LAIPAO 4
4
Zang-e Mosa ang Ohünotün Tsakzong Kox
1Ifüima Mosa-e Jowanpa kax to lan: “Namthütba, Israel khünaknue ku to chiong ilaxle ku zangwün to nathale chichangba chemle changüi? Hwome, nang ku hato ngaile ojao chiaho khato le jangthüiba, ija chemle changüi?” 2Jowanpae chix ma atüi: “Nang chak ma chemtüi?”
Mosa-e lan: “Kiathox tuita.”
3 Jowanpae thüi: “Ija hax to awüt-hu.” Chemtue Mosa-e ija kiathox hax to adüt, ija pu ang achangle pao, ilaxle ija thoto chix a zikle pao. 4Jowanpae Mosa ang thüi: “Akulax ilaxle ija to omüikua ma koplax.” Ikhoma Mosa-e akulaxle ija to omüikua ma kop, ifüima tomle ija chatle kiathox angwüi achang. 5Jowanpae thüi: “Israel khünaknu hama hwompu-hwompa, Abraham, Isak hia Jakop hwom Zang nang hato ngaile ahodaoa lükya münwan ang ile mokle ahokox.”
6 Jowanpae Mosa füi chatle chuwüi akax: “Nang nyipongkhüt to nang chak sholax.” Mosa-e ija kax ma lax, ilaxle chix chak dokle alaikya zuma zazathuakle, jun lailaile mak ang achangle bang. 7Ifüima Jowanpae thüi: “Nang chak chatle nang nyipongkhüt to tamsholax.” Chixe ile hwon, ilaxle chix chak dokle alikya zuma, tsangtsa mamakha lailaile wüi haxmüi-zangmale bang. 8Jowanpae thüi: “Hwome nang to chiong tamchu pongwang angkya ohünotün mwote hwom mongto changkoxngünle thütkya jao chitüile changkoxchu ijae hwom mongto changkoxngünle thüt ang tomüi. 9Ibibile ohünotün mwot oli anyi aho koxle ngaxchu hwome nang to mong chiongle jangchang, ilaxle nang zangwün to na chitha thüiningle, Nail shuanu angkya ti hidaole laxlax üntoxle ija hax to thokkox. Ija ma ija ti a aji ang achangle paoüi.”
10Ikoxlechu Mosa-e thüi: “Münchangüi, Jowanpa, ku a sütaxakat; ku a tsaothathale tsaidong-kaxdongle tüikya mixchu münchang. Nange ku füi zangwünle chang füima ngaxchu ku iningkya mix ang chiachang. Ku a zangwün chithokya tamchu kax ma thangkya mix changle.”
11 Jowanpae chix ang thüi: “Khünak ang chix tun owae kox? Chix a kaxux hia naba mix ang owae achang? Chix ang ngün angkya mik a owae kox ilaxle mik asut ang owae tom? Ija a Jowanpa ku changpu. 12Athax paolax! Zangwün angkya kue nang to asunüi ilaxle chem akaxüi hex ija kue apuale faüi.”
13Ikoxlechu Mosa-e lan: “Münchangüi, Jowanpa, mama khünak owawa wüi shong-akatfa.”
14Ijama Jowanpa ang Mosa füi mongma ilaxle thüi: “Hüntüi Arun, Liwi sün a büle? Chixe zangwün mankya kue awan ngopu; müile zangwün ang chixe tsuaküi. Otsingtsingma athax chix nang füi apong ang hüile ngole ilaxle chix ang nang ngünkya zuma huanuma mongmüiüi. 15Nange chix füi zangwünle chem akax angkya hex ija apuale fa ang tsuaküi. Zangwün angkya bama kue hünkhi pangnyi towüi asunüi. Chemle moküihex ija pangwüi hünkhi pangnyi hama apuale faüi. 16Chix a nang zangwün mix taile kox angkya mix ang achangüi ilaxle nang lüi ma khünaknu füi zang chixe wünüi. Ifüima nang a tuita Zang lailaile changüi, ilaxle chemwün angkya hex ija nange chix hama apuale faüi. 17Ija kiathox nang füi tomle koplax; chemthüikoxle ija füi nange ohünotün mwotbu mok angkya changle.”
Mosa Ijip Nok to Chat
18Ifüima Mosa chix hohochong Jethro hato chat, ilaxle chix ang thüi: “Chingchalaxle ku a Ijip nok to mamixbu hato chat ang tomhüi. Hwom müimüi-zangngaile chitüitüilaxpuix.” Jethro-e chix a müimüile wüi kalax, le danle akat.
19Mosa Midi nok chaxwan to tüitanto wüi Jowanpae chix ang thüi: “Nang Ijip nok to chatkox, chemthüikoxle nang langsele tungkyabu pangwüi zidaoa.” 20Ikhoma Mosa a, chix kakonu hia sasün hwom mantsak kho ma angat laxle Ijip nok to ka ang lai. Zang-e koplax-ole thüikya kiathox chixe kople tüikya.
21Anaole chuwüi Jowanpae Mosa füi akax: “Athax nang Ijip nok to chatle ngopu; kue nang ang ohünotün mwot mokle ahokya pangwüi wanghom tunthoma mokle ahokya changle, ija taxalak. Ikoxlechu kue wanghompa ang mongtsakle chang ang tomüi, ilaxle chixe khünaknu pao ang mündanüi. 22Ipongma nange ile akax angkya wüi changle, ‘Jowanpa, kue thüipu, Israel a ku somwang nao changle. 23#Lai 12.29.Chixe ku ang tö koxle ku shwom angkya hanpakma, ku sa pao ang laxkoxle kue nang ang thüipu, ikoxle nange chiapa. Athax a kue hünzom tüichongsasa langüi.’”
24Ijip nok to kaüi lom to, hwom athongle pom zaikya khato, Jowanpa Mosa füi apong ilaxle chix lang ang tung. 25-26Ipongma Ziporah, chix kakonue anaxkya long tuita tswon ilaxle sasün angkya okhwon züt ilaxle ija füi Mosa cha ma lyetle kox. Ija Khwonzüt-Zom khoma she-e Mosa ang thüi: “Aji ma nang a ku kakopa changle.” Ikhoma Jowanpae Mosa chilangle dantox.
27Ipongma Jowanpae Arun ang thüi: “Mosa füi apong ang sak-hax to paokox.” Ikhoma chix Mosa füi apong ang otsao haxhua to ngui. 28Ifüima Mosa-e, Jowanpae chix ang Ijip nok to chat angkya akax pongma chempangle akax daopuix ibu Arun hama komkaile wünle kox; Jowanpae chix ang ohünotün mwot mok ang tomkya chuwüi chix hama wün. 29Ilaxle Mosa hia Arun nyi Ijip nok to chat üntoxle Israel nok lompabu komle sele asox. 30Mosa füi Jowanpae chempangle wündaopuix ibu pangwüi Arun-e hwom hama apuale kox. Mosa-e noknu tunthoma ibu ohünotün mwotbu mokle aho. 31Hwome mongong, ilaxle chemtue hwom hato Jowanpa nguilaxle hwome sikngün apongle ngokyabu to komkaile hule toxkya kax atatle changpuix, ipongma hwome akhuxlaxle chix shwom.
دیاریکراوەکانی ئێستا:
LAIPAO 4: WANCBSI
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Wancho Naga Bible - OTSAO BAIBEL
Copyright © 2012 by The Bible Society of India
Used by permission. All rights reserved worldwide.