Luke 24

24
1စစ်ကာတ်ငှါဘင်းမာန်းရာတ်ဟက် ပထမဆုံးမာန်းရာတ်ထှာဘင်း အတိုင်စောင်းရှီမှါခ့်ခါ အီးရှီတာတ်ကား ပြာန်ဆာန်သပဲဘင်း သွန်းဘင်းဆလောတေဒေ လာရီဘန်း ဆာန်းကျိုင်းဂူပါ လာန်ကြီးမှာ။ 2အန်တာတ်ကား ဆာန်းကျိုင်းဂူပေါက်ဝတေပိတ်သပဲဘင်း လုံးကရှီတုံန်းတေ ဟော်ဝါဟော်ဝါကား ဖယ်သပဲဘင်းအတွာတ် လမ်းစာလားပါ ထုတ်ပန်းနင်းဘင်းနာတေ ကတုံန်ငါန်မှာ။ 3အန်တာတ်ကား ဆာန်းကျိုင်းဂူနောင်းဘေဆာန်မှါခ့်ခါ ကိုယ်တော်ယေရှုအလောင်းတေ အကတုံန်ကြီးဘန်း။ 4အန်တာတ်ကား ဟာနိမ်ထှာဘင်းနာတေ စဉ်းစားသလားအလူ ထှာနင်းကြီးမှါခ့်ခါ ချတ်ချန်းတုံန်း လုံးပုံပုံဆာန်ဆုန်တေ တော်ပဲဘန်း ကိုယ်ရောင်ကိုယ်ဝါတေ ယားဘန်းနင်းဘင်း သမီဆာကလိန်းဟူးကား အန်တာတ်ပိုက်ပေ ပေါ်ဒီဘန်း အန်တာတ်ပိုက်ပေ စပ်နင်းနီမှာ။ 5အီးရှီတာတ်ကား အကြီးကျယ်နိတ်ကြီးရာန်ဘန်း ကာစေါက်ပေ သထူထောက်သဘန်း ဝိုင်သကြီးမှာ။ အန်နိမ်စါန်းငှေါဒီ အန်တာတ်ကလိန်းဟူးကား "ရှီဘင်းဆိတ်တာတ်တေပဲဘင်း ဆာန်းကျိုင်းဂူဘေ ဟမာန်အတွာတ် အဆာတ်စားဘင်းဆိတ်တေ ဒီဘန်း သန်နင်းကြီးတေ။ 6ကိုယ်တော်ကား အဘင်းဘေအဘိုဘန်း။ ဟိန်ကား ရှီးလားဟက် စားဘန်းလာန်ဟာန်းပဲဘန်း။ ဂါလိလဲဘေ ဟနိမ်ယောက် အတူတူငှါနင်းမှါခ့်ခါ ဟနိမ်တေ ဟိန်မိန့်သည်ဘင်းနာတေဒေ ဆတီးလူကြီး။ 7သမီဆာဆားတော်တေ အမဲဘင်းအပြစ်ဆားတာတ် တဟူးနောင်းပါ အပ်သလားခံသထှာကူ။ အန်တာတ်ကား သမီဆာဆားတော်တေ တာပ်ပါးကပ်ပင်းတိုင်ဘေ တာန်သဘန်း သာန်းရှီးကြီးကူ။ အန်နိမ်စါန်းငှေါဒီ ဟိန်ကား ဆွန်းရာတ်ထုတ်မားမာန်းရာတ်ပေ ပြန်သဘန်း အဆာတ်စားဟာန်းရီကူညယ် မိန့်သည်လားအချီနော်" ညယ်ငှေါကြီးမှာ။ 8အန်၌မှါခ့်ခါ အန်ဘင်းအီးရှီတာတ်ကား ကိုယ်တော်ယေရှုမိန့်ဒီဘင်းနာတေဒေ ဆတီးလူကြီးရာန်ဘန်း 9ဆာန်းကျိုင်းဂူဟက် လာန်ဟာန်းဘဲဘန်း တပယ့်တော်ရှစ်နူဘန်းဟော်ဝါယောက် တခြားဘင်းသမီဆတာတ်တေ အန်ဘင်းအကြောင်းအရာတေဒေ ငှေါကာမှာ။ 10တပယ့်တော်တာတ်တေ အန်ဘင်းအကြောင်းတေဒေ ငှေါကာဘင်းအီးရှီတာတ်ကား မာဂဒလမြို့ဘင်းအီးရှီ မာရိ၊ ယောဟန်န၊ ယာကုပ်ပင်းအမယ်ထှာဘင်း မာရိယောက် တခြားဘင်းအီးရှီစယ်တာတ်ထှာကြီးမှာ။ 11တပယ့်တော်တာတ်ကား အန်ဘင်းအီးရှီတာတ်ငှေါဘင်းတူးတေကား အဓိပ္ပာယ်အဘိုဝါးညယ် ထာန်သနင်းကြီးဘင်းအတွာတ် အန်တာတ်ကား အယုံသကြီးရား။ 12အန်နိမ်စါန်းငှေါဒီဒါး ပေတရုကား ရဲဘန်းနာ ဆာန်းကျိုင်းဂူပါကာပ်လာန်ဘဲဘန်း နောင်းဘေယူဝါမ်မှါခ့်ခါ ကိုယ်တော်အလောင်းတေ အကတုံန်ဆွန်းဘန်းနာ လာန်တေပတ်သပဲဘင်း ပစယ်ကန်းတေ၌ဆာ ကတုံန်လူဘန်းလား။ အမှာတွာတ် ဟိန်ကား အန်ဘင်းအဖြစ်ပျက်တေဒေ အံ့ဩသဘန်း ကျေမ်းပါလာန်ဟာန်းဘဲမှာ။ 13အန်ဘင်းမာန်းရာတ်ပေ ကိုယ်တော်ယေရှုဘင်း တပယ့်တော်နောင်းဟက်ကလိန်းဟူးကား ဂျေရုဆလင်ဟက် ခုနှစ်မိုင်လမ်းစာဘင်း ဧမောက်ထိန်ပါ လာန်ကြီးမှာ။ 14အန်တာတ်ကား ကိုယ်တော်ယေရှု ထှာရီဘင်နာအကြောင်းတေဒေ တိုင်ပါန်သဘန်း လာန်နင်းကြီးမှာ။ 15အန်နိမ် ဟော်ဝါယောက် ဟော်ဝါ တိုင်ပါန်သဘန်းလာန်နင်းကြီးမှါခ့်ခါ ကိုယ်တော်ယေရှုကား ဒီဘန်း အန်တာတ်ယောက်အတူတူ လမ်းတယ်မှောက်မှာ။ 16ဘုရားရှာန်ကား အန်တာတ်တေ ကိုယ်တော်တေ ဆတီးအလူကွန်း အွန်ပဲဘင်းအတွာတ် အန်တာတ်ကား ကိုယ်တော်တေ ကတုံန်ကြီးဒီဒါး အမှတ်မိသကြီးရား။ 17ကိုယ်တော်ကား "ဟနိမ်ကား လမ်းဟာစါတ် ဟာဘင်းအကြောင်းတေဒေ ငှေါနင်းကြီးတေ" ညယ်စိန်ယူမှါခ့်ခါ အန်တာတ်ကား မန်းတေပြတ်သဘန်း စပ်ပန်းနင်းကြီးမှာ။ 18အန်တာတ်နောင်းဟက် ကလောဖကော်ဘင်းဆိတ်ကား ကိုယ်တော်တေ "အဘင်းမာန်းရာတ်အတွာန်းဘေ ဂျေရုဆလင်ဘေ ဟမာန်တေထှာရီမှာငှေါဘင်းနာတေဒေ အမိန်းရှာတ်ခါ အွန်းလားကား နာန်ဟော်ဝါ၌ဆာ ငှါလား" ညယ်ငှေါဘင်းအတွာတ် 19ကိုယ်တော်ကား "ဟမာန်တေထှာရီတေ" ညယ်စိန်ယူမှါခ့်ခါ အန်ဘင်းဆိတ်ကား "နာဇရတ်မြို့ဆား ကိုယ်တော်ယေရှု ထှာရီဘင်းနာတေထှာမှာ။ ဟိန်ကား အံ့ဩသထာတ်မဲဘင်းနာတုံန်းတေဒေ အွန်နီဘန်း မွန်းထာတ်ငှါဘင်း မာန်းဂလာဆတာန်းတူးတေဒေ ဟောသကာရီဘင်း ပရောဖက် ဟော်ဝါထှာမှာ။ ဟိန်ဟောသကာအွန်ကာဘင်းနာတေရီးဒါး တန်ခိုးအာနုဘော်တုံန်းမှာညယ် သမီဆတာတ်ကား ထာန်သကြီးရီမှာ။ 20အန်နိမ်စါန်းငှေါဒီ အလေဘင်း ဂျူးပုရောဟိတ်တုံန်းတာတ်ယောက် ဟလာမ်းစါတ်တုံန်းတာတ်ကား ဟိန်တေရင်ဘန်း ရောမအာဏာပိုင်တာတ် သဟူးနောင်းဘေ အပ်သကြီးရာန်မှာ။ အန်ဘင်းအာဏာပိုင်တာတ်ကား ဟိန်တေ သာန်းရှီးဘင်းအမိန့်ချသဘင်းအတွာတ် ဟိန်ကား သာပ်ပန်းကပ်ပင်းတိုင်ဘေ ဆိန်ကလာတ်ယောက်သာန်းဘန်း သာန်းရှီးကြီးရီမှာ။ 21အန်ဘင်းအရှာန်ကား အလေဘင်း အစ္စရေးသမီဆာတာတ်တေ ကယ်တာန်သကူဘင်းအရှာန်ထှာရီကူညယ် အလေ မျှော်လင့်သကြီးရီဒီဒါး အရာတ်ကား အန်ဘင်းအဖြစ်အပျက်တေထှာရီဘင်းကား ဆွန်းရာတ်မှါတ်ပန်း။ 22အန်နိမ်စါန်းငှေါဒီ အလေနောင်းဟက် အီးရှီစယ်ယာကား အံ့ဩသထာတ်မဲဘင်းနာတေဒေ ငှေါကြီးရီမှာ။ အန်တာတ်ကား အရာတ်မှါတ် အတိုင်စောင်းရှီ ဆာန်းကျိုင်းဂူပါလာန်မှါခ့်ခါ 23ကိုယ်တော်ဘင်းအလောင်းတေ အကတုံန်ကြီးရီလူညယ် မဲဘင်းဟမန်းစယ်ယာထုတ်ရီဘန်း ကိုယ်တော်ကား အဆာတ်စားလဟာန်းပဲဘန်းညယ် အန်တာတ်တေ ဒီဘန်း ငှေါရီဘင်းအတွာတ် အလေနင်းငှေါကာကြီးမှာ။ 24အမှာတွာတ် အလေနောင်းဟက် သမီဆာစယ်ယာရီးဒါး ဆာန်းကျိုင်းဂူပါလာန်ဘန်း ယူဝါမ်မှါခ့်ခါ အန်ဘင်းအီးရှီတာတ်ငှေါရီဘင်းအတိုင်း ထှာနင်းဘန်း အန်ဘင်းရီး ကိုယ်တော်ယေရှုဘင်းလာန်တေ အကတုံန်ကြီးရီရား" ညယ်ငှေါကြီးမှာ။ 25စီးမှါခ့်ခါ ကိုယ်တော်ကား အန်တာတ်တေ "ဟနိမ်ဟမာန်အတွာတ် အနားလည်သရန်ကြီးတေ။ ပရောဖက်တာတ်မိန့်သည်ဘင်းနာတေဒေ အယုံသရန်ကြီးတေ။ 26မေရှိယကား ဟိန်ဘင်း ဘုန်းတန်ခိုးတော်တေဒေ အလူချီ ဒုက္ခဝေဒနာတေဒေ ခံသထှာကူညယ်ငှေါဘင်းနာတေ အမိန်းရှာတ်ခါကြီးရားရယ်" ညယ်ငှေါမှာ။ 27စီးမှါခ့်ခါ ကိုယ်တော်ကား မောရှေယောက် ပရောဖက်တာတ်ကျမ်းနောင်းဟက် ဟိန်အကြောင်းတေ ကာရီဘင်း အဓိပ္ပာယ်တေဒေ အန်တာတ်တေ ရှာန်းသကာမှာ။ 28အန်တာတ်ကလိန်းဟူး လာန်နင်းဘင်း ထိန်ပိုက်ဘေထုတ်မှါခ့်ခါ ကိုယ်တော်ကား လမ်းစာလားပါ ဆာတ်သဘန်းလာန်ကူဘင်းပုံတေ ကတုံန်ဘင်းအတွာတ် 29အန်တာတ်ကား "စမိတ်ဆန် ဟလာမ်းနာတ်နင်းဘန်း ကြီးကျယ်နောက်ကျသနင်းဘန်းဟွန် အလေယောက်အတူတူနားသောညယ် ကိုယ်တော်တေကော်မှာ။ အမှာတွာတ် ကိုယ်တော်တေ အန်တာတ်ယောက်အတူတူ နားသဒင် ကျေမ်းနောင်းပါဆာန်မှာ။ 30ယုတ်တင် စားပွဲဝိုင်းဘေထုံန်းမှါခ့်ခါ ကိုယ်တော်ကား ပေါင်မုန့်တေငါတ်ပန်း ဘုရားဂုဏ်တေဒေချီးမွမ်းသကြီးမှာ။ ပေါင်မုန့်တေလပိုက်ပန်း