GÉNESIS 24
24
Abrahamca Isaacpaj huarmi cachun huarmita mashcashcami
1Abrahamca achca huatacunayuj, yallitaj yuyajmi carca. Mandaj Diosca Abrahamtaca tucuipimi bendiciarca. 2Abrahamca, paipajta rurajcunamanta ashtahuan yalli yuyaj paipajta rurajcunatapish mandaj, tucui pai imalla charishcacunatapish cuidaj runata cayashpami:
–Cunanca cambaj maquita ñuca changapi churashpa, 3ñuca churi Isaactaca, ñuca causacun cai Canaán llajtapi causaj huarmicunapurahuan cazarachun mana saquinata jahua pachata, cai pachata Mandaj Taita Diospaj ñaupajpi ari ni. 4Ashtahuanpish ñuca quiquin llajtaman rishpa, ñuca familiacunapuramanta shuj huarmita ñuca churi Isaacpaj huarmi cachun pushamunata ari ni– nirca.
5Chaimi paipajta ruraj runaca:
–Pushanaman rijpipish pi huarmi ñucahuan mana shamusha nij imajpica ¿cambaj churitachu can maimanta llujshimushca llajtaman pushangapaj tigramusha?– nirca.
6Shina nijpi Abrahamca:
–¡Ñataj ñuca churita chai llajtaman pushanguiman! 7Ñucataca jahua pacha Mandaj Taita Diosmi ñuca yayapaj huasimanta, ñuca familiacunapuramanta pushamushpa ñucamanca: “Cai llajtataca cambaj huahua huahuacunaman cushatajmi” nirca. Ñuca churipaj shuj huarmita chai llajtamanta pushamuchunpish pai Diosllatajmi paipaj angelta canta ñaupachishpa cachanga. 8Shina cajpipish pi huarmi canhuan mana shamusha nijpica, ñucaman ari nishcata ña pajtachishcamanta canca ima juchachina illajllami saquiringui. Ashtahuanca ñuca churi Isaacllata chai llajtaman ama pushangui– nircami.
9Shina nijpi paipajta ruraj runaca, paipaj amo Abrahampaj changapi maquita churashpami, chai ari ninacushcataca pajtachishatajmi nirca. 10Chai q'uipaca paipajta ruraj runaca paipaj amo Abraham charishcacunataca tucuimanta yalli alli camaricunata agllashpa, amopaj chunga camellocunata japishpa chaicunaman apachishpa ñanpi yaicushpaca, Mesopotamiapi caj Nacor causacun pueblomanmi chayarca. 11Ña chishiyacuitami puebloman yaicunllapi caj pugyu c'uchupi, camellocunata cungurichishpa samachicurca. Chaica chai pueblopi causaj solteracuna yacuta huishinaman rina horasmi carca. 12Chaipimi paica: “Ñuca amo Abrahamta Mandaj Taita Dios, ñuca cunan pihuan tupashcaca alli cashca cachun. Ñuca amo Abrahamta c'uyashcata ricuchihuai nirca. 13Cunanca cai pugyu c'uchullapimi shuyagrini. Cai pueblopi causajcunapaj ushushicuna yacuta huishinaman shamujpica, 14maijan solteratami ñuca: Cambaj puñuta uricuchishpa yacuta ñucaman ubyachihuai nijpi paica: Ubyailla, cambaj camellocunamanpish ubyachisha nij huarmimi, cambajta ruraj Isaacman quiquin cushca huarmi canga. Chaita ricushpami, ñuca amota quiquin c'uyashcataca yachasha” nircami.
15Pai chashna mañacujpirajmi Rebeca solteraca puñuta rigra jahuapi churashca shamucurca. Paica Betuelpaj ushushimi carca. Betuelpaj yayaca Nacormi carca. Nacorca Abrahampaj huauquimi carca. Nacorpaj huarmica Milcami carca. 16Chai solteraca sumaj ñahui, c'arihuan manaraj chayarinacushcami carca. Paica pugyuman uriyashpa paipaj puñupi yacuta huishishpami ña tigragrirca. 17Chaimi Abrahampajta ruraj runaca paipajman callpashpa rishpaca:
–Cambaj puñumanta asha yacuta ñucaman ubyachihuai– nishpa rogarca.
18Shina nijpi paica:
–Ñuca amitolla ubyailla– nishpami, puñuta uricuchishcahuan paipaj maquihuan charishpa ubyachirca. 19Chai runa ña ubyajpica, paica:
–Cambaj camellocunapish mana nijta ubyachun pugyumanta yacuta llujshichisha– nircami.
20Shina nishpaca, yacuta ubyachina rumipi puñumanta yacuta tallishcahuanmi, tucui camellocuna mana nijta ubyangacama yacuta llujshichishpa ashtacurcalla. 21Chai runaca achcata mancharishpa upalla shayashpami, pai shamushcataca Mandaj Diosca yangallata ruragrishcata, allita ruragrishcata yachasha nishpa shayacurca.
22Camellocuna yacuta ña mana nijta ubyajpica, Abrahampajta ruraj runaca Rebecamanca chaupi siclota pezaj curi shuj argollata, chunga siclota pezaj curi ishqui brazaletecunata cushpami, 23cashna nirca:
–Canca ¿pipaj ushushitaj cangui? ¿Cambaj yayapaj huasipi cunan tuta ñucanchij samaringapaj samarina tiyanchu?– nishpami tapurca.
24Chaimi paica:
–Ñucaca Betuelpaj ushushimi cani. Ñuca yayapaj yayaca Nacormi, mamaca Milcami– nirca.
25Cashnapishmi nirca:
–Ñucanchij huasipica cunan tuta cancuna maipi samarinapish ujshapish, q'uihuapish achcami tiyan– nircami.
26Shina nijpi chai runaca cumurishpami Mandaj Diostaca: 27“Ñuca amo Abrahamta Mandaj Taita Diostaca alli nishca cachun. Paica ñuca amota c'uyashpa, pai imata nishcata pajtachishpami, ñucataca tucui ñanta pushashpa ñuca amopaj huauquicunapaj huasiman pushamushca” nishpami adorarca.
28Chai solteraca, huasiman callpashpa rishpami, pihuan tupashcata tucuita paipaj mamaman huillarca. 29Rebeca solteraca, Labán shuti turitami charirca. Paica huasimanta llujshishcahuan callpashpa rishpami, yacu pugyu c'uchupi caj runapajman rirca. 30Paipaj panitaca curi argollata aparishcata, maquicunapipish curi brazaletecunata aparishcata ricushpa: “Chai runa imalla nishcatapish huillashcata uyashpami” chai runa maipi canman rirca. Pai rishpaca yacu pugyu c'uchupi camellocunandij shayacujta japishpaca, 31cashnami nirca:
–Mandaj Dios alli nishca runa jacupai. ¿Maitataj caipica pacaringuiyari? Cancuna samarina huasitapish, camellocunata maipi churanatapish ñamari allichimuni– nirca.
32Chaimi chai runaca, Labanpaj huasiman shamurca. Labanca camellocuna aparishcacunata uricuchishpami, ujshatapish q'uihuatapish cararca. Chai runapaj chaquicunata maillanapajpish, paihuan shamujcunapaj chaquicunata maillanapajpish yacuta curcami. 33Micunata carajpimi Abrahampajta ruraj runaca:
–Ñuca imapaj shamushcata manaraj huillashpaca, mana micui tucunichu– nijpimi, Labanca:
–Imata nina cashpaca nihuailla– nirca.
34Chaimi chai runaca:
–Ñucaca Abrahampajta ruraj runami cani. 35Mandaj Diosmi ñuca amomanca achca allicunata cushpa achcata charijyachishca. Chaimi paica ovejacunata, vacacunata, cullquita, curita, paipajta ruraj c'aricunata, huarmicunata, camellocunata, burrocunatapish achcata charij tucurca. 36Ñuca amopaj huarmi Saraca yuyaj pachapimi, ñuca amopajtaca shuj c'ari huahuata huacharca. Ñuca amoca pai tucui imalla charishcacunatami chai churiman curca. 37Ñuca amoca ñucataca: Ñuca churitaca cunan ñuca causacun cai llajtapi causaj cananeocunapaj ushushicunahuanca amataj cazarachingui. 38Ashtahuanpish ñuca yayapaj huasiman, ñuca familiapurapajman rishpa ñuca churipaj huarmi cachunca shuj huarmita pushamungui nishpami, chashnataj ruranata ari nichirca. 39Chaimi ñucaca: Pi huarmi ñucahuan mana shamusha nij imajpica nircani. 40Chaimi paica: Ñucaca tucui causaipimi Mandaj Diospaj ñaupajpi purini. Paillatajmi canhuanpish paipaj angelta cachajpi paica tucui ñanpi canta cuidajpi alli ringui. Chaimi ñuca yayapaj huasimanta, ñuca familiapuramantaca ñuca churipaj shuj huarmita pushamungui. 41Can ñuca yayapaj huasi familiapurapajman rijpi, paicunapaj ushushita mana cujpica, ari nishcata pajtachishcamanta canca ima juchachina illajllami saquiringui nircami.
42Chaimantami ñucaca cai puebloman yaicuna yacu pugyu c'uchuman chayamushpaca cashna mañarcani: “Ñuca amo Abrahamta Mandaj Taita Dios cunan ñuca caiman shamushca ama yanga cachun quiquin allita rurashpaca, 43cai pugyu c'uchullapi ñuca shayacujpi maijan solterata cai pugyumanta yacuta apanaman pushamupai. Paitaca ñucaca: Riqui asha yacuta ñuca ubyangapaj cambaj puñumanta cuhuai nishami. 44Shina nijpi paica: Caillahuan ubyapai, cambaj camellocunamanpish yacuta huishishpa ubyachisha nij huarmimi, cambajta ruraj Isaacman quiquin cushca huarmi canga nishpami mañacurcani”. 45Ñuca shungupi chashna mañacujpirajmi, Rebecaca puñuta rigra jahuapi churashca shamucushca carca. Paica pugyuman uriyashcahuan, yacuta huishishpa tigragrijpimi: “Yacuta ñucaman ubyachihuai” nishpa rogarcani. 46Shina nijpi paica rigra jahuamanta puñu yacuta uricuchishcahuanmi: Caillahuan ubyapai, cambaj camellocunamanpish yacuta ubyachisha nishpa ñucamanpish yacuta curca. Camellocunamanpish yacuta ubyachirca. 47Chaimi ñucaca: Canca ¿pipaj ushushitaj cangui? nijpi paica: Ñucaca Betuelpaj ushushimi cani, ñuca yayapaj yayaca Nacormi, mamaca Milcami nijpi ñucaca paipaj singapica shuj argollata churachircani. Maquicunapica brazaletecunata huatachircani. 48Chai q'uipaca ñuca amopaj churipaj huarmi cachunca paipaj huauquipaj ushushita pushachun tucui ñanpi cuidashpa pushamushcamantami ñuca amo Abrahamta Mandaj Taita Diospaj ñaupajpica cumurishpa allimari cangui nishpa adorarcani. 49Chaimanta cunanca ñuca amota llaquishcamanta paipaj allita rurasha nishpapish mana rurasha nishpapish mana llullashpalla huillapaichij. Ñucapish imata rurana cashcata yuyaringapaj– nircami.
