Matayo 12
12
1ND’EKEK’EKO, Yesu aocuwana basala b’asangu nd’okolo wa Sabata; ko bakimi’akande baoloka nzala, baanga lomuk’asangu, ko baleka. 2Aki Bafalusi oene, baolokela, Bala, bakimi’ake basekola boeko wa Sabata. 3Lolo aolakela, Inyo lotafoanda nd’onkanda joi liki Dawidi okelaka, aki’nd’okaka nzala, ende l’iy’aki l’ende; 4eleng’eki’nd’otswaka nd’ilombe ya Nzakomba, ko aleki mampa y’oeko iki’nde la baki l’ende batatola, baleka o nkanga kika? 5Ko lotafoanda nda bisekyelo wete nkanga basekol’esekyelo ea Sabata nda mbile ea Sabata nd’ilombe ya Nzakomba, ko bafa l’ekwa ea likambo? 6Lolo nsangel’inyo, Omo ondekol’ilombe ya Nzakomba al’ane. 7Nga leaki ncina ea joi line, Ndang’isei, afa mbeka, sik’inyo ntalumbak’iy’afa l’ekwa ea likambo? 8Ewela wae Bona ow’onto ale nkolo ea Sabata.
9Koko aoliman’eko, ko aocwa nda sunagoga ekiyo; 10ko bala, bonto onyeela likata aki eko. Ko baolouola, bakela, Nkin’oiky’anto nda mbile ea Sabata, osekola nde bisekyelo? basaki wae boumbe. 11Aolakela, Ayaka bont’okinyo’omo aata mpate emoko, ko eko eokwela lifoku nda mbile ea Sabata, afokite nde wae asafole? 12Bonto afolekola mpate nde? Nd’ewela eko, nkakela e’olotsi nda mbile ea Sabata eji la bisekyelo. 13Aokela bont’oko, Sembola likata likawe. Aosembola liko, ko likata likande joika ngole likata limo, 14Lolo Bafalusi baolola, ko baoloangela wango elenge e iy’oom’ende. 15Aki Yesu okotola ngoko, aoliman’eko; ko bant’auke baolokima; ko aolaikya iy’ankuma: 16ko aolasangela wae batakumyak’ende lokumo. 17Wete joi liki Yesaya owa boteli otelaka jiele, aokela,
18Bala, bosali’okami oki’m’osonaka;
Okami ow’eefe ondoky’otema’okami ekemo:
Njifila Bolimo’okami el’ende,
Ko ende ifosangela Bafaya etenelo e’akambo ea ci.
19Ende afaoswela, ko afaobeleza;
Ko bafaoka lofoso lokae nda mboka.
20Afaotena bokombe bonyukwa,
Ko afaofofya itswa ikututali,
Elaka nko aolieza etenelo e’akambo nd’elonga.
21Bafaya bifolendeza nda lina likande.
22Nkako baoloyela bonto oki la demona, awei’aiso, ko aki lokisi: aoloikya, lim’ako bont’oko owa lokisi aotefela, ko aolena. 23Ko bitukuluku bi’anto baokamwa, bakela, One afa bona owa Dawidi? 24Aki Bafalusi ookaka, baokela, Bont’one ozaka bademona la Balazebuba bokulaka owa bademona. 25Yesu eaki nkai ikiyo, ko aolakela, Wengi likulaka likafwana likomongo jomelengana: ko wengi bonanga bokafwana bokomongo bofaomonga, ko boloi w’ilombe ngoko. 26Ayaka Satana aooza Satana, ende ayakangw’omongo, ko likulaka likande limonga ngamo? 27Ayaka ndoza bademona la Balazebuba, bana’akinyo baoza la na? Nd’ewela eko, iyo bifoyalema juges bakinyo. 28Lolo ng’emi ndoza bademona la Bolimo wa Nzakomba, wae likulaka ja Nzakomba joy’el’inyo. 29Bonto otswaka nd’ilombe ya bonto owa mpamba ofunza baumba’akande, atatungya bonto owa mpamba nda joso ngamo? Aolotungya, mpang’afit’ilombe ikande. 30Ende of’el’emi aonsuk’isuki; ko ende otatakanyaka l’emi afalanganyaka. 31Nd’ewela eko, nsangel’inyo, banto bifotungwa lima baoyi’obe bauma la tosaola touma; lolo basaola Bolimo w’olotsi bafaotungwa nye. 32Koko otanga Bona ow’onto lotango, ifotungwa lima joi liko: lolonde otanga Bolimo w’olotsi, afaotungwa lima joi liko nd’ekek’ene, ko afaotungwa nd’ekeke eoya. 33Kela botamba boyaleme bolotsi ko l’amuka bolotsi, nkin’afa ngoko, kela botamba boyaleme bobe ko l’amuka bobe: ele botamba weana la bamuka b’oko. 34Inyo bana ba njwa, iny’ant’obe, lotefeleya baoyi b’olotsi ngamo? ele bomwa botefela lim’ofula wa botema. 35Bonto ow’olotsi aoz’aumba b’olotsi lima liaci likae j’olotsi; ko bonto ow’obe aoz’aumba b’obe lima liaci likae j’obe. 36Koko nsangel’inyo, nda mbile e’etenelo e’akambo, banto bifoata likambo nd’ewela ea wengi joi lisamba ncina loswele lik’iy’otefelaka. 37Wifoyengwa la baoyi’akawe, ko wifumbama la baoyi’akawe.
38Nkako bakoci b’enkanda l’afalusi bamo baolokela, Bolaki, iso tolanga wete tene lotaza lim’ele we. 39Lolonde aolamba, akela, Banto b’eotswelo e’obe la jibi bayase lotaza: lotaza lofaokaema el’iyo, imola nko lotaza ja Yona owa boteli; 40Bona ow’onto ifoyala nd’etei e’okili bembile besato la betso besato, ngoki Yona nda likunju ja nse e’enene bembile besato la betso besato.
41Banto ba Ninewe bifemala nd’etenelo e’akambo la banto ba eotswelo ene, ko bifaumba; ek’iy’oututalaka baoyi’obe la lilako ja Yona: ko bala, ondekola Yona al’ane. 42Bokulaka owa roi ow’omoto owa Sud ifemala nd’etenelo e’akambo la banto b’eotswelo ene, ko ifaumba; eki’nd’oyaka lima nsukela e’okili wae okoza baoyi ba wanya ba Solomona, ko bala, ondekola Solomona al’ane. 43Aki demona ea linyamo oole lim’el’onto, oko ayolande nd’okili wa kotukotu, ayase jomo, lolo afene. 44Ko akela, Njute nd’ilombe iki’mi wolaka; ko aki’nd’okit’eko, atan’iko o mpampa, ioombama, ko iotandema. 45Lim’ako aocw’okol’el’ende mongo bademona bamo nsambo bandekol’ende la bobe; bako baolotswa, ko baoyal’eko; ko elenge ea bont’oko ea nsukela eolekola eki joso la bobe. Eotswelo ene e’obe ifoyalema nk’eleng’eko.
46Nko end’otefela la banyenga b’anto, bala, nyango l’akune’akande bakemi nd’anza, basa wae batefele l’ende. 47Ko bont’omo aolokela, Bala, nyango l’akune’akawe bemi nd’anza, basa wae batefele la we. 48Lolo aolamba, aokela bonto ondosangelaki, Ole nyango ekami na? Ko bakune’akami na? 49Ko aosembola likata likande ele bakimi’akande, akela, Bala, nyango l’akune’akami! 50Wengi’onto okela baoyi balanga Fafa ekami ole nda loola, ale bokune’okami, la nkana, la nyango ekami.
دیاریکراوەکانی ئێستا:
Matayo 12: NTMN58
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Bonkanda Wa Nzakomba W’aeyoko © Aliiance Biblique de la RD Congo, 1958.