LUKAS 9
9
Usif Yesus ansonu asimo lasi bo'es am nua
(Mat. 10:5-15; Mrk. 6:7-13)
1Usif Yesus no'en In asimo lasi bo'es am nua, ma anfe neu sin matani ma kuasat hen li'u ale nitu ma he naleko ale menas. 2Ma In ansonu sin hen etun plenat Uisneno ma he naleko amenat, 3Yesus nak sin, “Kais meki sa' bi lalan, he tes ka, ai bukael ka, utunu' ka ai noni ka, ai sobalu nua. 4Ma leka ansimo ki ma amtam bi ume me, nati' mimaika ambin talan te him poi mi'ko. 5Ma kalu sin kan simo ki fa, him poi mi'ko kot nane ma amtekal afu na'ko hi haem hen fani saksi neu sin.” 6Oke te sin anpoi ma sin nao neu kuan-kuan ma anetun Lasi Alekot ma naleko' amenat bi me-me.
Nai Herodes an takamana'
(Mat. 14:1-12; Mrk. 6:14-29)
7Nai Herodes, usif pah Galilea in nen ale lasi nane ma in nekan na'oni, fun bian sin na'uab nak, Nai Yohanes anfen anfani na'ko amates. 8Ma bian sin nak, Nai Elia nalilon, ma bian nak, mafefa knino na'ko ahunut sin anfen anfani. 9Mes Nai Herodes nak, “Nai Yohanes in nakan au ote ufek ulali. I sekau kun ka, le au nen in lasi onane ka?” Ma in nami lalan he na'eku nok Yesus.
Usif Yesus antuthae atoni nifun nim
(Mat. 14:13-21; Mrk. 6:30-44; Yoh. 6:1-14)
10Ma haefin anfani nem, ma anetun neu Yesus ale lasi le sin anmo'e nalali. Oke te Yesus nok sin anhelok neu kuan esle' antek nani nak Betsaida. 11Leka to amfaun nahin, nalali te sin nao natuin In. Yesus ansimo sin ma na'uab neu sin Plenat Uisneno ma In naleko' ale atoni amenat sin.
12Leka neno hen faien In asimo lasi bo'es am nua nem neu In ma nak, “Amlelu to amfaun i he nao neu kuan-kuan ma kot-kot he naim bale ma mnahat fun hit bi i bale hufui.” 13Mes Usif Yesus nak neu sin, “Him fen sin hen bukaen!” Mes sin natae, “Le hai mu'i ka nesif na'ko utunu' pisa nim ma ika koe nua, so mak haim nao hem sos mnahat neu to pukan naek i.” 14Fun anbi nane oni atoni nifun nim. Mes In nak neu In asium lasi sin nak, “Amlelu sin hen tok pukan-pukan, oni pukan es atoni bo'nim.” 15Sin anmo'e onane ma anlelu sin antok. 16Usif Yesus naiti utunu' pisa nim ma ika koe nua nane, nalali te In anbaisenu neu neno tunan, antek alekot neune, ma ane'bi utunu' ma ika ma anfe nani neu In asimo lasi sin hen bati nani neu ale atoni sin. 17Ma sin anbukae talan te namsenan fin. Sin nabua nafani ale mnah nesif nane nahenu aba' bo'es am nua.
Nai Petrus ansaksi antom Yesus
(Mat. 16:13-20; Mrk. 8:27-30)
18Anbi haef es leka Usif Yesus anmes kun hen onen toti, In asimo lasi sin nem neu In. Ma In antoti sin nak, “Paha amfaun sin antek Kau sekau ka?” 19Sin natae nak, “Nai Yohanes Aslanit, bian nak Nai Elia, ma bian nak anteni nak mafefa knino es na'ko ahunut sin anfen anfani.” 20Mes Usif Yesus nak sin, “Mes hi, hi mak Au le i sekau ka?” Nai Petrus natae nak, “Neno Anan mu'ko Uisneno.” 21Ma Yesus antal matani, he nati' kais sin anetun lasi nane neu es.
Yesus namolok antom In neno mane'at ma In neno maten
(Mat. 16:21-28; Mrk. 8:31–9:1)
22Ma Yesus na'uab nak, “Anmone Pah To mes ansutai mane'at namfau ma ale amnasit sin, ma ale ana' lasi fuat nakaf sin ma ale ahin sulat sin of antite In ma namate In mes bi neno tenu nafena nafani.” 23Yesus nak sin alsin, “Sekau anlomi he natuin Kau, in mes natotan in aon, ma anloi in hau nehe neno-neno ma natuin Kau. 24Fun sekau anlomi he nahoni ini smanan, of in naneku nani, mes sekau anlomi he naneku in smanan natuin Au mepu, of in nahoni nani. 25Alekot sa' ka neu atoni le napeni pah pinan ok-oke, mes in nanukab ma nalukib in aon? 26Fun sekau in anmaen Kau ma in anmaen Au a'ak, Anmone Pah To of anmaen nani amsa leka In koenon nem bi In apinat ma bi Amaf In apinat ma ahake knino sin. 27Mes Au ak ki: Tebes anmu'i atoni anbi ki le anhake anbi i, of sin kan maten fa nahunun sin nit Plenat Uisneno.”
