MAWOOKIONYI 30
30
1Nao Raheli kekiwona ke aiwonyiase Yakobo manapfo, Raheli kanyenyia manomae. Kawia Yakobo, “Nnenga wana; chila wudo inyi njechipfa.” 2Yakobo kapufukia Raheli kambia, “Ngesa! Inyi njii handu ha Ruwachu, alekuima luwa wusunyi wopfo?” 3Kahamba, “Aiki kisinga kyako, Bilha, ida na koke kundu nawone mana huya ndi tsako, na inyi njiwone luwa koke.” 4Nahong'u kamnengia kisinga kyake Bilha nawe mka oke. Yakobo kaida na koke. 5Naho Bilha kakapika kawonyia Yakobo mana.
6Raheli kahamba, “Ruwa amennenga kyako kinsumhanyi, nao ameicho ṟu lyako, kannenga mana.” Ko ikyo kamdumbiya rina lyake nyi Dani 7Bilha kisinga kya Raheli, kakapikase, kawonyiase Yakobo mana o kawi. 8Raheli kahamba, “Kui ilimbanana king'anyi ngamelimbana ngawinga mano wama ngambinga. Kadumbuya mana rina nyi Naftali.”
9Lea kekiwona ke naletsitsia ifee, kaira kisinga kyake Silipa, kainengia Yakobo nawe mka oke. 10Silipa kisinga kya Lea, kawonyia Yakobo mana. 11Lea kahamba, “Osu lucha, kamdumbuya rina nyi Gadi. ” 12Silipa kisinga kya Lea, kawonyia Yakobo mana o kawi. 13Lea kahamba, “Nanga inyi, kyamba waka wechinjilaha, nanga. Kamdumbuya rina nyi Aseri .”
14Rubeni kahenda mfiri ya shilimu sha Ngano kawona matungucha kulya pichinyi, kahaendie mae Lea. Nalyo Raheli kawia Lea, “Kennengawo matungucha maata ha manachu opfo.” 15Nao kambia, “Ngesa! Nyi kindo kiangu insoka mii oko; nokundi iduose matunguchaha ha manaoko da?” Raheli kambia, “Ko ikyo nechilaa kopfo kio ki kipfa kya matungucha ha mana opfo.” 16Yakobo kacha kyukanyi awuka pichinyi, Lea kakure imwambia, kahamba, “Kikuwaṟi noche na koko kipfa ngakuhuṟa kya matungucha ha mana oko;” kalaa koke kio kilya. 17Ruwa kaadanyia Lea, nao kakapika, kawonyia Yakobo mana o katanu, 18Lea kahamba, “Ruwa amennenga wueri woko, kipfa njileinengya mii oko kisinga kyako.” Kamdumbuya rina lyake nyi Isakari. ” 19Lea kakapikase, kawonyia Yakobo mana o kaṟandaru. 20Lea kahamba, “Ruwa amennenga ngosa njicha, wulalu mii oko nechikaa na inyi kipfa ngamembonyia wana waṟandaṟu.” Kamdumbuya rina nyi Zebloni. 21Lyefurumia kafee mana o waka; kamdumbuya rina nyi Dina.
22Ruwa kakumbuo Raheli; Ruwa kamwandanyia kapfunguo wusu wulya woke. 23Kakapika, kafee mana, kahamba, “Ruwa amenjiwuta wusutsu woko.” 24Kamdumbuya rina nyi Yosefu, kechihamba, Mndumii nanjiengeṟie se mana ungi.
Yakobo awa msuṟi
25Nalyo Raheli kekifee Yosefu, Yakobo kawia Labani, “Nnenga momu njihende kodu, na orukenyi loko. 26Nnenga waka wako, na wana wako, njilekuṟundia, njikuhendie kyamba noichi wuṟundi woko njilekuṟundia.” 27Labani kambia, “Chandu njilewona mecha mesonyi hapfo, kekaa, kipfa njikumburie ke Mndumii-Ruwa nanjiinengie ona kipfa kyapfo.” 28Kahamba, “Hamba wueri wopfo ukundi, na inyi njechikuinenga.” 29Kammbia, “Noichi chandu njilekuṟundia na chandu shuma shapfo shiwei koko. 30Kyamba masaa hapfo hawei maangu kiheri kyo njilawemeche, naho hakaengeṟa ipfumbuka, Mndumii kakuwikia ona orio handu njilehenda. Aka wulalu, nyi indi njechiambuya sha kanyi koko?” 31Kammbesa, “Njikuinengeki?” Yakobo kahamba, “Kulanjiinenge kindo; kunjiwutie iki, njechilisa shuma shapfo na ishiringa. 32Inu njechisenguda shuma shapfo shose, na isahuopfo orio kiwode sahasaha na mapaṟipaṟi, na orio ichoondi liiwu ipfo ko machondi, na mburu tsa sahasaha na tsa mapaṟipaṟi nawo nyiwo wueri woko. 33Na wusumhanyi woko wochinjiṟingishia maheri ho hechishika, ha mbonyi tsa wueri woko wui kopfo. Orio mburu ilawode sahasaha ang'u mapaṟipaṟi, ang'u ichoondi lilaliiwu, shechikooyo koko, lyechiitalo ke liliiwe.” 34Labani kahamba, “Ambuya, kiwekuwia kido chandu ohamba.” 35Nahong'u mkonu naafo kasahuo shioṟo shiwode mcharie na mapaṟipaṟi, na mburu njika tsa sahasaha na mapaṟipaṟi, orio sa iwode ipaṟi lyiilyi, na machondi hose maiwu, kashidambikia mawokonyi ha wana wake. 36Kakaa haleshe na Yakobo handu ha mkonu iṟaṟu; na Yakobo kalisa shuma sha Labani shilya shiletsuhaaho.
37Yakobo kaira shidi sha mlubna shiwishi, na mlozi, na mwaramoni, kashipichuo makandaho, mcharie miili ikawono kulya shidinyi. 38Kahoṟotsa shidisho alepichuo kiidi kya maṟumbuchu herutsia shuma mṟinga, alya handu shuma shekenyoya mṟinga. 39Shuma shikawada wuroo alya shidinyi, shikashaa shidahina sha mcharie na sha sahasaha na sha mapaṟipaṟi. 40Yakobo kasahuo machondi; kaembeṟutsa mdo yaho haambuye ipo lilya lii lya mcharie, na orio lyilyiiwu kiidi kya shuma sha Labani. Kawika kyanya shuma shake amonyi, ma alesanza handu hamu na shuma sha Labanipfo. 41Kikawa orio mandi shuma shilya shiheṟemtsu shambada wuroo, Yakobo kaweshiwikia shidi shilya mesonyi hasho kulya maṟumbuchunyi kundu shiwade wuroo osehu lo shidi shilya. 42Indi shuma shipootse aleshiwika alya shidinyipfo. Ko ikyo shuma shipootse shikawa sha Labani na shiwode pfinya shikawa sha Yakobo. 43Ko ikyo mnducho kaengeṟeka mnu, kawada shuma shifoi, na shisinga, na masinga, na ngamia na nzoi.
دیاریکراوەکانی ئێستا:
MAWOOKIONYI 30: KIM2
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Kimochi Bible © Bible Society of Tanzania, 2016.