KAHTAMYENGHAN 30
30
1Hüpoi Rachel-e Jacobte naha ja nehoi yepuh tam. Tüokhei yhawe yoi nyate müktak; hüyange yhawe Jacobte i, “Üte naha yahkei, hüke yejema-a tao lilakei!”
2Jacob, Rachel te mongshih ngai; hüyange lye i, “Nang mepu naonyoi tükke anglak Kahwang nanleiye tao ngohnang kü a?”
3Hüwante yhawe i, “Hatüo me ü-phongphenyu Bilhah ngoh nang; yha phei shi tüoh; hümme nakshih yhawe üjingne naha puhtam lak. Tüo kih-e yha kaiye tao-o hayimlan tüopu oklak.” 4Hüyange yhawe yoi phongphe nyu Bilhah shekone menglak jingne Ite pha; hüyange Jacob-e yha phei shi. 5Hüyange Bilhah püm yekengpe ngai, hüyange Jacobte netan ja puhtam. 6Tüophei me Rachel-e i, “Kahwange ü-ngao phün, hüyange lye üne-o taowe yoppu jaiye, üte netan ja pha.” Tüokhei yhawe I min Dan she nyik. 7Rachel phongphe nyu Bilhah nishe püm yekengpe ngai, Jacobte ni she netan ja puh tam. 8Hüwante Rachel-e i, “Ünya phei yeonge yonge toktei yangki, hüyange taowe ok;” tüokhei yhawe I min Naphtali she nyik.
9Aope Leah-e shaaji yha nao puhpu lakteki she shinge pei, yhawe yoi phongphe nyu Zilpah yahpuwe Jacobte sheko ne pha. 10Hüwante Leah phongphenyu Zilphawe Jacobte netan ja puhtam. 11Hüyange Leah-e i, “Ü-shao meiteki!” Hüyange yhawe Ite Gad she min. 12Leah phongphenyu Zilpahwe ni shepupa netan naha puhtam. 13Hüyange Leahwe i, “Tao hangshin mongmeipu nyu! Hangjingne shekolanne üte mongmei nyu she nyiklak,” hüyange yhawe I min Asher she nyik.
14Wheat tah yahpu ju me Reuben kahte ta, hüyange moipe#Moipe-nyakkenpu hüyange moiman phawe tamnang ja she ütinglakpu pephao. tüowe, Inyu Leah tangte tüolan yah-e ong. Hüwante Rachel-e Leah te i, “Chingmei linge nangha jing moipe ütam üte yahkei.”
15Hüpoi Leah-e yha te i, “Nange ü-netanpa yah taipuwe yewangpu a? Nange ü-ha jing moipe-o yahhu pu a?”
Rachel-e i, “Meiteki nangha jing moipe nanlei, nang teya Jacob phei shipu oklak.”
16Aope ün ngoi, Jacob kah mepu ong, hüwante Leah I pongte yuwe tanne ngoh yange i, “Teya nang ü-tangte peiye shikei, hangjingne ütingme taowe nangha jing moipe nang jingne ümee phayangki,” hüyange tüoya I yha phei shi.
17Kahwange Leah te jai, hüyange püm yekengpe ngai, hüyange Jacob te nga shepupa netan naha puhtam. 18Hüyange Leah i, “Kahwange üte ü-nanmee phateki, hangjingne ü-netanpate taowe ü-phongphenyu pha”; hüyange yhawe I min Issakhar she min. 19Leah üne-o püm yekengpe ngaiye, Jacobte netan wok shepupa puhtam. 20Hüwante Leahwe i, “Kahwange üte hünghao ümei phateki, sha-a ü-netanpa-e üte wangshüm phei anglak, hangjingne taowe Ite hayim wok shepupa puhtam”; hüyange yhawe I min Zebulun she nyik. 21Phei me yhawe sheko ja puhtam, yha min Dinah she nyik.
22Tüophei me Kahwange Rachel teih tüo; hüyange Kahwange yhawe yoppu jai, hüyange yha naonyoi eptam. 23Yha püm yekengpe ngaiye netan ja puh; hüyange yhawe i, “Kahwange üte netan naha ja phapu kaiye phoiwümpu yahtei teki. 24Hüyange yhawe I min Joseph she nyik; hüyange i, Youngwanpawe üne-o netan ja üte moiman pha.”
Laban Phei Jacob-e Ngaopu
25Aope Rachel-e Joseph puh, Jacob-e Labante i, “Tao ü-nyoi hüyange yoi kahtokte tailak jingne tao shonpha. 26Üte ü-sheko hüyange ühalan aoyin jingne taowe nang shaoshan iman yahkei, hüyange tao taine tampha; hangjingne taowe nang hangke shaoshan, nange shingnang.”
27Hüpoi Laban-e Ite i, “Nange mongma-a jaikhu, phonglai hitleipu kaiye taowe hatüo shingteki, hüke Youngwanpawe nang kaiye üte moimanteki; 28nang nanmeelan itüoh, hüyange tüopa taowe nangte yahpha ning.”
29Jacob-e janne i, “Taowe nang hangke shaoshan, hüyange nangjing noksa yinmoklan hangke ü-phei ngoh, hatüo nang nying nyingke shing nang. 30Hangjingne tao manpeipe nang me ngohpu lanna üjingha hei ngohyangki; hüyange hatüo üngang jalunteki; hüyange tao ümpeyekao te lüp, Youngwanpawe nang moiman tam; hüpoi sha-a taowe tenok noksa jingne-a aope linglak?”
31Hüyange Labanne tong, “Taowe nangte hanghe phalak?”
Jacob-e janne i, “Nange üte hango tahpha kei; taowe phapu juteih te nange mongma-a, taowe nishe nang jing nyee ükhong yomme tampha ning.” 32Tao tenyih nang jing nyee ükhong üshei linne taishih ning, hüyange tushangpu hei nyanheye nangpu üshei hüyange nyee yo me ünyak khongküm, hüyange youn yo me tushangpu hei nyanhepu üshei tamme ngai phaning; “hüyange tüolan-a üjing nanmee ne menglak. 33Tao ngaotingpa phei ngoh yang pune mengma-a, phei me nange yamme leiwante oloh-e shinge oklak. Aope nange ü-nanmee jingne tokke leine peilakeih, youn ütam nyanhepu, yejema-a tushang pu yejema-a, nyee ütam ünyak üjepu ngohma-a, tüolan-a kuhyahpu yang she nange shinglak.”
34Labanne jan, “Meiteki! Nange hangke ngao hüke tümniye linglak.” 35Hüpoi tüonyih Labanne nyanhepu yejema-a tushangpu youn ponglan, hüyange youn pi hangshin me nyanhepu hei tushang pu ngoh, yejema-a iman me üheng ngoh tüolan-a khatte ang. Üne-o lye nyee ünyaklan khongkümpu yah ngai, hüyange tüolante paowe tüklak jingne Iye yoi ha angetam; 36I Jacob mepu tüolan nyee ükhong woiyange nyih lüm lamte yanne tai. Towe ngohpu Laban nyee ükhong te Jacob-e paowe tükke yomme ngoh. 37Tüophei me Jacob-e poplar pee, almond hüyange plane pee ühüng üqui mepu shengshaoh yahyange tüopa üsho khokke üheng ngaiye nyanne heye ngaiye ling. 38Hüyange lye pesho khokpu shengshaoh nyeelan yengying jing, yengnung te nyeelan yeng yingne peipu sheshaote shüp. lye tüolan tüome tüoh hangjingne nyee ükhong yengying ne peiwante iman won hüyange üha pah. 39Tüokhei aope pequilan sheshao me üha pah, hüyange iman kamshongpu, üngkampu, hüyange tushangpu omme ngai.
40Jacob-e nyee ükhonga younlan phei yoi yoi ne ang, hüyange lye nyee ükhong sheta Laban yinmok ükhong me ngohpu tushangpu, hei ümon ngohpu yekaote lüppe ang. Hükih-e linge lye yoi nyee ükhonga jalunne tam, hüyange Laban jing phei yoi yoi ne yanne ang.
41Aope nütpu yinmok üpilan-e üli yahlak hipak ngoiyahpeih, Jacob-e shengshaoh iman sheshao me yengte shüp, tüokaiye iman-e shengshaoh shongme üli yahne tam. 42Hüpoi lye shejenthpu yinmoklan sheshao me shengshaoh lanna ye-ang tam. Shonne yengohpe Laban yinmoklanna jienpu ngai, hüyange Jacob jinga nütpu ngai. 43Hüke, linge Jacob yeongpu moth ngohpa ne meng. I me mantoop#Mantoop-Nyee, Youn, Mahu tüolan ükhong lüm jamyange ükhong ja ne ngohpu te mantoop she nyiknang. rhalan, udh hei gado üngang ngoh yangki.
S'ha seleccionat:
KAHTAMYENGHAN 30: KONYBSI
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.