Luke 14
14
1အူန်းပူစ်မာန်းရာပ် ရာပ်အာလည် ကိုယ်တော်ယေရှုကော ဖာရိရှဲခေါင်းဆောင်ဟော်ဝါကာ ကျဥ်းမား ရောက်တီမ်ဖူမ် ရောက်မယ် လာမ်စန်းနော အင်းမာနေရားမာ့ ဖာရှိရှဲဖူမ်နောက် ကျမ်းထောကား ဆရာလာပ်ကော ကိုယ်တော်ပါအာ အပြစ်သမ်တီမ် ထံပါအာအယ် ထက်ကဲ့ယူကဲ့လင်းဟီးမာ့။ 2အင်းမာချိန်နယ် ထော်သာ အူမ်ငါးကာရောဂါ ခံစားလောထော်ကာ တီတ်ဆာဟော်ဝါကော ကိုယ်တော်ယေရှုကာ မန်းနား စာပ်ကဲ့အယ် လင်းမီမာ့။ 3ဖာရိရှဲလာပ်နောက် ကျမ်းထောကား ဆရာလာပ်သယ် ကိုယ်တော်ယေရှုကော “အူန်းပူစ်မာန်းရာပ်ပါအာ အဇကာတီတ်ဆာဟော်ဝါလည် ကုလောကဲ့အယ် အီကားကော ပညတ်တော်နောက် ညီလောနေး၊ ညီလိုလေး” ငေါကဲ့အယ် စီမ်ညူမာ့။ 4အင်းညယ်ငေါဝမ်ရီ ဟီမ်နာပ်ကော မဟာမ်းအသပေါက်အာပ်ထာမ်ညယ် ဆီမ်ရှင်းရှင်းရယ်လင်းကယ်မာ့ ကိုယ်တော်ကော အင်းမာရောဂါခံစားလောထော်ကာဟီမ်နယ် ထော်နောက် ထာကယ်အယ် ရောဂါလည် ကုလောကဲ့အယ် အီစီးရာနောက် ဟီမ်ငါကျဉ်းမာ သာပ်ထာမ်းငါမ်မာ့။ 5အင်းမာနောက်သယ် ကိုယ်တော်ယေရှုကော တီတ်ဆာဖူမ်နယ် “နီမ်ငါ ဆာဟာမ်းထာဂါက်ထာ၊ မုတ်ချန်း ထာဂါက်ထာ၊ ဝှေ့ပ်သာနား လက်ဆာမ်ပါတ်သော် အူန်းပူစ်မာန်းရာပ်ချန်ငေါရီး ချက်ချင်း တူမ်းဟေ ဟိကာယိုလေး” ငေါကဲ့အယ် မိန့်နောမာ့။ 6အင်းညယ်ငေါဝမ်ရီ အင်းမာတီတ်ဆာလာပ်ကော မဟာဟာမ်း ပြန်နောကဲ့ ငေါဟာမ်းဟီးယိုး။ 7ကိုယ်တော်ကော ဖိတ်သောကား ခံနောထော်ကာတီတ်ဆာဖူမ်ငေါ အရေးပါလောကား နေရာဖူမ်ပါအာ ထောင်းတီမ် ရွေးချယ်လော်ဟီကာလည် ယူပ်မူဝမ်စန်းနော ဟီမ်နာပ်သယ် ပုံဥပမာကြအာ မိန့်နောကားကော 8“ဟော်ဝါဟော်ဝါကော နာန်နယ် မင်္ဂလာဆောင်ပွဲပါအာ လီတီမ် ဖိတ်သောဝမ်းနော အရေးပါလောကားနေရာပါအာ ထောင်းငါဝါပ်၊ မဟာအောမ်ကယ်လိုးငေါနော နာန်ငါထက်သယ် အရေးပါလောကားဟီမ်နယ် ဖိတ်သောကာပ်ရီ ဖိတ်သောပေးဟာမာ့။ 9အင်းမာဟီမ်ထုတ်ပီပ်သော် နာန်နယ် ဖိတ်သောပေးကားဟီမ်ငေါ လီကဲ့အယ် နာန်နယ် ‘ထုတ်အီကား နှာမ်ဟနန်း နာန်ငါနေရာလည် အီရာမ်နိတ်’ ငေါကဲ့အယ် သပေါက်ကား ခံနောထော်ဝမ်နော် မန်းကတန်ကယ်အယ် အရေးအပါလော်ဟန်ဆုံး နေရာပါအာ နိမ့်နိမ့်ကျကျရယ် ထောင်းငါထော်ပ်ကား။ 10အင်းညယ်ငေါဝမ်ရီ နီမ်ငေါ မင်္ဂလာဆောင်ပွဲ လာမ်မန်းနော အရေးအပါလော်ဟန်ဆုံး နေရာပါအာ ထောင်းငါဝမ်နော် နာန်နယ် ဖိတ်သောပေးကားဟီမ်ငေါ လီကဲ့အယ် ‘မိတ်ဆွေ၊ အင်းကာထက်သယ် အရေးပါလောကားနေရားလီကဲ့ ထောင်းရီလိတ်’ ငေါကဲ့အယ် ငေါရီကယ်မာ့ နာန်ငေါ အခြားနှာမ်နာပ်ကာမန်းနား ဂုဏ်ယူလောမိကာ။ 11ကိုယ်ကာနောက်ကိုယ် ချီးမြှောက်သောကား ဟီမ်နာပ်တိုင်း ဘုရားရှင် နှိမ့်ချလောကားလည် ခံနောထော်ကယ်အယ် ကိုယ်ကာနောက်ကိုယ် နှိမ့်ချလောကား ဟီမ်နာပ်တိုင်း ဘုရားရှင်ငါ ချီးမြှောက်သောကား ခံနောထော်ပ်ကား” ငေါကဲ့အယ် မိန့်နောမာ့။ 12စီးရာပ်သော် ကိုယ်တော်ကော ဟီမ်နယ် ဖိတ်သောကားဟီမ်နယ် “နာန်ငေါ ရောက်ကားအူကားပွဲ ဖိတ်သောဝမ်းနော နာန်ငါ မိတ်ဆွဖူမ်၊ ကျဥ်းရှိတ်ဖူမ်၊ ဆွေမျိုးဖူမ်၊ ဆွာမ်ငါးကာ့ ကျဥ်းဖာန်ကျဥ်းဟက်ဖူမ်နယ်ဟာ ဖိတ်သောဝါ့။ နာန် အင်းညယ်အောမ်မန်းနော အင်းမာဟီမ်နာပ်ကော နာန်နယ် ပြန်နောကဲ့ ဖိတ်သောဟာမ်းကဲ့အယ် နောပ်ကဲ့ပြုစုဟာမ်းဟိကာ။ 13အင်းမာအစား နာန်ငေါ ဧည့်ခံပွဲအောမ်မန်းနော အပေါ်ဟာကားဟီမ်နာပ်၊ အသန်စွမ်နော်ကာ ဟီမ်နာပ်၊ အင်္ဂါအစုံနော်ကာဟီမ်နာပ်၊ မီပ်တူ အယူပ်မူကားဟီမ်နာပ်သယ်ဟာ ဖိတ်သောလိတ်။ 14နာန် အင်းညယ်အောမ်မန်းနော အင်းမာဟီမ်နာပ်ကော နာန်နန်းအီဟာမ်းတီမ် မဟာမ်းအပို။ အင်းညယ်ငေါရီး ဖြောင့်မတ်သောကားဟီမ်နာပ် ရှီးပါအာအယ် ပြန်နောကဲ့ အသက်ဆိုင်းဟာမ်းငါးချိန်နယ် ဘုရားရှင်ငေါ် နာန်နယ် ကလန်ငါဖူမ်နောက် ပြည့်စုံနော်စီမ်ကာ” ငေါကဲ့အယ် မိန့်နောမာ့။ 15အင်းမာညယ် မိန့်နောကားလည် သပ်မူကားကာ့ ကိုယ်တော်နောက်တူတူ စားပွဲရား ထောင်းကဲ့ရောက်ကဲ့ လင်းဟီးကား နှာမ်ဖူမ်ပါအာမာ့ ဟော်ဝါကော “ဘုရားရှင်ငါ သာသနာတော်နား ရောက်ကားအူကားခွင့် လူကားဟီမ်ငေါ ကံကလန်ငါဟီမ် ထာမာ့” ငေါကဲ့အယ် သပေါက်ကယ်မာ့ 16ကိုယ်တော်ကော အင်းမာဟီမ်နယ် “ရာပ်အာလည် တီတ်ဆာဟော်ဝါကော ဧည့်ခံပွဲအောမ်တီမ် နှာမ်ဖူမ် နည်းကြီစ်သယ် ဖိတ်သောပေးမာ့။ 17ဧည့်ခံပွဲဟနန် အားလုံးအရာမ်သင့်ထာစီရာမ်စန်နော် ဖိတ်သောပေးကား ဟီမ်နာပ်ပါအာ အစေခံဟော်ဝါလည် သာပ်ကဲ့အယ် ‘အားလုံး အရာမ်သင့် ထာကဲ့လင်းပါတ်၊ ကြွလောဟီးစာပ်ဆွမ်’ ငေါကဲ့အယ် ငေါစီမ်းမာ့။ 18နှာမ်ဖူမ်အားလုံးငေါ ဟော်ဝါစီးဟော်ဝါ အကြောင်း အမျိုးမျိုး ပြလောကဲ့အယ် လီတီမ် ငြင်းဆန်နော်ဟီမာ့။ ပထမဟော်ဝါကော ‘ငါကော လက်ပါးတစ်ကွက်မီးပေးကားသယ်မာ့ ယူဝါထော်ပ်ကား။ ငါလည် ခွင့်လွှတ်သောကဲ့အယ်’ ငေါကဲ့အယ် ငေါမာ့။ 19နောက်သယ်ဟော်ဝါကော ‘ငါကော မုတ်ငါးရှဉ်း မီးပေးကားသယ်မာ့ အင်းမာ့ မုတ်ဖူမ် ကလန်မယ် အလုပ်အောမ်ရင်ဒါရယ် လာမ်ကဲ့အယ် ယူဝါထော်ပ်ခူမ်း။ ငါလည် ခွင့်လွှတ်သောကဲ့အယ် အီစာမ်း’ ငေါကဲ့အယ် ငေါမာ့။ 20နောက်သယ် ဟော်ဝါရီး ‘ငါကော ရာမားဟာ ကျေးမီပ်စေါက်ကားသယ်မာ့ လီရင်နိုး။ ငါလည် ခွင့်လွှတ်သောကဲ့အယ် အီစာမ်း’ ငေါကဲ့အယ် ငြင်းနောဟာမ်းမာ့။ 21အင်းမာအစေခံရီး အင်းမာအဖြစ်ပျက်ဖူမ်နယ် ဟီမ်ငါသခင်နယ် ငေါဟာမ်းစန်နော် အင်းမာသခင်ရီ တအားရှေရှောကဲ့အယ် ‘မြို့နားကာ့ လမ်းမဖူမ်၊ လမ်းကြိုလမ်းကြားပါအာမာ့ အပေါ်ဟာကားဟီမ်နာပ်၊ အသန်စွမ်းနောကား ဟီမ်နာပ်၊ အင်္ဂါအစုံနော်ကာဟီမ်နာပ်၊ မီပ်တူ အယူပ်မူကားဟီမ်နာပ်သယ် အမြန်လာမ်ကဲ့ ဖိတ်သာလိတ်’ ငေါကဲ့အယ် စီမ်းညောက်အာမ်မာ့။ 22အင်းမာအစေခံ ထုတ်ထေကယ်အယ် ‘သခင်၊ သခင် စီမ်းညောက်ကာတိုင်း အောမ်စီးဟူမ်ပါတ်။ အင်းညယ်ငေါရီး တီတ်ဆာ နည်းကြီစ်ဖူမ်ဟနန်း နေရာဖူမ်ငါတူမ်း’ ငေါကဲ့အယ် သပေါက်မာ့။ 23ဟီမ်ငါသခင်ငေါ် ဟီမ်နယ် ‘အင်းညယ်ငေါက်သော် မြို့ပြာန် လမ်းမဖူမ်နောက် လမ်းဆဟာဖူမ်ပါအာ လာမ်ကဲ့အယ် အင်းမာနေရားမာ့ တီတ်ဆာဖူမ်အားလုံးနယ် ကျဉ်းမား ကလန်မယ် ကော်ရီလိတ်။ အင်းညယ်မားလည် ငါကာကျဉ်းမားငေါ တီတ်ဆာဖိန်းငါမ်ကား။ 24နာန်နယ် ငါငေါနာပ်။ အစလည် ငါဖိတ်သောပေးကားဟီမ်နာပ် ထုတ်ပီပ်သော် ငါပြာန်နောပေးကား ရောက်တီမ်အူတီမ်ဖူမ်နယ် နည်းနည်းဟာဟာမ်း မြည်းလောခွင့်အီရာပ်’ ငေါကဲ့အယ် အစေခံနယ် သပေါက်မာ့” ငေါကဲ့အယ် မိန့်နောမာ့။ 25ရာပ်အာလည် နံတင်းငါးကာ့ တီတ်ဆာပရိသတ်ဖူမ်ငေါ ကိုယ်တော်နောက်တူတူ ဂျေရုဆလင်မြို့ဝါး လီရာပ်ချီးကားသယ်မာ့ ကိုယ်တော်ကော မန်းကဲ့ယူဝမ်ကဲ့အယ် အင်းမာဟီမ်နာပ်သယ် 26“ဟော်ဝါဟော်ဝါကော ငါပါအာ လီမာငေါရီး ကိုယ်ကာ့ အမေနောက် အဝါ၊ ရှိတ်ဆာ၊ အိက်၊ အန်းချန်နရှီပြာန်နယ် ကိုယ်ကာ့ အသက်ထက်သယ်ဟာမ် ငါလည်ပိုလောကဲ့ အမူမ်းရင်မန်နော် အင်းမာဟီမ်ငေါ ငါကာ့ တပည့်တော် ထာရင်နိုး။ 27နီမ်ငါ လက်ဝါးကပ်တိုင်လည် ကိုယ်တိုင်ဖေးaကဲ့အယ် ငါနောက်တူတူ အလီရာပ်ရင်မန်နော် ငါကာတပည့်တော် ထာရင်နိုး။ 28နီမ်ပါအာမာ့ ဟော်ဝါကော မျှော်စင်ကြအာလည် စာကိုက်ပန်းငေါက်သော် မျှော်စင်စီးကွန်းနယ် စာတီမ် အရာမ်ဆုံး ထောင်းကဲ့အယ် ကုန်ကျစရိတ် အလုံအလောက် ငါမာ့အပို ငေါကားလည် အတွက်တောရယ် လင်းဟပ်ကာလေး။ 29တကယ်လို့ အတွက်သောရယ် စာမာ့ငေါက်သော် အုပ်မြစ်ချာ ချလောရင်ကယ်အယ် မျှော်စင်ကြအာလုံးနယ် စီးကွန်းနယ် အစာရင်ညယ် ထာဝမ်ကား။ အင်းမာလည် ယူပ်မူကားဟီမ်နာပ်ကော ဟီမ်နယ် 30‘အင်းကာဟီမ်ငေါ မျှော်စင်နယ် အစပြုလောကဲ့အယ် စာရီမာ့ငေါရီး စီးကွန်းနယ်ကော် အောမ်ရင်နိုး’ ငေါကဲ့အယ် ကဲ့လောဟိကာ။ 31အင်းမာတိုင်းမှန်း စစ်သားတစ်သောင်းငါကား ဘုရင်နယ် စစ်သားနှစ်သောင်း ငါကားဘုရင်ငေါ် တိုက်ခိုက်သောရီပ်သော် ဟီမ်ငေါ အရာမ်ဆုံး အကြံ အီကားဟီမ်နာပ်နောက်တူတူ ထောင်းကဲ့အယ် နားကွန်းနယ် တိုက်သောရင်နာ့၊ တိုက်သောရင်နို ငေါကားလည် အဆုံးဖြတ်သောရင် လင်းဟပ်ကာလေး။ 32တကယ်လို့ နားကွန်းနယ် အတိုက်သောရင်ငါလည် စဉ်းစားလောပါတ်ပန်းနော အင်းမာဘုရင်ငေါ် အခြားဘုရင် စာပါအာ ငါကဲ့လင်းငါးအချိန်နယ် ဟီမ်ငါ သံသမန်ဖူမ်နယ် သာပ်ကဲ့အယ် စစ်ပြေငြီမ်းနောတီမ် ကမ်းလှမ်းနာထော်ပ်ကား။ 33အင်းမာနည်းတိုင်းမန်း နီမ်ငေါ နီမ်ပိုင်ဆိုင်နောကားအရာဖူမ်အားလုံးနယ် အစွန့်လွှတ်သောရင်မန်နော် ငါကာတပည့်တော် ထာရင်နိုး။” ငေါကဲ့အယ် မိန့်နောမာ့။ 34နောက်သယ်ကာပ်ဝါ ကိုယ်တော်ကော “စူမ်ငေါ အသုံးဝင်နောမာ့။ အင်းညယ်ငေါဝမ်ရီ ဆောမ်းငါးဓာတ် အပေါ်စောမ်မန်နော် အင်းမာစူမ်နယ် ဆောမ်းဟာမ်းကွန်းနယ် မညယ်အောမ်ရင်ဟပ်ကားသယ်။ 35အင်းမာစူမ်ငေါ မြေဆီလွှာနန်းရော၊ ဪနန်းရော အသုံးအဝင်နော်စော်မန်သယ်မာ့ သက်ပူကာ ခံနောထော်ပ်ကား။
ငါငေါကားလည် သာပ်မူရင်ငါးဟီမ်နာပ်၊ နားလည်လော်ကွန်နယ် ကြိုစားလောဟီးထော်ပ်ကား” ငေါကဲ့အယ် မိန့်နောမာ့။
دیاریکراوەکانی ئێستا:
Luke 14: ktpv-rv
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
This translation of the Kanan Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.