Genesis 44
44
Josepnu kap silwappa hak
1Ag ee lana malaeg amu, Josep nug laug gumak danab amegppa aum. “Na danab amu, na bek ahilkadppa ee elelenab inan, silwa men doɗo ahilag bek anen anenppa oh eɗun inan matte! 2Laa ele amu, na dahil kap silwappa heppig amu, na amu aon, na ag amalag, na nuhig bek oɗeppa, nuhig men doɗo ele ine!” awa aum. Josep nug anam a amu, nug laug gumak danab nug aumbia heum.
3Aria, wagɗe buttuanab laa he, Josep awakkud amag ele ag, amu ahilkad donki ele ahan goppig. 4Ag gona, aab okkai dimittim uma ii ukkaegeg, Josep nug nuhig lag gumak danab amegppa aum. “Na ahan, danab amu dim lamadna gona, haen na gukkuadna wana amu, ag amelagppa inam a! ‘Aɗinu ag nob enanu nob nau heppig? 5Aɗinu ag dahil okkainu kap silwappa heppig yab aoppig? Dahil okkai nug kap amuppa le lanana, eman uɗat nuhig amuppa ele hette amu, ag iite dootteb? Ag nau heppig,’ aon a!” awa aum.
6Josep nug amegppa anam a amu, lag gumak danab nug aha, dim lamatta ukka, gukkuatta wana, Josep nai aum amu, amelagppa aum. 7Nug anam a, ag appig. “O naɗi, aɗinu na anam attem? Ig, nahipad maɗi nid, ig anam hekkunignu elele iittanab iitta. 8Antte! Ig tatam Kanan wanppanu uɗimut, eɗut gota amu, silwa men doɗo ihinig bek oɗeppa dayom anidmut amu, ig gemu amu ele eɗut aot uɗimut. Amunu ig aɗinu nahip okkai laugppanu silwa, o gol keeke yab aognig? 9Ig oonigppanu danab laa nug kap awom anidppe amu, nug mauhkku. Nug mauhkku, amu ig laa oh nahipad begbeg maɗi nid daagnig,” aon appig. 10Anam aeg amu, lag gumak danab nug aum. “Ag appig am ena, amge ag inam hekkulagnu iikku attem. Danab aun nug kap awom ele amu, nugib dahil begbeg maɗi nid daakku. Ag laa oh beɗulagppa aab iitta daaglag,” awa aum.
11Nug anam a amu, ag oh laippun bek ahilag donki attannu autadna, honap wanppa maadna, oɗe uhuqadppig. 12Uhuqeg amu, gumak danab awalag tatamnu, nug nuhig bekppa digma neekka ukka ukka, huh bieg batakppa neekkom. Anam neekke ukke, Benyaminnu bek oɗeppa kap dayeye anttom. 13Nug antte, ag anam anidna, guittak doonna, ahilag kobolppa lamen ahilkad patiɗadppig. Patiɗadna, ag ahilkad bek eɗun, donki attan maadna, ag eɗun, aab okkaippa noppig.
14Aria haen Juda awakkud amakkud ele ag eɗun, Josep laugppa ukkaeg, Josep ii ahom, appa dayeye, ag nug noobppa gatelag qaun ona, gomelna, iɗulag wanppa meppig. 15Anam heeg amu, Josep ag amelagppa aum. “Ag aɗi hekkulagnu anam heppig? Da am danab emanppa keeke dookkulnu elele amu, ag iite dootteb?” awa aum.
16Josep anam a amu, Juda nug aum. “O naɗi, ig aɗi nai laa akkunig? Ig aɗi apput, na ig keeke imu ii hemut anidkkut? Elele iitta. Kayak Nug he, ig, nahip maɗi nid, ig ihinig hipunin miag atiom. Aakku amunu, nid umu kap nuhig bekppa dayeye lag gumak danab anttom ele amu, nug ig laa oh ele nahip begbeg maɗi nid daagnig,” awa aum. 17Nug anam a amu, Josep oɗeppa awa aum. “Iitta. Da anam iinab hepa. Danab nug kap awom ele amu, nugib dahil begbeg maɗi nid daakku. Laa oh ahilagnu amu, ag oolag maɗoɗ ele eɗun, mamelag toppa ukkeg!” awa aum.
18Josep anam a amu, Juda nug Josep gumitta ukka, baula amegppa aum. “O naɗi dahil, na nahip maɗi nid da, da nai nakok appi dookkutnu ool daatte. Na am Paro bia daattem, amge na da, nahip maɗi nid, na dahilnu oot ii nauhmanu oɗ medattem. 19O naɗi dahil, anukka na ig, nahipad maɗi nid, na ig oɗ inam mekkame. ‘Ag mamelag ana daattete? Amalag laa elete?’ oɗ mekkame. 20Na anam oɗ mekkae amu, ig amut. ‘Ao, amanig laa ele, amu ig mamenig nug kaino ma dayeye, nug wau laa ig amanig anig amu, nug ele oiyya, ig amanig amu menuom. Amge ah amu nug nid amanig laa tatamnu menuom amu, nug mauhom amunu, ig mamenig nug ah amunu nid laa iitta; ig amanig nug nukka aakkuib. Anam amunu, ig amanig amu, nug mameg nuhignu, nug oo huan mauhtte.’ Ig anam aot amut. 21Ig anam aut amu, na ig amenigppa ame. ‘Ag gona, amalag amu, da nug anidkkulnu aon uɗieg!’ ame. 22Na, na ihinig naɗi amu, na anam ae, ig na amenppa amut. ‘Nid amu nug mameg uuidkkunu elele iitta. Nug uuitteb amu, nug mameg mauhkku,’ aot amut. 23Ig anam amut, amge na ame. ‘Ag amalag aon ii uɗina amu, da noolppa aib doppig,’ aon ame. 24Na anam ae, ig eɗut gota, nahip maɗi nid, da mamel amegppa nai amu oh, na, ihinig naɗi, na ame amu, ig mattimut. 25Aria, ig anam aut, dimppa ig mamenig nug aum. ‘Ag baula eɗun gona, ee nakok daden mena, aon uɗippeg, ig lakkunig,’ awa aum. 26Nug anam aum, amge ig amut. ‘Ig amanig ele ii gota amu, ig ele ikka ii gomata. Ig amanig ele oh gokkunig, anamib ig gokkunig. Aɗinu? Ig amanig nug ele ii gota amu, ig danab okkai amu, ig nug noobppa wakkunignu elele iitta,’ aot amut. 27Ig anam aut, ig mamenig, nahip maɗi nid amu, nug aum. ‘Ah dahil amu nug nid danab aɗit aakkuib menuatom, ag amu dootteb. 28Laa nug ukka, eɗua ii uɗie, da ami. “Doɗ dakkuɗ qa laum,” awe ami. Gemu ele da nug ii anidttem 29amunu, ag Benyamin ele dahilppanu aon goppeg, padal meeb amu, da oolppa uug okkai ele doyeye mauhkkul,’ awa aum.” Juda anam aum.
30-31Juda nug nai anam ana amu, nug nai tuɗitta aum. “Anam amunu, da nid imu awe ii goppi, da mamel nug mauhkku. Aɗinu? Nug beɗu oh am nid imunuppa daatte. Anam aakku daatte amunu, ig laa gokkunig, haen amuppa ig nid imu ii aot gopput, ig mamenig nug ii antta, oo doyakppa ig beɗunigppa mauhkku. 32Laa ele amu, da, nahip maɗi nid, da mamel amegppa da nid imu atognokkulnunab ami. Da inam ami. ‘Da nid imu awe, eɗuen ii uɗien amu, da na noomppa hanhan beɗulppa aab ele oikkul,’ ami 33amunu, O naɗi dahil, da, nahip maɗi nid, da nid imu nug abenab awen, nahip begbeg maɗi nid daakkulnu ool daatte. Nug eɗua, awakkud ele oh gokkulagnu ool daatte. 34Aɗinu? Nid imu nug da ele oh eɗuɗ ii gokkunih amu, da elele iittanab iitta dookkul. Nid imu nug eɗua ii ukkeb, ig mamenig amunu uug okkai maweb, da attem heine nug anam heebeb anidkkul? Amu elele iitta,” awa aum.
S'ha seleccionat:
Genesis 44: NB
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2022, Wycliffe Bible Translators, Inc. All rights reserved.