Luk 4
4
IMAAMA DZE ZEZU
1Zezu, ayinga nzali ye Zuluden. Singa ye Fudzu ye Umpende yedze nedzi, Fudzu ye Umpende ya bapa wangu se ikanye. 2Awawu ye Satan emaama Zezu se masi meku menayi. Se masi mamu mesi wangu akuta utsʉlu ve nzala, ye mana nzala ya kwata wangu. 3Satan atanda nedzi ati: «Ti wedzi ni ŋwana we Nzambi, tanda ne imanyan dzi dze yikwene bila.» 4Zezu akakʉle nedzi ati: «Batende se Sanguvu ye Umpende.» Ati: «Muutu nde lunga ne bila bitu.» 5Yumana vavu, ye Satan ebapa Zezu ikulu ne ulaka wangu melongo mesi. 6Wangu atanda nedzi ati: «Weni wami itse kaba ukani ne untamvu ŋwen melongo mesi, byangu byesi ni byami, me tuka kaba ne wami itondo. 7Ti wa vʉna mebongo busu vami ne ubondo me, metse kabe we byesi.» 8Zezu nedzi ati: «Batende se Sanguvu ye Umpende.» Ati: «Wowe itse bondo si Kuŋwu Nzambi ne dzanza dzowe itse pika si dzedzi mene.» 9Ye Satan ebapa Zezu Zeluzalemi, yedzi esatse wangu kule ŋwanza ŋwen ndaku ye Nzambi atanda nedzi ati: «Ti wedzi ni ŋwana we Nzambi, padzɨme sɨna.» 10Ni batende se Sanguvu ye Umpende ati: «Utsɨna nowe Nzambi aluma betuma bedzi ne ubata we.» 11Bangu betse supa we se meboko me bangu toko mekulu mowe makʉla memanyan. 12Zezu akakʉle nedzi ati: «Batende se Sanguvu ye Umpende.» Ati: «We nde maama Kuŋwu Nzambi wowe.» 13Satan amana maama Zezu se misumvu myesi, yedzi etse ulayi nedzi nzii ne ndili ye Nzambi etanda.
Zezu abanda dzanza dzedzi Galile
14Fudzu ye Umpende ye mana lundise Zezu, yedzi evʉtse Galile. Batu bedze ne uyuka likuma ledzi se bingundu bye nongo ne Galile. 15Wangu edze ne ulakise Iwowe dze Nzambi se mendaku me umbondu, ye batu besi bedze ne ukakise wangu.
Batu balewe Zezu Nazaleti
16Zezu atse Nazaleti, ngundu yedzi enene. Vʉsa ve idzʉndu Zezu anyindzile se ndaku ye umbondu, yangu ni ku yedzi, ye utelime ne untangale Sanguvu ye Umpende. 17Ye bekaba wangu sanguvu ye Ezayi Muutu we Nzambi. Zezu adzuvile sanguvu, ayene buma ye batende ati: 18«Fudzu ye Kuŋwu yedzi kule yami,
Wangu ni we me tobo me,
ne utandaka be mimvuvu misisli mive,
wangu ni we me luma me
ne utandaka ne bidzi mingenenge ati, Bangu baya ni nyingene,
ne utandaka ne be mɨsa pii ati, bangu betuka yene,
ne utandaka ne be binyokile ati, bangu baya ne singa.
19Ne utandaka ne batu
ayi ni ndili ye beyi bitse yene itondo dze Kuŋwu.»
20Zezu adzuba Sanguvu, avʉtise Sanguvu ne undzanzi, asunda untsitsi, batu besi bedze se ndaku ye umbondu bedze ne mɨsa kule yedzi. 21Zezu atanda ne bangu ati: «Me beyi beme yuka me tangala se Sanguvu ye Umpende, velolo mamvu mamu ma yikwe umbu.» 22Batu besi bayene wangu uve, bakima ne mamvu meve medze ne upula se undzumvu ŋwedzi, ni muutu yu, ka ŋwana we Zozefi. 23Zezu atanda ne bangu ati: «Me yiba miti beyi befumba te me ngana ye unsaki, saka we, we mene, beyi betandele me ati, besu bayuka mowe me pika se ngundu ye kapenayumi, pika mangu motu se ngundu yowe mene.» 24Zezu avele tanda ne bangu ati: «Me tanda beyi ni umbu amene, Muutu we Nzambi, batu nde mekidze wangu se ngundu yedzi mene.» 25Me tanda beyi ni umbu, ndili ye Eli Muutu we Nzambi, se ilongo dze Izayeli yedze ne mikwili miyitsi. Ndili mene yangu mbotu, badze bisiwu bisatu ne liyi, mvula nde non, ne pinga ya kwa se ilongo dzesi dze Izayeli. 26Nzambi eke luma Eli kwele ye unkwili ŋwen Izayeli, ni wangu awana luma Eli kwele ye unkwili ŋwen ngundu ye Salepeta se ilongo dze Sidoni. 27Ndili ye Elizi Muutu we Nzambi, yedze ne batu beyitsi bedze ne bifima se Izayeli, Elizi eke lungise muutu ti ne motu se Izayeli, ni Elizi alungise Naama we ilongo dze Sili. 28Batu besi bedze se ndaku ye umbondu, beyuka me Zezu edze ne utanda ye bangu besi bekamve nedzi. 29Bangu batelime, bapanza Zezu se ngundu, babapa wangu se kudzi ye bangu betunga ngundu, bangu bafumba linda wangu. 30Ni Zezu asʉta tima ye bangu, yedzi etse.
Zezu asaka muutu wedzi ne umbiti
31Zezu atse Kapenayumi ngundu ye Galile vʉsa ve idzʉndu, Zezu alakise batu. 32Bangu besi bakima nda wangu edze ne ulakise, ni Zezu edze ne uwowe ne singa ye Nzambi ekaba wangu. 33Se ndaku ye umbondu, yedze ne muutu motu wedze ne umbiti, wangu awʉla unsima ne singa ati: 34«We Zezu we Nazaleti, yowe ifumba ne besu ni yi? We meya ni ne utsala singa ye besu? Me yibe we, weni umpende ŋwen Nzambi me luma.» 35Zezu atanda ne umbiti ati: «Dzʉba undzumvu, pula.» Ye umbiti ŋwen naŋwule muutu mene busu ve batu besi, ye ŋwangu ŋwen pula, muutu mene eke yukʉve mbonzi. 36Batu besi bakima, bawowe tima ye bangu ati: «Ami miwowili ni mi nza? Apanza mimbiti ye myangu mipula.» 37Ye batu besi bewowe ne kumvu ye Zezu se ilongo dzesi.
Zezu asaka mibedzu miyitsi
38Zezu apula ndaku ye umbondu, atse ndaku ye Simon, akobise utsʉlu ve Simon ve saba ne uŋwaku ve singa. Batu basuŋwule Zezu ne usaka wangu. 39Zezu adondime kule yedzi, akamve ne uŋwaku ye uŋwaku ve siya, ye utsʉlu ve Simon ve telime ne ukaba bangu bila. 40Ne ikolo batu bedze ne mebedzu mesi, babapa bangu kwele ye Zezu, yedzi esatse bangu meboko, ye mibedzu myesi mye lunga. 41Ne mimbiti miyitsi mya pula se batu ne uwʉla misima ati: «Weni Ŋwana we Nzambi.» Ni Zezu abaŋwule bangu asumba bangu ne uwowe ne bangu beyiba ati, wangu ni we Nzambi etobo.
Zezu alakise se mendaku me umbondu
42Vʉsa ve seŋwen, Zezu apula se ngundu, atse se buma ye ikanye. Batu batse ne ufumba Zezu, bakobise wangu, ye bangu besumba Zezu ati: «We nde tse.» 43Ni Zezu atanda ne bangu ati: «Uve matse ne utandaka misisili mive mye likuma le Nzambi se bingundu byoko, Nzambi ame luma me ni utsina ne vavu.» 44Ye Zezu etse ne utandaka misisili mive se mendaku me umbondu me Zude.
دیاریکراوەکانی ئێستا:
Luk 4: WUM
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES