Matie 21

Zozii plä yɩ Zolizalɛmʋduu'

(Makö 11.1‑11; Lukö 19.28‑40; Zään 12.12‑16)

1'Tänyɩɛ 'mnö wa mɛ bhɛ lä Zolizalɛmʋ‑duu yëku, 'nɩ wa ‑ŋëë lä Bɛfazee‑duu yëkuu' Olivie‑kükëa' dää nä, Zozii ‑lobho ɔɔ' 'kʋgënyʋä 'sɔ. 2Ɔ lä 'duu‑ ‑kʋ lä ‑mɔyɩ 'yikʋ nä, a mʋʋ 'mnö! A kä ‑mɔɔ ‑ŋëë nä, a yi jakasö gä 'ni. Wa ‑gʋa 'nɩ aa' 'yu ‑kʋ 'sɩɩ ‑lɔɔ. A blisia ‑yä a ‑lä'ä 'mɩɩ! 3Nyɩkpɔ ka'anyɩ ylää‑ nä, a ci nynä ‑mä, Kwlienyɔɔ ylɩɩ bʋkʋ. A kä sɔɔ cii‑ nä, wa yii 'yi ‑taa 'kpobhuu ‑bhlo 'kʋ, 'nɩ a ‑yɩ 'sɔ yi yi. 4Kä ‑nɩnɩ 'fɩɩn plö bhlä sɔɔ 'kʋ ‑yä 'plɔfɛtɩɔɔ' ciciwälɩɩ 'kä glää. 5Kɔ cii‑ bhlä nynä

Laagɔ lä,

A soo Siyɔɔ‑duu' # 21.5 Siyɔɔ‑duu Zolizalɛmʋ‑duu 'mʋ wa laa lä 'sɩɩ Siyɔɔ. nyɩkpaa nynä

A wloo ‑mä, anyɩa' 'loyoo 'mɔɔ‑ yi lä.

Ɔmɔɔ‑ yi'anyɩ lä nëëdë.

Ɔ ‑glö nyɩkpɔɔ' lɔɔ

‑Ɔ ‑wɔtɔ lä plɛ nä.

Ɔ gblää‑ jakasö kätää',

Jakasö‑yulɛɛ, ɔ gblɔɔ‑ kätää'. # 21.5 Ɩ bha Eza 62.11; Zaka 9.9.

6Sä Zozii ‑soo bhlä ɔɔ' 'kʋgënyʋa nä, wa ‑mʋ lä nä, sɔɔ ‑säkä ‑säkä wa ‑nʋ. 7Wa ‑lä jakasɩɛ ‑yä ɛɛ' 'yuo. 'Nɩ wa yii waa' 'kwëtii kätää' 'pä 'nɩ Zozii yi sä kʋ. 8‑Mä nyɩkpaa ‑bhutukpä ‑lʋlʋ waa' 'kwëtii ‑blɔɔ 'kʋ ‑yä ɔ 'kɩ 'kʋ nämnö. 'Nɩ ‑nänʋä döö‑ si ‑gbolugbü 'nɩ wa yii ‑blɔɔ 'kʋ 'ŋʋ. 9‑Mä nyɩkpaa' 'kpä nämnö bhä Zozii 'yikʋ. 'Nɩ wa 'kpä ‑kʋɔ bhä 'sɩɩ klë 'nɩ wa woo bhä, wlä

Ozana!#21.9 Ozana: Laagɔɔ' 'ŋnu fäälɩɩ' wälɩklë lä.

‑Mɔɔ mɔ ‑ɔ plöö‑ lä ‑a tötɔ Davidö ‑Yowli nä,

'Klʋagba ŋënö‑ö 'kʋ!

‑Mɔɔ mɔ ‑ɔ yi lä Kwlienyɔ Laagɔɔ' 'ŋnöö 'mnö nä,

'Nyupälɩ ŋënö‑ö 'kʋ!

Ozana!

'Klʋagba ŋëë ‑mɔɔ Laagɔduu' fɛɛn fɛɛn!#21.9 Zɛɛ 'sɩɩ Lɔlɔ 118.25‑26.

10‑Mä Zozii ‑plä lä Zolizalɛmʋduu' nä, kä 'du ‑gbä 'mʋ. Nyɩkpaa' ‑nänʋä ylä bhä, wlä ‑mä ‑nɔnɔɔ' 'ŋnö bhää? 11'Nɩ ‑jlea 'mnö nyɩkpa sonʋwa bhä, wlä ‑mɔɔ Galilee' 'duu wa laa Nazalɛtö nä, ʋʋ' 'mnö 'Plɔfɛtɩɔ wa laa lä Zozii nä, ɔmɔɔ‑ ‑yi.

Zozii ‑plä Laagɔ‑bhutu 'kädʋʋ 'mnö

(Makö 11.15‑17; Lukö 19.45‑46; Zään 2.13‑17)

12'Nɩ Zozii yi Laagɔ‑bhutu 'kädʋʋ 'mnö plä. ‑Mä nyɩkpa ‑kʋ bhä ‑mɔɔ 'nɩ wa pä bhä 'kwäsɛ. ‑Nänʋä ŋʋ bhä 'kpä, 'nɩ ‑nänʋä zɔɔ bhä. 'Nɩ ɔ yiwa 'tlü. Nyɩkpaa‑ ‑kʋ bhlä ‑mɔɔ 'nɩ ‑wa dögbä bhlä moniee' nä, ɩyä ‑lʋa ŋʋ bhlä 'kpaakpii 'kpä nä, ɔ bhuë waa' këkpüü ‑yä waa' 'tëbhlüü. 13'Nɩ ɔ yiwa soo, ɔ lä ɩ ‑jɩjlɔ nynä ‑mä Laagɔ lä, 'naa ‑bhutuu ‑glö bhibhiedä.#21.13 Ɩ bha Eza 56.7. 'Nɩ anyɩ a klʋ nynä 'ghüghünyʋää' ‑gwlɛɛdä!

14‑Mä Zozii ‑kʋ ‑mɔɔ Laagɔ‑bhutu 'kädʋʋ 'mnö, 'nɩ 'yikpüü' kʋnyʋä ɩyä ‑yä nyɩkpaa' ‑lʋä kplää‑ lä nä, wa ‑yio yëku, 'nɩ ɔ yiwa yamä.

15‑Mä plɛkʋ 'niniegbɩnɩ 'fɩɩn Zozii ‑nʋ bhlä nä, ɩ gbä 'nɩ 'yua woo bhä ‑mɔɔ Laagɔ‑bhutuu 'mnö, 'nɩ wa ci bhä, wlä ozana! 'Klʋagba ŋëë ‑a tötɔ Davidö ‑Yowli 'kʋ!

‑Mä 'Cibhisänyʋaa' 'cifinyʋa ‑yä ‑Jlämöcɩanyʋa plɛkʋ 'niniegbɩnɩ wa nii‑ lä 'yi nä, ɩ ‑yä Laagɔ‑bhutuu 'kädʋʋ 'mnöö 'yua woo‑wälɩɩ, ɩ ‑gbä bhä 'nɩ waa' pleyii bhɔɔ mɛɛ‑. 16'Nɩ wa yi Zozii soo‑, wlä ‑n ni 'yi ‑a! ‑N nu sä 'yua ci lä nä ‑a? Zozii lä ‑ɛɛɛ, n nu. 'Nɩ wälɩklënä ‑jɩjlɔɔ ylä ‑mɔɔ Laagɔ‑bɔɔgʋʋ 'mnö nä, a 'nöa ‑läzä zɛɛ ‑a? Ɩ ‑jɩjlɔ nynä ‑mä

'Yuë 'tɩkɩɩlɩä, ɩyä ‑lɛɛ ‑dädʋa ‑kä lä ‑lätee nyiti nëë' nä,

‑N gbä 'nɩ laabhlɩ‑wälɩ ‑ghlänʋwa nëë' 'nɩ wa ‑fään Laagɔ 'ŋnu. # 21.16 Ɩ bha Lɔlɔ 8.3.

17Zozii cii‑ lä sɔɔ nä, kɔ ‑bhʋwa yëku. Ɔ ‑bha yɩ Zolizalɛmʋduu' 'nɩ ɔ ‑mʋ Betaniiduu'. ‑Mɔɔ ɔ ‑goo.

Zozii ‑gbütë 'figesu

(Makö 11.12‑14,19‑26; Lukö 13.6‑9)

18Zeli ‑ze ylä nä, Zozii ‑kʋ yɩ Zolizalɛmʋduu' 'ylɩbhɔdä 'nɩ ‑gbügbe ‑klɔɔ. 19Wa ‑kʋ lä mʋdä nä, ɔ lɔ wloo nä, 'figesu ‑kʋ ‑lɔɔ ‑blɔgbäkö. 'Nɩ ɔ yiu 'yi wloo ‑kää mʋ, ‑mä ‑nyakpɩ ‑bhlobhlo. Ʋʋ' bhɔɔ 'bhë 'yi ‑kʋ. Ɩ ‑kä 'ŋnö 'nɩ ɔ ‑soo 'figesuu, ɔ lä ‑nn ‑läyɩ 'kɔɔn 'bhë tlʋ! Ɔ cii‑ lä sɔɔ nä, kä suu ‑si 'kʋ 'kpobhuu ‑bhlo 'kʋ. 20‑Mä ɔɔ' 'kʋgënyʋa nii‑ lä wälɩɩ 'yi nä, kɩ ‑slʋwa nükpëë', 'nɩ wa ci bhä, wlä ‑mä säsä ɩ ‑nʋmɔ ‑nʋmɔ bhä 'nɩ 'figesuu ‑yɛɛ bhä sɔɔ 'kpobhu ‑bhlo 'kʋʋ? 21'Nɩ Zozii yiwa soo, ɔ lä n sonö'anyɩ ‑nʋawlɛɛ 'mnö nynä a kä 'zaazɩ pɔlötɛtɛ ‑kä nä, 'nɩ sa ylä lä nä, a kä sɔɔ plɛkʋ ‑kää nä, sä n ‑nʋ lä 'figesuu nä, anyɩ ‑mä 'sɩɩ, a yi mii 'nɩ a yi sɔɔ nʋ. A kä pɔlötɛtɛ ‑kä nä, a yi mii 'nɩ 'kükënä 'titi a yia soo nynä ‑mä, ‑weyia 'kükëë‑! ‑N ‑bha ‑lää ‑yä ‑n bhlüü jiee'! 'Nɩ sä a ylä lä nä, sɔɔ yi nʋɔ. 22A kä bhibhiedä ‑kʋ nä, 'nɩ a kä lʋʋ Laagɔ 'ylää‑ pɔlötɛtɛɛ 'mnö nä, ‑lɔɔ ‑lʋʋ a yiu 'ni.

Dä Zozii' 'päwaa bha lä nä

(Makö 11.27‑33; Lukö 20.1‑8)

23Zozii ‑ŋëë lä nä, kɔ ‑mʋ Laagɔ‑bhutu 'kädʋʋ 'mnö. 'Nɩ ɔ yi ‑mɔɔ cɩalɩ 'kʋ cie. ‑Mä 'Cibhisänyʋaa' 'cifinyʋa, wa ‑yä 'bhlɩɛ 'mnö ‑Dɔɔpänyʋa ‑yio yëku. 'Nɩ wa yio 'ylä, wlä ‑mä lɔɔ ‑sä 'titi ‑ɔ ‑lobho‑o bhää? ‑Ɔ nyɛɛ‑ɛ bhä 'päwä nynä ‑n nʋ ‑nɩnɩ ‑n nʋ lä nää? 24'Nɩ Zozii yiwa soo, ɔ lä ‑amʋ ‑mä 'sɩɩ, n 'kanyɩ wälɩklë ‑bhlo 'coo 'kʋ 'ylä ‑yä, a kä'ä soo. A kä'ä ‑soo nä, ‑ɔ ‑lobho'o lä nä, n yi'anyɩmɔ paa. 25‑Ɔ ‑lobho bhɛ Zään 'nɩ ɔ ŋʋ bhɛ nyɩkpaa 'nyuu 'wluu? Nyɩkpaa‑ ‑lobhuo bhä ‑a, ‑mä Laagɔ‑ ‑lobhuo bhä ‑a? Ɔ ylʋwa‑ lä sɔɔ nä, kwa ‑sonö ‑sonö, wlä ‑a gä cii‑ nynä Laagɔ‑ ‑lobho Zään nä, ɔ yi ci nynä 'nɩ ‑ɔnözä aa' bhɛ ɔɔ' ciciwälɩɩ nyaasäsä laa? 26‑A gä 'sɩɩ cii‑ nynä nyɩkpaa‑ ‑lobhuo nä, 'nnn! A ‑ya ‑guu ‑jlëa! Nyɩkpaa 'fɩɩn ‑yi sɔɔ nynä ‑mä Zään ‑glö bhä Laagɔɔ' 'plɔfɛtɩ 'titi. 27Ɩ ‑kä 'ŋnö nä, kwa ‑soo Zozii, wlä ‑ɔ ‑lobho lä Zään nä, ‑a 'nöɔ ‑wʋ ‑yi. Zozii lä ‑aaa! ‑Amʋ ‑mä 'sɩɩ, ‑ɔ ‑lobho'o lä 'nɩ n nʋ lä ‑nɩnɩ nä, n nö'anyɩ mɔ ‑lä paa.

Nyɩkpɔ ‑bhloo' 'yuë 'sɔɔ ‑nyädlä

28'Nɩ Zozii yiwa bʋkʋ soo, ɔ lä wälɩklënä säsä a nia bhä ‑zi 'yi 'naa? Nyɩkpɔ ‑bhlo, 'tänyɩ ‑kʋ ‑lɔɔ 'nɩ, ɔ laa‑ ɔɔ' 'yuŋwadia 'sɔ ɔ ‑kä bhlä nä. 'Nɩ ɔ yi tɛɛtɛɛlɔɔ soo, ɔ lä 'naa 'yunɔ, ‑n mʋ ‑zɩkä ‑mɔɔ 'naa divaa‑gälökla 'mnö ‑yä ‑n 'gä ‑mɔɔ lebhe nʋ. 29'Yuo lä ‑a 'bä, nn' ylä ‑wʋ! ‑Maa, 'yuo cii‑ 'flɛ sɔɔ oo ‑mä, ɔ 'cɩcɩ‑ bhobhowlu, 'nɩ ɔ yi ‑mɔɔ 'klaa 'mnö lebhe 'kʋ mʋ. 30‑Mä 'bäɔ ‑yi ‑lɔɔ' 'sɔnalɔɔ yëku 'nɩ ɔ yio wälɩklëa' ‑säkä ‑säkä soo. 'Sɔnalɔɔ lä ‑a 'bä, n yä 'nu! Kä n mʋ lä ‑mɔɔ 'klää. Maa, ɔ ŋoo‑ 'flɛ 'kʋ, ‑mä ɔɔ' ‑wʋ ‑mɔɔ ‑mʋ. 31Zozii lä nyɩkpɔnɔɔ' 'yua 'sɔ pää nä, lɔɔ ‑sä ‑nʋ bhä ɔ 'bää pɔlösaa? 'Cibhisänyʋaa' 'cifinyʋa lä tɛɛtɛɛ‑yuo 'bäɔ ‑soo lä nä, ɔmɔɔ‑ ‑nʋ ɔ 'bää pɔlösaa. 'Nɩ Zozii yiwa soo, ɔ lä ‑nʋawlɛɛ' n sonö'anyɩ nynä lapoo‑ylänyʋa ɩyä wluylä‑ŋwnɩa, wamää‑ ‑lä 'ganyɩ 'yikʋ gään ‑mɔɔ Laagɔɔ' 'leyiduu 'mnö. 32‑Ɔnöza bhää? Zään Badisö ‑yi 'nɩ ɔ panö'anyɩ Laagɔɔ' 'yigëë‑blɔɔ 'nɩ aa' ‑wʋ ɔɔ' ciciwälɩɩ nyaasäsä laa‑. ‑Mä lapoo‑ylänyʋa ‑yä wluylä‑ŋwnɩa, wa lɩɩ‑ nyaasäsä. Anyɩ nä, a nii‑ 'flɛ ‑nɩnɩ 'fɩɩn 'yi, ‑mä aa ‑wʋ anyɩa' kʋkʋsaa 'cɩcɩ‑.

Divaa‑gälöklaa 'mnö lebhenʋnyʋa ‑nyu 'mnö

(Makö 12.1‑12; Lukö 20.9‑19)

33'Nɩ Zozii yiwa bʋkʋ soo, ɔ lä a poo 'nyukwli ‑yä n 'kanyɩ ‑nyädlää' 'yigädala soo. A ni nyɩkpɔ ‑bhlo, ɔmɔɔ‑ ‑goo lä ɔɔ' divaa‑gälöklä. Ɔ ‑vë 'klaa ‑gbugbë 'yikʋ 'nɩ ɔ ‑nʋ ‑mɔɔ divaa‑gälöö' 'ylüüdä. 'Nɩ ɔ slää‑ 'sɩɩ ‑mɔɔ 'klaa 'kʋ dɩdɛlɩɩ' ‑papä. 'Nɩ ɔ ŋʋʋ‑ ‑mɔɔ lebhe‑nʋnyʋä ‑yä wa 'kä lebhe nʋ ‑yä ɔ ‑yʋwa 'sɔ 'kä dëë. 'Nɩ ɔ yi 'plö 'nɩ ɔ yi lowluu' mʋ. 34Divaa‑gälöö' zään‑tänyɩɛ ‑ŋëë ylä nä, kä 'klaa käänyɔ ‑lobho ‑gänʋnyʋa nynä wa mʋ ‑yä wa 'ni lebhe‑nʋnyʋa 'yi ‑yä sä ɔ ‑yʋwa 'sɔ 'ŋʋʋ‑ bhlä nä, wa 'kä yɩ sɔɔ dëë. 35‑Mä ‑gänʋnyʋa ‑mʋ lä nä, kä lebhe‑nʋnyʋa ‑klʋwa. Wa ‑bhütë ‑nɔnɔ, 'nɩ wa bhlää‑ lɔɔ ‑bhlo 'nɩ ɔ kuu‑. Taanalɔɔ, wa bhlɔɔ‑ cɛkwɩɩ'. 36'Nɩ 'klaa käänyɔ yi ‑mɔɔ ‑gänʋyʋää' 'yigädalʋä lobho. Wa ‑zu bhä 'nɩ wa ‑zi tɛɛtɛɛlʋa. ‑Mä 'klaa 'mnö lebhe‑nʋnyʋa ‑klʋwa säbhlo‑ ‑säbhlo. 37Bhɩädää nä, kä 'klaa käänyɔ ‑lobho yɩ ɔ ‑yowli. Ɔ ‑bhobho bhɛ, ɔ lä 'naa 'yu lä nä, wa yio 'klʋkpää' 'ŋʋ. 38‑Mä wa nio‑ lä 'yi nä, kwa ‑sonö ‑sonö, wlä ‑ɔ 'gä lä 'klaa jaa 'kʋ lüü nä, ɔmɔɔ‑ yi lä ‑mɔyɩ! A yi ‑a 'bhlɔɔ ‑yä ‑a 'gä ɔɔ' ‑jaa 'kʋ 'bhlü! 39Wa ‑klä lä nyɩkpɔɔ yowli nä, kä wa ‑yɔsɔ ‑bha 'klaa 'mnö 'nɩ wa ‑zigbë, 'nɩ wa yio 'bhlä. 40'Nɩ Zozii yi 'ylä, ɔ lä ɩ ‑kʋ ylä sää nä, 'klaa 'bä kä ‑yi nä, säsä ɔ 'kä bhä 'klaa 'mnö lebhe‑nʋnyʋa klää? 41Nyɩkpaa lä 'klaa käänyɔ kä ‑yi nä, 'mnö 'nyunɔ‑nyʋäyɩ kɔ 'kwa lä 'bhlä ‑yä ɔ 'kä 'klaa 'yigäda‑nyɩkpa 'mnö 'ŋʋ ‑yä wa 'kä ‑mɔɔ lebhe nʋ ‑yä ɔ ‑yʋwa 'sɔ 'kä dëë. 42'Nɩ Zozii yiwa bʋkʋ soo, ɔ lä aa ‑läzä wälɩklënä Laagɔ‑bɔɔgʋʋ 'mnö zɛnö ‑a? Ɩ ‑jɩjlɔ nynä ‑mä,

Cɛkʋbhëa ‑bhitislänyʋaa' bhɔɔ lä 'mänyɩ‑ nä,

Amää‑ ‑kään ylä ‑bhutuu sä.

‑A gɩɩ 'mnö wloo nä,

Ɩ ‑glö plɛkʋ 'ninie‑wälɩ.

Kwlienyɔ Laagɔ,

Ɔmɔɔ‑ ‑gbä 'nɩ

Ɩ plöö‑ lä sɔɔ 'kʋ. # 21.42 Ɩ bha Lɔlɔ 118.22‑23.

43Kä n sonö'anyɩ yɩ nynä Laagɔɔ' 'Leyiduu wa yi'anyɩmʋ ‑sä. Wa yiu 'yigädabhlɩ 'kʋʋ nyɩkpa 'nyɛ ‑yä ʋ 'ka 'bhü tlʋ. [44Nä, ‑lɔɔ' cɛkʋbhëa, nyɩkpɔ ka 'kʋ ‑zɔɔ ‑bhlü 'nä, ɔ yi 'kɔtɔ ‑kɔtɔ. 'Ɩzä nyɩkpɔ‑ a kä 'kʋ ‑bhlüü nä, a yio 'plɩtɩä.#21.44 Ɩ bha Eza 8.14.] 45‑Maa, 'Cibhisänyʋaa' 'cifinyʋa ‑yä Falizɩɛnyʋa nuu‑ lä Zozii' ‑nyädlöö nä, wa ‑yibhë sɔɔ nynä ‑mä wamä ɔ sä bhä. 46Ɩ ‑kä 'ŋnö nä, wa tään bhɛ sä wa kä lä nʋ ‑yä wa 'kɔ 'kʋ bhlü nä. ‑Mä sä nyɩkpaa 'fɩɩn ‑yi bhlä 'sɔɔ nynä ‑mä Zozii ‑glö Laagɔɔ' 'plɔfɛtɩ 'titi nä, wa ‑guu bhɛ ‑jlëa.

دیاریکراوەکانی ئێستا:

Matie 21: god

بەرچاوکردن

هاوبەشی بکە

لەبەرگرتنەوە

دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە

زانیاری زیاتر لەبارەی GOD - u2

Matie 21

ئایەتە بڵاوەکانی پەرتووکی پیرۆز لە
Matie 21

گوێگرتن لە Matie 21

کتێبی پیرۆز:

Godié

وەشان: GOD - u2 - god

Matie 21

Matie 21

ئایەتە بڵاوەکانی پەرتووکی پیرۆز لە Matie 21

گوێگرتن لە Matie 21

کتێبی پیرۆز:

Godié

وەشان: GOD - u2 - god

Matie 21

ئایەتە بڵاوەکانی پەرتووکی پیرۆز لە
Matie 21