Luk 10
10
Jeju la ngéndoog lon dɔtanãimɨta kɨta la mber ta kõɓe lo Luwah
1Go nyagt 'nten Bɨraɓe mbed ngéndoo madg dɔtanãimɨta lad joo joo nont kete, kɨ awɨn ɓet kɨɗen, kɨ lo kɨɗen'n hã ĩ kɨɓe kɨ dɔn mba kawt. 2Eld an: Nyako kɨ tet i ngãibe, na ngejaa ĩn tẽbe. Kɨtɔ 'nten, i kɔn Bɨraɓe kɨ ngenyako kɨrotĩsɨ kad la ngéja nyako kam ndɔɔt lon. 3Awɨn, oon, m'lasɨ tit nganbatg be kɨ ku bisɨkologt. 4Ot kunɨn ngong nar, ke ɓɔl, ke saa nja, ot ɗan lapia de dɔ ɗobt. 5Ke kuj kɨɗen a i andɨnt a ne, a i ɗan lapia ngékɨkam kujt kete kamtã. 6Na ĩla de mad kɨ ngendɨg lapia ndɨt nõ a ne, lapia losɨ a ndɨ kɨ dɔat; ĩla goto a ne, a tel kɨrosɨt gog. 7I ndɨn kam kujt'n non, i san ho, ãin nyag'n adsɨn ho, kɨta ngekɨla asɨ ta nyabaji. Ot ɓain kujt mad kaw kujt mad kɨɗang. 8Ke ɓebo kɨɗen hã andɨnt, na hɔsɨn kɨ rodt a ne, i san nya'n ndan nõsɨt. 9I yootɨn ngérotog kɨ kam ɓet'n non, elɨnd anan: Kõɓe lo Luwah i nderbe rosɨt. 10Na ɓebo kɨɗen a andɨnt, na hɔsɨn kɨrodt al a ne, i teen kɨ dɔ ɗobagt anan; 11ke bu ɓe losɨ'n hɔ njaj ye kaa, j'a kɨ nda kɨ dɔsɨt, na i gerɨn maj kõɓe lo Luwah ɗe nderbe rosɨt. 12M'ndɨ m'elsɨ ndɔ kɨ nut, takɨgang kɨ dɔ ɓebot kɨ Sodom a i soot tɔi kɨ dɔ ɓet'n non.
Jeju ndáng deg kɨ kam ɓebogt'n oon dɔta lon, na mbet tɔrrɨn ndid
13Jeju el an: Beto loi i ɓebo Korajẽ. Beto loi ĩ ɓebo Besaida. Kɨtɔ neni ɗan kɨlag kɨ yaya kam ɓebo Tirt kɨ ɓebo Sidõ tit'n m'ɗan kusɨt a ne, neni maɗi nu a lan ngisɨ kub, a ɔin buhoor kɨ dɔdt, hɔn ne ndo, na tɔrrɨn ndid. 14Ndɔ gangtat, takɨgang kɨdɔ ɓebo Tirt kɨ ɓebo Sidõ a i soot tɔi kɨ dɔsɨt. 15Na ĩ ɓebo Kapernawm, oo an Luwah a uni kɨ dõ ad i tee dɔrãt e? Be al, Bɨraɓe a ɔsɨ lai kam lot kɨ koo. 16Jeju el ngéndoog lon tɔ an: De'n ndɨ oo dɔta losɨ a ne, ndɨ oo dɔta lom ho, de'n ndɨ mbetɨm a ne, ndɨ mbet ngelam tɔ ho. 17Kamla ngéndoog kɨ dɔtanãimɨtag'n non telɨn kɨ ronel, anan: Bɨraɓe, mbã ndilg kɨmajal kaa ne, telɨn rod gotat loj lon j'elta kam tɔit. 18Jeju turd an: M'oo Sɨtan so ko dõ dɔrãt tit telndii be. 19Oon m'adsɨ tɔg kad i ɓan dɔ lig kɨ gɨnag, m'adsɨ tɔg dɔ madngétasɨgt tube; nya mad kɨ a tosɨ yoot be goto bat. 20Na kɨta 'nten, ot ɗan ronel kɨta ndilg'n ĩn girr tɔgt losɨ, na i ɗan ronel kɨtatɔsɨ'n i kɨndang maktubt kam dɔrãt dõ.
Jeju ɗa ronel
(Oo Mat 11:25-27)
21Kaglot'n non Jeju ɗa ronel kam Ndil kɨkunjɗangt, el an: M'ɗai mersi, oo Bɔw Bɨraɓe kɨ nge dɔrã kɨ dɔning, tit kan hã i yadɔ nyag'n non ko ro ngéterrgt kɨ ngégoosɨg, na i tee dɔ ad ngan kɨdug oon; m'ɗai mersi oo Bɔwm kɨta titbe la nelɨn dum ye. 22Bɔwm la nyag tube jimt, na de kɨ ger ke nõ i Bɔw goto, na Ngon kɨɗabe tã; kɨ dekɨɗen Ngon ndig tee ada tã. 23Kamla Jeju mbel kɨ ro ngéndoogt lon, eld ta tadang an: Ngéronel la ndɨ oon nyag'n i ndɨ oon ye, kum'n ndɨ oo nyag'n ndɨ oon i ngeronel. 24Kɨtɔ m'ndɨ m'elsɨ; ngékelta kɨ ta Luwaht, kɨ ngarg ngãibe ndigɨn kɨ n'oon nyag'n i ndɨ oon dɔ nõ, na oon al.
25De mad kɨ ngendoo Mberkɨnda lo Moij ɓai dõ, ɗa sah kɨ'n hɔa kɨ ta, el an: Ngendoodeg, ka m'ɗa ɗi kad'm ngahn kumkajir kɨ mbãkɨnõt a?
26Jeju tura an: Ɗi ndangɨn kam mberkɨndat a? Ɗi i ndɨ da tit a?
27De'n non tur an: A i tar Bɨraɓe Luwah loi kɨ ngarkami tube, kɨ roi tube, kɨ tɔgi tube, kɨ tagahi tube; a i tar madɓei tit roi be.
28Jeju ela an: I tur goɗobat: I ɗa nya 'nten, na a i ndɨ kɨ dɔi dõ.
29Na ngendoo mberkɨnda ndig kɨ n'ɔrr ta dɔnt ye, el Jeju an: Nõ i madɓem a?
30Jeju tur an: De mad ɓai ɓebo Jerusalemt ɗisɨ ndɨ aw ɓebo Jerikot, la so kam ji ngékumɗobt ad ngĩn kubg roat, na tɨndana mbukɨ mbukɨ adɨna dog, na ãi awɨn nyana de kɨ koit.
31Ngejamosɨ kadkari mad un ɗob'n non. Lon ooa ye, gang kɨtɨga tɔi.
32Titbe, Lebia mad lon tee lot'n non ye, ooa, gang kɨ tɨga tɔi ho.
33Na de mad kɨ Samarit, ndɨ aw mbah, tee lot'n tot, lon ooa ye, ta õ kama, 34ad ɗe roat ur yib kɨ man nduu ta dogt ndomɨn, kamla una, ndaa dɔ nyakult lon, aw sia kuj mbahgt mad ndɨ oo goa. 35Loti got tee kɨ nar asɨ joo ad kɨɓe ngekuj, an: Oo goa, nya'n hã i tĩ kɔ tɔi dɔ nar'n m'adi a ne, lon m'a m'tel m'ɗe ye, m'a m'bai. 36Ku degt kɨ mɨta'n non ye, nõ ooa i madɓe de'n so kam ji ngékumɗobgt a? 37Ngendoo mberkɨnda tur an: De'n oo kumtondo loa la i madɓea ye. Jeju ela an: Ĩ tɔ aw, i ɗa titbe.
Jeju aw kuju lo Mart kɨ Mari
38Lon Jeju kɨ ngéndoog lon ndɨ awɨn ye, and ngon ɓet mad, na dekɨdẽ mad tɔa i Mart hɔa kɨ ɓe lon. 39Ngon kõ Mart kɨdẽ ndɨ nõ, tɔa i Mari; ndɨ ber nja Bɨraɓet, ndɨ oo dɔ nyandoo loa. 40Na koo go nyag kɨ dang dang kam kujt ad dɔ Mart tel wãri; ad ɗe roat an: Bɨraɓe i oo 'nten i nya mad al kad ngonkom nyam kɨ ta kɨlat kɨ kɨɗambe e? Kɨtɔ 'nten ela ad ɗa sem kɨla. 41Bɨraɓe tura an: Mart i ndɨ i sool ho, i ndɨ ad roi kõ kɨta nyag ngãibe kari kɨndang. 42Na nya'n ndaa toot i kɨɗabedo. Mari kɔt gaj kɨmaj'n de asɨ taa jiat al bat.
دیاریکراوەکانی ئێستا:
Luk 10: MlL
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Mbai Bible Revision © Bible Society of Chad, 2015.