Luk 8
8
Baatu betse ne sukudze Zezu
1Yumana, Zezu atse se bingundu ne membuka ne utandaka misisili mive mye Ukani ve Nzambi. Betuma bedzi iku ne bole bedze kone dzi. 2Yedze ne va baatu booko be Zezu epanza mimbiti, ne boko bedzi esaka mebedzu, Maliya we Mangidala wedzi epanza mimbiti untsami. 3Zani ŋwadzi we kuza, undzanzi we Elodi, Suzani bane boko nedzi bekaba untamvu ŋwen bangu ne uyamene Zezu bane bebingi bedzi.
Ngana ye unkuni
4Batu beyitsi be bingundu byesi bakukene ne uya kwele ye Zezu. Wangu ate bangu ngana mbotu ati: 5«Vʉsa votu muutu atse se buka ne uŋwasa mbulu, ndili yedzi edze ne ŋwasa mbulu, mbulu mboko ya nawen se peyi, ye batu bidzangite, benyodzi badza yesi. 6Mbulu mboko ya naŋwen se senze ye memanyan, ya mene, ni bimeni bya kanye ne nde mangu. 7Mboko ya naŋwen tima ye minzila. Ne minzila ne mbulu byesi bya mene unsamba, ni minzila mya lutimise bila. 8Ni mbulu mboko ya naŋwen se senze yive, bimeni bya nene, meni yotu ya buta mbulu iku dzotu(100)». Ye Zezu evele wowe ne singa ati: «Bidzi ne meluyi me uyuka, bayuka.»
Ye Zezu iwowe ne me ngana ni yi
9Bebingi be Zezu nedzi ati: «Ngana yowe mete besu yi ye tanda nati yi?» 10Zezu akalʉle ne bangu ati: «Nzambi akaba beyi utsengu ve uyiba mamvu medzi midzi isolo se Ukani ve Nzambi, ni milimvɨle myedzi ni mye batu boko, me wowe ne bangu ni ne milimvɨle.»
«Ni bangu bewaya, bangu nde yene,
bangu bedzi ne meluyi me uyuka, ni bangu nde yuka me bitanda.»
Zezu asilile ŋgana ye uŋkuni
11Zezu ne bebingi bedzi ati: «Yene me ngana yayu itanda, mbulu ni iwowe dze Nzambi. 12Unkolo ŋwen peyi, ni batu biyuka iwowe dze Nzambi. Ni Satan ti aya, yedzi ipinule iwowe dze Nzambi se milima mye batu toko bangu bamekidze iwowe dze Nzambi bangu balunga. 13Senze ye memanyan ni batu biyuka iwowe dze Nzambi ne itsisa, ni bangu nde bata dzangu se milima mye bangu. Bangu bevukidze ne mendili moko, ni ndili ye mamvu meneni mikwa bangu baya nde ivukidze. 14Mbulu mboko ya naŋwen se midzila. Yedzi ni batu biyuka iwowe dze Nzambi ye bangu biyakwe. Ni menyoŋgo, ne untamvu, ne meve me se ilongo, me simba iwowe dze Nzambi dzidzi se milima mye bangu ne unene. Ni bangu nde tuka nene, nde yele se iwowe dze Nzambi. 15Mbulu mboko yi naŋwen se senze yimve, yedzi ni batu biyuka iwowe dze Nzambi, bibata se unlima umve ne ŋwen telee. Bangu bebata iwowe dze Nzambi, ye bangu bibomo milima mive.»
Ngana ye ibamvu
16«Muutu nde takise ibamvu asodze se mbiya, na asomo sɨna ilaka, ni bedzika ibamvu ni ikulu, yayu binyinzile se ndaku bayene kwalala. 17Mesi midzi isole me tse pulene, ne mamvu midzi isole se milima betse yiba mangu. 18Dzayi ne utsengu ne me beyi biyuka, yayu muutu widzi ne yila yotu betse velise wangu byoko biyitsi, ni we nde yila betse nanguse va yila yedzi itsimene ati, adzi ne yangu.»
Yali amene ye Zezu
19Vʉsa votu mama ne bandzi be Zezu baya yene wangu, ni bangu beke tuka yene wangu utsina ne batu uyitsi. 20Batanda Zezu ati: «Mama wowe ne bandzi bowe baya ituna befumba yene we.» 21Ni Zezu atanda ne bangu ati: «Mama wami ne bandzi bami ni biyuka iwowe dze Nzambi, ne bikuuna dzangu.»
Zezu atabise ipepe dzineni
22Vʉsa votu Zezu abita se mbungu bane bebingi bedzi, Zezu ne bangu ati: «Yakayi betse ngulu ye dzanga.» Ye bangu betse. 23Ndili ye mɨsavili, Zezu ananga mbula se mbungu. Palɨkise ipepe dze singa dza kukudze kule dzanga, mangu ma nyinzile se mbungu, mbungu ya fumba yinaka, bangu bayene bongo. 24Ye bebingi be Zezu betsindene kone dzi ne unyusile wangu ati: «Kuŋwu, Kuŋwu bebe bawele.» Zezu anyuse, akamve ne ipepe, ne mipukise mineni, ne ipepe ne mipukise byesi bya taba. 25Zezu ne bebingi bedzi ati: «Ivukidze dze beyi dza wayi?» Ni bangu bedze ne bongo viyitsi, ye bangu bekima. Ye bangu bewowe tima ye bangu ati: «Ayu muutu ni nza? Wiwowe ne ipepe ne, ne mangu, ye byangu bikuuna wangu.»
Zezu asaka muutu wedzi ne mimbiti
26Zezu ne bebingi bedzi basave dzanga, bakalwe ilongo dze Zelasene, dzidzi busu ve Galile. 27Ndili ye Zezu epula se mbungu, muutu motu we ngundu yayu aya kwanye nedzi. Muutu mene edze ne mimbiti miyitsi se nyulu, edze ne mikanda ande uswa, nde nanga bembula se mendaku. Ni wangu adze si se mesongo. 28Yedzi eyene Zezu, wangu awula unsima, avuna mebongo busu ve Zezu, yedzi ewowe ne singa ati: «Yowe ifumba nami ni yi? Zezu Ŋwana we Nzambi we ikulu, kolokolo yowe dzika nyokile me.» 29Wangu ewowe vavu, ni ne Zezu etanda ne umbiti ati: «Umbiti ŋwen pula se nyulu yedzi.» Ni mimbiti myedze ne usabise wangu. Bedze ne ukuta wangu bitseyi se meboko ne mekulu, ni wangu edze ne utsitaka byangu. Ye umbiti ŋwen bapa wangu se ikanye. 30Zezu asuŋwule wangu ati: «Kumvu yowe ni nza?» Muutu mene akalʉle nedzi ati: «Kumvu yami ni beyitsi.» Wangu etanda vavu ni ne mimbiti miyitsi myedze se nyulu yedzi. 31Mimbiti myedze ne ubondoko Zezu ati: «Kolokolo yowe, we nde luma besu se ibila dze nde sele.»
32Yedze ne dzinvu dze bingu dze dze ne ufumba bila kule kudzi. Mimbiti ne Zezu ati: «Dzika besu benyindzile se bingu.» Ye Zezu eluma mimbiti se bingu. 33Ye mimbiti mye pula se muutu ne unyindzile se bingu. Dzimvu dze bingu dza yinga kule kudzi ne mbangu, dza naŋwen se dzanga, bingu byesi bya yinaka. 34Batu bedze ne ubata bingu beyene vavu, ye bangu betanga ne utse tanda se ngundu ne be se membuka. 35Ye batu bepula ne utse yene mamvu mesuta. Bangu bekalwe kone Zezu, bangu bayene muutu we Zezu epanza mimbiti untsitsi sina mekulu me Zezu, alunga, aswa mikanda. Ye bangu beyene bongo. 36Bangu beyene mamvu mamu mesi, batanda ne boko nda muutu wedze ne mimbiti elunga. 37Batu besi be ngundu ye Zelasene, batanda ne Zezu ne uteme ilongo dze bangu, ne bangu bedze ne bongo. Zezu abita se mbungu ne utse. 38Muutu we Zezu epanza mimbiti nedzi ati: «Tumbeke benu.» Ni Zezu nedzi ati: 39«Vutse sombo yowe, we tanda mesi me Nzambi mepika we.» Ye muutu mene etse ne utandaka se ngundu yesi me Zezu epika wangu.
Ŋwana we ŋwatu we Zayiluse ne ŋwatu we betime ne ingoyi dze Zezu
40Ye Zezu evʉtse ngulu ye dzanga, batu bayamba wangu, ne bangu besi bedze ne ubuka wangu. 41Muutu we kumvu Zayiluse aya, wangu edze ni kuŋwu we ndaku ye umbondu. Wangu anaŋwen sɨna mekulu me Zezu, yedzi ebondo Zezu ne utse ndaku yedzi. 42Nedzi edze ne ŋwana we ŋwatu we itsɨka, we bisiwu iku ne byole wedze se liku. Ndili ye Zezu edze ne utse, unkuka ŋwen batu ŋwedze ne upinyeke wangu me kwele mesi. 43Yedze ne ŋwatu wedze ne ubedzu ve ndaku ye kayi, yedze ne upula wangu unkomo, se bisiwu iku ne byole. Wangu amana untamvu ŋwesi ne ukaba besaki be mebedzu, ni nde muutu we saka wangu. 44Wangu atsindene mbisa ye Zezu, abetime soko ye ingoyi dzedzi. Palɨkise, unsu wedze ne pula ŋwa kanye. 45Zezu asuŋwule ati: «We me betime nami ni nza?» Batu besi basuna. Pyeli nedzi ati: «Kuŋwu batu badzendze we me kwele mesi.» 46Ni Zezu ati: «Muutu abetime nami, ma yene miti singa yotu ya pula se nyulu yami.» 47Ŋwatu ayiba ati, wangu nde tuka solime, yedzi eya ne tsikite, anaŋwen sina mekulu me Zezu. Wangu atanda busu ve batu besi utsɨna vedzi ebetime ne isoko dze ingoyi dze Zezu, ne nda wangu elunga sɨna ne sɨna. 48Zezu ati: «Ŋwana wami we ŋwatu ivukidze dzowe dza lungise we, tseke ne itavu.»
49Ndili ye Zezu edze ne uwowe, muutu motu ayinga sombo ye Zayiluse kuŋwu we ndaku ye umbondu, nedzi ati: «Dzika vele dambise Kuŋwu, ŋwana wowe we ŋwatu awaa.» 50Zezu ayuka vavu, wangu ne Zayiluse ati: «We nde yene bongo, somo ivukidze, ŋwana wowe alungele.» 51Ye Zezu ekalwe ndaku ye Zayiluse, wangu eke tondo ati, batu boko benyinzile nedzi se ndaku, ni benyinzile nedzi ni Pyeli, Zan, Zaaki, tata ne mama we ŋwana. 52Batu besi bedze ne ulila, ne unyongo utsina ne ŋwana we waa. Zezu atanda ne bangu ati: «Dzika lilayi, ŋwana asa nde waa, ni wangu adzi ni bembula.» 53Ni bangu bedze ne usewe Zezu, ne bangu beyiba ati, ŋwana awaa. 54Ye Zezu ekwata boko ye ŋwana we ŋwatu, awowe ne singa ati: «Ŋwana wami nyuse.» 55Ŋwana anyuse, nda tsaŋwen atelime. Zezu atanda ne bangu ne singa yesi ati: «Kabayi ŋwana bila.» 56Yali ye ŋwana ya kima kate kima amene, ni Zezu asikidze ne bangu ati: «Beyi nde banda batanda ne muutu ti ne motu me mesuta.»
دیاریکراوەکانی ئێستا:
Luk 8: WUM
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES