; 17.29; 2 Pet 2.6Dhrongyengnü Abüdongba-nü Sodom ko Gomora yangdi michah miphohlung ko michang tsing roh-i rosohcho, 25ko arüh, angah shünü ko hütsüla liba apüm ko hütsü lih la chürocho apüm changsohcho. 26#Luk 17.32Ta Lot nitpünü ximüla dhingcho ko abükyü mih dongdi kangcho.
27Nyangnyü khüu mütoh Abraham-nü dhsüdhsa abi Abüdongba yola yaba müdüm lang tsü wücho. 28Abinü Sodom ko Gomora ko angah apüm tsü dhingcho ko alih lanü mikhu arangcheh chüroya ngucho. 29Ta khode Tsingrangba-nü Lot liba ngah yangditi changsohcho, abinü Abraham lümcheh Lot tsichehsohcho.
Moab-rü ko Amon-rü Athridi
30Lot-nü Zoar la linung drüchonü abi ko atsulatpü nyüh azonglang tsü tuwü lungkhi khüdula licho. 31Ko azitpü tsünü ani te yocho, “Uwa ashirü kangrü ko Ihjünü tsuzarü linungthsa Ihjü khyünung limih la adhrerü mühle. 32Hütsüeko rung, Ihjünü abi müchasohnung ko abi te mükhongpü abi khu azarü linung.” 33Hütsü romang abi khyang yongkha tihcho ko abi te azitpünü mükhongcho. Ta abi müchachonü hütsü mümüdhe.
34Nyümong khüu azitpünü ani te yocho, “Abi te shomang Ih yüpko; ko shomülangsü müchasohnung ko abi te nüh yüpm. Hütsükhang Ihjüding abi khu azarü linung.” 35Hütsüta hütsü romangsü abi müchasohcho, ko azatpü abi te mükhongcho. Adesü abi müchachonü hütsü mümüdhecho. 36Hütsüta Lot tsulatpü anyüding anyübünyü au khu fü müdengcho. 37Azitpünü adhrerü khüdu nümüsucho ko abinü aneng Moab dsijücho. Chünye chii abi Moab-rü au lile. 38Azatpü nüsü adhrerü khüdu nümüsucho, ko abinü Benami dsijücho. Abi tsü chünye yingcheh Amon-rü jümürü lile.
Právě zvoleno:
LIPOH 19: SANGBSI
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.