Luke 13
13
1အန်၌မှါခ့်ခါ သမီဆာစယ်ယာကား ကိုယ်တော်ယေရှုပါဒီဘန်း အမှါတ်ကျီမှါခ့်ခါ ပိလတ်ရှာန်းပလာန်ကား ဘုရားရှာန်တေ ပူဇော်သနင်းမှါခ့်ခါ ဂါလိလဲပြေဆားစယ်ယာကား စစ်ဆားတာတ်တေ တာတ်ပန်း သန်းရှီးစိန်းယုတ်အီမှာ ငှေါဘင်းအကြောင်းတေ လျှောက်တာန်သကြီးမှာ။ 2အန်၌မှါခ့်ခါ ကိုယ်တော်ကား "အန်ဘင်းသမီဆာတာတ်ကား တခြားဂါလိလဲပြေဘင်း သမီဆတေထာတ်ပိုသဘန်း အပြစ်တုံန်းဘန်းသာငှေါ အာနိမ်ထှာမှာညယ် ဟနိမ်ထာန်သကြီးလဲ။ 3အာနိမ်အချီရား။ ဟနိမ်တေငါငှေါကူ၊ ဟနိမ်ရီဒါး အမဲဘင်းအပြစ်တေဟက် နောင်တအလူဘန်းကား အန်တာတ်နိမ် ပြတ်စီးသကြီးကူ။ 4သမီဆာရှစ်နူဘန်းပက်ကာတ်ကား ရှိလောင်ကော်ဘင်းမျှော်စါန် ပြိုသအက်မှါခ့်ခါ ထေင်ခံသထှာဘန်းရှီးရီထှာမှာ။ အန်ဘင်းဆိတ်တာက်ကား တခြားဂျေရုဆလင်မြို့ဘင်း သမီဆာတာတ်ထာတ် ပိုသောဘန်းနာ အပြစ်တေ အွန်ပဲမှာညယ် ဟနိမ်ထာန်သကြီးလဲ။ 5အန်နိမ်အချီရား။ ဟနိမ်တေငါငှေါကူ။ ဟနိမ်ကား အမဲဘင်းအပြစ်တေဟက် နောင်တအလူဘန်းကား အန်ဘင်းဆိတ်တာတ်နိမ် ရှီးကြီးထှာကူ" ညယ်မိန့်သမှာ။ 6စီးမှါခ့်ခါ ကိုယ်တော်ကား တပယ့်တာတ်တေ အဘင်းပုံပြာန်တေ ငှေါကာမှာ။ "သမီဆာဟော်ဝါဘင်း စပျစ်ကလာန်နောင်းဘေ စုတ်ပဲဘင်း ဆာန်းညက်ကွုန် ကွုန်မှာငှါမှာ။ ရအာမှါခ့်ခါ ဟိန်ကား ဆာန်းညက်ရှီလာကာတ်တေ ဒီဘန်းယူရီမှါခ့်ခါ ရှရှီတေဒေ အကတုံန်ငှါး။ 7အမှာတွာတ် ဟိန်ကား ကလာန်စောင့်သနင်းဘင်း သမီဆာတေ ကော်ဘန်း 'အန်ဘင်းကလွုန်ဟက် ဆာန်းညက်ရှီတေ ငှါကူညယ်ထာန်သဘန်းနာ ဒဲရီဘင်းနာကား ဆွန်းပီးငှါပန်း။ ရှရှီဟူအာဆဲ အရှီနွန်း။ အန်ဘင်းဆာန်ညက်ကွုန်တေ ဝါမ်းပေါ်ရာန်စိတ်။ ဟမာန်ငှါး ကာတေအကျိုးအဘို နေရာလာနင်းစိန်းတေ' ညယ်ငှေါမှာ။ 8အာနိမ်စါန်းငှေါဒီ ကလာန်စောင့်သဘင်းဆိတ်ရီဒါး 'အန်ဘင်းကလွုန်တေ နှပ်နိမ်ပီးနူကား ဒဲရာန်ယုတ်။ ငါအဘင်းကလွုန်ပတ်လည်ဘေကာတေ ဆွသဘန်းနာ အော်စါန်းယုတ်ကူ။ 9အန်နိမ်ငှေါဘန်းကာ နှပ်နိမ်ပီးကား ရှရှီ ရှီရန်ယုတ်မှာ။ အန်နိမ်အွန်ဘန်းဆဲ ရှရှီအရှီဘန်းကား ဝါမ်းပေါ်ရာန်ကူ' ညယ် ငှေါမှာ" ညယ် မိန့်သမှာ။ 10ဥပုသ်မန်းရာတ်ရအာဘေ ဓမ္မာရုံဘေ ကိုယ်တော်ကား ဟောသကာဆွောန်သကာနင်းမှာ။ 11အန်ဘင်းနေရာဘေ အမဲဘင်းနနူ အွန်ခံဒီထှာဘင်း ရှစ်နူဘန်းပက်ပလီးမှါတ်ကွန်း ဟာအိုင်ကုန်းသောငှါနင်းဘင်း အီးရှီဟော်ဝါငှါမှာ။ 12အန်ဘင်းအီရှီတေ ကိုယ်တော်ကတုံန်မှါခ့်ခါ ဟိန်တေကော်ဘန်း "အီးရှီ၊ နာန်အယာတ်ဟက်စသဘန်း မလဲကလဲထှာဟာန်းဘန်း" ညယ် မိန့်သစီးဘန်း၊ 13ဟိန်သဟူးယောက် အီးရှီစောက်ပေ တာန်တာန်မှါခ့်ခါ ချတ်ချန်းဟိန်ဟာအိုင် ဆန့်တာန်ဘင်းအတွာတ် စပ်နာန်ဘန်း ဘုရားရှာန်ဂုဏ်တော်တေ ချီးမွမ်းသမှာ။ 14အန်နိမ်စါန်းငှေါဒီ ဥပုသ်မာန်းရာတ်ပေ ကိုယ်တော်ယေရှုကား ကမာရောဂါတေ ကယာစိန်းဘင်းအတွာတ် မ္မာရုံတာဝန်လာဘင်း ဟလောဝါကား ဒေါသပူဘန်း သမီဆာတာတ်တေ "အလုပ်အွန်ထှာကူဘင်းမာန်းရာတ်ကား မာန်းရာတ်ဟုတ်ရာတ်ငှါမှာ။ အန်ဘင်းမာန်းရာတ်ပေ၌ဆာ ကမာရောဂါ ကယာဒင်ဒီကြီး။ ဥပုသ်မာန်းရာတ်ပေ အဒီကြီးဆာ" ညယ်ငှေါမှာ။ 15အန်၌မှါခ့်ခါ ကိုယ်တော်ကား "သမီဆာမလဲနိမ် အယောင်ဆောင်သနင်းဘင်းဆိတ်တာတ်။ ဥပုသ်မာန်းရာတ်ပေ ဟနိမ်ဘေငှါဘင်းမုတ်တေ၊ မြည်းတေဒေ တင်းကုတ်ဟက် ဆိုင်းဟာပ်ပန်း ဝဲတိုက်သကြီးဒင် ကော်ကြီးရီမှာ အချီနော်။ 16အန်နိမ်စါန်းငှေါဒီ ရှစ်နူဘန်းကောင်ပီးစလုံး အမဲဘင်းနနူအွန်ပဲဘင်းခံဒီထှာဘင်း အာဗြဟံဘင်းဆအိတ် အဘင်းအီးရှီရှာတေရီး ဥပုသ်မာန်းရာတ်ပေ တာပ်သင့်သမှာအချည်နော်" ညယ်မိန့်သမှာ။ 17ကိုယ်တော်ငှေါဘင်းနာကား ရန်အွန်နင်းဘင်းဆိတ်တေ မန်းကတန်စိန်းဘန်း တခြားသမီဆာတာတ်ကား ကိုယ်တော်အွန်အီရီဘင်း ထူးဆန်းအံ့ဩသထာတ်တေဒေ မွန်းပန်းနင်းကြီးမှာ။ 18စီးမှါခ့်ခါ ကိုယ်တော်ကား "ဘုရားရှာန်သာသနာတော်ကား ဟမာန်ယောက်တူသောဒေ။ ဟာဘင်းနာတေယောက် ယှဉ်သကာထှာကူဒေငှေါဘန်းကာ 19အန်ဘင်းကား ကန်စူသတူယောက် တူသမာ။ သမီဆာဟော်ဝါကား သတူဒေလာဘန်း ကလာန်နောင်းဘေ စုတ်မှာ။ အန်ဘင်းသတူဟက် ကလွုန်တုံန်းထှာဘန်းနာ အူစိတ်ဆာတာတ်ရီဒါး ကလိုင်းဘေတေ အအုံစာဘန်းနင်းကြီးမှာ" ညယ်မိန့်သမှာ။ 20ပန်းနူကိုယ်တော်ကား "ဘုရားရှာန်သာသနာတော်တေ ဟမာန်ယောက်ပန်းနူယှဉ်သကာဟာန်းထှာကူးတေငှေါဘန်းကာ 21အန်ဘင်းကား တဆေးယောက်တူသမှာ။ အီးရှီဟော်ဝါကား တဆေးစစ်ဆာတေလာဘန်း ဂျုံမုန့်ဆွန်းပုံစာဘေ ရောတာန်မှါ့ခ်ခါ မုန့်တေ ဖောင်းသစိန်းမှာ" ညယ်မိန့်သမှာ။ 22စီးမှါခ့်ခါ ကိုယ်တော်ယေရှုကား ခရီးလမ်းဘေမြို့တေ၊ ထိန်တေဘေငှါဘင်း သမီဆတာတ်တေ ဟောသကာဘန်း ဂျေရုဆလင်မြို့ပါ ကြွသမှာ။ 23သမီဆာဟော်ဝှါကား ကိုယ်တော်တေ "ကိုယ်တော်၊ စစ်ဆာ၌ဆာ ကယ်တာသဘင်း ခံသထှာကလဲ" ညယ်စိန်ယူမှာ။ 24အန်၌မှါခ့်ခါ ကိုယ်တော်ကား "ဟနိမ်ကား ကျဉ်းသဘင်း အပေါက်ဟက် ဆာန်လူကွန်းအွန်ကြီး။ ဟနိမ်တေငါငှေါကူ။ အန်ဘင်းပတူးပေါက်တေ သမီဆာကလောင်းတုံန်း ဆာန်လူကွန်း အွန်ကြီးဒီဒါး ဆာန်လားလူကလားအချီရား။ 25ကျေမ်းဆိတ်ကား ရဲရီဘန်း ပတူးတေ အွပ်နာန်ဘန်းကား ဟနိမ်ကား ပြာန်ဘေစပ်ပန်း 'အဆိတ်၊ ပတူးဖွါမ်းသအီယုတ်' ညယ်ငှေါကြီးထှာကူ။ အန်နိမ်စါန်းငှေါဒီ ကျေမ်းဆိတ်ကား "ဟနိမ်ဟာဘင်းအရပ်ဟက်ဒီမှာငှေါဘင်းတေ ငါအမိန်းရှာတ်ခါး" ညယ်ပြန်သပန်းငှေါကူ။ 26ဟနိမ်ကား 'ငါကား အရှာန်ယောက် အတူတူ ယုတ်ကြီးရီပတ်မှာ။ အရှာန်ရီးဒါး အလေနင်းဘင်း ထိန်တေ မြို့တေ လမ်းစောက်ပေရီးဒါး အလေတေ ဟော်သကာ ဆွောန်သကာပတ်နီမှာ' ညယ်ပြန်သဘန်း ငှေါဟာန်းကြီးဒီးဒါး 27ဟိန်ကား 'ဟနိမ်တေ ငါငှေါကူ။ ဟနိမ်ကား ဟာဟက်ဒီကြီးမှာငှေါဘင်းတေရီး ငါအမိန်းရှာတ်ခါး။ အမဲဘင်းသမီဆာတာတ်၊ ငါဟက်ပူလာန်ဘဲကြီး' ညယ်ငှေါကူ။ 28အန်၌မှါခ့်ခါ အာဗြံဟံ၊ ဣဇက်ယောက် ပရောဖက်တာတ်တေဒေ ဘုရားရှာန်သာသနာနောင်းဘေ ကတုံန်ကြီးလူဘန်း ဟနိမ် ပြာန်ဘေငါတ်ပူလား ခံသကြီးထှာရီဘင်းအတွာတ် ဟနိမ်ကား ဝမ်းနည်းသဘန်းဟပ်ကြီးထှာကူ။ 29အရှေ့၊ အနောက် ၊ တောင်၊ မြောက်တေဟက် သမီဆတေကား ဘုရားရှာန်ဘင်းသာသနာတော်နောင်းဘေ အတူတူနင်းမောက်ကြီးဘန်း မဲဘင်းနာတေဒေ ယုတ်ကြီးလူကူ။ 30အရာတ်အရေးအပါသဘင်း ဆိတ်တာတ်ကား အရေးတုံန်းဘင်းဆိတ်တာတ်ထှာကြီးဘန်း၊ အရာတ် အရေးတုံန်းဘင်း ဆိတ်တာတ်ကား အရေးအပါသဘင်းဆိတ်တာတ်ထှာကြီးရီကူ" ညယ်မိန့်သမှာ။ 31အန်ကားအချိန်ဘေ ကိုယ်တော်ယေရှုပါ ဖာရိရှဲစယ်ယာတာတ်ကား ထုတ်အီပန်း "ဟေရုဒ်ရှာန်းပလာန်ကား နာန်တေသန်းရှီးကာတ်ခွန် အဘင်းဟက် တစ်ခြားပါ ပူလာန်ပဲ" ညယ်လျှောက်သကြီးမှာ။ 32အန်၌မှါခ့်ခါ ကိုယ်တော်ကား အန်ဘင်းဆိတ်တာတ်တေ "လာန်ဘန်း အန်ဘင်းမြေခွေးတေ ငှေါကြီး။ ငါကား အရာတ်ယောက် ဖာတ်မှါတ်အတိုင်ဒေ အမဲဘင်းနာတေဒေ ငါတ်ပူဘန်း၊ ကမာရောဂါတေဒေ ကယာစိန်းယုတ်ပန်း ဆွန်းရာတ်မှါတ်မှါခ့်ခါ ငါအွန်ဘင်းနာတေဒေ အဆုံးတတ်သကူ။ 33အန်နိမ်စါန်းငှေါဒီ ပရောဖက်တာတ်ကား ဂျေရုဆလင်မြို့ဟက် လွှဲသဘန်း အခြားအရပ်ပေ အရှီးလူဘင်းအတွာတ် ငါကား အရာတ်မှါတ်၊ ဖါတ်မှါတ် ထုတ်ကွန်း ငါဆာတ်သော လာန်ထှာယုတ်ကူ။" 34"အို ဂျေရုဆလင်မြို့၊ ဂျေရုဆလင်မြို့၊ နာန်ဘင်း မြို့သူမြို့ဆားတာတ်ကား ပရောဖက်တာတ်တေ သန်းရှီးကြီးဆွန်ဘန်း ဘုရားရှာန်ဟက် တာတ်နီဘင်း စေတမန်တေဒေရီး လုံးကရှီတေယောက် တက်ကြီးရီမှာ။ အူပါးတုန်းကား အူရှာရှာတာတ်တေဒေ ဟိန်ဒင်ကူးနောင်ဘေအွပ်ပန်း စောင့်ရှောက်သပဲနိမ် ငှါကား နာန်မြို့သူမြို့ဆားတာတ်တေ ထိန်းသိမ်းစောင့်ရှောက်သကာတ်တေ ပလန်းပလန်းအွန်နီဒီဒါး ဟနိမ်ကား အလက်ခံသကြီးယား။ 35နာန်ဗိမာန်တော်ကား သမီဆာထုတ်လားစစ်ပင်းပုတ်ခါးနိမ် ငှါဘန်း ယူရှီရှီငှါနင်းဘန်း ကူးနင်းကူ။ ဟနိမ်ကား 'ဘုရားရှာန်ဘင်း နာမယ်ယောက် ကြွဒီဘင်းဆိတ်ကား မာန်းဂလာငှါမှာ' ညယ် အငှေါမချန်း အရာတ်ဟက် စသဘန်း ဟနိမ် ငါတေ အနားပန်နူ ကတုံန်ကြီးကလား အချီရား" ညယ်ငှေါမှာ။
S'ha seleccionat:
Luke 13: ktpv-rv
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
This translation of the Kadu Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.