အန်တာတ်နင်းအီရာန်မှာ။ 31အန်၌မှါခ့်ခါ အန်တာတ်တေ ဆတီးလူဟာန်းစိန်းဘင်းအတွာတ် အန်တာတ်ကား ကိုယ်တော်တေ မှတ်မိသကြီးရာန်မှာ။ အန်နိမ်စါန်းငှေါဒီ အန်၌မှါခ့်ခါ ကိုယ်တော်ကား အန်တာတ်မန်းဟက် ကယာလာန်ပဲမှာ။ 32အန်ဘင်းဆိတ်တာတ်ရီးဒါး "လမ်းဘေ ကိုယ်တော်ယေရှုကား အလေတေ ကျမ်းကျိန်းတေဒေ ရှာန်းသကာနင်းမှါခ့်ခါ အလေအဆေင်နောင်းဘေ ဟိန်တေမိန်းရှာတ်ခါနိမ် ငှါနင်းမှာအချီနော်" ညယ်အချန်းချန်း ငှေါနင်းကြီးမှာ။ 33စီးမှါခ့်ခါ အန်တာတ်ကား ချတ်ချန်းရဲဘန်း ဂျေရုဆလင်မြို့ပါ လာန်ဟာန်းကြီးမှါခ့်ခါ တပယ့်တော်ရှစ်နူဘန်းဟော်ဝါတာတ်ကား တခြားဘင်းသမီဆတာတ်ယောက် အတူတူ စုရုံးသဘန်းနင်းကြီးဘင်းနာတေ ကတုံန်လူမှာ။ 34အန်ဘင်းစုသနင်းဘင်းဆိတ်တာတ်ကား ဒီဟာန်းဘင်းသမီဆာကလိန်းဟူးတေ "ကိုယ်တော်ယေရှုကား ရှီးလားဟက် အဟုတ်မလပ် စားဟာန်းရီဘန်းနာ ရှိမုန်တေ ဖူးသလူကွန်း အခွာမ့်အီမှာ" ညယ်ငှေါကာကြီးမှာ။ 35အန်၌မှါခ့်ခါ ဧမောက်ထိန်ဟက် သမီဆာကလိန်းဟူးရီးဒါး လမ်းဘေအန်တာတ်ကြုံသည်ဘင်းနာတေယောက် မုန့်တေ လပိုက်အာန်မှါခ့်ခါ ကိုယ်တော်ယေရှုထှာဘင်းနာတေ အန်တာတ်မိန်းရှာတ်ခါရာန်ဘင်းနာတေ ငှေါကာကြီးမှာ။ 36အန်နိမ် တပယ့်တော်တာတ်ကား အန်ဘင်းအဖြစ်အပျက်တေဒေ ငှေါကာနင်းမှါခ့်ခါ ကိုယ်တော်ကား အန်တာတ်ဘလန်းဘေ ကိုယ်ထာန်ကာဘန်း အန်တာတ်တေ "ဘုရားရှာန်ကား ဟနိမ်တေ အေးချမ်းသဘင်းနာတေ အီစိန်း" ညယ်မိန့်တော်မူသမှာ။ 37အန်နိမ်စါန်းငှေါဒီ တပယ့်တော်တာတ်ကား သရဲတေကတုံန်နင်းမှာညယ် မာန်တာတ်နင်းကြီးဘန်း စါတ်လာန်ပဲကြီးမှာ။ 38အန်နိမ်စါန်းငှေါဒီ ကိုယ်တော်ကား "ဟနိမ်ဟမာန်တွာတ် စာတ်နင်းကြီးတေ။ ဟမာန်းငှါး အယုံသကြီးငှါနင်းတေ။ 39ငါတဟူးတေ ၊တာတေဒေယူဝါမ်။ ငါတေထိကြည့်တာန်။ သရဲ‌ဘေ မလာ၊ မာတ်ကူအဘိုဝါး။ ငါဘေကား ဟနိမ်ကတုံန်ဘင်းအတိုင်း မလာတေ၊ မာတ်ကူတေငှါမှာ" ညယ်မိန့်တော်မူသမှာ။ 40အန်နိမ်ငှေါစီးဘန်း ဟိန်သဟူးတေ တာတေဘေငှါဘင်း ဒဏ်ရာတေဒေ ကာမှာ။ 41တပယ့်တော်တာတ်ရီးဒါး အကြီးကျယ်မွန်းဘန်း အယုံကြည်ဒရန်ကွန်း အံ့ဩဒနင်းကြီးရာန်မှာ။ ကိုယ်တော်ကား အန်တာတ်တေ "ယုတ်တင် စားနူစားနာငှါလဲ" ညယ်စိန်ယူမှာ။ 42အန်၌မှါခ့်ခါ အန်တာတ်ကား တာန်းငှါကားတွမ်နာတေ အီရာန်မှါခ့်ခါ 43ကိုယ်တော်ကား အန်တာတ်မန်းဘေ ယုတ်အာန်မှာ။ 44စီးမှါခ့်ခါ ကိုယ်တော်ကား "မောရှေဥပဒေကျမ်း၊ ပရောဖက်တာတ်ဘင်းကျမ်းတေယောက် ဆာလံကျမ်းတေဘေ ငါအကြောင်းတေ ကာပဲဘင်းအတိုင်း အဟုတ်မလာပ်ထှာရီကူညယ် ဟနိမ်တေ‌ငှေါကာရီဘင်းအကြောင်းတေကား အဘင်းအဖြစ်ပျက်တေ ထှာမှာ" ညယ်မိန့်တော်မူသမှာ။ 45အမှာတွာတ် ကျမ်းကျိန်းတေ နားလည်သရန်ကွန်းအတွာတ် ကိုယ်တော်ကား တပယ့်တော်တာတ်တေ ဆွောန်သကာဘန်း လမ်းကာအီမှာ။ 46စီးမှါခ့်ခါ အန်တာတ်တေ "ကျမ်းကျိန်းဘေ ကယ်တာန်ရှာမေရှိယကား ဆာန်းရဲဒုက္ခတေဒေ ခံစားသထှာဘန်း ဆွာန်းရာတ်မှါတ်မှါခ့်ခါ ရှီးလားဟက် ပြန်သဘန်း စားဟာန်းရီကူ။ 47နောင်တလူဘန်း အမဲဘင်းအပြစ်တေအတွာတ် ခွာမ်းလွတ်သလားခံသထှာလူကွန်း ဂျေရုဆလင်မြို့ဟက်စသဘန်း သမီဆာတာတ်တေ ဟောသကာကူ ညယ်ကာပဲမှာ။ 48အမှာတွာတ် ဟနိမ်ရီးဒါး အဘင်းကြောင်းအရာတေအတွာတ် မျက်မြင်သက်သေတေထှာကြီးမှာ။ 49ငါအဝါ ဘုရားရှာန် အီပဲဘင်းအတိုင်း ဟနိမ်ပါ ဉာဏ်အလင်းတော်တေ တာတ်အီကူ။ အမှာတွာတ် ဟနိမ်ကား ရွှေမြို့တော်ဟက် တန်ခိုးတော်တေ အီဘင်းအချိန်ထုတ်ကွန်း ဂျေရုဆလင်မြို့ဘေ ဒဲဘန်းနင်းကြီး" ညယ်မိန့်သမှာ။ 50စီးမှါခ့်ခါ ကိုယ်တော်ကား တပယ့်တာတ်တေဒေကော်ဘန်း ဗေသနိမြို့ပြာန်ဘင်း တစ်နေရာပါကြွတာန်မှာ။ အန်ဘင်းနေရာဘေ ထုတ်မှါခ့်ခါ တပယ့်တော်တာတ်အားလုံးအတွာတ် တဟူးတေမြှောက်သဘန်း ကောင်းချီးတေအီမှာ။ 51စီးမှါခ့်ခါ ကိုယ်တော်ယေရှုကား ရွှေမြို့တော်ပါ ကြွတော်မူသမှာ။ 52တပယ့်တော်တာတ်ကား ကိုယ်တော်ယေရှုတေ သထူထောက်သဘန်း ဝိုင်သစီးမှါခ့်ခါ အကြီးကျယ်မွန်းဘန်းနာ ဂျေရုဆလင်မြို့ပါ လာန်ဟာန်းကြီးမှာ။ 53ဂျေရုဆလင်မြို့ပါထုတ်မှါခ့်ခါ ဗိမာန်တော်ဘေ ဘုရားရှာန်ဘင်းဂုဏ်တော်တေဒေ အမြဲတမ်းအပြတ်သညယ် ချီမွမ်းသနင်းကြီးမှာ။

S'ha seleccionat:

Luke 24: ktpv-rv

Subratllat

Comparteix

Copia

None

Vols que els teus subratllats es desin a tots els teus dispositius? Registra't o inicia sessió