Gén 4
4
Caín lhäy'e Abel
1Adán imäyej lech'efwa Eva wet hich'otshan. Tä iwo lhäsa, yen lheya Caín. Wet Eva yok:
–Lhawuk hiw'en n'oho olhäs tä hin'o.
2Tä paj wet äp nichätchä elh, wet iwo lheya Abel, Caín lech'inij. Abel häpe p'ante tson'ataswo wet Caín häpe n'utchenaj. 3Tä tajyäme p'ante wujpe ifwalas, Caín ihäne Lhawuk häp lechumet lhay tä yen t'awayhata. 4Wet Abel ihäne Lhawuk tson'ataj leles tä lechunkatshay tä wuj tä isis, wet yen t'awayhata. Wet Lhawuk wuj tä akäjejlhi Abel lhäy'e m'ak tä yen t'awayhata, 5mat tek akäjejlhi Caín lhäy'e m'ak tä ichäj.#Heb 11.4 Tä mälhyejtso, Caín yen fwitajayaja täjtso, wet ifwuhtejchä lhetek wet wuj tä lewäk ihi. 6Wet Lhawuk tahuyej wet yok:
–¿Chipte tä lefwuhtejchä etek awäk? 7Chik lewohiye m'ak tä is alhoho, olham oaiwujyen t'at. Mat chik kawoyaye m'ak tä is alhoho, neklhat ame hach'isukyaj yämthilek ayäyit. Mat chik kawahina amej, lekalhi t'at.
8Fwala elh p'ante Caín tahuyej lech'inij Abel wet yok:
–N'aho tayhiye.
Tä yäm kanhi, Caín inuye lech'inij wet ilän.#1~Juan 3.11-12
9Wet Lhawuk tay'ätshane Caín wet yok:
–¿Chi tä ihi hach'inij Abel?
Caín nichulho wet yok:
–Thayej, ohanhiyejt'a ihi. Olham ochumethit'a yämthilek ot'uye.
10Lhawuk yok:
–¿Chipte tä lewoye m'ak tä ni'isa? Hach'inij lew'oyis tä letsäyhchä, lepak tälh honhate tä t'än och'oye. 11Tä mälhyejtso, awit'äyhyaj i'amej. ¡Mäch'oye honhat tä lhehi tä leyäynej hach'inij w'oyis tä lelän! 12Tejlak lefwetaj letutchey, mat nemla iwo lhaya akäs yachuyaj. Lelunlatpe honhat, mat tek elakw'et ihichela.
13Tä Caín iläte Lhawuk lhämet, wet yok:
–Matche tä äytajche atasnhayaj tä leti n'oyej. Tek otumhilahlä. 14Fwalana lechenn'o tä oihi honhatna, wet olunhichela honhat tä otofwe ahilä wet lajit ot'elakw'eta. Wet hin'o chik häpe chik hiw'enn'o, ilänlan'o.
15Mat Lhawuk nichulho wet yok:
–Hin'o chik ailän otihiyeja otasnhayaj siete veces.
Tä mälhyejtso, Lhawuk itiyej letetnek Caín, häpkhilek elh chik hiw'en ilänhit'a. 16Wet Caín yikch'oye Lhawuk wet yen w'eta honhat lhip tä lhey Nod tä tumej Edén lhip tä hichä.
Caín leles
17Caín imäyej lech'efwa wet hich'otshan. Tä iwo lhäsa, yen lheya Enoc. Tä paj Caín yenlhi hupuy wet yen lheya Enoc, häpe t'at lhäs lhey. 18Enoc iwo p'ante lhäsa Irad, wet Irad iwo lhäsa Mehujael, wet Mehujael iwo lhäsa Metusael, wet Metusael iwo lhäsa Lamec.
19Lamec lech'efwas täkwfwas p'ante, elh lhey Ada wet elh lhey Zila. 20Wet Ada iwo lhäsa Jabal, wet häp tä wichi tä yen wukweya tsänt'ähes wet iti lhamejen itshätäy, häp p'ante tä tälhe hin'otso. 21Wet Jabal lepuhfwa iche, lhey Jubal, wet häp p'ante tä wichi tä yafwutchehen lefwolis tälhe p'ante, häp lhamel tä tachuma arpa lhäy'e flauta. 22Wet Zila häte iwo lhäsa, lhey Tubal-caín, lham häpe chinajwo wet yenwethä m'ayhay tä bronce lhäy'e chinaj. Wet lech'inhä lhey Naama.
23Tä paj p'ante, Lamec tahuyej lech'efwas täkwfwas wet yok:
–Ada lhäy'e Zila, ch'ahuye olhämet tä ofwel amhohen. Olän hin'o mamse tä ipäjlhin'o wet itshänn'o. 24Chik õ'tiyej siete veces n'otasnhayaj elh chik ilän Caín, olham elh chik ilänn'o is chik õ'tiyej setenta y siete veces n'otasnhayaj.
Adán lhäy'e Eva lhäs elh tä lhey Set
25Adán yachajo tä imäyej lech'efwa. Tä iwo lhäsa, yen lheya Set, tsi yok:
–Dios hiw'en n'oho olhäs tä icheyäjo Abel lew'et,#4.25 Häp n'olhey Set yiwitej n'olhämet p'ante yok, Hiw'enho. häp elh tä Caín ilän.
26Häte Set iwo lhäsa, lhey Enós. Wet tälhe p'ante fwalastso nech'e wichi t'änch'oye Lhawuk wet n'okwiyej.
S'ha seleccionat:
Gén 4: WCHB
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Biblia Wichí, Dios Lhämtes tä Matchehen © Sociedad Bíblica Argentina, 2002.