KAHTAMYENGHAN 45
45
Joseph-e Ijeihei Naolante I Shingne Tamnang
1 #
Lam 7.13. Tüophei me Joseph-a, I sheshao me ngohpulan shongme yoi nying nying te tük-e ye-okpe ngai, hüyange i üngwün, “Ü-shong mepu üshei yantepha.” Tüokhei Joseph-e I jei hei naolan te I jeng ngai-e iwante I shong me ülao aohi-o yenangpe ngoh. 2Hüyange I yeonge üngwün-e Egyptlan hei Pharaoh noksalan-e nehoi jai-e shap. 3Joseph-e I jeihei naolante hüke i, “Taowa Joseph. Üpa sha-a te ngoi-e üyin me ngoh nang a?” Hüpoi I jeihei naolan jamloi mokh-e nyampu jingne hang ngao-o yejan.
4Tüophei me Joseph-e I jei hei naolan te i, “Ü-shongte owe wenkei.” Hüyange iman owe wen wante Iye hüke i, “Taowa numan-e Egypt te yah-e teilak jingne yüowe tampu, numan ünao Joseph. 5Hüyange sha-a tao yüo yangpu jingne numan yoi nying nying te mongtah shang yesheküma-a mongtah shih; hangjingne kahtalan üyin yinne anglak jingne Kahwang-e numan shao te tao shon-e tam. 6Hangjingne kahtoknyu me seanyaopu-a sha-a wangpeng ni shepupa hei ngohnang; sha-a üne-o wangpeng nga ngoi she kah yehamkülak üne-o tahyahpu-o yengoh külak. 7Kahwange kahtoknyu me lanshe pa-a mah ne yetampe numan jingne ütam pa-a towe anglak üne-o maapu üyin tük-e anglak jingne shaotan te numan shao me tao shon. 8Tüokhei tao hatüo me shonpu-a numan yeje, hüpoi Kahwang ngohnang; hüyange Iye taowa Pharaoh üpa yafün me I jing noksa lanshepu tangme nokpu ne üne-o Egypt kahtok nopu tangme wanglam lampa ne linge tam.
9“Mamtüoh, hüyange onge üpa te hüke itüoh, ‘Nangha Joseph-e hüke ngao shonne inang; Kahwange taowa Egypt lanshepu tang me nokpu ne mengtamteki; shon-e yengohpe ü-tangte ta kei. 10Nang Goshen kahtok me nyoilak, hüyange nang ü-phin me ngohlak, nang hei nanghalan hüyange nanghayim halan, hüyange nang nyee ükhong, mahu ükhong, hüyange nangjing hanghe yin ngoh khongkümpu; 11nang tüome nyoi ma-a nang wongpong üshei taowe namno-e phalak, hangjingne üne-o wangpeng nga seanyaolak ngoh nang, hüke yeling ma-a nang hei nenok noksalan hei numan me nangpu üshei toiheinanpu yafün te takülak.’
12“Hüyange sha-a numan mük hei ü-nao Benjamin mük-e hatüo ngao numan te ngao puwa ü ju me ngao she nge okteki. 13Egypt kahtok me hangshin tao kheyong hüyange numan mük-e ngepu sheminlamphe jeng üpa te itüoh. Mamtüoh hüyange üpa mamshe yahtai kei.”
14Hüwante lye yoinao Benjamin üngme kenyange shap; hüyange Benjamin-o I üngme kenyange shap. 15Tüophei me I shapjang shappe Ijeilan püm leppute üngme kenyange omhüp. Tüophei me nakshih I jeilan-e Iphei teingao.
16Aope Joseph I jeiheinaolan ta-e ngoh nangki she Pharaoh nok te ngaolan pei, Pharaoh hei I shaoshanpalan üshei mongmei. 17Pharaohwe Joseph te i, “Nang jeihei naolante, imanjing gado me hangki khak wange kiyange Kanan kahtokte yelak jingne itüoh. 18Iman-e iman üpa hüyange iman noksalan yahyange tüome leih ye ne tamtüoh. Hüyange Egypt kahtok üshei me shemeipupa nyoi phalak, hüyange tüome iman kahtok üyao wangman-e tüowe nyoilak.” 19Imante üne-o tüo itüoh, “Hüke lingtüoh: numan hashih nahalan, hei shekolan jingne, Egypt kahtok mepu tongtoi yah yah, hüyange numan üpa woi taikei. 20Numan toinyu nanhalan jingne nüngnei-e tahteih, hangjingne Egypt kahtok lanshepu me shemei pupa-a numan jingne mengteki.”
21Imante ngaowe tampu kih-e Israel hayimlan-e ling. Ahngpa ngaowe tampu kih-e, Joseph-e imante tongtoi pha, hüyange lamme hahlak jingne pha. 22lye iman kahta lep i pu te leijei lak inkhek pha. 23Iye yoipa te tüo lan shon: Egypt kahtok mepu toimei lan Gado pen ma-e, üne-o gado üpi pen me tah, an hei Ipawe lam me hahlak hahhei ying tüm-e tam. 24Tüophei me lye yoi jeihei naolan shonne tei, hüyange hüke iman yayong wante lye imante i, “Lamme numan tahtee.”
25Iman-e Egypt kahtok tüohyange yayonge nokte ye, hüyange Kanan kahtok me ngohpu iman üpa Jacob tangte ngoi. 26Hüyange iman-e Ite i, “Joseph-a sha-ate ngoiye üyin me ngoh nangki! I-a Egypt kahtok üshei tangme nokpu ne ngoh nang ei!” Jacob yashan-e mongpai hüyange iman ngao te üting yelak ok. 27Hüpoi aope Joseph-e Ite shonpu ngaolan khongkümpu I phei ngao yapeih, hüyange I woilak jingne Joseph-e shonpu tongtoi ngeye, iman üpa Jacob yaha yange ye. 28Jacob-e i, “Hülan! Üha Joseph üyin me ngohnang she ipuwe wangteki, tao ta-e tao lishao me I te leilakeih.”
S'ha seleccionat:
KAHTAMYENGHAN 45: KONYBSI
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.