Luc 5
5
Suma hat suma Jesus mi yazi avo’â
(Gol Mat 4.18-22; Mar 1.16-20)
1Bur tu Jesus mi nga tchola avun apo d’a Jenesaret-ta. Ablau suma a togï gevem á hum zlad’a hAlonid’a. 2Mi we alumei suma gureina mbà a nga kä avun apod’a. Suma tchiuna a buzuk kei kuruziya, a nga mbus abei mazina woyo. 3Mi djak kur alumba tu, ni hi Simon-nda, mi tchenem ala mi hud’um sä woi nde ki gongôd’id’a. Jesus mi kak kurud’u, mi hat ablau sum ndazina.
4Ata yima mi dap zla d’a ded’a dapma, mi de mi Simon ala: Ei i kur galileina; ang ki ndrongâ, agi tchugugi abei magina kä, agi tchiwigiya.
5Simon mi hulong dum ala: Salamina, ami tchiwimi andjege dei bei fami va ba, wani yam de manga, an nga ni tchuk abeina kä.
6Kid’a azi le hina d’a, azi vik kulufâ ngola, abei mazina mi lá tchala. 7A labozi mi ndrozi suma a nga kur alum mba mbàd’a á mba á ndjunuziya. A mba, a oî alumba djak. Alumei ndazina a lá hlupa kä. 8Kid’a Simon Pierre mi we hina d’a, mi grif kä avok Jesus, mi dala: Salana, ang aranu, kayam an ni sama tchona.
9Mi le mandarâ ki ndroma kayam kuluf ma azi vigim heîna. 10Jacques azi ki Jean Zebede groma ni Simon ndroma, a le atchap mi. Jesus mi de mi Simon ala: Ang le mandar ri, ar avok hî ang mba tchiu ni suma. 11Kid’a a i alumeina avun gongôd’id’a, a ar ahligiyezi kä pet, a i ad’u Jesus.
Jesus mi sut sama libina
(Gol Mat 8.1-4; Mar 1.40-45)
12Kid’a Jesus mi nga kur azì ma ngol ma dingâ tud’a, sama libina mi zagam hûna mi mba. Kid’a mi we Jesus-d’a, mi ge tam kä avoromu, mi tchenem ki labiyad’a, mi dum ala: Salana, le ang mina ni, ang ndak á yagan ndeyo.
13Jesus mi mat abom mi domu, mi dum ala: An mina, ar libi mangâ mi yak keyo. Ata yi máma na wat, libi mama mi yak kei mi. 14Jesus mi gad’am ala: Ang de zla ndata mi sa d’i. Wani ang iya, ang simat tang mi ma ngat buzuna mAlona, ang he vama ngat buzu ma Moise mi he vuna kama yam yak manga á tagazi woi ala ang yak wa woi da’. 15Wani zlam nde yina ngola. Ablau suma a togï gevem á humumu, á sud’uzi woi kur tugud’ei mazid’a mi. 16Wani mi araziya, mi i abagei á tchen Alona.
Jesus mi sut sama gugutud’a
(Gol Mat 9.1-8; Mar 2.1-12)
17Bur ma dingâ Jesus nga mi hat suma. Fariziyêna azi ki suma hat gata a nga kaka kä gevemu. Ni suma a tcholï kur azì ma nglo ma Galile-na ki ma nglo ma Jude-na ki suma Jerusalem-ma pet mi. Ad’enga hi Salad’id’a nga ki Jesus á sut suma tugud’eid’a mi. 18Suma a ganï sama gugutud’a ki zlatna. A nga hal lovota á kal ki sed’em á tinim kä avok Jesus. 19Kid’a azi fe nga lovota d’uo abo ablau sumid’a, a djak akulo yam dudura, a hôt teyo, a sirim kä ki zlatna aduk suma avok Jesus. 20Kid’a mi we he gagazi mazid’id’a, Jesus mi de mi sa máma ala: Bäna, an vat wa hurun ndei yam tcho manga da’.
21Suma hat gata azi ki Fariziyêna a nde djib’er kuruzi ala: Ni nge ba, mi las Alona na ge? Sama ndak á vat hurum mbei yam tchod’a ni nge? NAlona tu d’uo zu?
22Wani Jesus mi we djib’er ra kuruzid’a tcha, mi dazi ala: Ni kayam me ba, agi djib’eregi kurugi krovo hina ge? 23Vama afefeta kal á ded’a ni me ge? An vat wa hurun ndei yam tcho manga da’, d’oze á ded’a ala: Ang tchol akulo, ang tid’a d’a zu? 24Wani kayam agi wagi woi ala an Gor Sana ni nga kad’enga yam andagad’a ka hî á vat hurun ndei yam tchod’a hi sumid’a,... mi de mi sama gugutud’a ala: An nga ni dangû, ang tchol akulo, ang hle zlat mangâ, ang i avo hatangû. 25Atogo hina zak, mi tchol akulo avorozi pet, mi hle zlat mam ma burâ, mi i avo hatamu, nga mi subur Alona. 26Azi pet a le atchap, a subur Alona, a le mandarâ, a dala: Ei wei ini vama yoyouna.
Jesus mi yi Levi
(Gol Mat 9.9-13; Mar 2.13-17)
27Bugola, Jesus mi ndabua, mi we sama ve lombod’a, simiyêm ala Levi, mi nga kaka kä kur gong nga ve lombod’a. Jesus mi dum ala: Ang mbeï ad’unu. 28Levi mi ar ahlena kä pet, mi i ad’umu.
29Levi mi le te ma ngolâ kayam Jesus avo hatamu. Ablau suma ve lombod’a azi ki suma dingâ, a nga te ki sed’eziya. 30Fariziyêna azi ki mazi suma hat gata, a nga kud’os mam suma hata ala: Ni kayam me ba, agi tagi tchagi ki suma ve lombod’a azi ki suma tchona ge?
31Jesus mi hulong dazi ala: Suma a nga kad’eng tazina, va mi ndolozi nga ki dokdor ri, wani ni suma tugud’eid’a hol. 32An mba ná yi suma d’ingêrâ d’i, wani an mba ná yi suma tchona á mbut huruzi yam tcho mazid’a.
A djop Jesus yam d’el ta d’a bei te tenid’a
(Gol Mat 9.14-17; Mar 2.18-22)
33Suma a djop Jesus ala: Suma hata hi Jean ma le suma batembina a nga d’el tazi bei te tena, a nga tchen Alona mi. Suma hata hi Fariziyênina a nga le hina mi, wani mang suma hata a nga te, a nga tche.
34Jesus mi dazi ala: Agi ndak á d’elegi suma sala tela mi yazi yam tenina kid’a mi nga ki sed’ezi tua d’a zu? Nga na d’i. 35Wani burâ nga mi mba, a mba hle sala tela woi adigaziya. Kur bur máma a mba d’el tazi bei te tena.
36Jesus mi dazi zla d’a d’ogola ala: Sa nga mi haû vun baru d’a awilid’a, mi dubut ata baru d’a adjeud’a d’i. Le mi le na ni, ndat mba d’i haû d’a awilid’a woyo, vun baru d’a awilid’a nga d’i zlap ki d’a adjeud’a d’i. 37Sa nga mi sel süm ma ayîna kur agolongeî suma adjeuna d’i. Le mi le na ni, süma mba mi munuzi woyo, süma mba mi b’lak kei kagolongeîna mi. 38Wani süm ma ayîna a selem mi kur agolongeî suma awilina. 39Sama tche süm ma adjeuna, nga mi min ma awilina d’i, kayam mam nga mi dala: Ma adjeuna mi djivid’a kal ma awilina.
Azumeina Bible © Alliance Biblique du Tchad, 1999.