Luc 4
4
Kuka hi Jesus-d’a
(Gol Mat 4.1-11; Mar 1.12-13)
1Kid’a Jesus mi tcholï avun alum ma Jurdê-nid’a, mi nga oîd’a ki Muzuk ma bei tchod’a ba na; Muzuk máma mi im hur fulâ. 2Mi le burâ dok fid’i kua, Diable nga mi kugum mi. Kur bur máma pet mi te nga va d’i. Kid’a bur máma dapa, meid’a nde d’i tchumu. 3Ata yi máma, Diable mi dum ala: Ang le nAlona Goroma ni, ang he vuna mahina d’a wanda ti mbut avuna.
4Wani Jesus mi hulong dum ala: A b’ir kur mbaktumba hAlonid’a ala: Sana mi kak karid’a ni yam tena hol li.
5Ata yi máma, Diable mi i ki sed’em akulo yam ahinad’a, atogo hina zak mi tagam leu d’a yam andagad’id’a pet. 6Mi dum ala: An mba ni hang ad’eng nga wanda pet ki ndjondjoîd’a hi leu ndatid’a pet mi, kayam Alona mi han ahle ndazina pet nabonu. An ndak á hazi mi sama an minima. 7Kayam ndata, ang le grif kä avoronu ni, ahle ndazina pet a mba arî mangâ.
8Jesus mi hulong dum ala: A b’ir kur mbaktumba hAlonid’a ala: Ang kud’orî Ma didina Alo mangâ, ni mam tu go ba, ang lum sunda.
9Diable mi i ki sed’em Jerusalem, mi tinim akulo yam gong nga kud’ora hAlonid’a, mi dum ala: Le ang nAlona Goroma ni, ang ge tang kä, 10kayam a b’ir kur mbaktumba hAlonid’a ala: Alona mba mi he vuna mi malaika mama kang á ngomongû. 11A mba vang akulo kabozi kayambala ahinad’a ti dabang aseng nguo d’a.
12Jesus mi hulong dum ala: A b’ir kur mbaktumba hAlonid’a ala: Ang kuk Ma didina Alo mangâ d’i. 13Ata yima Diable mi dap vun kuk mamba gu na, mi aram á djup bur ma dingâ.
JESUS MI TCHI WALA WOI ADUK SUMA GALILE-NA
(4.14—9.50)
Jesus mi tin ad’u le sun mamba kur Galile
(Gol Mat 4.12-17; Mar 1.14-15)
14Jesus mi hulong kur Galile kad’enga hi Muzuk ma bei tchod’a ba na. Zlam nde yina yam ambas sa nguyuta pet. 15Nga mi had’azi kur gongîyo mazi suma toka; azi pet a suburumu.
Suma Nazarat-na a noî Jesus
(Gol Mat 13.53-58; Mar 6.1-6)
16Jesus mi mbaza Nazarat kur azì ma mi wul kuana. Mi kal kur gong mazi d’a toka kur bur ma sabatna d’igi nga mi le teteu na. Mi tchol akulo á ndum mbaktumba ki delem akulo. 17A hum mbaktumba hi ma djok vun Alona Isai-d’a. Mi malad’u, mi fe yima mi dala:
18Muzu’â hi Salad’ina mi nga kanu,
kayam mi von mbulâ kan mi tinin iran van
ná tchi wal Zla d’a Djivid’a mi suma houd’a.
Mi sunun á tchi wala mi suma a yozi magombina
á tchuguzi akulo,
á mal ir suma duka woyo,
á tchuk suma a nga lazi ndakina akulo,
19á tchi wala ala biza d’a Ma didina mba mi tak suma mamba woid’a, ti mba wa da’.
20Jesus mi d’ut mbaktumba, mi hat mi ma le sunda kur gongina, mi kak kä. Suma kur gongina pet a so irazi kamu. 21Mi nde mi dazi ala: Zla d’a a b’irit kur mbaktumba hAlona d’a agi humut inid’a, ti ndak wa memet.
22Azi pet tazi lazi djivid’a kamu, a le atchap yam zla d’a suma d’a nga d’i ndavunamba, a dala: Mam mi Josef goroma d’uo zu?
