Luc 2
2
Vuta hi Jesus-d’a
(Gol Mat 1.18-25)
1Kur bur máma ma te yamba Auguste mi he vuna mi mam suma sunda ala: Agi b’irigi simiyê suma a nga kaka kur leu d’a Romê-d’ina pet. 2Wana ni ndum mba avoka, kid’a Kiriniyus nga mi te leud’a yam andaga d’a Siri-d’id’a. 3Nge nge pî mi i yam andaga mamba á b’ir simiyêm kur mbaktumba.
4Josef mi tcholï kur azì ma ngol ma Nazarat ma Galile-na, mi i yam andaga d’a Jude-d’a kur azì ma ngol ma a yum ala Betelehem ma ni yima a vut amul ma ngolâ David kuana, kayam Josef tamba nandjafâ hi David-na. 5Mi i á b’ir simiyêm ki Marie d’a mam nga mi d’umuta. Ti nga ki wirâ. 6Kid’a azi sä Betelehem tua d’a, Marie burut ma vuta ndaga. 7Ti vut gorot ma avo’â, ti d’ud’um ki barud’a, ti gum kur kup ma tena hi d’uwarîna, kayam yima burâ nga kazi kur gong nga akoid’a d’i.
Malaikana mi nde tam mbei ir suma pola
8Kur andaga ndata, suma pola a nga abageya, a nga ngom tumiyô mazina andjege. 9Malaikana hi Salad’ina mi nde woi iraziya, subura hi Salad’id’a ti b’o kaziya; suma pola a le mandarâ ngola. 10Malaikana mi dazi ala: Agi lagi mandar ri, an mbagi ni Zla d’a Djivi d’a furî d’a yam suma peta. 11Kayam a vud’ugiya wa Ma Suta ini kur azina hi David-na, ni Christ, Salad’a. 12Wana ni vama simat ma agi mba wum ki na: Agi mba fagi gorâ d’uta ki barud’a, ged’a kä kur kup ma tena hi d’uwarîna.
13Atogo hina zak, ablaud’a hi malaikanid’a zlapa ki malaika máma, a nga gile Alona ala:
14Ei suburi Alo ma sä akulona!
Ar mi he b’leng nga halas mamba yam andagad’a
mi suma mi le kazina.
Suma pola a i Betelehem
15Ata yima ablaud’a hi malaikanid’a a arazi a hulong akulona, suma pola a de tazi ala: Ar ei i gak Betelehem á we vama le ma Salad’a mi tageizina. 16Azi i atogo zak, a fe Marie azi ki Josef ki gor máma nga mi ged’a kä kur kup ma tena hi d’uwarîna. 17Kid’a azi wumba, azi tagazi zla d’a malaikana mi dazizi yam gor mámid’a. 18Suma a hum zla ndatina pet a le atchap yam zla d’a suma pola a dazizid’a. 19Wani Marie ti ngom zla ndata kurut pet, nga d’i djib’er kad’u. 20Suma pola a hulongâ, a nga subur Alona, a nga gilem yam ahlena pet suma azi humuzina ki suma azi wazina, d’igi malaikana mi dazi na.
A tinim simiyêm ala Jesus
21Kid’a bur ma klavandina ndaka, a ngat gor máma bayâd’a, a tinim simiyêm ala Jesus, ni simi ma malaikana mi tinimzi avok bei asum vum wirîma.
A tak Jesus woi kur gong nga kud’ora
22Kid’a bur mazi ma mbut tazi yed’etna ndak d’igi gata hi Moise-sa de na d’a, Josef azi ki Marie a mba ki Jesus avo Jerusalem á tagam mi Salad’a. 23Ni d’igi a b’ir kur gata hi Salad’id’a na ala: Gor ma lara pî ma a vud’um avo’â, a mba tinim iram vam mi Salad’a. 24Josef azi ki Marie a he vama ngat buzuna d’igi a b’ir kur gata hi Salad’id’a na, nala, gugu bed’egera mbà d’oze gugu d’a avo d’a gureid’a mbà.
25Sana mi nga Jerusalem, simiyêm ala Simeon. Mam mi sama d’ingêrâ, ni ma nga mi ring mandar Alona, nga mi djup Ma sut Israel-lîna. Muzuk ma bei tchod’a ba na, mi nga ki sed’emu, 26mi dum avok ala mam mba mi mit ti, gak mba mi we Mesi ma Salad’a sunumïna tua. 27Kid’a Josef azi ki Marie a mba ki gorozina Jesus á le ki sed’em d’igi a b’ir kur gata na d’a, Muzu’â mi zut Simeon mi im kur gong nga kud’ora hAlonid’a. 28Simeon mi hlum akulo hur abomu, mi subur Alona ala:
29Ki tchetchemba, Salad’a,
ar an azong mangâ ni mit ki b’leng nga halasa
d’igi ang de na.
