KAHTAMYENGHAN 19
19
Ünu Me Ngohpu Sodom
1Ünpong me wangdang shongmokpa ni Sodom te pei, Lot-a chingnyu peten me shotte ngoh. lye imni ngepu phei jamshe I yong hüyange imni phei hüone wen, hüyange imni sheshao me lye khuh-e ta-e khüm; 2hüyange i, “Üyonglan, numan te paowe tüklak jingne tao tüome ngohnang. Chingmei lamlinge tenok me ngoikei. Numan-e yatuh yakpho yange teya-a pümkei. Napning numan shonge laowe numan tailak lamte taipu okkülak.”
Hüpoi imniye jan-e i, “Min, tomni teya-a chingyangko me pümlak.”
3Hüpoi Iye yelakpe kang, tüokhei, imni Inok te ong; hüyange Iye hahying tüm-e do-yenyütpu an ling hüyange iman-e hah.
4Hüpoi yinpalan shinleng te manongpe ngohwante, Sodom kahtalanne nokte neikon. Chingnyu mepu kahtalan lwngmei hei nahalan khongkümpu jemyangki. 5Iman-e Lot te nyik-e tong, “Teya nenok te peipu kahtalan-a üpu? Toman tangte iman yüokei, toman-e iman phei toimeng linglakeih.”
6Lot nokshao te iman tangte yu, hüyange I tokphei me taküp küp. 7lye imante i, “Jeihei naolan, hükihpu nushakpu toi tah ling kei. 8Leihuyah, netan phei manpangpu tenok naoyha ni ngohnang. Imni numan tangte yah yüophaning, numan-e hangke linghuyapeih lingyah, hüpoi tüolan kahta te hango tahling; hangjingne iman-a ü-yüoshüm phang me lolak jingne peinang.”
9Hüpoi iman-e jan i, “Toman lam tahpang, nanga yinpa kahta, tomante tienma-a toman-e imante jonlak phei shemeng she nangte jonlak.” Tüophei me iman-e Lot te shunge yenetam hüyange taküp menge onglak jingne shunge pei. 10Hüpoi noksa me ngohpu kahta ni nokshao te yu. Lot shuwe noksa te inne tam, hüyange taküp küp. 11Tüophei me iman-e kahtalan khongkümpu te mük müone tam-e shet, tüo kaiye iman-e tafün shong yetüope pong.
Lotte Sodom Tüoh
12Hüwante kahta niye Lotte i, “Nang phei tüo me nang pheipulan ütam, nanghalan, yhalalan, mata-tong ninglan, yejema-a chingnyu me nang pheipu ütam ngohma-a, tüomepu iman yanne tamtüoh; 13hangjingne toman-e tüopa nyoi mahtamlak; tüomepu kahtalan-e püohpinne wenkapu Youngwanpawe jaiteki, tüokhei tüopa mahtamlak jingne toman shon yangki.”
14Hüwante Iha ni yahne ngohpu nyemthepa ni tangte Lot wen, hüyange i, “Mamtüoh hüyange tüomepu yayong tüoh; Youngwanpawe tüopa chingnyu mahtamlak yang.” Hüpoi Iye wonnang she iman-e teih.
15Aope wangngai, hüwante wangdang shongmokpalan-e Lot te i, “Mamtüoh!” “Nenok sheko hei nangha ni yahyah hüyange yayong tüoh; hüke yetaima-a tüopa chingnyu phei jamshe numan-o mahlak.”
16Aope Lot nüngneiye ngohyapeih; Youngwanpawe shüpshe-e teihpu jingne, kahta ni-e I shekonyu hüyange Iha naoyha ni yak me shu-e tei-e pephang te lai tüoh. 17Iman yah-e yüoyang phei me, imni yo me sheja-e i, “Numan üyin jingne phettüoh; tokphei te eih tahlei, kahjee ümeken me-o tahlak, kahtang yete phettüoh, hüke yetaima-a numan om mahlak.”
18Hüpoi Lotte imante i, “Üyongpalan, hüke yeje, 19nange üte monghahpu üyong hüoyangki, hüyange shüpshe hüowe ü-üyin yin-e tam; hüpoi taowa kahtanglan yete phet-e yetai oklak yang; hangjingne mahshümpu-e ükem yüowe, tao likülakyang. 20Leitehu, tüome phet ngoi okjangpu bangching (jila) ja, hüyange tüowa chingha ja, Taowa tüopate phet shihning, hatüowa yeonge shoi-e üno? Hümme nakshih ü-üyin-a yinlak.”
21Iye Ite i, “Leitüoh, taowe tüopa jengme-o nanga yahteki, hüke hanghepa bangching jeng nange i hatüowa taowe mah ne yetamlak. 22Mamtüoh! Hangjingne nang tüokente manpei manpei taowe hango yeling oklak.” Tüokhei tüopa chinghate Zoar#Üjoi she nyik.
Sodom Hei Gomorrah Mahpu
23Lot, Zoar ngoiwante wanghe ongteiye ngoh yangki. 24#Lk 17.29.Hüwante mokhshe Youngwanpawe Sodom hei Gomorrah te wang mepu vün oun hei vün wai keine tam, 25hüyange kahjee nopu, tüo me ngohpu üyinlan khongkümpu hüyange nyiempu phümha-wengyong üshei vün-e hahshu. 26#Lk 17.32.Hüpoi Lot shekonyuwe tokphei te, lüppe lei, hüyange yha hüm shongnyu ne menge mah.
27Ünenap shomme ümeken nyoi me Youngwanpa phei I yong yangki, tüopa nyoi ngoilak jingne Abraham mam-e tai. 28#Ütah 9.2.Hüyange lye Sodom hei Gomorrah te hüyange kahjee nopute üshei yete leiye tai, hüyange leihu, tüopa kahtok mepu vünkhuh-a vünjhomnyu vünkhuh kih-e nyeih ong.
29Hüpoi aope Kahwange kahjee nyoi mepu chingnyulan mahne tam, Kahwange Abraham teih-e tüowe Iye Lot ngohpu chingnyulan mahtam wante, mahlakpa yo mepu Lot teine tam.
Wüolakpa Moab Hei Amonlan Ükongwangpu
30Sha-a Lot Zoar mepu onge kahtang me ngoh, hüyange I ha sheko ni I phei tai; hangjingne lye Zoar me ngohlak jingne nyam; hüyange I phei I ha ni jamme longsa phang me ngoh. 31Nyih ja nyayongnyuwe I naote i, “Teman üpa-a shaaji wuteki, hüyange kahtoknyu wanglam kih-e teman phei shilak netan hatüo wankon me ao-o yenang. 32Kei tümni-e teman üpate wuwüngti-e jok ne tamhah, hüyange tümni I phei shiyange I mepu noksa üli anghah.” 33Hüyange tüoya imni-e iman üpate wuwüngti yingne tam, hüyange nyayongnyu onge yoipa phei shi. Hüpoi I jamloi jokpu jingne yha aope shi hüyange aope lao Iye yeshing.
34Üne nyih nyayongnyuwe naolinyu te i, “Leitüoh, minya tao üpa phei shi; teman-e üpa mepu üli anglak jingne teya-o Ite jokne tamhah, hüyange nang onge I phei shitüoh; hümme tümni moini-e tümni üpa kaiye hayim tüolak.” 35Tüokhei tüoya-o imniye iman üpa te jokne tam, hüyange naolinyu onge I phei shi; üne-o I jokteiye ngohpu jingne yha aope shi hüyange aope lao lye yeshing. 36Tüokhei, Lot hayim moini imni üpa kaiye püm yekengpe ngai. 37Hüyange nya-yongnyuwe netan naha ja puh, hüyange I min Moab#Moab te leppu-üpa mepu she nyik. I-a tenyih ngoiye Moablan pajeiyong ngohnang. 38Naolinyuwe-o netan nahaja puh, hüyange I min Benammi#Benammi te leppu-üpheipupa Ha she nyik. I-a tenyih ngoiye ngohpu Ammonlan hayim pajeiyong ngohnang.
S'ha seleccionat:
KAHTAMYENGHAN 19: KONYBSI
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.