PIANPATNAK 13
13
Abram le Lot Khendun
1Mah hangin Izipt ngam pen Abram cu tulin, saklam ngam Negev lamah a zi le a neihmi hempoh tuah hawh hi. 2Abram cu mihauzet hi a, tuu, keel, khui tampi nei in, sui le ngun vang nei hi. 3Negev mun pen tulin ngiahbuk pa khat nung pa khat thawn pepelin, masabel ngiahbuk a saknak Bethel le Ai khua laklawh ngam lamah hawh hi. 4Amasa a, biaklandawh a bawlnak mun a hen ten Topa cu bia hi.
5Abram tuah a hawh langkhat bokmi Lot vangin tuu, keel le khui tampi nei bokin innceng vang nei hi. 6Abram le Lot cu ngan tampi nei veve haw a, ngan tei eih tuk hampa khamtham a um ngawl hangin, munkhatah um langkhat thei haw ma hi. 7Mah hangin a nganhing cingtu tei laklawhah nase zetin hauhdunnak piang hi. Mah hun laihin Kanaan mi le Periz mite cu mah ngamah um haw laih hi. 8Abram in Lot lakah, “U le nau hi ung a, na mihing le ka mihingte hi haudun li tukmi kha haw ma hi. 9Khendun saw nung. Na deihmi ngam teng inna, mahlaiah hawhin hi. Kei cu mundangah hawh tung,” ti hi.
10Lot cu khua le ngam cuanin, Topa i huandum le Izipt ngam bangin, Jordan ngun mawk tuan hi cu Zoar tian tui tamzet ummi ngampha hi tih cu mu hi. Hi hun laihin Sodom le Gomorrah khua cu Topa in siatik ma laih hi.#Pian 2:10; 11Lot in ama ca tukin Jordan ngun mawk munlawn venghawng cu tengin nisuahnak lamah thawn hi. Mah hangin khekdun hawta hi. 12Abram cu Kanaan ngamah umin, Lot cu munlawn a, khuapiah um hi. Sodom khua elah ngiahbuk sam hi. 13Sodom khuasung mite cu mipha ngawlzet haw a, Topa i maiah sual leita haw hi.
Abram Hebron Ah Thawn
14Lot in, a zamsan nungten Abram lakah, Topa in, “Na umnak mun pen khua cuan inna, sak le hang, nisuah le nitumnak lam tian zoham khawngin hi. 15Itahim titale na muhmi ngam hempoh cu nangmah le na casuante pia khawng tung a, kumkhua in nangmuta hi tuk toh hi.#Nung 7:5; 16Casuan tampi pia tung hi. Leihum a, leivui a sial zotu ten na casuante vang sial zo haw tuk hi. 17Atu-in, ngam zoham khawng tukin hawhin hi. Itahim titale nangmah pia khawng tung,” ti hi. 18Mah hangin Abram cu a ngiahbuk thawnin, Hebron khua Mamre Sasua kung elah umnak tuk bawl hi. Mahlaiah Topa i biaklan dawh hi.
دیاریکراوەکانی ئێستا:
PIANPATNAK 13: NBF1
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Ngawm Bible © Bible Society of Myanmar, 2014.