23Mi dazi ala: Dam agi mba dan zla d’a d’ogol la wanda ala: Dokdorâ, ang sut tangû. Ahle suma ang lazi kur Kapernayum suma ami humuzi ang lazina, ang lazi ka hî kur aziyang mi.
24Mi dazi kua ala: Gagazi, ma djok vun Alona, suma a nga hum ngola yam ambazam mbi. 25Wani gagazi, an nga ni dagiya, adjeu arop suma modonod’a ablaud’a a nga yam andaga d’a Israel-la kur atchogoid’a Elie-d’a, kid’a alona se d’uo bizad’a hindi ki tilâ karagayad’a. Baktara d’a ngola nde yam andagad’a pet. 26Alona mi sun Elie nga mi sa tu adigazi d’i, ni mi modono d’a Sarepta d’a kur ambas sa Sidon-nda hol. 27Suma libina ablaud’a a nga yam andaga d’a Israel-la kur atchogoid’a hi ma djok vun Alona Elise-d’a, wani mi yak nga libina hi sa woi tu adigazi d’i, ni hi Näman ma Siri-na hol.
28Ata yima suma kur gongina pet a hum zla ndatina, a mbut ayîna, 29a tchol akulo, a digim abu bugol azina, a i ki sed’em ata yima ndingâ, yima a min azina kuana, kayam azi zud’umï kä ki delemu. 30Wani mi kal adigazi mi iya.
Jesus mi dik muzuk ma tchona woi kur sana
(Gol Mar 1.21-28)
31Jesus mi mbaza kur azì ma ngol ma Kapernayum ma kur Galile-na, mi had’azi kur bur ma sabatna. 32Azi le atchap yam hat mamba, kayam nga mi had’azi kad’enga. 33Mi fe sana kur gong mazi d’a toka mi nga ki muzuk ma tchona kurumu. Sa máma mi er ad’um akulo ala: 34Hei, Jesus ma Nazarat-na, vama ndolong ki ami ni me ge? Ang mba á bami woi zu? An wang tetet, angî Ma bei tcho ma Alona sunungîna.
35Jesus mi ngobom ala: Ang ba! Ang nde woi kurumu. Ata yima muzuk ma tchona mi gum kä adigazina, mi nde woi kurumu, mi lum nga va d’i. 36Azi pet a le atchap, a de tazi ala: Zla ndata ni zla d’a nana na ge? Kayam mi he vuna mi muzuk ma tchona kad’enga, mi ndabua. 37Zlam nde yina kur ambas ndata pet.
Jesus mi sut suma tugud’eid’a ablaud’a
(Gol Mat 8.14-17; Mar 1.29-34)
38Jesus mi tcholï kur gong nga toka hi Juif-fîd’a, mi kal avo hi Simon. Simon akunomba tat nga d’i kumurut ngola. Azi tchen Jesus ala mi tcholot akulo. 39Mi hud’o kä kad’u, mi dat ala: Ta d’a kumura, ndak aragu! Tat ta kumura ti arat mi. Ti tchol atogo zak, nga d’i lazi sunda.
40Kid’a afata nik dad’a, suma pet suma a nga ki tugud’eid’a tetengâ, a mbamziya. Mi tin abom kazi tutu pet, mi sud’uziya. 41Muzuk ma tchona ablaud’a a buzuk kei kur suma, a er ad’uzi akulo ala: Angî Alona Goroma! Wani Jesus ngoboziya, mi arazi nga lovota á de zlad’a d’i, kayam azi wum ala mam mi Mesi.
Jesus mi tchi wala kur Jude
(Gol Mar 1.35-39)
42Kid’a yina fo dad’a, Jesus mi tchol mi i abageya. Ablau suma a nga halamu, a fumu, a min d’elem kayam mi arazi d’i. 43Wani mi dazi ala: Djivid’a an i tchi wal Zla d’a Djivi d’a yam leud’a hAlonid’a kur azì ma nglo ma dingâ mi. Ni kayam ndata ba, Alona mi sununïya. 44Mi tchi wala kur gongîyo suma toka teteng kur ambas sa Jude-d’a.
Azumeina Bible © Alliance Biblique du Tchad, 1999.