LAIPAO 3
3
Zang-e Mosa Nyak
1Mosa a hohochong Jethro müi nyele ngokya. Jethro a Midi nok ma zompu-zangpa tuita changkya. Müizyembu koplaxle chix faonu mong akaile Zang haxnu Horeb to ngui. 2#Mwt 7.30-34.Ikhato Jowanpa kaxtaimix tuita fumkho to chuakya wünle ma chix hato ngai. Chixe hule ngokoxle fumkho ma wünchua dung-dungle ngo ikoxle ijae fum chishun. 3Ifüima Mosa-e thüi: “Kue azyemle za üntoxle ija ohünotün to hu angkya changle, ilaxle ija fumkho büthüikoxle chishun puix, ija awanle lax angkya changle.”
4Chemtue chix ija to hu ang azyemle zapuix, Jowanpae ngünle lax ilaxle ija fumkho ma chuale ngokya wünle makhange Zang-e chix nyak: “Mosa! Mosa!” Chixe lan: “Ku ikhama tüile!”
5Ifüima Zang-e thüi: “Ikhato soxle taxhüi! Nang cha angkya chisox sukdao, chemthüikoxle nang ajongle ngokya chaxwankho a otsao changle.” 6Zang-e akax: “Ku a hünpa hwom Zang, Abraham, Isak hia Jakop hwom Zang changle.” Ijama Mosa-e Zang thünza to hu ang za ilaxle chix thün khom.
7Ifüima Jowanpae akax: “Kue ku khünakbu Ijip chaxwan to sikngün ashukle ngokya nuzao ngünle laxdaoa, hwom mwot to hu-ang ngokya da humix khoma hwom sople ngokya kue atatdaoa. Hwom sikngün kue awan tomta daoa. 8Ku a Ijip nokbu chak tokya hwom khosün angle nguikya changpu; ilaxle kue hwom ikhatokya, müikya tamchu haxka khaole tüikya; tsomti hia nax-ti shuajen jenle tüikya: Kanan nok, Hit nok, Amon nok, Periz nok, Hip nok, Jebu nok, ibu ngokya Kanan chaxwan to apüi angkya changle. 9Israel khünaknu sopkya ozing ku na to nguidaoa. Ijip noke hwom to chemle sikngün ang tompuix, ibu bakle kue ngünle laxdaoa. 10Idaile oman, Ijip chaxwan tokya ku khünaknu Israel nok, Farao chak tokya alaile apüi angkya kue nang tsanle akatüi.” 11Ikoxle Mosa-e Zang kax to lan: “Farao hato kalaxle chix chak tokya Israel khünaknu alaile wün angkya ku a owa changlaxpu?”
12Ikoxlechu chixe thüi: “Ku a nang füi tomle tüiüi; ilaxle nang tomle akatkya a ku changpu lükya münwan a ija changüi: Chemtue nange Israel khünaknu Ijip nok chaxwan tokya alaile apüiüihex, nange ija haxhua ma Zang to shwomüi.”
13 #
Lai 6.2,3. Ikoxle Mosa-e Zang ang thüi: “Israel khünaknu hato nguilaxle kue hwom ang ‘Hünpu-hünpa hwom Zang-e ku hünzom hato tomle akatpu’ le thüiüi, ikoxle hwome ku ma ‘Chix ang chemle amünpu?’ le jangatüiba kue hwom kax to chemle lanüi?”
14 #
Mik 1.4,8. Zang-e Mosa ang thüi: “‘KU A KU CHANGPU’, idaile nange Israel khünaknu hama: Ku a hünzom hato kue tsanle akatpu, le thüikox.” 15Zang-e chatle chu Mosa ang thüi: “Nange Israel khünaknu ang ile thüikox, ‘Hünpu-hünpa Abraham, Isak hia Jakop hwom Jowanpae tsanle akatpu’, ija a jento ku mün, ilaxle tsüntsün to ija a ku homjen changpu. 16Paokox ilaxle Israel nok lompabu sele asox kox, ilaxle hwom hama thüikox, ‘Jowanpa hünpu-hünpa Abraham, Isak hia Jakop hwom Zang ku hato ngaile ilaxle thüile: Ijip nok ma kue hünzom to hudaoa ilaxle hünzom to chemle changpuix pangwüi ngünle laxdaoa. 17Kue thüipu, kue hünzom Ijip nok chak to sikngün apongle ngokya chak tokya alaile paoüi, ilaxle tsomti hia nax-ti shuajen jenle ngokya Kanan haxtok; Kanan nok, Hit nok, Amon nok, Periz nok, Hip nok tamchu Jebu nok ngokya chaxwan to apüiüi.’
18“Hwome nang kax to apaüi; nang üntoxle Israel nok lompabu Ijip wanghom Farao hato nguilaxle chix ang thüikox ‘Jowanpa Israel nok Zang kwom füi apongdaoa; kwom nyix azom lom to faokha to kalaxle Jowanpa ang tö koxle chang ang, ku ka ang shong-danfa.’ 19Kue awan ngopu, Khüthak Zang chake mamok tanto Ijip nok wanghompa-e hünzom pao ang mündan. 20Idaile kue ku chak thüiüi ilaxle Ijip nok to chak moküi üntoxle kue ohünotün pangnu moküi; ifüima chixe hünzom apong ang danüi.
21 #
Lai 12.35,36. “Hünzom laile paokya zuma hünzom chak-hua ma chipao angkya kuxma kue Ijip nok ang hünzom to chingchale tüi ang tomüi. 22Israel shekobu noke wüi Ijip nok ma tomzizi hato tamchu mahom ma ngole tüikya Ijip nok shekobu hato nyi-za, hun hia khop füi zingkya likwünbu ju ang pao angkya changle. Israel khünakbue ibu tuina masu-masasa tsangtsa ma aza-apuale koxüi. Ija ningle Ijip nok tuina laxlaxtox angkya changle.”
دیاریکراوەکانی ئێستا:
LAIPAO 3: WANCBSI
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Wancho Naga Bible - OTSAO BAIBEL
Copyright © 2012 by The Bible Society of India
Used by permission. All rights reserved worldwide.