30Kayam iran we wa Ma sut mangâ d’a.
31Ni d’a ang minit yam suma peta.
32Ni d’a mba d’i b’o woi yam andjaf suma dingîd’a,
ni subura hi mang suma Israel-lîd’a mi.
Djok vuna hi Simeon-na
33Jesus abum azi kasum a le atchap yam ahle suma Simeon mi dazi kama. 34Simeon mi dazi kua ala: Ar Salad’a mi ndjunugiya. Mi de mi Marie Jesus asum ala: Alona mi man gor máma ni yam puka ki tchola hi suma ablaud’a aduk Israel-lâ. Mam mba mi mbut ni vama simata hAlonina mi suma kak djangûna ki sed’ema, 35kayam djib’era hablau suma d’a nga ngeid’a kuruzid’a, mba d’i nde woyo. Ndak taka, ndaka mba d’i tchogok huruk d’igi mbigeu d’a fiyaka na mi.
Ta djok vun Alona Anne
36Ta djok vun Alona nga, simiyêt ala Anne, ni Fanuwel ma ad’u andjafâ hi Aser-rîna goromba. Ti le bizad’a ablaud’a; kid’a ndjuvut mi vat ki weyeta ti le bizad’a ki sed’emî kid’iziya. 37Ti kak modonod’a bizad’a dok klavandi yam fid’i. Ti ar nga gong nga kud’ora hAlonid’a d’i, nga d’i kud’or Alona ki d’el tad’a bei te tena ki tchenda andjege ki faleya. 38Ata yi máma, ti mba, ti le mersi mAlona. Ti de zlad’a hi gor mámid’a mi suma pet suma a nga djup pat ta Alona mba mi pat Jerusalem mbeid’a.
Hulonga avo Nazarat-ta
39Kid’a Jesus simiyêm a lahlena pet ndak yam gata hi Salad’id’a, a hulong Galile kur azì mazi ma ngol ma Nazarat-na. 40Gor máma nga mi wula, nga mi sira, mi mbut sama ned’a heîna, sumad’a hAlonid’a nga ki sed’em mi.
Jesus bizam ndak dogo yam mbà, mi kal kur gong nga kud’ora
41Bizad’a ki bizad’a, simiyêm a nga i Jerusalem á le vun til ma Pa’â. 42Kid’a bizam ndak dogo yam mbàd’a, a i ki Jesus avo Jerusalem ata yima vun tilâ d’igi azi nga le teteu na. 43Kid’a vun tilâ dap dad’a, a hulongâ. Gor máma, nala Jesus, mi ar nga Jerusalem, wani simiyêm a we nga d’i, 44wani a djib’er ala mi nga naduk ndrozi suma tita. A tit burâ tu, a nga halam aduk simiyêzi ki buniyôzina. 45Kid’a azi fum nga d’uo d’a, a hulong Jerusalem á halamu. 46Bugol bur ma hindina, a fum kur gong nga kud’ora hAlonid’a. Mi nga kak kä aduk suma hat suma, nga mi humuziya, nga mi djobozi mi. 47Suma pet suma a hum zla mambina, a le atchap yam ne mamba ki zla d’a de d’a nga mi hulongôzizid’a mi. 48Kid’a simiyêm a wumba, a le atchap. Asum mbi dum ala: Gorona, ni kayam me ba, ang lami hina ge? Ami kabung ami nga halang ki vunadik ka tumba. 49Mi hulong dazi ala: Agi halan ni yam me ge? Agi wagi nga d’ala mbeî an kak kur gonga hAbunda d’uo zu? 50Wani a hum nga ad’u zla d’a mi dazizid’a d’i.
51Mi hulong ki sed’ezi kur azì ma ngol ma Nazarat-na, mi ge yam kä ad’u zla mazid’a, wani asum mbi ngom zla ndata kurud’u, ti djib’er yam ahle ndazina pet mi. 52Jesus nga mi wula, mi mbut sama ned’a, nga mi lAlona tam djivid’a, nga mi le suma tazi djivid’a mi.
Azumeina Bible © Alliance Biblique du Tchad, 1999.