Yesus In human anpin
(Mat. 17:1-8; Mrk. 9:2-8)
28Neno fanu namuni na'ko ale a'an i te, Yesus neki Nai Petrus, Yohanes ma Yakobus ansae neu nu'af tunan hen onen toti. 29Ma In fe hen onen toti, In human nabaina ma In bale pake nane muti nalim-nalim. 30Ma kiso te atoni nua namolok nok In, esle' Nai Musa ma Nai Elia. 31Sin nuasin natonok bi apinat nane ma sin na'uab antom Yesus Ini maten le mes he natis nani bi Yerusalem. 32Fun Nai Petrus nok in bia sin antup anfin, ma leka sin anbe' sin nit Yesus anbi apinat; ma atoni nua nane anhake nok In. 33Ma leka atoni nua nane he nabatiok nok Yesus, Nai Petrus nak neu In, “Anoni, leko nesi haim bi bale i. So hai mihakeb la'at tenu, es neu Ko, es neu Nai Musa, ma es neu Nai Elia.” Mes Nai Petrus in ka nahin fa sa' le in nauab. 34Leka in fe na'uab onane te, nope anbol ma ankub nan sin. Ma leka sin antam bi nope nane te sin namtau. 35Ma hanaf mese anbol na'ko nope nane ma nak, “I Au Anah le Au beti ani, him nen nai na'ko In.” 36Leka hanaf nane anbol, sin nit Yesus anmes kun. Ma asimo lasi sin anta' kun ma bi neno nane sin ka na'uab fa neu es am es antom lasi le sin nit nalali.
Yesus naleko' li'ana le'an toman Sman Nitu
(Mat. 17:14-21; Mrk. 9:14-29)
37Fun nokfa onane leka sin ansanu na'ko nu'af nane atoni namfau ansai nem he nae'ku nok Yesus. 38Ma kiso atoni mese na'ko atoni amfaun nane anan'bai nak, “Pak, au toti Ko he mail au anah, fun in au anmone fua mese. 39Ma leka nitu smanaf anhek in, naskek in anan'bai ma nitu smanaf nane anbeko nani talan te in fefan nafule. Nitu smanaf nane nasusab in ma kan lomi fa he nasaitan anah nane. 40Ma au toti Ho asimo lasi sin hen li'u napoitan nani, mes sin ka nabe'i fa.” 41Yesus natae nak, “Hoi batan le ka apalsait ma nakfatu, talan te leka Au he ubala ok ki ma he sutai ki ka? Mok ho anah nane nem neu i!” 42Ma leka anah nane nem anpaumak Yesus, nitu nane antepon in neu nain ma antetak in. Mes Yesus nakain nitu smanaf nane ma naleko' anah nane ma anfe nafani neu in amaf. 43aSin alsin nekan namnekun natuin Uisneno In kuasat matani.
Yesus naton anteni In neno mane'at
(Mat. 17:22-23; Mrk. 9:30-32)
43bLeka sin alsin fe namkak neu ale lasi le In anmo'e nalali, Yesus na'uab neu In asimo lasi sin nak, 44“Mitnin nai ma ampanat ale Au a'at i: Fun Anmone Pah To of mana'at neu nimaf mansian.” 45Ma sin ka nahin fa a'at nane, fun a'at nane In oten fe nakolo'on neu sin, he kais sin nahin nani. Ma sin namtau he natan a'at nane neu Yesus.
Sekau es nanae nesi?
(Mat. 18:1-5; Mrk. 9:33-37)
46Ma lasi matoes mese anbol neu Yesus asium lasi sin antom neu sekau es nanae nesi anbi sin. 47Mes Yesus nahin sin nek tenab nane. Es nane te In antopu nan liana mese ma nahakeb bi In aon bian, 48ma nak neu sin, “Sekau ansimo liana i bi Au kanak, in ansimo Kau; ma sekau in ansimo Kau, in ansimo In, le ansonu Kau. Fun sekau le nabau nis anbi hi alki, in es anaek.”
Sekau in kan laban ki fa in haek nok ki
(Mrk. 9:38-40)
49Ma Nai Yohanes nak, “Tuan, hai mit atoni es anli'u napoitan nitu sin neki Ho kanam, oke te hai mikain mani, fun in ka nao natuin kit fa.” 50Ma Yesus nak neu in, “Kais hi mikain, fun sekau le kan laban ki fa, in anhaek nok ki.”
Kuan mese anbi Samaria le' kan simo fa Yesus
51Leka neno anpaumak he naiti Yesus neu neno tunan, In nafek he nao neu Yerusalem, 52ma In ansonu tuaf fauk he nahunun In. Sin nao ma antam bi atoni Samaria sin kuan he naloitan ale sa' neu Usif Yesus. 53Mes atoni Samaria sin kan simo fa In, fun In sali he nao neu Yerusalem. 54Leka asimo lasi nua, esle' Nai Yakobus ma Nai Yohanes nit lasi nane sin nak, “Usif, bait Hom lomi, haim toti ai ansanu na'ko neno tunan he notu nis sin ka?” 55Mes Yesus naklelo on ma nakain sin. 56Oke te sin nao neu kuan bian.
Atoni-atoni le'an lomi ma anfani atuin-atuin Yesus
(Mat. 8:19-22)
57Leka Yesus nok In asimo lasi fe nao natuin lalan, atoni mese na'uab neu Yesus nak, “Au he utuin Ko, neu lalan me le Ho hem nao.” 58Yesus nak neu In, “Asu fui anmu'i bola ma kolo anmu'i kuna, mes Anmone Pah To kan mu'if bale he natuta Ini nakan.” 59Ma In nak neu atoni bian, “Mutuin Kau nai!” Mes atoni nane nak, “Mufetin kau fe he au nao he sub au ama.” 60Mes Yesus nak neu in, “Mautu nai amates ansub sin amates; mes ho amnao nai he muton Plenat Uisneno.”
61Ma atoni es anteni nak, “Au he utuin Ko, Usif, mes mufetin kau fe, he useon au ume nanan sin.” 62Mes Yesus nak neu in nak, “Katit fa atoni le antao nalali niman neu besi foi afu, oke te in nike koti, in antam ota bi Plenat Uisneno.”
دیاریکراوەکانی ئێستا:
LUKAS 9: AOZ
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە