Luke 15
15
1ရာပ်အာလည် အခွန်ကောက်သောကား ဟီမ်နာက်နောက် အပြစ်ဒုစရိုက်သားဖူမ်ငေါ် ကိုယ်တော်ယေရှုဟောပြောသွန်သင်နောကားလည် သပ်တီမ် ထုတ်ချီးရီမာ့။ 2အင်းညယ်ငေါဝမ်ရီ ဖာရိရှဲဖူမ်နောက် ကျမ်းထောကား ဆရာဖူမ်ငေါ “အင်းကာဟီမ်ငေါ အပြစ်ဒုစရိုက်သားဖူမ်နောက် မိတ်ဆွေအောမ်စာမ်းဟာအဟီပ်ရယ် ဟီမ်နာပ်နောက်တူတူ ရောက်မောက်ကားတော်ဟေး” ငေါကဲ့အယ် ဝေဖန်နောဟီးမာ့။ 3အင်းသယ် ကိုယ်တော်ယေရှုကော ဟီမ်နာပ်သယ် ပုံဥပမာကြအာနောက် မိန့်နောကားကော 4“နီမ်ပါအာကော် သိုးကောင်ရေတစ်ရာ ငါကဲ့အယ် အင်းမာသိုးသာမ်းပါအာမာ့ သိုးနူဝါ မီမ်ပါတ်သော် နာန်ငေါ သိုးကိုးဆယ့်ကိုးကောင်နယ် လက်ပါးကွင်းနား ပေးကဲ့အယ် မီမ်ကဲ့လင်းငါးကာ့ သိုးနူဝါလည် အယူပ်မူနိက်ဆီ သမ်ဟိကာ ဟီပ်ယိုလေး။ 5အင်းမာသိုးလည် ဟောပ်တောဟာမ်းပါတ်သော် ပျှော်လောကဲ့အယ် အင်းမာသိုးလည် ဝေးပါးတူစ်ဟာ သာမ်စာပ်ရယ် 6ကျဉ်းမာလီဟာမ်းကဲ့အယ် မိတ်ဆွေဖူမ်နောက် ကျဉ်းဖာန်ကျဉ်းဟက်ဖူမ်နယ် ‘ငါကော မီမ်ငါးကာ့ သိုးနူဝါလည် ဟောပ်တောဟာမ်းပါတ်သယ်မာ့ ငါနောက်တူတူ လီကဲ့အယ် ပျော်လောဟီးစာ့’ ငေါကဲ့အယ် သပေါက်ခပ်ကာ။ 7အင်းသယ် နီမ်နယ် ငါငေါ့နာပ်။ အင်းမာတိုင်းရယ် နောင်တသံဝေဂ လူတီမ် အလိုလော်စောမ်ငါကာ ဖြောင့်မတ်သောကားကာ တီတ်ဆာ ကိုးဆယ့်ကိုးယောက်ထက်သယ် အပြစ်ဒုစရိုက်သယ် နောင်တသံဝေဂ လူကား အပြစ်သားဟော်ဝါနန်း ရွှေမြို့တော်ပါမာ့ ဘုရားရှင်နောက် ဟမန်းနာပ်ကော် ပိုလောကဲ့အယ် ဆကောက်ချိကာ” ငေါကဲ့အယ် မိန့်နောမာ့။ 8အင်းမာနောက်သယ် ကိုယ်တော်ကော တီတ်ဆာပရိသတ်သယ် နောက်ထပ် ပုံဥပမာနောက် မိန့်နောကားကော “ယာပ်ရှီဟော်ဝါပါအာ ဖူးဒင်္ဂါး ဆယ်ပါတ်ငါကဲ့အယ် အင်းပါအာမာ့ ပါတ်အာ မီမ်ပါတ်သော် ဟီမ်ငေါ မီးအိမ်နယ် သာပ်ကဲ့အယ် ကျဉ်းနယ် ဆပိုက်ထော်နောက် ရှောကဲ့အယ် အယူပ်မူနိက်ဆီ သေသေချာချာ သမ်ညာပ်ခပ်ကား ယိုလေး။ 9သမ်ငါးလူဟာမ်းပါတ်သော် ဟီမ်ငေါ မိတ်ဆွေဖူမ်နောက် ကျဉ်းဖာန်ကျဉ်းဟက်ဖူမ်နယ် ကော်ကဲ့အယ် 'မီမ်ငါးကာ ဖူးဒင်္ဂါးလည် လူဟာမ်းပါတ်သယ်မာ့ ငါနောက်တူတူ လီကဲ့အယ် ပျော်လောဟီးရီစာ့' ငေါကဲ့အယ် ငေါ့ကာ။ 10နီမ်နယ် ငါငေါ့နာပ်။ အင်းမာတိုင်းမန်း အပြစ်သားဟော်ဝါကော နောင်တ သံဝေဂလူဝမ်းနော ရွှေမြို့တော်ပါအာမာ့ ဘုရားရှင်နောက် ဟမန်းနာပ်ကော် တအား ဆကောက်ချိကာ” ငေါကဲ့အယ် မိန့်နောမာ့။ 11နောက်သယ်ကာပ်ဝါ ကိုယ်တော် နောက်ထပ် ပုံဥပမာနောက် မိန့်နောဟာမ်းငါးကော “တစ်ခါလည် တီတ်ဆာဟော်ဝါပါအာ ဆာကယ်ဟောငါမာ့။ 12ရာပ်အာလည် ဆာကထောမ်ငေါ် အဝါလည် ‘အဝါ၊ ငါလူသင့်နောကား အမွေဖူမ်နယ် ခွဲလောကဲ့အီလိတ်’ ငေါကဲ့အယ် စိမ်မာ့။ အင်းသယ် အဝါကော ဆာကယ်ဟောလည် ဟီမ်ငါ ပိုင်ဆိုင်နောကားဖူမ်နယ် ခွဲလောကဲ့ အီရီမာ့။ 13တအောင်းဟာ အမာပ်ကြီစ်ရယ် ဆာကထောမ်ငေါ် အမွေဖူမ်နယ် ငဟေကယ်အယ် ဖူးဖူမ်နယ် လာကဲ့အယ် တခြားတိုင်းပြည်ပါအာ ပူပေးရာမ်မာ့။ အင်းမာတိုင်းပြည်ရာ ထုတ်အာမ်စန်းနော ဟီမ်ငေါ အပျော်အပါး လိုက်သောကဲ့အယ် ဖူးဖူမ်နယ် ဖြုန်းနောဟူမ်မာန်မာ့။ 14စီးရာပ်သော် ဟီမ်ငါ ဖူးအားလုံး ဆွန်ငါးအချိန် ထုတ်အီစန်းနော အင်းမာတိုင်းပြည်ရာကော် အားကြီစ်ရယ် အစာငတ်မွတ်ခေါင်းပါးလောကဲ့အယ် ဆိုးလောတင်းငါးကာ့ ကပ်ဆိုက်တီကယ်မာ့ အရောက်မူ၊ အအူမူ ဘဝပါအာ ထုတ်အာမ်မာ့။ 15အင်းသယ် ဟီမ်ငေါ အင်းမာ တိုင်းပြည်ရာမာ့ တီတ်ဆာဟော်ဝါပါအာ လာမ်ကဲ့အယ် အလုပ်အီတီမ် စိမ်ကယ်မာ့ အင်းမာဟီမ်ရီး ဟီမ်နယ် လက်ပါးပါအာမာ့ ဝါပ်ဖူမ်နယ် ထိန်းနောတီမ် လက်ပါးကွင်းနား သာပ်လာမ်မာ့။ 16ဟီမ်ငေါ တအားရောက်ခေါပ်တင်းကယ်မာ့ ဝါပ်ဖူမ်ရောက်ကား အစာဖူမ်နယ်ဟာမ်း ရောက်ကာပ်ကဲ့အယ် လင်းမီရီ ဟင်ဟာမ်း ဟီမ်နန်း အစာအီဟီယို။ 17နောက်ဆုံးငါးကော ဟီမ်ငေါ အသိစိတ် ဆာမ်ဟေကယ်အယ် အဝါကာ့ အစေခံဖူမ်ပါအာကော် ရောက်တီမ်ဖူမ် နည်းကြီစ်ရယ် ငါမာ့ငေါရီး ငါပါအာကော် အင်းကာနေရား ရောက်တီမ်ဖူမ် အပေါ်ရယ်ငတ်သောကဲ့အယ် ရှီးထော်ကိုက်ပန်။ 18ငါကော ရာဟာမ်းရာ ယုတ်ကဲ့အယ် အဝါပါအာ လာမ်ကဲ့အယ် ‘အဝါ၊ ငါကော ဘုရားရှင်နယ်ရော အဝါလည်ရော ပြစ်မှားလောပါတ်ပါပ်။
19အဝါကာ့ ဆာငေါကဲ့အယ် ကော်တီမ်ဟာမ်း ငါနောက် ထိုက်တန်နို။ ငါလည် စီစ်ချာ အဝါကာ့ အစေခံဟော်ဝါညယ်ဟာ ပေးရာမ်စာ့’ ငေါကဲ့အယ် ငါငေါ့ကာ ရယ် တွေးလောမာ့။ 20အင်းသယ် ဆာကထောမ်ငေါ် ယုတ်ကဲ့အယ် အဝါကာ ကျဉ်းမား လာမ်ဟာမ်းမာ့။ ဆာကထောမ်ငေါ် ကျဉ်းနောက်စာပါအာ ငါကားအချိန်နယ် အဝါကော ဆာကထောမ် လီဟာမ်းငါးလည် စာပါအာအယ် ယူပ်မူဝမ်စန်းနော စာန်တင်ကယ်အယ် ဟီမ်နယ် ကာပ်ကဲ့အယ် ကြိုဆိုလောစီးရာပ်သော် ကပယ်ကယ်အယ် မန်းတူမ်မာ့။ 21ဆာကထောမ်ရီ ‘အဝါ၊ ငါကော ဘုရားရှင်နယ်ရော အဝါလည်ရော ပြစ်မှားလောပါတ်ပါ့။ အဝါကာ ဆာငေါကဲ့အယ် ကော်တီမ်ဟာမ်း ငါနောက် ထိုက်တန်နို’a ငေါကဲ့အယ် ငေါမာ့။ 22အင်းညယ်ငေါဝမ်ရီ ဟီမ်ငါအဝါကော အစေခံဖူမ်နယ် ‘ဟန်ဆူန်ကလန်ဟန်ဆုံးဖူမ် အမြန်လာကဲ့အယ် ဟီမ်နယ် ဖူမ်ကဲ့အယ် အီဟီးရာမ်နိတ်။ ထော်ဝါး လက်စွပ် ဆောက်ကဲ့အယ် ဟက်တီမ်းရီး စီးလောကဲ့ အီဟီးရာမ်နိတ်။ 23မောမ်းငါးကာ မုတ်ဆဟာနူဝါလည် ကက်ရှီးကဲ့အယ် ဆပါတ်မုတ်ချီးရာမ်နိတ်။ ငါ့ဆာ လီဟာမ်းကယ်မာ့ ပျှော်ပွဲရွှင်ပွဲ အောမ်ဟီးမယ်။ 24မဟာအောမ်ကယ်လိုးငေါနော ငါကာ ဆာကော ရှီးရာမ်ရီ ရာ ဆိုင်းဟေကယ်အယ်၊ မီမ်ငါမ်ရီး ရာဟော့ပ်တောဟာမ်းပါတ်’ ငေါကဲ့အယ် ဟီမ်နာပ်ကော ပျော်ပွဲရွှင်ပွဲ အောမ်ဟီးမာ့။ 25အင်းမာချိန်နယ် လက်ပါး အလုပ်အောမ်စီးကဲ့အယ် လီဟာမ်းငါးကာ ဆာတုန်းငေါ ကျဉ်းနောက် ထံပါအာ ထုတ်ထေစန်နော် သီချာန်းသံနောက် ကားလောကဲ့လင်းဟီးကား အသံဖူမ်နယ် သပ်မူဝမ်မာ့။ 26အင်းသယ် ဟီမ်ငေါ အစေခံဟော်ဝါလည် ကော်ကဲ့အယ် ‘မဟာဖူမ် ထာကဲ့လင်းငါးသယ်’ ငေါကဲ့အယ် စီမ်ညူဝမ်မာ့။ 27အင်းသယ် အစေခံငေါ ‘နာန်ငါ နရှီကော် ဇလားစာပ်ရယ် ထုတ်ထေကယ်သယ်မာ့ နာန်ငါအဝါကော မောမ်းတင်းငါးကာ မုတ်ဆဟာနူဝါလည် မုတ်ကဲ့အယ် ပျော်ပွဲရွှင်ပွဲ အောမ်ဟီးကား’ ငေါကဲ့အယ် ဖြေလောဟာမ်းမာ့။ 28အင်းမာချိန်နယ် ဆာတုန်းငေါ ရှေရှောတင်းကဲ့အယ် ကျဉ်းမားဟာမ်း ဆာမ်ကာပ်အိုး သယ်မာ့ ဟီမ်ငါအဝါကော ပြာန်ငါ ပူကဲ့အယ် ကျဉ်းနား ဆာမ်ရီတီမ် တောင်းပန်နီရီး 29ဟီမ်ငေါ ‘ငါကော အဝါနန်း အစေခံဟော်ဝါညယ် နှစ်ပေါင်းမာပ်ကွန်းနယ် အလုပ်ကျွေးအောမ်မီကဲ့အယ် အဝါသပေါက်ကားလည်ရား သပ်နာ့။ အင်းညယ်ငေါဝမ်ရီ အဝါကော ငါနန်း မိတ်ဆွေဖူမ်နောက်တူတူ ပျော်ပွဲရွှင်ပွဲအောမ်တီမ် ဆိတ်နူဝါလည်ဟာဟာမ်း အီတန်မာန်ငိုး။ 30အင်းညယ်ငေါဝမ်ရီ အင်းကာ ဆာကထောမ်ငေါ် အဝါကာ ဥစ္စာပစ္စည်းဖူမ်နယ် အကလန်ငါ အောမ်ငါး ယာပ်ရှီဖူမ်နောက် ဖြုန်းနောကဲ့အယ် လီဟာမ်းငါး အချိန်နယ်ဟာမ်း အဝါကော မောမ်းတင်ငါး မုတ်ဆဟာလည် ကတ်ရှီးကဲ့အယ် ပျော်ပွဲရွှင်ပွဲ အောမ်ကဲ့အယ်ဟာမ် အီမာ့’ ငေါကဲ့အယ် ငေါမာ့။ 31အင်းမာနောက်သယ် အဝါကော ဆာတုန်းနယ် ‘ငါဆာ၊ နာန်ငေါ ငါနောက်တူတူ အမြဲတမ်း ငါကားသယ်မာ့ ငါပိုင်နောကား ဥစ္စာပစ္စည်းဖူမ်အားလုံးငေါ နာန်ဟနန်း ထာမာ့။ 32အင်းညယ်ငေါဝမ်ရီ နာန်ငါ နရှီကော် ရှီးရာမ်ရီ ရာဆိုင်းဟေရာမ်၊ မီမ်ငါမ်မာ့ငေါရီး ရာ ဟောပ်တောဟာမ်းပါတ်သယ်မာ့ အလေကော် ပျော်လောသင့်နောမာ့’ ငေါကဲ့အယ် ငေါမာ့” ငေါကဲ့အယ် မိန့်နောမာ့။
دیاریکراوەکانی ئێستا:
Luke 15: ktpv-rv
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
This translation of the Kanan Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.