LUKAS 10
10
Usif Yesus ansonu asimo lasi bo'hitu
1Namuni na'ko nane te, Usif Yesus anlek asium lasi bian sin bo'hitu, ma ansonu sin nua-nua nao nahunun In neu ale kot ma bale le In he nao neune. 2Yesus nak neu sin, “Hetus ma mnonut nae le'uf, mes ameput ka namfauf. Es nane him toti nai neu hetus ma mnonut in Usin, he In anfe ameput neu mnonut nane. 3Him nao nai, kiso Au sonu ki on bibi kase bi asu fui sin atnanan. 4Kais meki alu nok noni ai bukael ai penhae, ma kais hi mahosen bi lalan. 5Kalu him tam meu ume me, nahunu te hi mak: Halan nekaf neu ume i. 6Ma bait anmu'i atoni le ansimo halan nane, lof hi halan nane nabala bi in. Mes kalu kahaf halan nane of anfani nem neu ki. 7Hi mimaika anbi ume nane, miah ma minu sa' le nabalab neu ki, fun ameput nane lo mes he napeni palseb. Kais mi'oni mi'ko ume es meu ume bian. 8Ma leka him tam ambi kot me ma sin ansimo ki, miah nai sa' le sin nabalab ki neu ki. 9Mileko' nai amenat le sin anbine ma ametun sin mak: Plenat Uisneno nem haumakan ki. 10Mes leka him tam meu kot me ma sin kan simo ki fa, him poi nai meu ale lal uf ma hi mak: 11Afu skuku bi hi kuan na'ki bi hai haem, of haim tekal mani neu ki; mes so hi mihin nai mak: Plenat Uisneno nem anhaumak. 12Au ak ki: of kot Sodom in sutais anmakafa nesin kot nane.”
Kot-kot le'kan mu'ifa afnekat
(Mat. 11:20-24)
13“Amle'ut neu ko Khorazim! Amle'ut neu ko Betsaida! Fun bait afi bi kot Tirus ma Sidon mo'et amkakat anbol neu sin, le anbol bi hi atnanam, oni sin nate'un sin nekan ma antok nok kulut. 14Bi neno kasat nateabon of kot Tirus ma Sidon sin lenat anmakaf nesin ki. 15Ma ho Kapernaum, ati he nasaeb ko ante neno tunan ka? Kahaf, of nasanut ko talan te amates balan!
16Sekau in nen ki, in nen Kau, ma atoni le antite ki, in antite Kau; ma sekau in antite Kau, in antite In kun le ansonu Kau.”
Asimo lasi bo'hitu sin anfani nem
17Namuni te asium lasi bo'hitu nane sin anfani nem nok amlilat ma sin nak, “Usif, ale nitu, sin naluli neu kai kalu haim tek Ho kanam.” 18Yesus nak neu sin, “Au it Sanat in tuaf anmof on limat na'ko neno tunan. 19Mimnau Au fe ulali ki kuasat hem teli bi kauna, kabiti ma ale musu sin kuasat, ma sa'es of kan hamu'i ki. 20Mes kais hi mimlil natuin ale smanaf nane sin naluli neu ki, mes mimlil nai natuin hi kanam matui bi neno tunan.”
Usif Yesus nekan namlil
(Mat. 11:25-27, 13:16-17)
21Bi leku nane amsa' Usif Yesus In namlil bi Smanan Knino ma nak, “Au utulu nekak neu Ko, Ama, Usif neno tunan ma pah pinan, fun ale lasi nane Ho mutolo neu malole sin ma ahinet sin ma Hom muton mani neu ka ahinet sin. Koi Ama, onane Ho nek alomit anbol. 22Fun ale lasi Au Ama nana'at nani neu Kau ma katit fa esle' nahin Anmone nane sekau, al Amaf, ma Amaf nane sekau kun, al Anmone, ma sekau le Anmone anlomi he naton nani neu in.”
23Nalali te Yesus naklelon neu asium lasi sin anmes ma nak, “Alekot neu ale mataf le sin nit sa' le hi mit. 24Mes mimnau: Ale Mafefa knino ma kesel sin anlomi he nit sa' le hi mit, mes sin ka nit nani fa, ma he nen sa' le him nen, mes sin ka nen nani fa.”
Lasi leta atoni Samaria nek amanoet
25Bi neno es atoni ahin plenat mese anfen hen su' Yesus, nak, “Anoni, au mo'e onme ka he upeni honis nabal-bal?” 26Yesus nak neu in, “Antui sa' bi plenat knino ka? Hom soi onme ka?” 27Atoni nane natae nak, “Mes hom nek Abal-balat, Uisneno meki ho nekam oke ma meki ho smanam oke ma meki ho matanim oke ma meki ho lolem oke ma amnek ho bia ho benu onle amnek ho aom” 28Yesus nak neu in, “Namneo onane; mo'e mani nai of ho mupeni honis.” 29Mes in lomi he namneob kun in aon, in nak neu Yesus, “Ma au bia benu nane sekau kun ka?” 30Yesus natae nak, “Anmu'i atoni mese ansanu na'ko Yerusalem neu Yerikho; in anmof neu atoni abulalut sin niman, ma nasik nan ale ini bale, oket antepo nalali te anpaleob nani, ala kle'o in anmate. 31Anbi leku nane ana' lasi fuat mese ansanu natuin lalan nane; in nit atoni nane mes in nao anfin kun natuin lalan aon bian. 32Onane te atoni Lewi mese nem neu bale nane; leka in nit atoni nane, in nao anfin kun natuin lalan aonbian. 33Mes atoni Samaria mese anao lalan nem neu bale nane; leka in nit atoni nane, in nekan anmof ma nekan namnoe. 34In anfonat nu ma ana'mu in papa' ma antosi mina ma tua amtasa neune. Oke te in nasaeb neu in bikase ma nokan nao neu ume snasat ma anpaloli nani. 35Nokfa onane, in anfe noni dinar nua neu apao ume snasat nane nak: Hom paloli in ma leka hom baen nes na'ko le i of au ufani ko sin, leka au fani aum. 36Ma na'ko atoni teun in i, ho mutenab mani, sekau es anfani bia benu neu atoni le anmof bi abulalut sin niman?” 37In natae nak, “In kun le anmo'e alekot neu atoni nane.” Yesus nak neune, “Hom nao nai, ma ho mo'e onane!”
Yesus an nono bi Marta ma bi Maria
38Leka Usif Yesus a'nao nok asium lasi sin, In antam bi kuan mese. Ma bife mese in kanan bi Marta ansimo In anbi in ume. 39In anmu'i olif mese kanan bi Maria. Bi Maria antok paumak Usif Yesus In haen ma nen In a'an. 40Bi Marta in nabiku anfin neu hen tuthae Usif Yesus. In nem anpaumak Yesus ma nak, “Usif, ait Ho kam laef, he au oli nane anpaleoba kau mes he ubiku? So Hom lelu in anbab kau fe.”
41Mes Usif natae in nak: “Marta, Marta, ho mu'unu ma ho muhaebom neu lasi namfau, 42mes al lasi an-ana nono mese hom nuk mani: Bi Maria anbeti nalali lasi tukan alekot, le of ka nait nani fa na'ko in.”
دیاریکراوەکانی ئێستا:
LUKAS 10: AOZ
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە