GÉNESIS 25
25
Cetura huarmipi Abraham charishca huahua huahuacunami
(1 Cr 1.32-33)
1Abrahampaj caishuj huarmica Cetura shutimi carca. 2Chai huarmipica Abrahamca Zimram, Jocsán, Medán, Madián, Isbac, Súa shuti churicunatami charirca. 3Jocsanca Seba, Dedán shuti churicunatami charirca. Dedanpaj churicunamantami Asurim, Letusim, Leumim nishcacuna mirarircacuna. 4Madianpaj churicunaca: Efa, Efer, Hanoc, Abida, Elda shutimi carcacuna. Tucui chaicunami Ceturapaj huahua huahuacuna carca. 5Abrahamca tucui pai imalla charishcacunataca Isaacmanmi saquirca. 6Paipaj caishuj huarmicunapaj huahuacunamanpish tucuicunamanmi asha ashata convidarca. Abrahamca pai causacushparajmi paipaj caishuj churicunataca paipaj churi Isaacmanta ch'icanyachishpa inti llujshin ladoman caj llajtacunapi causachun cacharca.
Abraham huañushcapish paita pambashcapish
7Abrahamca, 175 huatacunatami causarca. 8Abrahamca uni huatacunata causashpa yallitaj yuyaj tucungacama causashpami huañurca. Huañushpaca paipaj ñaupa yayacunahuanmi tandanacugrirca. 9Abrahamtaca paipaj churi Isaacmi caishuj churi Ismaelhuan ishqui tucushpa, heteocunapuramanta caj Zoharpaj churi Efronpaj Macpela shuti allpapi caj jutcupi churarcacuna. Chai allpaca, Mamre pueblo ch'imbapurapimi carca. 10Chai allpataca Abrahamllatajmi Hetpaj huahuacunapura Efronman randirca. Paipaj huarmi Saratapish, Abrahamtapish chaillapitajmi churarcacuna. 11Abraham huañushca q'uipapish paipaj churi Isaacmanca Taita Diosca achca allicunatami curca. Isaacca: “Ñucata ricuj causacuj Diospaj pugyu” c'uchullapitajmi causarca.
Ismaelpaj huahua huahuacunami
(1 Cr 1.28-31)
12Abrahampaj caishuj churi Ismaelpaj huahua huahua callari yayacunaca caicunami: Ismaeltaca Sarapajta ruraj egipcia Agar huarmimi huacharca. 13Ismaelpaj churicunaca, paicuna ima shina huacharishca shinallataj caicunami: Ismaelpaj punta churica Nebaiotmi. Q'uipa churicunaca Cedar, Adbeel, Mibsam, 14Misma, Duma, Massa, 15Hadar, Tema, Jetur, Nafis, Cedema shutimi carcacuna. 16Tucui chaicunami, Ismaelpaj churicunaca. Paicunaca chunga ishqui llajtacuna tucushpami, chai llajtacunataca paicunapaj quiquin shuticunata churashpa paicunapaj quiquin mandajcunata churashpa carpa huasicunapi causarcacuna.
17Ismaelca, 137 huatacunatami causarca. Huañushpaca paipaj ñaupa yayacunahuanmi tandanacugrirca. 18Ismaelitacunaca Havila llajtamanta callarishpaca Asiriaman rina ñanta catishpa Egipto ch'imbapurapi caj Shur llajtacamami causarcacuna. Ismaelca tucui paipaj huauquicuna ricucunpimi huañurca.
Jacobpish, Esaupish huacharishcami
19Abrahamca Isaac churitami charirca. Abrahampaj churi Isaacpaj huahua huahua callari yayacunaca caicunami: 20Isaacca chuscu chunga huatayuj cashpami Padan-aram llajtapi causaj arameocunapura Betuelpaj ushushi, Labanpaj pani Rebecataca paipaj huarmi cachun japirca. 21Isaacca paipaj huarmi Rebeca mana huachaj cajpimi, Mandaj Diosta mañarca. Pai mañashcata Mandaj Dios uyajpimi, Rebecaca chichurca. 22Rebecapaj huijsapica huahuacuna macanacujpimi Rebecaca: “Chashna cajpica, imapajtaj ñucaca causasha” yuyashpami Mandaj Diosta tapugrirca. 23Mandaj Diosca Rebecataca:
“Cambaj huijsapica ishqui llajtacunami tiyan.
Cambaj huijsamantapachamari, ch'ican ch'ican llajtacuna tucushpa llujshinga.
Shuj llajtami caishuj llajtata yalli c'ari c'ari canga.
Punta huacharijmi q'uipa huacharijpajta ruranga” nircami.
24Rebecaca huachana punlla pajtajpica, ishqui c'ari huahuatami huacharca. 25Punta huacharij huahuaca tucui cuerpo puca millmayuj huacharijpimi, Esauta shutichirca. 26Q'uipata huacharij huahuaca, paipaj huauqui Esaupaj chaqui talonpi charirashca huacharijpimi, Jacobta shutichirca. Isaacca paipaj huarmi huachanapajca, sujta chunga huatacunayujmi carca.
Esauca punta churi cashcata c'atushcami
27Chai huahuacuna huiñashpaca, Esauca urcucunapi purinata munaj, sacha animalcunata huañuchinata alli yachajmi carca. Ashtahuanpish Jacobca maiman rinata mana munaj, carpa huasicuna ucullapi imatapish rurashpa causajmi carca. 28Esaú japimushca animalcunata micuj cashpami Isaacca Esautaca yallitaj c'uyarca. Rebecaca, Jacobtami yallitaj c'uyarca.
29Shuj punllami Jacobca sumaj micuita yanucurca. Paipaj huauqui Esauca urcumanta achca shaicushca shamushpami, 30Jacobtaca:
–Ñucaca achca shaicushcamari cani. Can yanucun sumaj puca micuita carachunmi rogapani– nirca.
Chaimi Esautaca Edomta shutichircacuna.
31Jacobca Esautaca:
–Can punta churi cashcata cunan punllataj ñucaman c'atupai– nircami.
32Chaimi Esauca:
–Cunan ñuca yaricaihuan huañucujpica, punta churi cashcaca ñucapajca ima mana canchu– nirca.
33Shina nijpimi Jacobca:
–Cunan punllataj c'atunitajmi niyari– nijpi, Esauca:
–Manataj llullanichu, c'atunitajmi– nishpa, punta churi cashcata Jacobman c'aturca. 34Chaimi Jacobca Esaumanca tandatapish, lentejata yanushca sumaj micuitapish carajpi, Esauca micushpa ubyashpa chaimanta jatarishpaca rircalla. Chashnami Esauca punta churi cashcataca yanganchirca.
دیاریکراوەکانی ئێستا:
GÉNESIS 25: QCHI04
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Quichua Chimborazo Bible Revision 2010 © United Bible Societies, 2010.