50Chaimi Labanpish, Betuelpish:
–Tucui chaicunaca Mandaj Diospaj munaimi chashna cashca. Chaimanta ñucanchijca allimi, mana allichu mana ni tucunchijchu. 51Riqui, cunanca Rebecallataj caipimi. Paitaca Mandaj Dios nishca shinallataj cambaj amo Abrahampaj churipaj huarmi cachun pushashpa ringuilla– nircacuna.
52Chaita uyashpami Abrahampajta ruraj runaca, Mandaj Diospaj ñaupajpi pambaman tupajta cumurirca. 53Chai q'uipami Abrahampajta ruraj runaca cullquimanta, curimanta rurashca sumajcunatapish, churanacunatapish llujshichishpa Rebecaman curca. Paipaj turi Labanmanpish, paipaj mamamanpish tucui laya sumajcunatami curca. 54Abrahampajta ruraj runapish, paihuan cajcunapish micushpa, ubyashpaca chai tutaca chaipimi dormircacuna. Cayandij tutamantaca utcata jatarishpami Abrahampajta ruraj runaca:
–Ñuca amopajman ña cachapaichij– nirca.
55Chaimi Rebecapaj turipish, mamapish:
–Chunga punllacunallahuanpish huambra ñucanchijhuanraj cachun shuyapayari. Chai q'uipaca ringallami– nircacuna.
56Abrahampajta ruraj runaca:
–Mandaj Diosca ñuca shamushcataca mana yangata rurashcachu. Chaimanta ñucataca ama jarcapaichijchu. Ñuca amo maipi canman tigrangapaj utca cachapaichijlla– nirca.
57Chaimi paicunaca:
–Shinashpaca, huambrata cayashpa tapushunchij– nircacuna.
58Rebecata cayashpaca:
–¿Canca cai runahuan risha ninguichu?– nijpi paica:
–Ari, rishallami– nircami.
59Chaimi Rebecataca paita huiñachij huarmindij, Abrahampajta ruraj runahuan, paihuan shamujcunahuanpish richun saquircacuna. 60Paicunaca alli cashca cachun nishpami Rebecataca:
“Ñucanchij paniculla, canca huaranga huarangacunapaj mama tucushpa alli canguiman.
Cambaj huahua huahuacunaca paicunata p'iñajcunahuan macanacushpa pueblocunata quichushpa alli canman” nircacuna.
61Rebecaca, paipajta ruraj solteracunandij camellocunapi tiyarishpaca, Abrahampajta ruraj runata catishpa rircallami. Chashnami Abrahampajta ruraj runaca, Rebecata pushashpa tigrarca.
62Isaacca, Neguevpimi causarca. Paica: “Ñucata ricuj causacuj Diospaj pugyu” shuti c'uchumantami tigracurca. 63Isaacca ña chishiyacui shinatami, pueblomanta canllaman ashata puringapaj llujshishca carca. Chaipimi paica huichilla ricushpaca, camellocuna shamucujta ricurca. 64Rebecapish Isaacta ricushcahuan camellomanta uriyashpami, 65Abrahampajta ruraj runataca:
–Chai pambata ñucanchijpajman shamucuj runaca ¿pitaj?– nijpi, Abrahampajta ruraj runaca:
–Paimari ñuca amo– nijpimi, Rebecaca pai ch'ungullirina linsohuan ñahuindij ch'ungullirirca.
66Abrahampajta ruraj runaca tucui ima shinalla tucushcatami Isaacmanca parlarca. 67Isaacca, Rebecataca paipaj mama Sarapaj carpa huasimanmi pusharca. Isaacca, Rebecataca paipaj huarmi cachun japishpaca achcata c'uyashpami causarca. Paipaj mama huañujpi llaquilla cashcamantaca Rebecahuan cazarashpami cushicurca.
دیاریکراوەکانی ئێستا:
GÉNESIS 24: QCHI04
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Quichua Chimborazo Bible Revision 2010 © United Bible Societies, 2010.