Matie 22

Wlunödää' gämʋʋ' ‑nyädlä

(Lukö 14.15‑24)

1‑Mä Zozii ‑sonʋwa bʋkʋ ‑nyädlöö', 2ɔ lä a ni Laagɔɔ' 'Leyiduu' panalɩɩ ‑kʋ nynä ‑n ‑näsä 'loyo ‑gbä 'nɩ wa ‑pi lä ɔ ‑yowlii' ŋnʋnö‑gämʋʋ' lülülɩɩ nä. 3Ɩ ‑kä 'ŋnö nä, ɔ ‑lobho ɔɔ' ‑gänʋnyʋa nynä wa laa‑ nyɩkpaa ‑yä wa yi gämadaa. ‑Mä nyɩkpaa' ‑wʋ yigbʋ ŋoo. 4Ɔ ‑lobho bʋkʋ ‑mɔɔ ɔɔ' ‑gänʋnyʋa 'yigädalʋä, nynä wa mʋ ‑yä wa soo nyɩkpaa wälɩklënä. Ɔ lä a sonʋwa nynä n bhlää‑ ‑dodobhlüü ‑yä nʋänʋä‑mna, 'nɩ ɩ yä ‑pio. Lülülɩɩ yä ylö nä, wa yi ‑yä ɩ 'kä lüo. 5‑Gänʋnyʋa ‑mʋ lä nyɩkpanä laa ‑kää nä, nyɩkpaa' ‑wʋ waa' ciciwälɩɩ 'mänyɩ‑. Nyɩkpaa' ‑nänʋä cii‑ nynä ‑mä kä wa mʋ waa' 'kälö, 'nɩ ‑nänʋä cii‑ nynä kwa mʋ 'kwäsɛ 'pä kää. 6‑Nänʋä ‑klä lä nyɩkpaa ɔ ‑lobho lä nä, kä wa ‑bhütuwa, 'nɩ wa bhlʋwa‑ 'nɩ wa yi 'ku. 7Wa ‑nʋ ylä sɔɔ nä, kä 'loyo plɛkʋ ‑sio. 'Nɩ ɔ yi ɔɔ' 'sujaa ku, 'nɩ wa yi nyɩkpaa 'bhlä, 'nɩ 'sʋjaa yi waa' 'dii sie. 8Ɩ ‑kʋ bhɛ lä sää nä, kɔ ‑soo ɔ ‑gänʋnyʋa, ɔ lä lülülɩɩ yä pio, ‑mä ‑lʋa n laa‑ bhlä nynä wa yi ‑yä ‑a 'gɩ lü nä, wa 'nɩ bhɔɔ 'kʋ ‑ŋwa. 9Nä, a mʋ ‑yä a bhlü 'tlüü, ɩyä nyɩkpaa' lʋä a ‑yʋwa 'sɔ kä sloo‑ nä, a sonʋwa nynä wa yi ‑lɔɔ gämadaa ‑yä a 'gä lü. 10'Nɩ 'loyoo' ‑gänʋnyʋa yi ‑bɔlɩɩ 'fɩɩn bhlü. Nyɩkpaa' ‑lʋa wa ni bhlä nä, wa sonʋwa bhä nynä wa yi gämadaa. ‑Naa gbɩ ‑nyu ‑o, ‑naa gbɩ nää ‑o, kwa pää‑ä wälɩ. Wa ‑nʋ sɔɔ ‑aaa, 'nɩ 'loyoo ‑bhutuu 'mnö yi nyɩkpa 'kʋ yie. 11'Nɩ 'loyo yi yɩ plä ‑yä ɔ 'kä ‑wa ‑yi bhlä nä, 'yi 'ni. Wa ‑plʋwa bhä gämʋʋ' 'kwëti‑cëa ‑bhlo 'mʋ. ‑Mä waa' nëëdë, nyɩkpɔ ‑bhlo ‑kʋ bhä ‑mɔɔ 'nɩ 'kotuu wa nyɛɛ‑ lä nyɩkpɔ nyɩkpɔ nä, ɔmɔ ɔ 'nʋʋ bhɔɔ ‑kä. 12'Nɩ 'loyoo yio soo, ɔ lä ‑aawli, ‑nn ‑wʋ gämalɩɩ' 'kotuu 'mʋ ‑plä nä, säsä ‑n ‑nʋ bhä 'nɩ ‑n ‑plä bhä ‑mää? ‑Mä ɔ ylää‑ lä sɔɔ nä, nyɩkpɔɔ' ‑wʋ në ‑sälɩ mii. 13'Nɩ 'loyoo yi ɔɔ' ‑gänʋnyʋa soo, ɔ lä nyɩkpɔnɔ a gʋɔ! A gʋɔ bhɩ ‑yä sɩ ‑yä a 'pɔɔ ‑mɔɔ jlukʋʋ' 'cucukpaa 'mnö ‑yä ɔ 'kä ‑mɔɔ kʋ ɔ 'kä 'tu ‑yä ɔ 'kä kanɔɔ' gläwlu mnü. 14Zozii lä a ni 'yi ‑a! Wa laa‑ lä nä, wa ‑zu ‑mä wa ‑sä lä nynä ‑wa yi plä nä, waa' ‑wʋ ‑zu.

Sezaa' lapoo 'pɛɛlɩɩ

(Makö 12.13‑17; Lukö 20.20‑26)

15'Nɩ Falizɩɛnyʋä yi 'nii. Wa tään bhä 'kwäslɛɛ' lɛɛ‑ yi bhlä gbä 'nɩ Zozii 'titii' në yio bhlä gbʋ klaa nä. 16Ɩ ‑kä 'ŋnö nä, waa' 'kʋgënyʋä, ‑yä Elodöö' ‑jɛnyɩɛɛ' nyɩkpa, wa ‑lobhuwa Zozii yëku. Wa ‑yi lä nä, wlä Cɩanyɔ‑, ‑a ‑yi sɔɔ nynä ‑n ‑glö ‑nʋawlɛɛ‑cinyɔ. Kä ‑n cɩa nyɩkpa Laagɔɔ' ‑blɔɔ 'kʋ ‑nʋawlɛɛ. Nyɩkpɔɔ' kʋkʋsä, sɔɔ ‑nn wloo ‑wʋ 'nɩ ‑n 'gä ci. 'Nɩ ‑nn ‑guu ‑wʋ 'sɩɩ nyɩkpɔɔ' 'klʋ ciciwälɩ. 17Nä, ‑n sonö‑anyɩ ‑wʋ saa. Laagɔɔ' ‑Jlämaa ci bhä nynä ‑mä ‑a 'pɛɛ 'loyo 'kädɔɔ Sezaa' lapoo ‑a? ‑A 'pɛɛnʋ bhä ‑a, ‑mä ‑aa 'pɛɛnʋ ‑lä bhä ‑a? 18‑Mä Zozii nii‑ lä waa' bhobhowlu ‑nyonyuu 'yi nä, kɔ cii‑, ɔ lä 'kʋ wloowloogbɩɩ' nʋnyʋänyɩ‑! ‑Ɔnözä 'nɩ a sä'ä bhä ‑zɔɔ? 19A ‑lä'ä ‑wʋ saa monie a bhlü 'kʋ 'nɩ a 'pɛɛ lä lapoo nä, ‑yä n 'kɛ 'ni! 'Nɩ wa yio ‑flëëgie ‑lä. 20'Nɩ ɔ yiwa 'ylä, ɔ lä nyɩkpɔɔ ‑ɔnö 'wluu wa ‑bhütëë lä ‑flëëgie 'klʋ, 'nɩ ‑ɔnö 'ŋnöö wa ‑jɩjlä lä ‑lɔɔ nä, lɔɔ ‑sa bhää? 21Wlä 'loyo 'kädɔɔ Sezaa 'mɔɔ‑ ‑kʋ lä ‑lɔɔ. Zozii lä ‑aaa! Nä, ‑ɔ gä sɔɔ nä, dää‑ plöö‑ lä Sezaa' dä nä, a 'nyɛ ‑lɔɔ Sezaa! Ɩyä dää‑ plöö‑ lä Laagɔɔ' dä nä, a 'nyɛ ‑lɔɔ Laagɔ! 22‑Mä Zozii cii‑ lä sɔɔ nä, kä nükpëë' ‑slʋwa. Ɩ ‑kä 'ŋnö nä kwa ‑bhɔɔ yëku, 'nɩ wa yi mʋ.

'Kudukuaa' glɔɔlɩ sä ɩ nuo lä 'mʋ nä

(Makö 12.18‑27; Lukö 20.27‑40)

23'Ylʋʋ ‑bhlobhlo 'kʋ, nyɩkpaa ‑waa laa ‑wʋ lä 'kudukua' 'kuëë glɔɔlɩɩ nyaasäsä 'nɩ wa laa lä Sadisɩɛnyʋa nä, wa ‑yi Zozii yëku 'nɩ wa yio 'ylä, wlä 24Cɩanyɔ‑, Moyizöö' ‑Jlämaa ci nynä ‑mä, nyɩkpɔ ‑yä ɔ 'ŋnɔ 'sɔ 'nö 'yu ‑gään 'nɩ ɔ kä kuu‑ nä, ɔ bheli 'bhlü 'kuzëlü‑ŋnɔɔ 'kʋ ‑yä ɔɔ' 'lɔlʋʋ' kä ‑kä mnɔ.#22.24 Ɩ bha Detlo 25.5‑6. 25Nä, ‑n ni bhelie ‑ngbɔɔsɔ ‑kʋ bhä ‑lɔɔ. Tɛɛtɛɛlɔɔ nöö‑ bhä 'ŋnɔ, ‑mä ɔ ‑yɔsɔ ‑wʋ 'yu ‑gään, 'nɩ ɔ yi 'ku. 'Nɩ 'sɔna‑bhelio yi 'kuzëlü‑ŋnɔɔ 'kʋ 'bhlü. 26‑Mä 'sɔnalɔɔ ‑yɔsɔ ‑wʋ 'sɩɩ 'yu ‑gään, 'nɩ ɔ yi 'ku. 'Nɩ taanalɔɔ yi 'ŋnɔɔ 'kʋ 'bhlü, ‑mä säbhlo ‑säbhlo. Ɔ ‑yɔsɔ ‑wʋ 'yu ‑gään 'nɩ ɔ yi 'ku. ‑Mä bhelia kuu‑ sɔɔ ‑aaa, 'nɩ wamä ‑ngbɔɔsɔ ‑bhɩä. 27'Nɩ 'ŋnɔɔ ‑mä 'sɩɩ, ɔ yi ‑mɔɔ plä 'nɩ ɔ yi 'ku. 28Nä, bhelia ‑ngbɔɔsɔ ‑wa nönöɔ‑ bhlä nä, 'kudukua' 'kuëë glɔɔylʋʋ 'kʋ nä, waa' nëëdëë' lɔɔ ‑sä 'titi ‑ɔ 'gä bhä 'ŋnɔɔ kään? 29'Nɩ Zozii yiwa soo, ɔ lä sa bhobho lä ‑lɔyɩ nä, a yä mnɔ! ‑Ɔnöza bhää? Laagɔwälɩɩ a ‑zɛɛ lä nä, aa ‑wʋ ɩɩ' ‑zɔɔ ‑yi. 'Nɩ Laagɔɔ' 'päwaa' sä a ‑kʋ lä nä, aa ‑wʋ 'sɩɩ sɔɔ ‑yi. 30Sɩ ‑kʋ lä naa, 'kudukua kä 'kuëë ‑glɔɔ nä, nönölɩɩ' wälɩɩ' ‑läyɩɔ kʋ. ‑Mɔɔ Laagɔ yëku nä, kä nyɩkpa 'kä ylä kʋ nynä ‑Laagɔzizi. 31Sä Laagɔ cii‑ lä 'kudukuaa' 'kuëë glɔɔlɩɩ' ‑za nä, aa' ‑läzä sɔɔ zɛɛ ‑a? 32Laagɔ lä ‑amʋʋ‑ plöö‑ lä Ablaamʋʋ Laagɔ, n plöö‑ Yizaköö' Laagɔ, 'nɩ n plöö‑ Zakɔpʋʋ' Laagɔ.#22.32 Ɩ bha 'Nämʋ 3.6. Laagɔɔ' ‑wʋ 'kudukuëë' Laagɔ plöö‑ ‑mä ʋ ‑glö ‑yäyänyʋaa' Laagɔ. 33‑Mä nyɩkpaa ‑wa ‑kʋ bhlä ‑lɔɔ 'nɩ ‑wa ‑poo bhlä Zozii 'nyukwli nä, kä ɔɔ' cɩalɩɩ 'tanʋwa.

‑Jlämöö' 'fɩɩn ‑lɛkädä

(Makö 12.28‑34; Lukö 10.25‑37)

34 Falizɩɛnyʋa nuu‑ lä nynä ‑mä Zozii ‑sɩä Sadisɩɛnyʋa ciciwälɩɩ' nä, kä wa 'nii‑. 35'Nɩ waa' pää' lɔɔ ‑bhlo yi Zozii yëku yi ‑yä ɔ 'kɔ bhɛ ‑zɔɔ ‑sä. Ɔ ylää‑ Zozii, 36Ɔ lä Cɩanyɔ‑, Laagɔɔ' ‑Jlämöö nëëdë nä, laa ‑sä 'titii‑ plöö‑ bhä ‑mɔɔ ‑lɛ 'kädää? 37Zozii lä ‑Jlämaa' ‑lɛkäda, amää‑ plöö‑ lä nynä ‑mä ɩ ‑ŋwa 'kʋ nynä Kwlienyɔ ‑naa Laagɔ, ‑n wamänöɔ ‑naa plɛɛ 'fɩɩn 'mnö, ‑n wamänöɔ ‑naa 'wugɔɔ 'fɩɩn 'mnö, ɩyä ‑n wamänöɔ ‑naa bhobhowluu 'fɩɩn 'mnö.#22.37 Ɩ bha Detlo 6.5.

38‑Jlämöö 'fɩɩn 'mnö nä, amää‑ 'ghlü lä, 'nɩ amää‑ plöö‑ la 'sɩɩ tɛɛtɛɛla. 39'Sɔna ‑jlämaa‑ ‑kʋ lä 'sɩɩ nynä tɛɛtɛɛlaa nä, ka ci lä nynä ‑mä, ɩ ‑ŋwa 'kʋ nynä ‑mä sä ‑n ‑waa lä ‑n yëku nä, ‑n wamä sɔɔ ‑n ‑lie.#22.39 Ɩ bha Levi 19.18.

40‑Jlämönö 'sɔ nä, ɩmɩɩ‑ bhɛɛ‑ lä Moyizöö' ‑Jlämaa ‑yä 'plɔfɛtɩnyʋa 'fɩɩn ciciwälɩɩ.

Klisöɔ ‑yä Davidö

(Makö 12.35‑37; Lukö 20.41‑44)

41 Falizɩɛnyʋa 'wlää‑ bhɛ lä 'wlu nä, kä Zozii ylʋwa‑, 42ɔ lä säsä a bhobho bhä Klisöɔ ‑zaa? ‑Ɔnö 'lɔlʋnyɔ bhää? Falizɩɛnyʋa lä Klisöɔ ‑glö Davidöö' 'yu. 43Zozii lä ‑aaa! 'Nɩ dä Kplɔɔkplɔɔ‑wugɔɔ kwlii‑ bhlä Davidö 'kʋ nä, sɩ ‑kʋ bhɛ 'nɩ Davidö 'titi laa‑ bhɛ Klisöɔ ɔɔ' Kwlienyɔɔ? 44Kä Davidö cii‑, ɔ lä

Kwlienyɔ Laagɔ ‑soo 'naa Kwlienyɔ nynä

‑N kʋ 'naa lüüklä 'kʋ sä!

‑N kʋ ‑lɔɔ ‑yä ‑naa ‑zɔbhlɛgbänyʋa,

N 'kwa ‑naa 'kʋ nämnö ‑gwädɛ 'kʋ nʋ. # 22.44 Ɩ bha Lɔlɔ 110.1.

45Nä, Davidö 'titi laa ‑kä ‑bhlɛ Klisöɔ ɔɔ' Kwlienyɔ nä, sɩ ‑kʋ bhä 'nɩ ɔ yi bhä bʋkʋ ɔɔ' 'yu 'plöö? 46Zozii ylää‑ lä sɔɔ nä, nyɩkpɔɔ' ‑wʋ mii‑ 'nɩ ɔ 'kɔ 'kwäslɛ 'kʋ ŋoo‑. 'Bhää bhɛ ‑lɔɔ ylʋʋ 'kʋ nä, nyɩkpɔ 'nöɔ yɩɔ bʋkʋ 'kwäslɛ 'kʋ ylää‑.

دیاریکراوەکانی ئێستا:

Matie 22: god

بەرچاوکردن

هاوبەشی بکە

لەبەرگرتنەوە

دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە

زانیاری زیاتر لەبارەی GOD - u2

Matie 22

ئایەتە بڵاوەکانی پەرتووکی پیرۆز لە
Matie 22

گوێگرتن لە Matie 22

کتێبی پیرۆز:

Godié

وەشان: GOD - u2 - god

Matie 22

Matie 22

ئایەتە بڵاوەکانی پەرتووکی پیرۆز لە Matie 22

گوێگرتن لە Matie 22

کتێبی پیرۆز:

Godié

وەشان: GOD - u2 - god

Matie 22

ئایەتە بڵاوەکانی پەرتووکی پیرۆز لە
Matie 22