Luk 7
7
Zezu asaka uŋnzanzi we kuŋwu we bewolo
1Ndili ye Zezu emana wowe mesi ne batu bedze ne uyuka wangu, yedzi etse Kapenayumi. 2Awawu yedze ne kuŋwu we bewolo we ilongo dze Lomi. Wangu edze ne undzanzi wedzi edze ne utondo uyitsi. Undzanzi mene edze ne ubedzu vineni, edze akitse waa. 3Ye kuŋwu we bewolo eyuka bewowe ne kumvu ye Zezu, yedzi eluma va bibutu bye Bezwifi, ne ubondo Zezu ne uya saka undzanzi ŋwedzi. 4Ye bibutu bekalwe kone Zezu, ye bangu bebondo Zezu ati: «Uve waya yamene muutu yu. 5Wangu atondo besu batu be Zuda, wangu ni we tunga ndaku ye besu ye umbondu.» 6Ye Zezu etse bane bangu. Ye bangu bekalwe kone ndaku, ye kuŋwu we bewolo eluma bembatsi bedzi ne utanda wangu ati: «Kuŋwu, sele wayu, we nde tuka nyinzile se ndaku ye muutu nda me. 7Yene itsina vami eke ye yene we. Ni tanda si dzamvu dzotu, undzanzi wami alunga. 8Me mene, medzi ne bekuŋwu bami ikuuna, nami ni kuŋwu we bewolo, ne bangu bekuuna me. Ti ma tanda ne motu tseke wangu atse, ne moko yaka wangu aya, ti ma tanda ne undzanzi ŋwami pika tuu, wangu apika.» 9Ndili ye Zezu eyuka mamvu me kuŋwu we bewolo edze ne wowe, Zezu ayene uve. Wangu ayikwene, awaya unkuka ŋwedze ne ubinga wangu ati: «Me tanda beyi, ne se Izayeli, me sa nde yene muutu widzi ne ivukidze nda dze kuŋwu we bewolo.» 10Batu bedzi eluma, bavʉtse ndaku ye kuŋwu we bewolo, bakobise undzanzi ŋwan lunga.
Zezu anyusile ŋwana we ibaka we ŋwatu we uŋkwili
11Zezu atse ngundu ye Nayine, bebingi bedzi, ne unkuka uneni basukidze wangu. 12Ye bangu bekalwe ikuvu dze ngundu, bakwanye ne batu betse ne tsindzi mesongo. Yedze ni ŋwana we ibaka we itsika dze ŋwatu unkwili, batu beyitsi bedze ne usukidze wangu. 13Zezu awaya ŋwatu wayu, ayene wangu tsesi, ati: «Dzika lila.» 14Yedzi etsindene ne ubetime ne lipoyi, bebapi basita. Zezu ati: «Ŋwana we ibaka yu, me tanda we, telime.» 15Tsindzi ya nyuse, ya sunda untsitsi ya wowe. Zezu avʉtise ŋwana ne mama. 16Bangu besi bayene bongo, bakumise Nzambi ati: «Muutu we Nzambi aya tima ye besu, Nzambi aya yamene batu bedzi.» 17Besi bedze Zude ne membuka me kone dzi bayuka likuma le mamvu me Zezu epika.
Bebingi be Zambatisi
18Bebingi be Zambatisi batse tanda mamvu mamu mesi ne kuŋwu we bangu Zan, ye Zan ebanga bebingi bedzi bole. 19Wangu aluma bangu kwele ye Kuŋwu, ne usuŋwule wangu ati: «Weni we Nzambi etobo witse ya? Na besu bebuka ni moko?» 20Ye bangu bekalwe kone Zezu, bangu nedzi ati: «Zambatisi me luma besu kwele yowe ne usuŋwule we.» Ati: «Weni we Nzambi me tobo witse ya? Na besu bebuka ni moko?» 21Ndili mene yayu Zezu edze ne saka batu bedze ne mebedzu mesi, apanza ne mimbiti mye dze se me nyulu me batu, alungise ne batu bedze mɨsa pii. 22Ye Zezu ekalʉle ne bebingi be Zambatisi ati: «Tsekayi tanda ne Zan, me beyi beme yene ne me beyi beme yuka. Be mɨsa pii bakiyene, be bileme baki landa, be bifima balunga, be meluyi pii baki yuka, bitsindzi bya kinyusenge, be mimvuvu bamekidze misisili mive. 23Itsisa ne muutu we nde dzika ivukɨdze itsɨna nami!»
24Ndili ye bebingi be Zambatisi bevʉtse Zezu awowe ne unkuka itsɨna ne Zambatisi ati: «We beyi beme tse yene se ikanye ni nza? Va ŋwana we lisetse we ipepe dzi nyingise?» 25Ni ye beyi beme tse yene ni yi? Muutu widzi ne mengoyi meve? Biswa mengoyi meve ni bidzi ne untamvu ne bidzi se mendaku me bekani. 26We beyi beme tse yene ni nza? Muutu we Nzambi? Ee me tanda beyi umbu amene, wangu atakwe ne Muutu we Nzambi. 27Ni Zambatisi ni we Sanguvu ye Umpende ye tanda ati: «Me tse luma tuma wami busu vowe ne uyebise we peyi.»
28Zezu avele tanda ati: «Me tanda beyi nde muutu witakwe Zambatisi, ni muutu we unte se Ukani ve Nzambi awayu, atakwe Zambatisi uneni.» 29Batu besi ne betoliŋgi be bedolo beyuka Zambatisi, ye bangu beyiba ati, Nzambi adzi telee, Zambatisi akaba bangu meteme. 30Ni batu be Falizi ne belakisi bebitsila belewe me Nzambi efumba pika bangu, ye bangu belewe ne meteme me Zambatisi.
31Zezu avele tanda ne bangu ati: «Wami ituka mikise batu belolo ba nedzi ni nza? We bangu bitala ni nza?» 32Bangu bedzi nda baana bete bidzi untsitsi se buma ye batu besi, boko beyukidze boko ati: «Besu babete beyi longo ati, beyi bebɨna, beyi beke bɨna, besu bayakwe limvu le kondo ni beyi beke lila!» 33Ni Zambatisi aya, wangu nde dza pembe, nde noto melaku, ni beyi ati: «Wangu adzi ne umbiti.» 34We yikwene Muutu meya, wangu adza anoto, beyi ati: «Wayayi muutu yu, wangu ayiba si idza ne inoto dze melaku, bedzi bembatsi ni betolingi be bedolo, ne batu bidzi ne mesumu.» 35Ni bemekidze ukani ve Nzambi beyiba ati, ukani vavu ni ve telee.
Zezu se ndaku ye Simon
36Muutu we Falizi abanga Zezu ne utse dza bila ndaku yedzi, Zezu atse ndaku ye muutu mene, asunda untsitsi ne udza. 37Yedze ne ŋwatu we fwati se ngundu yayu. Wangu ayuka ati, Zezu adza bila se ndaku ye Simon, wangu aya ne mbasi ye unyombo, 38wangu adze sɨna mekulu me Zezu, alila, yedzi ebolise mekulu me Zezu ne mesanga medzi, atsɨlile mesanga ne suyi yedzi, apoto mekulu me Zezu, yedzi esuwaka unyombo kule mangu. 39Muutu we Falizi we banga Zezu se ndaku yedzi, ayene vavu awowe se unlima ŋwedzi ati: «Muutu yu tadzi si Muutu we Nzambi, tadzi wangu ayiba ati, ŋwatu wibetime nedzi yu adzi ni fwati.» 40Zezu ne batu be Falizi ati: «Simon, me fumba tanda we dzamvu dzotu.» Simon nedzi ati: «Kuŋwu wowe.» 41Zezu atanda nedzi ati: «Muutu motu abikise batu bolo bedolo. Bimvu ye we wika yedze uyutsi, ni ye moko, ya takwese uyitsi. 42Nda besi bole bewata wʉta bimvu, wangu ayene bangu tsesi.» Atanda ne bangu ati: «Beyi besi bole bandu wʉta bimvu yayu.» Tima ye bangu bole witse tondo wangu uyitsi ni nza? 43Simon akalʉle ne Zezu ati: «Me tsimene miti witakwe moko bedolo beyitsi.» Zezu nedzi ati: «Wedzi ne mbingu.»
44Yedzi yikwene kwele ye ŋwatu, ne Simon ati: «We yene ŋwatu yu! Me me nyidzile se ndaku yowe, wake swaka me mekulu, ni wangu aswaka me mekulu ne mesanga medzi, atsɨlile me mekulu ne sʉyi yedzi. 45Wa ke sanzile me, ni wangu ulayi vedzi meya, apoto me mekulu. 46Wa ke suwaka me unyombo kule mulu, ni wangu asuwaka me unyombo se mekulu. 47Me tanda we dzamvu dzotu, ma boloko mesumu medzi mesi, yene utsɨna vedzi melaka itondo dziyitsi. Ni we biboloko mesumu ite, nedzi atondo si ite.» 48Zezu ne ŋwatu ati: «Ma boloko mesumu mowe mesi.» 49Batu bedze ne udza bila nedzi, batsimene se milima mye bangu ati: «Ayu muutu ni nza? Wituka boloko mesumu.» 50Ni Zezu ne ŋwatu ati: «Ivukidze dzowe dza lungise we, tseke ne itavu.»
دیاریکراوەکانی ئێستا:
Luk 7: WUM
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES