Luk 8
8
Dekɨdẽg'n ɗan kɨ Jeju kɨ nyag lod
1Goot gog, Jeju a lago ɓebog kɨ nganɓeg a la mber hoita kɨmaj lo kõɓe lo Luwah, ngéndoog loa kɨkɨlah gidaijoo ĩn nat sia, 2kɨ dekɨdẽ madg ĩn Jeju ajd ji ndilgt kɨ majal, na yootd dɔ rotogt kɨ dang dang, ad i Mari'n hã a kunɨna Madelen, ĩn ndil kɨmajalg tanãimɨta teen kamat kɔ, 3kɨ Jan kɨ nẽ Suja ĩn i ngombangkɨla lo Herod kɨ Sujan kɨ kɨmadg ngãibe ĩgɨn ɗan kɨ Jeju kɨ ngéndoog loa.
Terrta dɔ ngeduw nyat
(Oo Mat 13:1-23; Mrk 4:1-25)
4Deg ɓain kɨ ɓeg kɨ dang dang ɗen nõ Jejut, na lon deg koosɨg kawɨna kɨ roat ye, Jeju eld terrta 'nten. 5Ngedubnya tee kad kɨ'n duw nyako. Lon ɗa duw nya ye, kumnya madg tuson dɔ ɗobt, ad deg ɓan dɔd, na yelg kɨ dõ ɗe õn. 6Kɨmadg tuson dɔ mbangt, lon ɓan ye, ndulon kɨta, ning kɨ sɔl goto. 7Kɨmadg tuson dan kongt, kong tɔgɨn sede nat, utɨn dɔd. 8Kumnyag'n tuson dɔningt kɨmaj, ɓa tɔgɨn, andɨn kand'd kɨɗang ɓu. Goot'n hã elta 'nten ye, un ndɨn kɨ dõ kon an: De'n ndɨ kɨ mbin kɨta koo dɔ a ne, kɨ oo dɔ.
Jeju ɔrr girr terrta
(Oo Mat 13:18-23; Mrk 4:13-20)
9Ngéndoog loa ndɨjena anan: Girr terrta 'nten i ɗi a? 10Eld an: Ĩn taa, adsɨn kɨ i gerɨn tag kɨmund lo kõɓe lo Luwah, na ndeg deg a gerɨn kɨ terrta tã; kɨtakad oon ta koo, na kɨ oon al, kɨ oon dɔ ta koo, na kɨ gerɨn girra al. 11Girr terrta kaa nõ la ten: Kumnya i ta lo Luwah. 12Kumnya kɨ dɔ ɗobt la i ĩgɨn ndɨ oon dɔ ta kamla, Sɨtan ɗe gaw ta kɨ kamdt kɔ, na ɓeta adɨn kamd ajɨn ne, 13kɨ dɔ mbangt la i ĩgɨn hã lon oon dɔ ta, na taan kɨ ronel; deg'n non ngɨrad goto adɨn kamd kaglo tẽbe, na lon nánd ye, telɨn kɨgog. 14Kumnyag'n tuson dan kongt ye, ɔj dɔ deg'n ndɨ oon dɔ, taan ta, na soolg, kɨ nyamajg kɨ koomajrog kɨ kaglo ndɨt kɨ dɔ dõ 'nten utɨn dɔd, ad andɨn kɨjaraw al. 15Kumnya kɨ tuso dɔningt kɨmaj ye, ɔj dɔ deg'n oon dɔ ta kɨ kam kɨro kɨmaj, ndɨ ngomɨn mbã teen kɨ kand'd.
De a nda lamba girr ngot al
(Oo Mrk 4:21-26)
16De kɨ a ndah horr lambat kamla ut dɔa kɨjoo, ke ndaa girr tɨrat goto. A ɗa titbe al, na a ndaa dɔ kag nda lambat kɨtakad deg'n ndɨ andɨn kuju oon kunja. 17Kɨtɔ nya mad kɨ lo yarot goto, nyag tube a ton kɨ tɨga doo ta kum degt, nya mad kɨ lo mundt kaa goto, na a i kɨ teekɨdɔ. 18Kɨtɔ 'nten oon maj tit'n i ndɨ oon ne dɔ kɨta dekɨɗen kɨ ndɨ kɨ nya a ne, a adɨna dɔt; na de'n ndɨ kɨ nya al, mbã nya'n oo an i lon kaa ne, a taan jiat kɔ.
Ta lo Jeju kɨ ngankõa
(Oo Mat 12:46-50; Mrk 3:31-35)
19Kõ Jeju kɨ ngankõa kɨdɨngã ɗen roat, na asɨn tee roat al, kɨta koosɨdeg. 20Elɨna anan: Kõi kɨ ngankõi kɨdɨngã ɗan tɨga nõ ndigɨn kooi. 21Jeju turd an: Deg'n ndɨ oon dɔ ta lo Luwah, na ndɨ ɗan got tɔ la ĩn kom kɨ ngankomg ye.
Jeju ndáng nélbarwãi ad lo to lom
(Oo Mat 8:23-27; Mrk 4:35-41)
22Ndɔ mad kam ndɔgt'n non Jeju and kam toot mad nat kɨ ngéndoog lon: Eld an: Ad kɨ gangɨn bahbo gid ko nu. Ɔsɨn too, na awɨn. 23Na lon ndɨ awɨn ɓaitɔ ye, ɓi ɗa Jeju. Nel barwãi kɨbobe ɓai dɔ bahbot, ad man ndɨ ɗoosɨ too, ndɨn ta koit. 24Ngéndoog ɗen ro Jejut ndoolɨna anan: Ngendooj, Ngendooj tamj ndɨ tĩ, Jeju ndool, ndáng nel kɨ hul man ad dɨban, lo to loi. 25Kamla el ngéndoog lon an: kadkam losɨ i ɗa? Taa yad biw ad ɓool ɗad, elɨn na anan: De'n ndɨn ye, i nõ? Elta a ne, nel kɨ man telɨn rod gotat loa.
Jeju tuɓa ndil kɨyerr kɔ kam det kɨ dɔning Geraja
(Oo Mat 8:28-34; Mrk 5:1-20)
26Awɨn kam toot mbã teen dɔningt lo deg kɨ Geraja, i gid bahbot sumban na kɨ Galile sew. 27Lon Jeju ud kɨ ber ye, de mad kɨ ɓet'n non ndɔda, ndilg kɨmajal'n kamat. De'n non la kub ront al asɨ ndɔg ngãibe, ge ndɨ ɓe al, na ndaɓe kam dɔɓadgt kɨ kam bulo mbalgt tã. 28Lon oo Jeju ye, ko bang so nõat, elta kɨ ndin kɨbo an: Jeju Ngon Luwah, Ngetɔitɔi, ɗi gom nat sei a? M'kɔi kɨ i ɗa sem nya kɨ to al. 29El titbe kɨta Jeju el ndil kɨyerr kad tee kamat kɔ. Ndil kɨyerr'n non hɔ de'n non kɨ nja natnatbe. Deg dɔnah kɨ jinjir ninga njaat, ndan deg dɔat titbe kaa ne, tuɓa jinjirg gang, na ndil kɨmajal tuɓaa kɨ tɨga kam logt kɨ kam mut. 30Jeju ndɨjea an: Tɔi i ɗi a? El an: Tɔm i lejion ad i koosɨg, el titbe kɨta ndilg kɨmajal andɨn kamat ngãibe. 31Kɔɔn Jeju kɨ rotĩd kad ndad mber ad n'andɨn kam holɓet kɨ dɔboia goto al. 32Ɓut boor koosɨg kɨ ngãi ɗan lot'n non, ɗa san nya dɔ door lot, ndil kɨmajalg kɔn Jeju kɨ rotĩd kad nyad ad n'andɨn kam boorgt'n non. Jeju nya ta ɗob ad'd. 33Ndilg kɨmajal teen kam det'n non kɔ, andɨn kam boorgt. Ɓut boorg tube hurɨn ngɔd door lot kɨ hollot, tuson kam bahbot, ad oin kam mant. 34Lon ngékuldg oon nya'n hã ɗa nya ye, ãin na a ɔrrɨn hoia kam ɓebot, kɨ nganɓeg. 35Deg teen kɨ n'oon nya'n ɗa nya nõ. Ɗen ro Jejut ngahn de'n ndilg kɨmajal teen kamat kɔ, ndɨ ber nja Jejut kɨ kubg ront, kuma ja roi, ad ɓool ɗad. 36Deg'n oon nya'n ɗa nya ye, ɔrrɨnd hoi kaj'n de'n ndilg kɨmajal'n kamat maɗi aj. 37Deg kɨ dɔningt lo Gerasag tube kɔn Jeju kad ɓai dɔningt lod kɔ kɨta ɓool tɔld sɔkɨr. Jeju and kam toot tel kɨgog. 38Na de'n ndilg kɨmajal teen kamat kɔ ye, kɔa kɨ rotĩn kad nyan adɨn ndɨ sia. 39Na Jeju tel ela an: Aw ɓe loi, ɔrrd hoi nya'n Luwah ɗa sei. De'n non aw la mber ta nya'n Jeju ɗa sia kam ɓet lon tube.
Ta lo ngon Jairus kɨ lo dekɨdẽ'n ɔd kub lo Jeju yootɨn
(Oo Mat 9:18-26; Mrk 5:21-43)
40Lon Jeju tel gang bahbo ko nu ye, koosɨg hɔna kɨ rodt kɨ ronel kɨta ĩn tube ndɨ ngoona. 41Kamla de mad, tɔa i Jairus ɗe, i kɨbo kɨ kuj kawnat lo Juipg. De'n non so kɨ nõ Jejut kɔa kɨ rotĩn kad aw ɓe lon. 42Kɨtɔ ngona kɨdẽ kɨ kɨɗabe'n ɓala asɨ kɨlah gidaijoo to ta koit. Lon Jeju ndɨ aw ye, koosɨdeg a rumbona. 43Dekɨdẽ mad'n mosɨ ũa ɓal kɨlah gidaijoo, tɨnda nyag kɨ jint tube tĩ kɔ ro ngekĩgt, titbe kaa ne, ngah lapia ro det mad al. 44Dekɨdẽ'n non ɗe ko gid Jejut, ɔd ta kub loa, tajigt mosɨn ũa ye, gangtan. 45Jeju el an: Nõɓai ɔdɨm a? Lon deg tube majɨn ye, Pierr el an: Ngendooj, deg koosɨg'n gugɨn dɔi, la ɗa rumboin ye. 46Na Jeju el an: De mad ɔdɨm kɨta m'oo tɔg tee romt. 47Lon dekɨdẽ oo dum kad ya dɔn ye, ɓool ɗaa ad roa ndad yatɨt, so kɨ ber nõat, elta nõ deg tube dɔ nyat'n ɗa nya, ad ɔda'n nõ, kɨ yootɨn yoot tajigt nõ.
48Na Jeju ela an: Ngonɨm kɨdẽ, kadkam loi aji, aw kɨ lapia. 49Lon ɗa elta ɓaitɔ ye, de mad ɗe ko ɓe lo kɨbo dɔ kuj kawnat lo Juipg an: Ngoni kɨdẽ oi woi, ot kad ngendoo deg ɔr kɨndang.
50Na Jeju oo dɔta 'nten, el kɨbo dɔ kuj kawnat lo Juipg an: Ot ɓool, na adkami kɨɗabe koon, na a aj kari.
51Lon tee ɓe ye, nya de kɨɗa, ad and sia al, na Pierr, Jã kɨ Jak kɨ bɔw ngon kɨdẽ kɨ kõa koon. 52Deg tube ndɨ non, ndɨ gan gud kɨ tɔa, na Jeju el an: Ot nõ, na oi al, na ɓi la to ɓi ye.
53Na gona raka, kɨta gerɨn koia ɓet. 54Kamla Jeju hɔ jia kun nya kɨ ndin kɨbo an: Ngonɨm i ɓai. 55Ndila tel ɗe roat gog ad ɓai tajigt. Jeju eld kɨ adɨna nyasa. 56Ta ya ngékoojag biw. Jeju ndad mber kad elɨn de mad nya'n ɗa nya nõ al.
دیاریکراوەکانی ئێستا:
Luk 8: MlL
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Mbai Bible Revision © Bible Society of Chad, 2015.