Luk 9
9
Jeju la ngéndoog kɨlah gidaijoo kad lan mber ta lon
(Oo Mat 10; Mrk 6:7-13)
1Jeju kun kɨkɨlah gidaijoo kɨ ɗen kɨ nat, ad'd tɔg kad õnɓe dɔ ndilgt kɨmajal tube kɨ yootɨn rotog. 2Lad kɨ lan mber ta kõɓe lo Luwah, kɨ yootɨn ngérotog ho. 3Eld an: Ot kunɨn nya mad kɨta ɗob, ke gɔlkɔp, ke ɓɔl, ke nyasa, ke nar, ot kawɨn kɨ kub joo. 4Kuj kɨɗen'n a andɨnt a ne, i ndɨnt mbã i ɓain ne. 5Ĩla deg kɨ ɓe madt hɔsɨn kɨ rodt al a ne, lon i ndɨ i ɓain kam ɓet'n non i ndan bu kɨɗa njasɨt kɔ kɨta najkɨma kɨdɔdt. 6Taa ne, ngéndoog ɓai awɨn, a lan go nganɓeg, a lan mber hoita kɨmaj, a yootɨn deg kɨ go log tube.
Herod oo tit Jeju i Jã ngeɗa deg baptem
(Oo Mat 14:1-2; Mrk 6:14-16)
7Herod kɨ ngekõɓe dɔ dɔning Galilet oo hoi nyag'n ɗan nya tube, kama daa ta paa, kɨta deg madg ndɨ anan: Jã la ɓai ku ngékoit ye. 8Kɨmadg ndɨ anan: Eli la tee hɔi ku degt ye, kɨmadg tɔ ndɨ anan: kɨkɨɗa ku ngékelta kɨ ta Luwaht mad la ɓai lo koit ye.
9Na Herod el an: M'gang dɔ Jã kɔ, na de'n non i nõ m'ndɨ m'oo hoi nyag 'nten kɨ dɔat a? Sah kɨ n'ooa.
Jeju ad deg dub mi san nya
10Ngombangkɨlag telɨn, ɔrrɨn Jeju hoi nyag'n ɗan nõ tube. Jeju ɔid, aw sed lot mad kɔtkokɨɗa kad ɓet mad kɨ tɔa i Besaida. 11Na lon koosɨdeg gerɨn nya 'nten ye, ndulon goa. Jeju hɔd kɨront, eld ta dɔ kõɓet lo Luwah. Ĩgɨn ndigɨn ngah lapia ye Jeju yootd ho. 12Na lon kàd aw kɨ n'ud ye, ngéndoog loa kɨkɨlah gidaijoo ndɔt'n kɨ roat anan: I nya deg'n ɗan, ad awɨn kam nganɓegt kɨ gawg'n gugɨn dɔ lo 'nten kad hɔn lotod, kɨ sahn nyasad, kɨta lon kɨ ndɨt nẽbe ye i dɨlalo. 13Na Jeju turd an: Ĩn kɨɓeg adɨnd nyasa. Ngéndoog loa elɨn anan: J'aw kɨ kuɓɨr bɨna mi, kɨkanj joo koon. Maj a ne, j'a kɨ j'aw suku kɨ ndugo nyasa kɨta deg tube'n ɗan wan tã.
14Dekɨdɨngãg tube asɨn dub mi. Jeju el ngéndoog lon an: Adɨnd ndɨn ber but dɔmi dɔmi.
15Ɗan tit'n eld nõ, adɨn deg tube ndɨn ber. 16Jeju ɔi kuɓɨr bɨna kɨmi kɨkanj kɨ joo'n non, un kumɨn kɨ dõ dɔrãt ndub Luwah, kamla hɔ tet, ad ngéndoog lon kɨtakad ndan nõ koosɨgt. 17Deg tube san, ndanɨn. Ngéndoog loa ɔin budag kɨ nãi ɗoosɨ jàng kɨlah gidaijoo.
Pierr elta dan dɔ Jeju an: I Krist
(Oo Mat 16:13-28; Mrk 8:27—9:1)
18Ndɔ mad lon Jeju ndɨ elta kɨ Luwah kɨ kɨɗanbe, na ngéndoog loa ĩn nat sia ye, Jeju ndɨjed an: Koosɨdeg ndɨ anan mĩ nõ a? 19Turɨn anan: Deg madg ndɨ anan: Ĩ Jã ngeɗa deg baptem, kɨmadg anan ĩ Eli; kɨmadg tɔ ndɨ anan: Ĩ kɨkɨɗa ku ngékelta kɨ ta Luwaht kɨmaɗi la ɓai lo koit ye. 20Eld an: Na ĩn ye, anan mĩ nõ a? Pierr tur an: ĩ la ĩ Krist lo Luwah ye.
Jeju elta kete dɔ koint kɨ ɓain lo koit
(Oo Mat 16:20-28; Mrk 8:30; 9:1)
21Jeju eld ta kɨ tɔgɨn ndad mber kad elɨn ta 'nten al. 22Eld an: Kari na Ngon de a dai yon ngãibe. Kɨbog lo Juipg kɨ ngéjanyamosɨkadkari kɨbog kɨ ngéndoo maktubg a mbetɨna, a tɔlɨna, ndɔ kɨkõmɨta a ne, a ɓai lo koit. 23Kamla eld tube an: Ĩla de mad ndig kɨ'n tel ron gomt a ne, ad ɔrr ta ron kɔ ad un kag dosɨ lon kɨndɔgndɔg, na kɨ ndulo gom. 24Kɨtɔ dekɨɗen'n ndig kɨ n'aj ron a ne, a laa kɔ, na dekɨɗen'n la ron kɔ kɨtatɔm a ne a aja. 25Ndaa i ɗi kad de ngah nyag kam dɔningt tube, na nuj ron ke la ron kɔa? 26Kɨtɔ dekɨɗen'n hã roa ndɨ sɔla kɨtatɔm, kɨ tag lom a ne, ro Ngon de a sɔla kɨ tatɔa ho, lon a ɗe kɨ kunj bɔwɨn kɨɗangeɗeng sed malaikag kɨjaɓat. 27Na m'ndɨ m'elsɨ: Rota kɨmadg ku ĩgɨtɨn ɗan ɗan a oin al bat, mbã a oon kõɓe lo Luwah kamtã.
Ro Jeju unjɗang dɔ mbalbot
(Oo Mat 17:1-9; Mrk 9:2-10; 2 Pie 1:16-18)
28Goot lon Jeju eltag 'nten asɨ ndɔ jijoo be ye, un Pierr kɨ Jã kɨ Jak, al sed dɔ mbalbot mad kɨ nelta kɨ Luwah nu. 29Ndɨ elta kɨ Luwah ɓaitɔ ye, takuma ɓa kɨ ndaa. Kubg loa ndaan ngũng ndulon ngẽingẽi. 30Tentenbe deg joo teen hɔi kam kunjt kɨɗangeɗeng. 31Ɗa elɨn ta kɨ Jeju, i Moij kɨ Eli. Ɗa elɨn na ta koia'n ɓet a koi go ndɔgt kɨ ngãi al ɓebo Jerusalemt. 32Pierr kɨ ĩgɨn ĩn nat sia ye, ɓi tɔld sɔkɨr, na lon ndoolɨn kumd jaroi ye, oon kunja kɨɗangeɗeng kɨ deg joo ĩgɨn ɗan nõ nat sia. 33Lon deg kɨ joo'n non ɓai awɨn ye, Pierr el Jeju an: Bɨraɓe maj kad kɨ ndɨn nẽ be. Maj kad kɨ ɗa kuj kámg mɨta. Kɨkɨɗa kɨtatɔi, kɨkɨɗa kɨta Moij, na kɨta Eli. Pierr ger go nya'n el nõ al. 34Lon ndɨ eltag 'nten ɓaitɔ ye kilndii mad ɗe ut dɔd kɨ ndilɨn. Ɓool ɗad kɨ kandɨn andɨn kam kilndiit. 35Ndita mad tee ko kam kilndiit'n non an: Ĩn ɗan i Ngonɨm kɨmbed lom. Oon dɔ ta loa. 36Lon ndita n'non elta woi ye ngahn Jeju kɨ kɨɗabe. Ngéndoog loa ndɨn tad mbo dɔt kam ndɔgt'n non elɨn de mad ta nyag'n oon kɨ kumd nõ al.
Ɗen kɨ ngon kɨdɨngã'n ndil kɨmajal i kamat ad Jeju yoota
(Oo Mat 17:14-21; Mrk 9:14-27; Mrk 1:23-27)
37Loti got lon ɗisɨn dɔ mbalbot ye, koosɨdeg lan ta Jeju. 38Oon de mad ku koosɨgt un ndin kɨ dõ kon an: Ngendoo deg, m'kɔi kɨ i tel kumi oon ngonɨm kɨta i kɨɗabe jimt. 39Oo ndil mad a hɔa, tentenbe, a ɔrr kɔl bang, tura murmur mbã, ad taa ɓa hul mbukɨmbukɨ, tɔsɨ ron ret kɨ dog, lo gang lam kamla nyàa ye. 40M'kɔ ngéndoog loi kɨ tuɓan Ndilɨn non kɔ, na asɨn tuɓaa al. 41Jeju tur an: Ĩn ngékadkamsɨ Luwah al, ngéɗanya kɨ dene al, m'am ndɨ nat sesɨ kaglo bãi a? Kamla el bɔw ngon an: I ɗe kɨ ngoni so. 42Lon ngon ndɨ ɗe ɓaitɔ ye, ndil kɨmajal ɔrra laa ɓer tura murmur kɨ tɔgɨn. Jeju ndáng ndil kɨyerr, yoot ngon telɨn ad bɔwa. 43Deg oon tɔg kɨ ngãi lo Luwah ad ta yad biw.
Jeju elta kete kel kɨkõjoo dɔ koint kɨ bãin lo koit
Na lon ĩn tube ndɨ yad biw dɔ nyagt tube'n Jeju ɗa ɓaitɔ ye, el ngéndoog lon an: 44I nelɨn mbisɨ oon ne dɔta'n m'ndɨ m'el nõ maj. Kari na a lan Ngon de ji degt. 45Na ngéndoog loa gerɨn girr ta 'nten al, kɨta ar nyang ko rodt al, ad gerɨn kama al, ɓoolɨn kad ndɨjena ta dɔ nyat'n ndig kel.
Nõ i kɨbo tɔi a?
(Oo Mat 18:1-7; Mrk 9:33-37)
46Ta mad ɓai dan ngéndoogt lo Jeju, majɨn na ta, ke nõ a i kɨbo kudt a? 47Na lon Jeju ger tagah kɨ kamdt ɓet ye, un ngon kɨdu ndaa kadɨnt. 48Na eld an: Dekɨɗen'n a hɔ ngon kɨdu'n ɗan kɨront kam tɔmt a ne, i mĩ la hɔm kɨ ront ye, dekɨɗen'n a hɔm kɨ ront a ne, a hɔ Ngelam kɨ ront ho. De'n i kɨdu tɔi kusɨt tube a ne, de'n non la i kɨbo tɔi ye.
De'n ndoor deg lo Luwah al a ne, i sej
49Jã el an: Ngendooj, j'oo de mad ndɨ ɔrr ndilg kɨmajal kɔ kam tɔit la kɨ j'ɔga dɔ, kɨta ndulo goi sej al. 50Na Jeju ela an: Ot kɔgna dɔ, kɨta de'n ndoorsɨ al a ne, i sesɨ.
Deg kɨ ɓe madt lo Samariag hɔn Jeju kɨrodt al
51Na lon kaglo kuna kɨ dõ dɔrãt asɨ ye, Jeju nda kamɨnt kɨ n'aw ɓebo Jerusalemt. 52La ngombangkɨla madg kete nont, ĩn tɔ aw andɨn kam ngon ɓet mad lo Samariag kad ɗan go lo adɨna. 53Na deg kɨɓet'n non hɔn na kɨ rodt al kɨta ndɨ aw kɨ ɓebo Jerusalemt. 54Lon ngéndoog loa, Jak kɨ Jã oon nya 'nten ye, anan: Bɨraɓe i ndig kad j'elta kɨ Luwah kad horr ɓai ko dɔrãt so dɔdt õd a? 55Na Jeju mbel kɨ gog ndángd. 56Kamla awɨn ngonɓet mad kɨɗang.
Jeju elta kɨ deg'n ndig ndulon goa
(Oo Mat 8:19-22)
57Ndɨ awɨn ɓaitɔ, de mad ela an: Bɨraɓe m'a m'ndulo goi kɨ lo kɨɗen a awt. 58Jeju ela an: Talg awɨn kɨ ɓetod, yelg kɨ dõ awɨn kɨ kuj todg, na Ngon de oo lo kɨ kad la dɔnt al. 59El mad an: I ndulo gom. Na de'n non tura an: Bɨraɓe i nyam ad m'aw m'duw bɔwɨm kamtã. 60Na Jeju ela an: I nya ngékoig ad duwɨn ngékoig lod; na aw i la mber kõɓe lo Luwah. 61De mad el an: M'a m'ndulo goi Bɨraɓe; na i nya ta ɗob ad m'aw m'ɔrr hoia ngékɨɓe lom kamtã. 62Na Jeju ela an: Dekɨɗen nda jin dɔ kag kɔsndɔɔ manggt, na mbel oo nyag kɨgog a ne, asɨ ta kõɓe lo Luwah al.
دیاریکراوەکانی ئێستا:
Luk 9: MlL
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Mbai Bible Revision © Bible Society of Chad, 2015.